Mi eng' bukuit

Poisyonigap che Kiyoktoi 25 FHB Father's Heart Bible™

Kiistoi 15% eng' kiy ne iale korook →
Bukuit

Kibaoryanji Paulo eng' taitap Festo

Ki nam pounindet ne lel ng'aleechooto, ak ki weeksei ribiseet ne po keny. Kosiir keyookto ineendet Jerusalem, ki tonon Paulo eng' taitap Kaisar, ak ki chamchi Festo. Eng' ung'oot ki mwa Festo kole, ng'olyoondoni ko agobo chiito age ne kome ne kiguure Jeso, ne mwaei Paulo kole sabei.

Sura 25.

Kingo pata peetuusyek somok ye kagonyo Festo emet, kotogosta kobun Kaisarea kwo Jerusalem. Ki ip tisiik che eecheen ak poisyegap Yahudik ng'aleekwak agobo Paulo, ak kobirchin; kosoomei chameet agobo ineendet, kole koguurchi Paulo kwo Jerusalem. Ki inde icheek ribiseet si kobar ineendet eng' ooreet. Kowolji Festo kole kirabei Paulo eng' Kaisarea, ak kole inee ineegei komanda ne ma tya. Kole inee, “Ingoba anyun che imuuchi eng' okweek kobooto anee, kobaoryanji chiichooto, ngot komi kiy age tugul ne ya ne po ineendet.”

Ki menye Festo kobooto icheek peetuusyek che ma siir sisiit anan taman, yeityo kwo Kaisarea. Eng' peetuut ne ki isubi, kotebee ng'echereet ole irwoge ak kong'at kiip Paulo. Kingo nyo Paulo, koyiem Yahudik che kibiiten Jerusalem, koip ng'aleek che chaang' che samisen che ma kimuuch koboorun. Kowolji Paulo kotoretkei, kole, “Ma kaayai yaityo age tugul agobo ng'atuutyetap Yahudik, anan agobo hekaluut, anan agobo Kaisar.”

Ago Festo, amu ki mache koboiboitu Yahudik, koteebe Paulo, kole, “Imache itogosta kwo Jerusalem, si kigirwoogin yooto eng' tainnyu agobo ng'aleechu?”

Kole Paulo, “Atonone eng' taitap ng'echereet ole irwoge ne po Kaisar, ole nyolu kigirwoogo. Ma kaayachi Yahudik yaityo age tugul, ko uu ye inai inyee ineegei komyee. Ngot ko kaayai yaityo, ko kaayai kiit ne nyoljin meet, ko ma aete ame. Ago ngot ko ma po iman ng'aleek che baoryaneena pichu, koma mi chii ne imuuchi koinda eunekwak. Ariirchi Kaisar.”

Kingo pata koteebe kobooto kapkirwoogennyi, kowolji Festo, kole, “Kairiirchi Kaisar; iwendi Kaisar.”

Kingo pata peetuusyek alak, kobwa Laitoryat Agripa ak Bernike Kaisarea, ak kogat Festo. Kingo menye yooto peetuusyek che chaang', ki ip Festo ng'aleegap Paulo koba taitap laitoryat, kole, “Ki bagaak Feliki chiito age yu ne kirabei. Ye ki ami Jerusalem, kobaoryanji tisiik che eecheen ak poisyegap Yahudik ineendet, kosoom si kirwookyin. Ki awolji kole ma po piteetap Romaik koinda chii age tugul eunekwak, kotomo kotuiye chiichooto ne kibaoryaneen paoryanikyik takyinegei, ak konyoor poroindo kotoretkei agobo baoryeet. Kingo tuiyo anyun yu, ki ma agagei kiit age tugul; eng' peetuut ne ki isubi, ki atebee ng'echereet ole irwoge ak ang'at kiip chiichooto. Kingo tonon paoryanikyik, ki ma koip baoryeet age tugul ne ya ne kata abwaati. Ago ki tinyei ng'aleek alak ak ineendet agobo kaguutnywa ak agobo chiito age ne kiga kome ne kiguure Jeso, ne mwaei Paulo koigeny kole sabei. Amu ki ma anai ole asyache nooto, ki ateebe kole icham kobwa Jerusalem, si kigirwoogin yooto agobo ng'aleechu. Ago amu ki iriirchi Paulo kole kirabei agoi kotebi kirwoogetap Kaisar ne oo, ki ang'at kirabei kot asendi ineendet kwo Kaisar.”

Koleenji Agripa Festo, “Amache akas chiichooto aneege.” “Mutai,” kole Festo, “iwendi ikas ineendet.”

Tonone Paulo eng' taitap Agripa ak Bernike

Eng' peetuut ne ki isubi, kobwa Agripa ak Bernike eng' toroornatet ne oo, ak koba kooindap koot kobooto kiptainigap pooryeet ak piik che eecheen che po nganaseet. Ko uu ng'atuutyetap Festo, kiip Paulo. Kole Festo, “Laitoryat Agripa, ak okweek tugul che mi yu kobootech, ogeere chiini. Ki soom piik tugul che po Yahudik agobo ineendet, eng' Jerusalem ak yu, koboldos kole ma nyolu kosabei kong'etee. Ago amu ki ma anyoor kiit age tugul ne nyoljin meet, ak amu ki iriirchi inee ineegei Kaisar ne oo, ki atil kole asendi ineendet. Ma atinye kiit ne iman ne asirchi kiptaiyandennyu agobo ineendet, nooto si ka aip ineendet eng' taing'wong' tugul, miising' ko eng' taing'ung' inyee, Laitoryat Agripa, si kingo pata syachet ni, anyooru kiit ne asir. Amu keerei kole ma karaaran eng' anee asendi chii ne kirabei amanda aboorun ng'aleek che baoryaneen ineendet.”