Kibek eng' Tengekto, Kisaabei eng' Kwanda
Ngot kotuch myeeindo tuguuk tugul, amu nee si ma keyai tengek koigeny? Wolutap Paulo ko ma ng'atuutyet ago ko meet: kitupchi acheek kabatisanet ak meetap Kristo, nooto ngot keweeksei tengekto, keweeksei keebe che kibek ne kagiweeksei. Igoitoi poorteng'ung' Kwandanyo — isubi ne igas iit ineendet.
6 1Nee anyun ne kemwae? Tos keboisyee keyai tengek si koeet myeeindo? 2Achicha miising'! Keamuuchi ano kesubi oriit, acheek che kigibek eng' tengekto? 3Anan tos mongen ile acheek tugul che kibatisan eng' Kristo Jeso, ko ki kibatisan eng' meennyi? 4Nooto anyun ki kitupchi kobooto ineendet eng' kabatisanet eng' meet, si ko uu ye ki king'eet Kristo komang'une che ki pek eng' toroornatetap Kwandanyo, kesich kora acheek kebendi eng' saboon ne leel.
5Amu ngot kagiropchingei ak kergeindap meennyi, ko iman kora ko kegiropchingei ak ng'eetyeennyi. 6Kingen ile ki kigartaat kobooto ineendet chiito ne po tai, si keng'em poortap tengekto, si ma kiegu kora otwogigap tengekto. 7Amu chii age tugul ne kagobek, ko kagotyagat eng' tengekto. 8Ngot kagobek kobooto Kristo, keyani ile kesubi kora kobooto ineendet. 9Amu kingen ile Kristo ne king'eetu komang'une meet, ma meei kora; ma pou kora meet ineendet. 10Amu meet ne ki me, ki me eng' tengekto kogeny agenge; ago saboon ne sabei, sabei eng' Kwandanyo. 11Ko uu nooto, oit okweegei oleen kagobek eng' tengekto ago osubi eng' Kwandanyo eng' Kristo Jeso.
12Nooto anyun, matechamji tengekto kolaitoran eng' poortang'wong' ne ng'emaksei, si ogas iit maguutikyik. 13Matogoochini tengekto partigap poortang'wong' koek kariik che po ne ma po imanda; ago ogoochi okweegei Kwandanyo ko uu pichooto che kiga koip komang'une meet koba saboon, ak partigap poortang'wong' ineendet koek kariik che po imanda. 14Amu ma mastoi tengekto okweek, amu momi okweek oriit ng'atuutyet, ago omi oriit myeeindo.
15Nee anyun? Tos keyai tengek amu momi acheek oriit ng'atuutyet, ago kemi oriit myeeindo? Achicha miising'! 16Tos mongen ile ngo ogoochi okweegei chii age koek otwogik si ogas iit, ko oegu otwogigap ineendet ne ogase iit—ngo tengekto ne itoi meet, anan kasetap iit ne itoi imanda? 17Kongoi Kwandanyo: ki oo otwogigap tengekto, ago kagogas okweek iit eng' muguleldo kaneetisyet ne kergeindo ne kigigoochok. 18Ye kagotyagat eng' tengekto, ko kagoegu okweek otwogigap imanda.
19Ang'alaali ko uu chii, amu nyaluli poortang'wong'. Ko uu ye ki ogoochi partigap poortang'wong' koek otwogik che po murwoonindo ak yaityet, ne itoi yaityet ne chaang', ko nguno ogoochi icheek koek otwogik che po imanda, ne itoi tiliilindo. 20Amu ye ki oo otwogigap tengekto, ko ki otyagat eng' imanda. 21Nee anyun ne ki olunji eng' tuguuchooto che olilanse nguno agobo? Amu tuguuchooto ko segei meet. 22Ago nguno, ye kagotyagaten eng' tengekto ak koegu otwogigap Kwandanyo, ko itoi logoekwok tiliilindo, ak segeennyi ko saboondap koigeny. 23Amu melektap tengekto ko meet, ago kagoochinetap Kwandanyo ko saboondap koigeny eng' Kristo Jeso Kiptaiyandennyo.