Warumi 5

5 ¹Basi, kwa kuwa tumehesabiwa haki kwa imani, tuna amani na Baba yetu kwa njia ya Bwana wetu Yesu Kristo. ²Ambaye kwa yeye tumepata pia njia ya kuifikia kwa imani neema hii tuliyo nayo, nasi twafurahi katika tumaini la utukufu wa Baba yetu. ³Wala si hivyo tu, bali twajivunia pia katika mateso yetu, kwa kuwa mateso huleta saburi, ⁴na saburi huleta uthabiti wa moyo, na uthabiti wa moyo huleta tumaini. ⁵Na tumaini halituaibishi, kwa sababu upendo wa Baba yetu umekwisha kumiminwa mioyoni mwetu kwa njia ya Roho Mtakatifu tuliyepewa.

⁶Kwa maana tulipokuwa tungali dhaifu, wakati ulipowadia, Kristo alikufa kwa ajili ya waovu. ⁷Ni vigumu mtu kufa kwa ajili ya mwenye haki; ijapokuwa kwa ajili ya mtu mwema huenda mtu akathubutu kufa. ⁸Bali Baba yetu adhihirisha pendo lake mwenyewe kwetu, kwa kuwa tulipokuwa tungali wenye dhambi, Kristo alikufa kwa ajili yetu. ^a a v8 Baba yetu athibitisha pendo lake msalabani — kwa kumtoa Mwanawe kwa ajili yetu tulipokuwa tungali mbali naye.

⁹Basi zaidi sana sasa, kwa kuwa tumehesabiwa haki katika damu yake, tutaokolewa na ghadhabu kwa njia yake. ¹⁰Kwa maana, ikiwa tulipokuwa adui tulipatanishwa na Baba yetu kwa njia ya kifo cha Mwanawe, zaidi sana baada ya kupatanishwa, tutaokolewa katika uzima wake. ¹¹Wala si hivyo tu, bali pia twafurahi katika Baba yetu kwa njia ya Bwana wetu Yesu Kristo, ambaye kwa yeye sasa tumeupokea upatanisho.

Mauti Kupitia Adamu, Uzima Kupitia Kristo

¹²Basi, kama vile dhambi ilivyoingia ulimwenguni kwa njia ya mtu mmoja, na mauti kwa njia ya dhambi, vivyo hivyo mauti ikawafikia watu wote, kwa sababu wote wamefanya dhambi. ¹³Kabla ya sheria, dhambi ilikuwako ulimwenguni; lakini dhambi haihesabiwi pasipo sheria. ¹⁴Walakini mauti ilitawala tangu Adamu mpaka Musa, hata juu ya wale ambao dhambi yao haikufanana na kosa la Adamu—naye Adamu ni kivuli cha yule atakayekuja.

¹⁵Lakini kile kipawa si kama lile kosa: kwa maana ikiwa kwa kosa la mtu mmoja wengi walikufa, zaidi sana neema ya Baba yetu na kile kipawa kwa neema ya mtu mmoja, Yesu Kristo, kimewafurikia wengi. ¹⁶Wala kile kipawa si kama tokeo la dhambi ya yule mtu mmoja: kwa maana hukumu iliyotoka katika kosa moja ilileta adhabu, bali kile kipawa kilichotoka katika makosa mengi kikaleta kuhesabiwa haki. ¹⁷Kwa maana ikiwa kwa kosa la mtu mmoja mauti ilitawala kwa njia ya huyo mmoja, zaidi sana wale wanaopokea wingi wa neema na kile kipawa cha haki watatawala katika uzima kwa njia ya huyo mmoja, Yesu Kristo.

¹⁸Basi, kama kosa moja lilivyoleta adhabu kwa watu wote, kadhalika kwa tendo moja la haki huja kuhesabiwa haki kwa watu wote na uzima. ¹⁹Kwa maana kama kwa kutotii kwa mtu mmoja wengi walifanywa wenye dhambi, kadhalika kwa kutii kwa mtu mmoja wengi watafanywa wenye haki. ²⁰Lakini sheria iliingia ili kosa lizidi kuwa kubwa; lakini pale dhambi ilipozidi, neema ilizidi kwa wingi zaidi, ²¹ili kwamba kama dhambi ilivyotawala katika mauti, vivyo hivyo neema itawale kwa njia ya haki hata uzima wa milele, kwa njia ya Yesu Kristo Bwana wetu.