Loma 2 FHB Father's Heart Bible™

2 ¹Buna, ngeyi wisi kondi dyambu dya kudisuwangana, ata wena nani, mu tangwa wisi fundisa mukwawu; mukuma mu kufundisa yandi, wisi fundisa ngeyi-meni, kikuma ngeyi phi wisi hanga mambu mamosi. ²Buna tuzayi ni pfundusu ya Tata wetu yisi bwila mu masonga kwena babana bisi hanga mambu ma mutindu wuna. ³Ngeyi wisi banza, ngeyi wuna wisi fundisa batu kikuma kya mambu ma mutindu wuna amana ngeyi-meni wisi hanga mawu, ni ngeyi katína pfundusu ya Tata wetu? ⁴Holo, ngeyi wisi lewula kimvwama kya buweti bwandi yi kuvibidila yi sipha dya mbundu, ngeyi wukondi bakula ni buweti bwa Tata wetu bwisi kunata ngeyi ku kubalula bikalulu byaku? ⁵Kaasi kikuma kya mbundu yaku ya ngolu yi yikonda balula bikalulu, wisi dilumbikila khabu ngeyi-meni, kikuma kya kilumbu kya khabu, tangwa pfundusu ya masonga ya Tata wetu yámonika. ⁶Yandi kafúta kosu mutu kikuma kya mambu mana kahánga. ⁷Kwena babana bisi sosa khembu, luzitu yi kukonda fwa mu kikwamina mu mihangu mya mboti, Yandi kahána luzingu lwa mvula yi mvula. ⁸Kaasi babana bisi sosa mambu ma bawu-meni, bakonda lemvwakila kyedika, amana bisi landa mbi, khabu yi nganzi byakála kwena bawu. ⁹Phasi yi kiwayi kwena kosu mutu wuna wisi hanga mbi—Muyuta theti, buna Mungeleki, ¹⁰kaasi khembu, luzitu yi ngemba kwena boosu babana bisi hanga mboti—Muyuta theti, buna Mungeleki phi. ¹¹Mukuma Tata wetu kisiku yekula batu. ¹²Basumuki bana bakonda mitsiku bazíluka phi konda mitsiku; amana basumuki bana benina ku ntsi ya mitsiku bafundisa mu mitsiku. ¹³Mukuma, heku babana bisi yuka mitsiku bena batu ba masonga ku mesu ma Tata wetu, kaasi babana bisi lemvwakila myawu, bawu bakála batu ba masonga. ¹⁴Kyedika, tangwa batu ba bikanda, bana bakonda mitsiku, bisi hanga mu khadidi ya bawu mana mitsiku misi lomba, mitsiku myenina mu kisalu mu kati dya bawu, ata bawu bakonda mitsiku. ¹⁵Bawu bisi songila kisalu kya mitsiku kina kisi sonika ha mbundu zawu, katsatsa ka bawu kisi ta kimbangi, amana mabanza mawu mana masi swaswana bisi funda holo bisi zonzila bawu. ¹⁶Mama masálama mu kilumbu kina Tata wetu kafúndisa bitsweki bya batu boosu mu nzila ya Yesu Kidisitu, bwosu Musamu wa Bukheti wama wisi zimbula. ^a a v16 Tata wetu yandi wenina mfundisi, kaasi yandi wisi fundisa mu nzila ya Mwana wandi—Tata wáheka pfundusu yosu kwena Yesu.

Mitsiku Mikahuludiku Ngeyi

¹⁷Kaasi yuka ni wisi ditela ngeyi-meni Muyuta, wisi yekamina ku mitsiku, amana wisi kukemba mu Tata wetu, ¹⁸yuka ni wisi zaya luzolu lwa Tata wetu, amana wisi sola mana malutini mboti kikuma mitsiku misi kulonga, ¹⁹yuka ni wisi kwikila ni ngeyi wenina ntwadisi wa baphofu, kyezi kwena babana benina mu phipa, ²⁰nlongi wa bazoba, nlongi wa bana, ngeyi wuna wenina mu mitsiku mfwanusu wa mazaya yi kyedika. ²¹Ngeyi wisi longa batu bakwawu—keti wisi dilonga ngeyi-meni? Wisi samuna kwena batu ni bayibakaku—keti ngeyi-meni wisi yiba? ²²Ngeyi wuna wisi zimbula batu bakwawu ni batáku mbongi—keti ngeyi-meni wisi ta mbongi? Ngeyi wuna wisi menga banzambi—keti ngeyi wisi yiba bima mu nzu za banzambi? ²³Ngeyi wuna wisi kukemba mu mitsiku, keti wisi lewula Tata wetu mu kukulula mitsiku? ²⁴Bwosu básonika: «Hakati dya bikanda, bisi kwana Khumbu ya Tata wetu kikuma kya benu.» ²⁵Kukota mukhanda kwenina mupfunu yuka ni wisi landa mitsiku; kaasi yuka ni wukulula myawu, kukota kwaku mukhanda khituki kukonda kota mukhanda. ²⁶Buna yuka ni mutu wuna wakonda kota mukhanda wisi landa mambu ma mitsiku, keti kukonda kota mukhanda kwandi kwatangama hanga kukota mukhanda? ²⁷Mutu wuna wakonda kota mukhanda mu lutu, kaasi wisi landa mitsiku, kafúndisa ngeyi wuna, ata wenina yi mukanda yi kukota mukhanda, wisi kulula mitsiku. ²⁸Mukuma, kukala Muyuta heku dyambu dya ha mbata lwesi, amana kukota mukhanda heku kwa lutu lwesi. ²⁹Kaasi, mutu wenina Muyuta mu kati dyandi, amana kukota mukhanda kwenina kwa mbundu, mu Kitembu, heku mu mambu ma mukanda; luzitu lwa mutu wuna heku kwa batu lutuki kaasi kwena Tata wetu.