ሐዋርያት ሥራ 24

24 ¹ከአምስት ቀን በኋላ ሊቀ ካህናቱ ሐናንያ ከጥቂት ሽማግሌዎችና ጠርጠሉስ ከሚባል ጠበቃ ጋራ ወረደ፤ በገዥውም ፊት ጳውሎስን ከሰሱት። ²ጳውሎስም በተጠራ ጊዜ ጠርጠሉስ እንዲህ ሲል ይከስሰው ጀመር፤ “በአንተ ታላቅ ሰላም እናገኛለን፤ በአንተም አርቆ አስተዋይነት ለዚህ ሕዝብ ማሻሻያ ተደርጓል፤ ³እጅግ የተከበርህ ፊሊክስ ሆይ፤ ይህን በሁሉ መንገድና በሁሉ ስፍራ በፍጹም ምስጋና እናምናለን። ⁴ነገር ግን ከዚህ በላይ እንዳላጓጉልህ፣ በጥቂት ቃላት በቸርነት እንድትሰማን እለምንሃለሁ። ⁵ይህ ሰው መቅሠፍት ሆኖ አገኘነው፤ በዓለም ዙሪያ ባሉ አይሁድ ሁሉ መካከል ሁከትን የሚያነሣሣ፣ የናዝራውያንም ኑፋቄ ዋና መሪ ነው። ⁶መቅደሱን እንኳ ለማርከስ ሞከረ፤ ስለዚህ ያዝነው። ^a a v6 በጥንታዊዎቹ ቅጂዎች እዚህ ቍጥር 7 የለም፤ በኋላ የተገለበጡት ግን እንዲህ ይጨምራሉ፤ “አዛዡ ሉስዮስ ግን መጥቶ በታላቅ ኀይል ከእጃችን ወሰደው፣” ⁸አንተ ራስህ ብትመረምረው የምንከስሰውን ሁሉ ልታውቅ ትችላለህ።”

⁹አይሁድም ይህ እንዲሁ እንደ ሆነ እያስረገጡ በክሱ ተባበሩ።

¹⁰ገዥውም እንዲናገር ጠቀሰው። ጳውሎስም እንዲህ ሲል መለሰ፤ “ለብዙ ዓመታት ለዚህ ሕዝብ ዳኛ እንደ ሆንህ ስለማውቅ፣ በደስታ ለራሴ መልስ እሰጣለሁ። ¹¹ለመስገድ ወደ ኢየሩሳሌም ከወጣሁ ጀምሮ ከዐሥራ ሁለት ቀን ያልበለጠ መሆኑን ልታረጋግጥ ትችላለህ። ¹²በመቅደስም ሆነ በምኵራቦች ወይም በከተማዋ በየትኛውም ስፍራ ከማንም ስከራከር ወይም ሕዝብ ሳነሣሣ አላገኙኝም። ¹³አሁን የሚከሱኝንም ክስ ሊያስረዱህ አይችሉም። ¹⁴ነገር ግን ይህን እመሰክርልሃለሁ፤ እነርሱ ኑፋቄ ብለው የሚጠሩትን መንገድ በመከተል የአባቶቻችንን አምላክ አመልካለሁ፤ ከሕግ ጋር የሚስማማውንና በነቢያት የተጻፈውን ሁሉ አምናለሁ። ¹⁵እነዚህ ሰዎች ራሳቸውም የሚጠብቁትን፣ ጻድቃንና ኀጥኣን እንዲሁ እንደሚነሡ፣ በአባታችን ተስፋ አለኝ። ¹⁶ስለዚህ በአባታችንና በሰዎች ፊት ንጹሕ ኅሊና ለመጠበቅ ዘወትር እተጋለሁ። ¹⁷ከብዙ ዓመታት በኋላ ለሕዝቤ ድኾች የምጽዋት ስጦታዎችንና መባዎችን ለማምጣት መጣሁ። ¹⁸በዚህም መካከል በመቅደስ ነጽቼ ሳለሁ አገኙኝ፤ ሕዝብም ሁከትም አልነበረም። ¹⁹በእኔ ላይ አንዳች ነገር ቢኖራቸው፣ ከእስያ የመጡ አንዳንድ አይሁድ ለመክሰስ በአንተ ፊት መቅረብ ይገባቸው ነበር። ²⁰ወይም በሸንጎው ፊት በቆምሁ ጊዜ ምን በደል እንዳገኙብኝ እነዚህ ሰዎች ራሳቸው ይናገሩ፤ ²¹በመካከላቸው ቆሜ ‘ዛሬ በእናንተ ፊት የምፋረደው ስለ ሙታን ትንሣኤ ነው’ ብዬ የጮኽኋትን ይህችን አንዲት ቃል ብቻ ቢሆን እንጂ።”

²²ስለ መንገዱም በመጠኑ ዐዋቂ የሆነው ፊሊክስ፣ “አዛዡ ሉስዮስ በመጣ ጊዜ ነገራችሁን እወስናለሁ” ብሎ ችሎቱን አስተላለፈ። ²³የመቶ አለቃውም ጳውሎስን እንዲጠብቅ፣ ነገር ግን ጥቂት ነጻነት እንዲሰጠው፣ ከወዳጆቹም ማንም እንዳያገለግለው እንዳይከለክል አዘዘ።

²⁴ከጥቂት ቀን በኋላ ፊሊክስ አይሁዳዊት ከሆነችው ከሚስቱ ከድሩስላ ጋራ መጥቶ ጳውሎስን አስጠራው፤ በክርስቶስ ኢየሱስም ስለ ማመን ሲናገር ሰማው። ²⁵ጳውሎስም ስለ ጽድቅ፣ ስለ ራስን መግዛትና ስለሚመጣው ፍርድ ሲናገር፣ ፊሊክስ ፈርቶ፣ “ለአሁኑ ይበቃል፤ ሂድ፤ ጊዜ ባገኝ ጊዜ እጠራሃለሁ” አለ። ²⁶ጳውሎስም ገንዘብ ይሰጠው ዘንድ ተስፋ ያደርግ ነበር፤ ስለዚህ ብዙ ጊዜ እያስጠራው ያነጋግረው ነበር።

²⁷ከሁለት ዓመት በኋላ ጶርቅዮስ ፊስጦስ ፊሊክስን ተካ። ፊሊክስም አይሁድን ደስ ለማሰኘት ወዶ ጳውሎስን በወኅኒ ትቶት ሄደ።