Romans 4

4 ¹So wetin we go talk say Abraham, our forefather for body, don find? ²Because if na by work Abraham take become correct for our Papa eye, e get something wey e fit take blow mouth—but no be for our Papa front. ³Because wetin di Scripture talk? Abraham believe our Papa, and dem count am give am as correct-and-holy way. ^a a v3 "Count" na word wey dem dey use for accounting matter, but our Papa no be cold person wey just dey keep book. Abraham just trust am, and our Papa look im empty hand come declare am say e dey correct-and-holy. ⁴For person wey dey work, dem no dey count di pay give am as free gift, but as di thing wey dem owe am. ⁵But for person wey no dey work, but e dey trust di One wey dey make wicked person become correct, dem dey count im faith as correct-and-holy way. ⁶As David sef take talk about di blessing wey dey for person wey our Papa dey count correct-and-holy way give am, wey no be by work: ⁷"Blessing dey for those wey dem don forgive dia bad-bad deed, and wey dem don cover dia sin; ⁸blessing dey for di person wey our Papa no go ever count im sin against am."

⁹Dis blessing na only for di people wey don do circumcision, abi na for di people wey no do am too? We talk say dem count Abraham faith as correct-and-holy way. ¹⁰So how dem take count am? When e don do circumcision, abi when e never do am? No be when e don do am, but na when e never do am. ¹¹E collect circumcision as sign, as seal of di correct-and-holy way wey e get by faith when e never do circumcision, so dat e go be papa of all di people wey believe even wen dem never do circumcision, so dat dem go count correct-and-holy way give dem too, ¹²and papa of di people wey don do circumcision wey no be say dem just do circumcision nome, but dem dey waka for di footstep of di faith wey our papa Abraham get when e never do circumcision.

¹³Because di promise wey e give Abraham and im pikin-pikin, say e go inherit di world, no come through di law, but na through di correct-and-holy way wey come by faith. ¹⁴Because if na di people wey dey live by di law be di heir, den faith turn empty and dem don cancel di promise. ¹⁵Di law dey bring vex; but where law no dey, breaking-law no dey.

¹⁶So e dey come by faith, so dat e go be by grace, so dat di promise go stand sure give all di pikin-pikin—no be only di people wey tie to di law, but also di people wey share Abraham faith, wey be papa of all of us,

¹⁷as dem write am say, "I don make you papa of plenty nation"—for front of our Papa wey e believe, di One wey dey give dead people life and dey call di things wey no dey come dey exist. ¹⁸Even when hope no dey, e still believe with hope, come turn papa of plenty nation, as dem don tell am say: "Na so your pikin-pikin go be."

¹⁹Im faith no weak, e look im own body wey don be like dead body—e don near hundred years—and Sarah womb wey no fit born again. ²⁰E no doubt our Papa promise for lack of faith, but e come get strong for faith, dey give our Papa glory, ²¹as e believe well-well say wetin our Papa promise, e fit do am too. ²²Na why "dem count am give am as correct-and-holy way." ²³But di words "dem count am give am" no be only for im own sake dem write am, ²⁴but na for our own sake too, we wey dem go count am give—we wey dey trust di One wey raise our Oga Jesus from dead, ²⁵di One wey dem hand over because of our sin, come raise am up so dat e go make us correct with our Papa.