ሐዋርያት ሥራ 26

26 ¹አግሪጳም ጳውሎስን፣ “ስለ ራስህ ልትናገር ትችላለህ” አለው። ጳውሎስም እጁን ዘርግቶ መከላከያውን ጀመረ።

²“አግሪጳ ንጉሥ ሆይ፤ አይሁድ ከሚከሱኝ ክስ ሁሉ ዛሬ በፊትህ ራሴን ስከላከል ዕድለኛ አድርጌ እቈጥራለሁ፤ ³ይልቁንም የአይሁድን ልማዶችና ክርክሮች ሁሉ መልካም አድርገህ ስለምታውቅ፣ በትዕግሥት እንድትሰማኝ እለምንሃለሁ።

⁴አይሁድ ሁሉ ከልጅነቴ ጀምሮ፣ ከመጀመሪያው በገዛ ወገኔ መካከልና በኢየሩሳሌም ያሳለፍሁትን ኑሮዬን ያውቃሉ። ⁵ከጥንት ጀምሮ ያውቁኛል፤ ሊመሰክሩም ቢፈቅዱ፣ እንደ ሃይማኖታችን ጥብቅ ወገን ፈሪሳዊ ሆኜ እንደ ኖርሁ ያውቃሉ። ⁶አሁንም አባታችን ለአባቶቻችን በገባው ተስፋ ባለኝ ተስፋ ምክንያት ተከሼ ለፍርድ ቆሜአለሁ። ⁷ዐሥራ ሁለቱ ነገዶቻችን ሌትና ቀን በትጋት እርሱን እያመለኩ፣ ይህን ተስፋ ለመድረስ ተስፋ ያደርጋሉ። ንጉሥ ሆይ፣ ስለዚህ ተስፋ በአይሁድ እከሰሳለሁ። ⁸አባታችን ሙታንን እንደሚያስነሣ ከእናንተ በማንም ዘንድ ለምን የማይታመን ሆኖ ይፈረዳል?

⁹እኔ ራሴ በናዝሬቱ ኢየሱስ ስም ላይ ብዙ ነገር ማድረግ እንዳለብኝ አስብ ነበር። ¹⁰በኢየሩሳሌምም ያደረግሁት ይህንኑ ነው፤ ከካህናት አለቆች ሥልጣን ተቀብዬ ከቅዱሳኑ ብዙዎቹን በእስር ቤት አኖርሁ፣ ሲገደሉም በእነርሱ ላይ ድምፅ ሰጠሁ። ¹¹በየምኵራቡ ሁሉ ብዙ ጊዜ እቀጣቸው ነበር፣ በእግዚአብሔር ላይ እንዲናገሩ ላስገድዳቸው እሞክር ነበር፤ በእነርሱ ላይም እጅግ ተቈጥቼ እስከ ባዕድ ከተሞች ድረስ አሳድዳቸው ነበር።

¹²እንዲህ ባለ ጕዞ ላይ ሳለሁ ከካህናት አለቆች ሥልጣንና ትእዛዝ ተቀብዬ ወደ ደማስቆ ሄድሁ። ¹³ንጉሥ ሆይ፣ እኩለ ቀን ላይ ከፀሓይ ይልቅ የሚያበራ ብርሃን ከሰማይ በመንገድ ላይ ዐየሁ፤ በእኔና አብረውኝ በሚጓዙት ዙሪያ ይበራ ነበር።

¹⁴ሁላችንም ወደ መሬት ወደቅን፤ በዕብራይስጥ ቋንቋ የሚናገረኝንም ድምፅ፣ “ሳውል፣ ሳውል፣ ለምን ታሳድደኛለህ? የመውጊያውን ብረት ብትቃወም ለአንተ ይከብድሃል” ሲለኝ ሰማሁ። ^a a v14 “የመውጊያውን ብረት መቃወም” ገበሬው በሚወጋው ብረት ላይ ለሚታገል ግትር በሬ የሚነገር የተለመደ ምሳሌ ነበር፤ መቃወም ራስን ብቻ ያቈስላል።

¹⁵እኔም፣ “ጌታ ሆይ፣ አንተ ማን ነህ?” አልሁ። ጌታም፣ “የምታሳድደኝ እኔ ኢየሱስ ነኝ” አለ።

¹⁶ነገር ግን ተነሥተህ በእግርህ ቁም፤ ለዚህ ነገር ነው የተገለጥሁልህ፤ ስለ እኔ ያየኸውን እንዲሁም ወደ ፊት የምገለጥልህን ነገር ለመመስከር አገልጋይና ምስክር ላድርግህ። ¹⁷ከወገኖችህና ከአሕዛብ አድንሃለሁ፤ ወደ እነርሱም እልክሃለሁ፤ ¹⁸ዓይኖቻቸውን ለመክፈት፣ ከጨለማ ወደ ብርሃን ከሰይጣንም ኀይል ወደ አባታችን እንዲመለሱ፣ የኀጢአትም ይቅርታ እንዲቀበሉ፣ በእኔም በማመን በተቀደሱት መካከል ርስት እንዲያገኙ ነው።

¹⁹ስለዚህ አግሪጳ ንጉሥ ሆይ፣ ለሰማያዊው ራእይ የማይታዘዝ አልሆንሁም፤ ²⁰ነገር ግን መጀመሪያ በደማስቆ ላሉት፣ ቀጥሎም በኢየሩሳሌምና በይሁዳ አገር ሁሉ፣ እንዲሁም ለአሕዛብ፣ ንስሓ ገብተው ወደ አባታችን እንዲመለሱ፣ ለንስሓቸውም የሚመጥን ሥራ እንዲሠሩ ሰበክሁ። ²¹በዚህ ምክንያት አይሁድ በቤተ መቅደስ ያዙኝ፣ ሊገድሉኝም ሞከሩ። ²²አባታችን ስለረዳኝ፣ እስከ ዛሬ ድረስ ለታናሹም ለታላቁም እየመሰከርሁ ቆሜአለሁ፤ ነቢያትና ሙሴ ይሆናል ብለው ከተናገሩት በቀር ሌላ ምንም አልናገርም፤ ²³ይኸውም ክርስቶስ መከራ መቀበል እንዳለበት፣ ከሙታንም በመጀመሪያ ተነሥቶ ለወገኖቻችንም ለአሕዛብም ብርሃንን እንደሚሰብክ ነው።”

²⁴ጳውሎስ ራሱን ሲከላከል ሳለ፣ ፌስጦስ ጮኾ፣ “ጳውሎስ ሆይ፣ አብደሃል! ብዙ ትምህርትህ ወደ ዕብደት እየነዳህ ነው” አለ።

²⁵ጳውሎስ ግን፣ “የተከበርህ ፌስጦስ ሆይ፣ አላበድሁም፤ የእውነትና የቅን አእምሮ ቃል እናገራለሁ። ²⁶ንጉሡ ይህን ነገር ያውቃል፤ ለእርሱም ገልጬ እናገራለሁ። ይህ በስውር ጥግ ያልተደረገ ስለሆነ፣ ከዚህ ነገር ምንም እንዳላመለጠው እርግጠኛ ነኝ። ²⁷አግሪጳ ንጉሥ ሆይ፣ ነቢያትን ታምናለህን? እንደምታምን ዐውቃለሁ” አለ።

²⁸አግሪጳም፣ “እንዲህ በፍጥነት ክርስቲያን እንድሆን ልታግባባኝ ትሻለህን?” አለ።

²⁹ጳውሎስም፣ “በአጭር ጊዜም ይሁን በረጅም፣ አንተ ብቻ ሳትሆን ዛሬ የሚሰሙኝ ሁሉ ከዚህ ሰንሰለት በቀር እንደ እኔ እንዲሆኑ አባታችንን እለምናለሁ” አለ።

³⁰ከዚያም ንጉሡ፣ ገዥውም፣ በርኒቄም፣ ከእነርሱም ጋራ ተቀምጠው የነበሩት ተነሡ።

³¹ወጥተውም ሲሄዱ፣ እርስ በርሳቸው፣ “ይህ ሰው ሞትም ሆነ እስራት የሚገባው ነገር አላደረገም” ተባባሉ።

³²አግሪጳም ፌስጦስን፣ “ይህ ሰው ወደ ቄሳር ይግባኝ ባይል ኖሮ ሊፈታ በቻለ ነበር” አለው።