ግብሪ ሃዋርያት 26 FHB Father's Heart Bible™

26 ¹ኣግሪጳ ድማ ንጳውሎስ፦ “ባዕልኻ ኽትዛረብ ይፍቀደልካ እዩ” በሎ። ሽዑ ጳውሎስ ኢዱ ዘርጊሑ ክማጐት ጀመረ።

²ኦ ንጉስ ኣግሪጳ፥ ሎሚ በቲ ኣይሁድ ዝኸሱኒ ዘለዉ ዅሉ ክሲ፥ ኣብ ቅድሜኻ ባዕለይ ክማጐት ዕድለኛ ከም ዝኾንኩ እቘፅር ኣለኹ፤ ³ኣውራ ኸዓ ንስኻ ኵሉ ልማድን ክርክርን ኣይሁድ ኣፀቢቕካ ስለ እትፈልጥ፥ ብትዕግስቲ ኽትሰምዓኒ እልምነካ ኣለኹ።

⁴ካብ ንእስነተይ ጀሚረ ኣብ ማእኸል ህዝበይን ኣብ ኢየሩሳሌምን ዝነበርክዎ ናብራይ፥ ኵሎም ኣይሁድ ይፈልጥዎ እዮም። ⁵ካብ ቀደም ይፈልጡኒ እዮም፤ ክምስክሩ እንተ ደልዮም ድማ፥ ከምቲ ኣዝዩ ጥብቂ ዝኾነ ወገን ሃይማኖትና፥ ፈሪሳዊ ኮይነ ኸም ዝነበርኩ ይፈልጡ እዮም። ⁶ሕዚ ድማ፥ በቲ ኣቦና ንኣቦታትና ዝኣተዎ ተስፋ ብምትስፋወይ፥ ንፍርዲ ደው ኢለ ኣለኹ። ⁷ዓሰርተ ኽልተ ነገዳትና ነዝ ተስፋ እዙይ ንምብፃሕ እናተስፈዉ፥ ለይትን መዓልትን ተጊሆም የገልግልዎ ኣለዉ። ኦ ንጉስ፥ ስለ እዝ ተስፋ እዙይ ድማ፥ ብኣይሁድ እኽሰስ ኣለኹ። ⁸ኣቦና ንምዉታት ዘተስኦም ምዃኑ፥ ስለ ምንታይ ኣባኻትኩም ዘይእመን ኮይኑ ይፍረድ?

⁹ኣነ ባዕለይ ኣንፃር ስም ናይ ናዝሬት ኢየሱስ ብዙሕ ነገር ክገብር ከም ዝግብኣኒ እሓስብ ነበርኩ። ¹⁰ኣብ ኢየሩሳሌም ድማ ከምኡ ገበርኩ፤ ካብ ሊቃውንቲ ካህናት ስልጣን ተቐቢለ፥ ካብ ቅዱሳን ብዙሓት ናብ ቤት ማእሰርቲ ዓፀኽዎም፤ ክቕተሉ እንተለዉ ኸዓ ኣንፃሮም ድምፀይ ሃብኩ። ¹¹ኣብ ኵሉ ቤተ ፀሎት ኣዘውቲረ እቐፅዖም ነበርኩ፤ ኣንፃር እግዚኣብሄር ክዛረቡ ኸገድዶም እፍትን ነበርኩ፤ የመና ተቖጢዐሎም ድማ ክሳዕ ናይ ባዕዲ ኸተማታት ኣሳጐጕክዎም።

¹²ከምዙይ እናገበርኩ ኸዓ፥ ካብ ሊቃውንቲ ካህናት ስልጣንን ፍቓድን ተቐቢለ ናብ ደማስቆ ኸድኩ። ¹³ኦ ንጉስ፥ ፍርቂ መዓልቲ ኣብ መንገዲ፥ ካብ ፀሓይ ዝያዳ ዝበርሃ ብርሃን ካብ ሰማይ፥ ኣብ ዙርያይን ኣብ ዙርያ እቶም ምሳይ ዝኸዱ ዝነበሩን ሃልሃል እንተ ዝብል ረአኹ።

¹⁴ኵላትና ኸዓ ናብ ምድሪ ወደቕና፤ ብቛንቋ እብራይስጢ ኸዓ፦ ‘ሳኦል፥ ሳኦል፥ ስለ ምንታይ ትሳጕጐኒ ኣለኻ? ኣንፃር መውግኢ ኽትረግፅ ንኣኻ ኸቢድ እዩ’ ዝብል ድምፂ ሰማዕኹ። ^a a v14 ‘ኣንፃር መውግኢ ምርጋፅ’ ንዓንዳሪ ብዕራይ፥ ነቲ ናይ ሓረስታይ መውግኢ ዝቃወም፥ ዝገልፅ ልሙድ ምስላ እዩ ነይሩ፤ ምቅዋም ንባዕልኻ ጥራሕ እዩ ዘቚስለካ።

¹⁵ኣነ ኸዓ፦ ‘ኦ ጐይታ፥ ንስኻ መን ኢኻ?’ በልኩ። ጐይታ ድማ፦ ‘ኣነ እቲ ንስኻ እትሳጕጐ ዘለኻ ኢየሱስ እየ’ በለ።

¹⁶ግናኸ ተንስእ፥ ብእግርኻ ደው በል፤ ኣገልጋልን ምስክርን ክሾመካ፥ ነቲ ብዛዕባይ ዝረአኽዮን ነቲ ገና ዝግለፀልካን ክትምስክር፥ ነዝ ምኽንያት እዙይ ተራአኽዎ። ¹⁷ካብ ህዝብኻን ካብ ኣህዛብን እናኣድሓንኩኻ፥ ናባታቶም እሰደካ ኣለኹ። ¹⁸ኣዒንቶም ክትከፍት፥ ካብ ፀልማት ናብ ብርሃን፥ ካብ ስልጣን ሰይጣን ድማ ናብ ኣቦና ምእንቲ ኽምለሱ፥ ብእምነት ብኣይ ድማ ሕድገት ሓጢኣትን ኣብ ማእኸል እቶም ዝተቐደሱ ርስትን ምእንቲ ኽቕበሉን።’

¹⁹ስለዙይ ኦ ንጉስ ኣግሪጳ፥ ነቲ ሰማያዊ ራእይ ዘይእዙዝ ኣይኮንኩን፤ ²⁰እኳ ደኣ ቅድም ነቶም ኣብ ደማስቆ ዝነበሩ፥ ድሕሪኡ ኣብ ኢየሩሳሌምን ኣብ ኵሉ ሃገር ይሁዳን፥ ንኣህዛብውን፥ ንስሃ ኽኣትዉን ናብ ኣቦና ኽምለሱን፥ ንንስሃኦም ዝበቅዕ ግብሪ ኽገብሩ ነገርኩ። ²¹ስለ እዝ ነገር እዙይ ኣይሁድ ኣብ ቤተ መቕደስ ሐዙኒ፥ ክቐትሉኒውን ፈተኑ። ²²ካብ ኣቦና ሓገዝ ስለ ዝረኸብኩ፥ ክሳዕ ሎሚ ንንእሽተይን ንዓብይን እናመስከርኩ ደው ኢለ ኣለኹ፤ ካብቲ ነቢያትን ሙሴን ክኸውን እዩ ኢሎም ዝተነበይዎ ወፃኢ ድማ ገለ እኳ ኣይብልን፤ ²³ክርስቶስ መከራ ኽቕበል ከም ዘለዎ፥ ካብ ምዉታት ድማ ቀዳማይ ኮይኑ ተሲኡ፥ ንህዝብናን ንኣህዛብን ብርሃን ከም ዝሰብኽ።

²⁴ጳውሎስ ከምዙይ ኢሉ ክማጐት እንተሎ፥ ፌስጦስ ዓው ኢሉ፦ “ጳውሎስ፥ ዐቢድካ ኢኻ! እቲ ብዙሕ ትምህርትኻ ናብ ዕብዳን የብፅሐካ ኣሎ” በለ።

²⁵ጳውሎስ ግና፦ “ኦ ክቡር ፌስጦስ፥ ኣነ ኣይዐበድኩን፤ ቃል ሓቅን ቅኑዕ ፍርድን ደኣ እዛረብ ኣለኹ እምበር። ²⁶ንጉስ ነዝ ነገራት እዙይ ይፈልጦ እዩ፤ ብግህዶ ድማ እዛረቦ ኣለኹ። እዝ ነገር እዙይ ኣብ ኩርናዕ ዝተገብረ ኣይኮነን እሞ፥ ካብኡ ገለ እኳ ኸም ዘይተኸወሎ ርግፀኛ እየ። ²⁷ኦ ንጉስ ኣግሪጳ፥ ንነቢያትዶ ትኣምን ኢኻ? ከም እትኣምን ድማ እፈልጥ እየ” በለ።

²⁸ኣግሪጳ ድማ፦ “ብኸምዙይ ቀልጢፍካ ክርስትያን ክኸውን ክተረድኣኒ ትደሊ ዲኻ?” በለ።

²⁹ጳውሎስ ከዓ፦ “ብሓፂር ኮነ ብነዊሕ፥ ንስኻ ጥራሕ ዘይኴንካ፥ እቶም ሎሚ ዝሰምዑኒ ዘለዉ ዅሎም ከዓ ከምቲ ኣነ ዘለኽዎ ክኾኑ፥ ብዘይ እዝ መቝሕ እዙይ ፥ ናብ ኣቦና እፅሊ ኣለኹ” በለ።

³⁰ሽዑ ንጉስን ሹምን በርኒቄን እቶም ምሳቶም ተቐሚጦም ዝነበሩን ተንስኡ።

³¹ክወፁ እንተለዉ ኸዓ፦ “እዝ ሰብኣይ እዙይ ሞት ኮነ ማእሰርቲ ኣይግብኦን እዩ” ኢሎም ንሓድሕዶም ተዛረቡ።

³²ኣግሪጳ ድማ ንፌስጦስ፦ “እዝ ሰብኣይ እዙይ ናብ ቄሳር ይግባይ እንተ ዘይብል ነይሩ፥ ክፍታሕ ምተኽኣለ ነይሩ” በሎ።