Me basika na mukanda
Dibuku

Ata Muntu Mosi Ke Vuuka ve na Lufundusu ya Tata ya beto

Polo ke baluka na mutangi yina vwandaka sepela na lutangu ya kapu ya ntete. Kufundisa bantu ya nkaka ntangu nge mosi ke sala mambu kaka mosi ke bedisa nge, mpe bidimbu ya mambu ya Nzambi ke katula muntu ata mosi na lufundusu ve—Tata ya beto ke tala bizizi ya bantu ve, mpe bantu ya bayinsi yina vwandaka ti Nsiku ve lenda keba yawu na nzila ya ndinga ya yisi ya ntima ya bawu.

Kapu 2.

Na yina, ata nge kele nani, nge lenda kuditanina ve ntangu nge ke fundisa muntu ya nkaka. Na kufundisa yandi, nge ke kudibedisa nge mosi, samu ti nge mpe ke sala mambu kaka mosi. Beto zaba ti lufundusu ya Tata ya beto ke bwidila na kudedama bantu yina ke sala mambu ya mutindu yayi. Nge, muntu yina ke fundisa bantu ya nkaka samu na mambu ya mutindu yayi kasi nge mosi ke sala yawu, keti nge ke yindula ti nge ke vuuka na lufundusu ya Tata ya beto? To, nge ke manga kimvwama ya bumbote ya yandi, ya kukanga ntima ya yandi mpe ya mvibudulu ya yandi, na kubakula ve ti bumbote ya Tata ya beto ke nata nge na kusoba nkadulu? Kasi samu na ntima-ngolo ya nge yina ke zola kusoba nkadulu ve, nge ke kudibumbila nkele, samu na kilumbu ya nkele ntangu lufundusu ya kudedama ya Tata ya beto ke monikina. Yandi ke futa konso muntu na kutadila mambu yina yandi salaka. Na bayina ke sosaka nkembo, nzitusu mpe luzingu ya ke fwaka ve na nzila ya kusala mambu ya mbote kukonda kulemba, yandi ke pesa bawu luzingu ya seko. Kasi bantu yina ke sosaka kaka mambu ya bawu mosi, ke manga kyeleka mpe ke landa yimbi, bawu ke baka nkele mpe kudasuka. Mpasi mpe nyokoso na konso muntu yina ke sala yimbi, na mu-Zwife na ntete, na manima na mu-Ngeleke, kasi nkembo, nzitusu mpe kizunu na bantu nyonso yina ke sala mambu ya mbote, na mu-Zwife na ntete, na manima na mu-Ngeleke mpe. Samu ti Tata ya beto ke talaka ve bizizi ya bantu. Bantu yina salaka masumu kukonda Misiku ke fwa mpe kukonda Misiku; bantu yina salaka masumu na nsi ya Misiku ke fundisama na Misiku. Samu ti bantu yina ke kuwaka Misiku kele ve bantu ya kudedama na ntwala ya Tata ya beto, kasi bantu yina ke sadilaka yawu ke kumisama ya kudedama. Ya kyeleka, ntangu bayina kele ve ba-Zwife, yina kele ve na Misiku, ke sala na nkadulu ya bawu mambu yina Misiku ke lombaka, Misiku ke sala kisalu na kati ya bawu, ata bawu kele ve na Misiku. Bawu ke lakisaka ti kisalu ya Misiku kele ya kusonama na bantima ya bawu, mpe ndinga ya yisi ya ntima ya bawu ke pesaka kimbangi, mpe mabanza ya bawu yina ke swanaka ke fundaka to ke taninaka bawu. Yawu ke salama na kilumbu yina Tata ya beto ke fundisa mambu ya kubumbama ya bantu nyonso na nzila ya Yesu-Klisto, kaka mutindu Nsangu ya Mbote ya munu ke tubaka. a a v16 Tata ya beto kele zuzi, kasi yandi ke fundisa na nzila ya Mwana ya yandi — Tata me pesa lufundusu nyonso na maboko ya Yesu.

Misiku Ke Vuukisa Nge ve

Kasi kana nge ke kudibokila mu-Zwife, kana nge ke tula kivuvu na Misiku, mpe kana nge ke kudikumisa na Tata ya beto, kana nge me zaba luzolo ya Tata ya beto mpe nge ke ndima mambu ya kuluta mbote samu ti Misiku ke longa nge, kana nge me ndima ti nge kele muntu ya kutwadisa bantu yina meso me fwa, nsemo samu na bayina kele na kati ya mpimpa, muntu ya kulongisa bilawu, mulongisi ya bantu ya kileke, nge kele na Misiku kifwani ya mayela mpe ya kyeleka. Nge ke longa bantu ya nkaka, kasi nge ke kudilonga nge mosi ve? Nge ke longa ti muntu kulaba ve, kasi nge mosi ke laba? Nge yina ke tuba na bantu ya nkaka ti bawu sala kinsuza ve, kasi nge mosi ke sala yawu? Nge yina ke yina biteki, kasi nge ke yiba bima na bayinzo ya banzambi? Nge yina ke kudikumisa na Misiku, kasi nge ke safula Tata ya beto na kufwa Misiku? Mutindu yawu kele ya kusonama: «Ba ke safula Nkumbu ya Tata ya beto na kati ya makanda samu na beno.» Nzengolo ya bubakala ke sadisaka kana nge ke sadila Misiku. Kasi kana nge fwa Misiku, nge me kuma mutindu muntu yina ba zengaka ve bubakala. Na yina, kana bantu yina ba zengaka ve bubakala ke sadila mambu yina Misiku ke lombaka, keti ba ke tanga bawu ve bonso bantu yina ba zengaka bubakala? Muntu yina ba zengaka ve bubakala na nzutu, kasi ke sadila Misiku, ke fundisa nge yina, ata nge kele na Misiku ya kusonama mpe na nzengolo ya bubakala, ke fwa Misiku. Samu ti kuvwanda mu-Zwife kele ve kaka dyambu ya ngaanda, mpe nzengolo ya bubakala kele ve kaka dyambu ya nzutu. Kasi, muntu kele mu-Zwife na kati ya ntima, mpe nzengolo ya bubakala kele ya ntima, na nzila ya Mpeve, kasi na mukanda ya kusonama ve. Lukumu ya muntu ya mutindu yayi ke katukaka na bantu ve, kasi ke katukaka na Tata ya beto.