Mga Buhat 25

25 ¹Karon, tulo ka adlaw human miabot si Festus sa probinsya, mitungas siya ngadto sa Jerusalem gikan sa Cesarea. ²Didto ang mga pangulong pari ug ang mga pangulo sa mga Judio mipasaka sa ilang sumbong batok kang Pablo ug sige silang nangamuyo kaniya, ³nga nangayo ug pabor batok kaniya—nga ipatawag niya si Pablo ngadto sa Jerusalem. Nag-andam sila ug banhig aron patyon siya diha sa dalan. ⁴Mitubag si Festus nga si Pablo gibilanggo didto sa Cesarea, ug siya mismo molakaw didto sa dili madugay. ⁵“Busa,” miingon siya, “paubana kanako kadtong mga makahimo kaninyo, ug isumbong ang tawo, kon aduna man siyay nabuhat nga sayop.”

⁶Nagpabilin si Festus uban kanila sulod sa dili molabaw sa walo o napulo ka adlaw, unya milugsong siya ngadto sa Cesarea. Pagkasunod adlaw milingkod siya sa lingkoranan sa maghuhukom ug nagmando nga dad-on si Pablo. ⁷Pag-abot ni Pablo, gilibotan siya sa mga Judio nga gikan sa Jerusalem, nga nagdala ug daghang bug-at nga mga sumbong nga dili nila mapamatud-an. ⁸Mitubag si Pablo sa iyang pagpanalipod, “Wala akoy nabuhat nga sayop batok sa balaod sa mga Judio, sa templo, o kang Cesar.”

⁹Apan si Festus, nga buot mopahimuot sa mga Judio, nangutana kang Pablo, “Buot ka bang motungas sa Jerusalem ug didto husayon sa akong atubangan mahitungod niini nga mga sumbong?”

¹⁰Miingon si Pablo, “Nagbarog ako atubangan sa hukmanan ni Cesar, diin kinahanglan akong hukman. Wala akoy nabuhat nga sayop batok sa mga Judio, sumala sa imo mismong nasayran pag-ayo. ¹¹Kon aduna akoy nabuhat nga sayop, o nakabuhat ug butang nga takos sa kamatayon, dili ako modumili sa kamatayon. Apan kon walay basihanan ang mga sumbong niini nga mga tawo batok kanako, walay makatugyan kanako ngadto kanila. Nagdangop ako kang Cesar.”

¹²Human makigsabot sa iyang konseho, mitubag si Festus, “Nagdangop ka kang Cesar; ngadto kang Cesar ka moadto.”

¹³Paglabay sa pipila ka adlaw, si Haring Agripa ug si Bernice miabot sa Cesarea ug mitimbaya kang Festus. ¹⁴Samtang nagpabilin sila didto ug daghang mga adlaw, gipaila ni Festus ngadto sa hari ang kaso ni Pablo, “Dihay usa ka tawo nga gibiyaan ni Felix dinhi ingon nga binilanggo. ¹⁵Samtang didto ako sa Jerusalem, gisumbong siya sa mga pangulong pari ug sa mga anciano sa mga Judio, nga nangayo kanako nga hukman siya nga sad-an. ¹⁶Giingnan ko sila nga dili batasan sa mga Romanhon nga itugyan si bisan kinsa sa dili pa maatubang sa gipasanginlan ang iyang mga magsusumbong ug mahatagan ug kahigayonan sa pagpanalipod sa iyang kaugalingon batok sa sumbong. ¹⁷Busa pagtigom nila dinhi, wala akoy gilangan—pagkasunod adlaw milingkod ako sa lingkoranan sa paghukom ug nagmando nga dad-on ang tawo. ¹⁸Sa dihang mibarog ang iyang mga magsusumbong, wala silay gipasaka nga bisan unsang sumbong sa krimen nga akong gidahom. ¹⁹Hinuon, dihay pipila ka panaglalis nila kaniya mahitungod sa ilang kaugalingong relihiyon ug sa usa ka tawong patay nga ginganlan ug Jesus, nga gisige ni Pablo ug pamatuod nga buhi. ²⁰Kay wala ako masayod kon unsaon pagsusi niini, nangutana ako kon buot ba siyang moadto sa Jerusalem ug didto husayon mahitungod niini nga mga sumbong. ²¹Apan tungod kay si Pablo nagdangop nga bantayan alang sa hukom sa Emperador, nagmando ako nga bantayan siya hangtod nga mapadala ko siya ngadto kang Cesar.”

²²Miingon si Agripa kang Festus, “Buot ko mismong madungog ang tawo.” “Ugma,” miingon si Festus, “madungog mo siya.”

Nagbarog si Pablo sa Atubangan nila ni Agripa ug Bernice

²³Pagkasunod adlaw si Agripa ug si Bernice miabot uban ang dakong pagpasundayag ug misulod sa hawanan uban sa mga komandante sa kasundalohan ug sa mga dungganong tawo sa siyudad. Sa mando ni Festus, gidala si Pablo sa sulod. ²⁴Miingon si Festus, “Haring Agripa, ug kamong tanan nga ania uban kanamo—nakita ninyo kining tawhana. Ang tibuok katilingban sa mga Judio mihangyo kanako mahitungod kaniya, sa Jerusalem ug dinhi, nga naninggit nga dili na siya angay mabuhi pa. ²⁵Apan kay wala akoy nakaplagan nga takos sa kamatayon, ug tungod kay siya mismo nagdangop sa Emperador, nakahukom ako nga ipadala siya. ²⁶Wala akoy tino nga ikasulat sa akong agalon mahitungod kaniya, busa gidala ko siya sa inyong atubangan, ilabina sa imong atubangan, Haring Agripa, aron nga human niini nga pagsusi aduna akoy ikasulat. ²⁷Kay alang kanako daw dili makataronganon ang pagpadala ug usa ka binilanggo nga walay gipakita nga mga sumbong batok kaniya.”