Mga Buhat 26

26 ¹Miingon si Agripa kang Pablo, “Makasulti ka na alang sa imong kaugalingon.” Unya gituy-od ni Pablo ang iyang kamot ug misugod sa iyang pagpanalipod sa kaugalingon.

²Hari Agripa, giisip ko ang akong kaugalingon nga bulahan nga makapanalipod sa akong kaugalingon sa imong atubangan karong adlawa batok sa tanang sumbong sa mga Judio, ³ilabi na kay nahibalo ka pag-ayo sa tanang kustombre ug panaglalis sa mga Judio, busa naghangyo ako nga paminawon mo ako nga mapailubon.

⁴Nahibalo ang tanang Judio sa akong kinabuhi sukad sa akong pagkabatan-on, nga gigugol sukad pa sa sinugdan taliwala sa akong kaugalingong nasod ug didto sa Jerusalem. ⁵Dugay na nila akong nailhan, ug kon buot nila mosaksi, nga sumala sa labing istrikto nga pundok sa atong relihiyon nagkinabuhi ako ingon nga usa ka Pariseo. ⁶Ug karon nagabarog ako aron husayon tungod sa paglaom sa saad nga gihimo sa atong Amahan ngadto sa atong mga katigulangan. ⁷Ang atong napulog duha ka tribo naglaom nga makaabot niini nga saad, nga nagasimba kaniya sa tibuok kasingkasing adlaw ug gabii. Tungod niini nga paglaom, hari, gisumbong ako sa mga Judio. ⁸Nganong giisip man nga dili katuohan ni bisan kinsa kaninyo nga ang atong Amahan nagabanhaw sa mga patay?

⁹Ako mismo naghunahuna kaniadto nga kinahanglan akong mobuhat ug daghang butang batok sa ngalan ni Jesus nga taga-Nazaret. ¹⁰Mao kana ang akong gibuhat didto sa Jerusalem: pinaagi sa awtoridad gikan sa mga pangulong pari, gipriso ko ang daghan sa mga balaan, ug miboto ako batok kanila sa dihang gipamatay sila. ¹¹Sa matag sinagoga kanunay ko silang gisilotan, nga naningkamot sa pagpugos kanila sa pagsulti batok sa Dios; ug tungod sa akong hilabihang kasuko batok kanila, gilutos ko sila bisan ngadto sa langyaw nga mga siyudad.

¹²Sa usa niana nga panaw miadto ako sa Damasco uban ang awtoridad ug sugo gikan sa mga pangulong pari. ¹³Sa udtong tutok, O hari, nakita ko diha sa dalan ang usa ka kahayag gikan sa langit, mas masanag pa kay sa adlaw, nga midan-ag libot kanako ug sa akong mga kauban sa panaw.

¹⁴Natumba kaming tanan sa yuta, ug nadungog ko ang usa ka tingog nga nagasulti kanako sa Hebreohanong pinulongan, ‘Saulo, Saulo, nganong gilutos mo ako? Malisod alang kanimo ang pagtindak batok sa mga igtutugsok.’ ^a a v14 Ang “pagtindak batok sa mga igtutugsok” maoy usa ka kasagarang panultihon alang sa gahig-ulo nga baka nga nakig-away sa igtutugsok sa mag-uuma — ang pagsukol magsamad lamang kanimo.

¹⁵Nangutana ako, ‘Kinsa ka, Ginoo?’ Ang Ginoo miingon, ‘Ako si Jesus, nga imong gilutos.’

¹⁶Apan bangon, tindog sa imong mga tiil—nagpakita ako kanimo tungod niini nga hinungdan: aron itudlo ka nga alagad ug saksi sa imong nakita mahitungod kanako ug sa mga butang nga igapakita ko pa kanimo, ¹⁷nga magaluwas kanimo gikan sa imong katawhan ug gikan sa mga Hentil—nga kanila igapadala ko ikaw, ¹⁸aron pagbuka sa ilang mga mata, aron motalikod sila gikan sa kangitngit ngadto sa kahayag ug gikan sa gahom ni Satanas ngadto sa atong Amahan, ug makadawat sa kapasayloan sa mga sala ug ug dapit taliwala niadtong gibalaan pinaagi sa pagtuo kanako.’

¹⁹Busa, Hari Agripa, wala ako magmasupilon sa langitnong panan-awon, ²⁰kondili nagmantala ako una ngadto sa mga tua sa Damasco, unya sa Jerusalem ug sa tibuok rehiyon sa Judea, ug ngadto usab sa mga Hentil, nga maghinulsol sila ug motalikod ngadto sa atong Amahan, nga magbuhat sa mga binuhatan nga mohaom sa ilang paghinulsol. ²¹Tungod niini nga hinungdan gidakop ako sa mga Judio didto sa templo ug naningkamot sila sa pagpatay kanako. ²²Pinaagi sa tabang gikan sa atong Amahan, nagabarog ako hangtod niining adlawa nga nagapamatuod ngadto sa gagmay ug sa dagko, nga walay gisulti nga labaw pa sa giingon sa mga propeta ug ni Moises nga mahitabo: ²³nga ang Cristo kinahanglang mag-antos, ug, ingon nga una nga mabanhaw gikan sa mga patay, magmantala sa kahayag ngadto sa atong katawhan ug sa mga Hentil.

²⁴Samtang nanalipod si Pablo sa iyang kaugalingon, misinggit si Festo, “Pablo, buang ka! Ang imong dakong kaalam nagapabuang kanimo.”

²⁵Apan miingon si Pablo, “Dili ako buang, labing halangdon nga Festo; nagasulti ako ug mga pulong sa kamatuoran ug sa maayong panghunahuna. ²⁶Nahibalo ang hari niini nga mga butang—nagasulti ako kaniya nga walay lipudlipod. Sigurado ako nga walay nitago niini kaniya, kay wala kini buhata sa usa ka suok. ²⁷Hari Agripa, mituo ka ba sa mga propeta? Nahibalo ako nga mituo ka.”

²⁸Miingon si Agripa, “Niini ka kadali makadani kanako nga mahimong Cristohanon?”

²⁹Miingon si Pablo, “Mubo man o taas, nagaampo ako sa atong Amahan nga dili lang ikaw kondili ang tanan nga nakadungog kanako karong adlawa mahimong sama kanako—gawas niini nga mga kadena.”

³⁰Unya mitindog ang hari, ug ang gobernador ug si Bernice ug kadtong nanaglingkod uban kanila.

³¹Samtang nanggula sila, nag-ingnanay sila sa usag usa, “Kini nga tawo dili angayan sa kamatayon ni sa pagkabilanggo.”

³²Miingon si Agripa kang Festo, “Kini nga tawo makagawas unta kon wala pa siya modangop kang Cesar.”