Mi eng' bukuit

Romaik 2 FHB Father's Heart Bible™

Kiistoi 15% eng' kiy ne iale korook →
Bukuit

Ma Chilili Chii Kirwoogetap Kwandanyo

Koweeksei Paulo soomandet ne ki boiboentoi tuguuk che kiisir eng' churateet ne po tai. Ye irwookyini chii age ago iyaei tuguuk che kergeit, irwookyini inyegei, ak ma tyachei kayanet chii age tugul — amu ma tiytiyei piik Kwandanyo, ak muuchi pororyosyek che ma ki tinyei Ng'atuutyet koriip ineendet eng' muguleldanywa.

Sura 2.

Ma itinye anyun lotania, agot ng'oo inyee, ye irwookyini chii age; amu ye irwookyini ineendet, irwookyini inyegei, amu iyaei tuguuk che kergeit. Kingen anyun kole bunu kirwoogetap Kwandanyo eng' imanda eng' icheeget che yaei tuguuk che uu chooto. Ibwaat ile ichililyei kirwoogetap Kwandanyo, inyee ne irwookyini alak agobo tuguuk che uu chooto ago iyaei inyegei? Anan iesyei mogornatosyegap kindeatnyi ak teptebutyennyi ak muitaennyi, ago ma inai kole kindeatap Kwandanyo kondoin siguunet? Ago amu muguleldang'ung' ne ngwaan ne ma siguunotin, onorchigei inyegei nereeknateet, agobo peetuutap nereegek ye kong'ang'agis kirwoogetap Kwandanyo ne po imanda. Repaik ineendet chii age tugul ko uu ye kiyae. Agoochini saboondap koigeny icheeget che cheeng'ei toroornatet ak teegisto ak saboondo ne ma meei, eng' poisyet ne myee ne testai. Ago icheeget che cheeng'ei inegei kityo, che wechei man, ak kosubi tengekto, konyoorchi nereegek ak nyitatet. Nyalulnateet ak nyoreet eng' chii age tugul ne yaei ne ya; eng' Yahudyot korook ak eng' Yunanindet, Ago toroornatet ak teegisto ak kaalyeet eng' age tugul ne yaei ne myee; eng' Yahudyot korook ak eng' Yunanindet agine. Amu ma tiytiyei piik Kwandanyo. Kiptengeginik tugul che ma tinyei Ng'atuutyet komeei agine ma tinyei Ng'atuutyet; ak kiptengeginik che mi eng' Ng'atuutyet korwookyi eng' Ng'atuutyet. Amu ma che kasei Ng'atuutyet che po imanda eng' taitap Kwandanyo, ago icheeget che riibei Ng'atuutyet kiityini imanda. Inde, ye yaei Pororyosyek, che ma tinyei Ng'atuutyet, tuguuk che machei Ng'atuutyet eng' poortanywa, ko Ng'atuutyet eng' icheegei, agot nganda ma tinyei Ng'atuutyet. Booru icheek poisyetap Ng'atuutyet ne kisir eng' mugulelwekwak, ko ng'wanindonywa kopaorei, ak kabwaatutikwak che pchegei koikyini icheek anan kosar. Yuyani nooto eng' peetuut ye irwookyini Kwandanyo tuguuk che kiunotin che po chii age tugul eng' Jeso Kristo, ko uu ye mwaei logoiywek che myach chenyu. a a v16 Kwandanyo ko kirwoogindet, ago irwookyini eng' Weeriinnyi; kagoogoochi Kwanda Jeso kirwooget tugul.

Ma Sarin Ng'atuutyet

Ago ngot iguure inyegei Yahudyot, ak imang'u Ng'atuutyet, ak iloskei eng' Kwandanyo, ngot ingen maachetap Kwandanyo, ak ichamwech tuguuk che karaaran, amu kineetin eng' Ng'atuutyet, ngot angen ile inyee kandoindet ne po che ma keerei, lapkeiyet eng' icheeget che mi mesundeito, ne chorchini che perber, kaneetindetap lagok, inyee ne tinyei eng' Ng'atuutyet yaetap ng'omnateet ak man. Inyee ne neetei piik alak, ma ineetei inyegei? Iamdoi ile mochorse, ichorei? Inyee ne leenji piik alak mogesesen, igesesen? Inyee ne wechei kanamonik, irebe kootap kanamonik? Inyee ne iloskei eng' Ng'atuutyet, ing'aany Kwandanyo eng' putuletap Ng'atuutyet? Ko uu ye kisir: “Kisasei kainetap Kwandanyo eng' kwenutap Pororyosyek agobo okweek.” Toreti kamuratanet ngot iriip Ng'atuutyet; ago ngot iputei, koegu kamuratanet ne ma kimuratan. Ngot anyun koriip che ma kimuratan katigonetap Ng'atuutyet, tos ma kigiiten ma kimuratan nywa koek kamuratanet? Korwookyi icheeget che ma kimuratan eng' poorto che riibei Ng'atuutyet inyee ne tinyei sireet ak kamuratanet ago iputei Ng'atuutyet. Amu ma Yahudyot chii eng' saang' kityo, ak ma kamuratanet ne po poorto kityo. Ago Yahudyot chii eng' kwenutap muguleldanyi, ak kamuratanet ko ne po muguleldo, eng' Kabuuset, ma eng' sireet; ne toroornatetap chiichooto ma punu piik ago punu Kwandanyo.