Kibaoryanji eng' Taitap Feliks
Ki guure baornateet ne ki kiyal Paulo chiito ne koonu nyalilda ak pounindetap kiruogutyet. Ki wol Paulo kole ma mi chii ne imuuch koboorun kiy, ak kole irwookyin ineendet agobo king'eet komang'une che pek. Ki boisto Feliks sait, ak ki arageni kingo it ng'olyoo kirwooget, ak koriibe ineendet kenyiisyek aeng', kobwaate kole konyoorchi silingisyek.
24 1Eng' let peetuusyek muut, ki choorta Ananias tisiindet ne oo kobooto poisyek alak ak chiitap ng'atuutik, Tertereen, ak ki ibei icheek charu agobo Paulo eng' taitap pounindet. 2Ye kiguur Paulo, ki tuun Tertereen baornatennyi kole, “Eng' inyee ko kebaibai kaalyeet ne oo, ak kaanyooru wechyoot che myee eng' pororyeetni eng' naetounateng'ung', 3ko keboortoi ni eng' ortinwek tugul ak eng' ole tugul, ee Feliks ne ii tagunoot, eng' kongoi tugul. 4Ago si ma akoorin kogeny, asoomin igase acheek eng' kaalyeet, eng' ng'aleek che ng'ering'. 5Ki kenyooru chiichi ko chiito ne koonu nyalilda, ne ng'eetei polatosyek eng' kwenutap Yahudik tugul eng' ng'wony komugul, ak ko pounindetap kiruogutyetap che po Nazareth. 6Ki kimachei agine koreeny Temploit, amu nooto ki kenam ineendet. a a v6 Sirutik che tai ko ma tinyei islet 7 yu; sirutik che let kotesi: “Ago ki nyo kiptaiyatap lugeet Lisias ak koisto ineendet eng' eunenyo eng' kimnateet ne oo,” 8Eng' ichigilet ineendet inyeenyin, imuuchi inai tugul che kebaoryanji ineendet.”
9Ki beligei Yahudik kora, kole imanit tuguuchu kou nooto.
10Ki ng'otochi pounindet ineendet kong'alaal. Ki wolji Paulo kole, “Amu angen ile ki irwookyin pororyeetni kenyiisyek che chaang', atoretkei eng' chamyet. 11Imuuchi igimit ile ma siirei peetuusyek taman ak aeng' koyob ki atogoste awo ayachi Kamuktaindet eng' Jerusalem. 12Ki ma kaanyooru icheek ang'alaaljigei ak chii age tugul, anan ang'eetei polateet eng' tuiyet, ma eng' Temploit, anan eng' sinagogisyek, anan ole tugul eng' nganaseet. 13Ak ma imuuchi kooburwok charu che ibchin anee nguno. 14Ago ang'aanyei eng' taing'ung': asubi Ooreet—ne kiguure icheek kiruogut—ayachi Kamuktaindetap kwanisyekwok, aiyanei tugul che yamegei ak Ng'atuutik ak che kisir eng' Maotik. 15Atinye mang'unet eng' Kwandanyo—ne tinyei pichu kora—ale king'eetyi che po imanda ak che ma po imanda tugul. 16Nooto anyun ayaei kotugul ariip ng'wanindanyu kotiliil eng' taitap Kwandanyo ak eng' taitap piik. 17Eng' let kenyiisyek che chaang', ki anyoo aibu kagoochinoik che po charu agobo poorwek che po pororyennyu, ak sembutik. 18Eng' kwenutap ni, ki kaanyooru icheek aanyinygei eng' Temploit—ma mi tuiyet, ma mi polateet. 19Alak che po Yahudik che punu Asia, ko kanyool komi yu eng' taing'ung' kobaoryan, ngot ko mi kiy ne tinyei agobo anee. 20Anan ingomwa pichu icheegei yaityo ne ki kaanyooru ye ki atonon eng' taitap kapkirwooget, 21ago agenge kiy ni ne ki arwai atonon eng' kwenekwak, ale, ‘Agobo ng'eetyeetap che kibek ko kirwookyin anee eng' taing'ung' raini.’”
22Feliks, ne ki ngen komyee agobo Ooreet, ki terter kirwooget kole, “Ye iitu Lisias kiptaiyatap lugeet, agas ng'olyoondeng'wong'.” 23Ki ng'atyi kiptaiyatap pogol koriip Paulo, ago kocham konyoor katyagnatet, ama kobagakta chii age tugul eng' choronokyik si kotoret ineendet.
24Eng' let peetuusyek alak, ki nyo Feliks kobooto osotyonnyi Drusila, ne po Yahudik, ki iyookto koguur Paulo, ak kogas ineendet agobo kayaneet eng' Kristo Jeso. 25Ye kita kong'alaal Paulo agobo imanda, ak koriibetgei, ak kirwooget ne nyonei, ki aragenso Feliks ak kole, “Kagoyam nguno; ui. Ye anyooru sait, aguurin.” 26Ki mang'u kora ale koochi Paulo ineendet rabisiek, amu nooto ki iyookto koguur ineendet konyil che chaang' ak kong'alaalji ineendet.
27Eng' let kenyiisyek aeng', ki weekyi Porkio Festo Feliks. Kingo mach komyeeit Yahudik, ki bagakta Feliks Paulo korgoreet.