அப்போஸ்தலர் 24

24 ¹ஐந்து நாட்களுக்குப் பின்பு, பிரதான ஆசாரியனாகிய அனனியா சில மூப்பர்களோடும், தெர்த்துல்லு என்னும் நியாயவாதியோடும் வந்து, தேசாதிபதிக்கு முன்பாக பவுலுக்கு விரோதமாகக் குற்றஞ்சாட்டினார்கள். ²பவுல் அழைக்கப்பட்டபோது, தெர்த்துல்லு தன் குற்றச்சாட்டைத் தொடங்கினான்: “உம்மாலே நாங்கள் மிகுந்த சமாதானத்தை அனுபவிக்கிறோம், உம்முடைய தூரதிருஷ்டியினாலே இந்த ஜாதிக்குச் சீர்திருத்தங்கள் உண்டாயின; ³மகா கனம்பொருந்திய பேலிக்ஸே, இதை நாங்கள் எல்லா விதத்திலும் எங்குமே முழு நன்றியோடும் ஏற்றுக்கொள்கிறோம். ⁴ஆயினும், உம்மை மேலும் தாமதிக்கச் செய்யாதபடிக்கு, சில வார்த்தைகளில் எங்கள் பேச்சை தயவுடன் கேட்கும்படி உம்மை வேண்டிக்கொள்கிறேன். ⁵இந்த மனிதன் ஒரு கொள்ளைநோய் போலிருந்து, உலகமெங்குமுள்ள யூதர்கள் எல்லாருக்குள்ளும் கலகங்களை எழுப்புகிறவனாகவும், நசரேயர் என்னும் மதப்பிரிவின் தலைவனாகவும் இருக்கிறதாகக் கண்டுபிடித்தோம். ⁶இவன் தேவாலயத்தையும் தீட்டுப்படுத்த முயன்றான்; ஆகையால் நாங்கள் இவனைப் பிடித்தோம். ^a a v6 மிகப் பழமையான கையெழுத்துப்பிரதிகளில் இங்கே 7-ஆம் வசனம் இல்லை; பிற்காலப் பிரதிகள் இதைச் சேர்க்கின்றன: “ஆனால் தளபதியாகிய லீசியா வந்து, மிகுந்த பலவந்தத்துடன் இவனை எங்கள் கைகளிலிருந்து பறித்துக்கொண்டுபோனான்,” ⁸நீரே இவனை விசாரித்துப் பார்த்தால், நாங்கள் இவன்மேல் சுமத்தும் குற்றங்கள் யாவையும் அறிந்துகொள்ளலாம்.”

⁹யூதர்களும் இந்தத் தாக்குதலில் சேர்ந்து, இவைகள் இவ்விதமே என்று வலியுறுத்திச் சொன்னார்கள்.

¹⁰தேசாதிபதி பேசும்படி பவுலுக்குச் சைகைகாட்டினான். அப்பொழுது பவுல் மறுமொழியாக: “நீர் அநேக வருடங்களாய் இந்த ஜாதிக்கு நியாயாதிபதியாய் இருக்கிறீர் என்று அறிந்து, மனமகிழ்ச்சியுடன் என் காரியத்தைப்பற்றி பதில் சொல்கிறேன். ¹¹நான் தொழுதுகொள்ளும்படி எருசலேமுக்குப் போய் பன்னிரண்டு நாட்களுக்கு மேலாகவில்லை என்பதை நீர் உறுதிசெய்துகொள்ளலாம். ¹²தேவாலயத்திலோ, ஜெப ஆலயங்களிலோ, நகரத்தின் வேறு எந்த இடத்திலோ, நான் ஒருவரோடும் தர்க்கம்பண்ணுகிறதையும், மக்கள் கூட்டத்தைக் கலவரப்படுத்துகிறதையும் அவர்கள் காணவில்லை. ¹³இப்பொழுது என்மேல் அவர்கள் சுமத்தும் குற்றங்களை உமக்கு அவர்களால் ருஜுப்படுத்தவும் முடியாது. ¹⁴ஆனாலும் உம்மிடத்தில் இதை நான் அறிக்கையிடுகிறேன்: அவர்கள் மதப்பிரிவு என்று சொல்லுகிற மார்க்கத்தைப் பின்பற்றி, நியாயப்பிரமாணத்திற்கு இசைந்து தீர்க்கதரிசிகளின் ஆகமங்களில் எழுதியிருக்கிற எல்லாவற்றையும் விசுவாசித்து, எங்கள் முன்னோர்களுடைய தேவனை நான் தொழுதுகொள்கிறேன். ¹⁵நீதிமான்களும் அநீதிமான்களும் ஒருமிக்க உயிர்த்தெழுவார்கள் என்று, இந்த மனிதரும் காத்திருக்கிற அந்த நம்பிக்கையை நான் எங்கள் பிதாவின்மேல் வைத்திருக்கிறேன். ¹⁶ஆகையால் எங்கள் பிதாவுக்கு முன்பாகவும் மனிதருக்கு முன்பாகவும் என் மனச்சாட்சியை மாசற்றதாய்க் காத்துக்கொள்ள எப்பொழுதும் நான் பிரயாசப்படுகிறேன். ¹⁷பல வருடங்களுக்குப் பின்பு, என் ஜாதியாரின் ஏழைகளுக்குத் தர்ம தானங்களையும் காணிக்கைகளையும் கொண்டுவரும்படி நான் வந்தேன். ¹⁸இதற்கிடையில், கூட்டமும் இல்லாமல், அமளியும் இல்லாமல், தேவாலயத்தில் சுத்திகரிக்கப்பட்டவனாய் என்னை அவர்கள் கண்டார்கள். ¹⁹ஆசியா நாட்டிலிருந்து வந்த சில யூதர்கள், என்மேல் ஏதாவது குற்றம் சுமத்த இருந்தால், அவர்கள் உமக்கு முன்பாக நேரில் வந்து குற்றஞ்சாட்ட வேண்டியது. ²⁰அல்லது, நான் ஆலோசனைச் சங்கத்துக்கு முன்பாக நின்றபோது, என்னிடத்தில் அவர்கள் கண்ட அநியாயம் என்ன என்று இவர்களே சொல்லட்டும்; ²¹அவர்கள் நடுவே நான் நின்று, ‘மரித்தோர் உயிர்த்தெழுதலைப்பற்றியே இன்று நான் உங்களால் நியாயம் விசாரிக்கப்படுகிறேன்’ என்று சத்தமிட்டுச் சொன்ன இந்த ஒரு காரியத்தைத்தவிர வேறொன்றையும் காணவில்லையே.”

²²மார்க்கத்தைக் குறித்து நன்றாய் அறிந்திருந்த பேலிக்ஸ், அவர்களுடைய விசாரணையை ஒத்திவைத்து: “தளபதியாகிய லீசியா வரும்போது, உங்கள் காரியத்தை நான் தீர்மானிப்பேன்” என்றான். ²³பவுலைக் காவல்பண்ணும்படியும், ஆயினும் அவனுக்குச் சற்று சுதந்திரம் அளிக்கும்படியும், அவனுடைய நண்பர்களில் ஒருவரும் அவனுக்கு உதவிசெய்வதைத் தடைபண்ணாதிருக்கும்படியும், நூற்றுக்கு அதிபதிக்குக் கட்டளையிட்டான்.

²⁴சில நாட்களுக்குப் பின்பு, பேலிக்ஸ் யூதப் பெண்ணாகிய தன் மனைவி துருசில்லாளோடு வந்து, பவுலை அழைப்பித்து, கிறிஸ்து இயேசுவின்மேலுள்ள விசுவாசத்தைப்பற்றி அவன் சொல்வதைக் கேட்டான். ²⁵பவுல் நீதியையும், இச்சையடக்கத்தையும், வரப்போகிற நியாயத்தீர்ப்பையும்பற்றி பேசினபோது, பேலிக்ஸ் பயமடைந்து: “இப்போதைக்கு இது போதும்; நீ போகலாம். எனக்கு சமயம் கிடைக்கும்போது உன்னை அழைப்பிப்பேன்” என்றான். ²⁶மேலும், பவுல் தனக்குப் பணம் கொடுப்பான் என்று அவன் நம்பியிருந்தான்; ஆகையால் அவனை அடிக்கடி அழைப்பித்து அவனோடு பேசிக்கொண்டிருந்தான்.

²⁷இரண்டு வருடங்கள் சென்றபின், பொர்க்கியு பெஸ்து பேலிக்ஸின் ஸ்தானத்துக்கு வந்தான். யூதர்களைப் பிரியப்படுத்த விரும்பி, பேலிக்ஸ் பவுலைச் சிறையிலே விட்டுவைத்தான்.