ሐዋርያት ሥራ 23

23 ¹ጳውሎስም ሸንጎውን ትኵር ብሎ ተመለከተና፣ “ወንድሞች ሆይ፤ እስከ ዛሬ ድረስ በአባታችን ፊት በመልካም ኅሊና ኖሬአለሁ” አለ።

²ሊቀ ካህናቱ ሐናንያም በአጠገቡ የቆሙትን ጳውሎስን በአፉ እንዲመቱት አዘዛቸው።

³ጳውሎስም፣ “አንተ በኖራ የተለሰንክ ግድግዳ፤ አባታችን አንተን ይመታሃል! በሕግ ልትፈርድብኝ ተቀምጠሃል፤ ነገር ግን እንድመታ በማዘዝ ሕጉን ትተላለፋለህን?” አለው።

⁴በአጠገቡ የቆሙትም፣ “የአባታችንን ሊቀ ካህናት ትሳደባለህን?” አሉ።

⁵ጳውሎስም፣ “ወንድሞች ሆይ፤ ሊቀ ካህናት መሆኑን አላወቅሁም ነበር፤ ‘የሕዝብህን አለቃ በክፉ አትናገር’ ተብሎ ተጽፎአልና” አለ።

⁶ጳውሎስም ከፊሎቹ ሰዱቃውያን ከፊሎቹም ፈሪሳውያን መሆናቸውን ዐውቆ በሸንጎው ውስጥ፣ “ወንድሞች ሆይ፤ እኔ ፈሪሳዊ፣ የፈሪሳውያን ልጅ ነኝ፤ ስለ ሙታን ተስፋና ትንሣኤ እየተዳኘሁ ነው!” ብሎ ጮኸ።

⁷ይህን ባለ ጊዜ፣ በፈሪሳውያንና በሰዱቃውያን መካከል ክርክር ተነሣ፤ ጉባኤውም ተከፈለ። ⁸ሰዱቃውያን ትንሣኤ የለም፣ መልአክም ሆነ መንፈስ የለም ይላሉና፤ ፈሪሳውያን ግን ሁሉንም ያምናሉ። ⁹ታላቅ ጩኸትም ሆነ። ከፈሪሳውያን ወገን የሆኑ አንዳንድ ጸሐፍት ተነሥተው አጥብቀው ተከራከሩ፤ “በዚህ ሰው ላይ ምንም ክፉ ነገር አላገኘንም፤ መንፈስ ወይም መልአክ ተናግሮት ቢሆንስ?” አሉ። ¹⁰ክርክሩም እየበረታ በመጣ ጊዜ፣ የሻለቃው አለቃ ጳውሎስ በእነርሱ እንዳይቈራረጥ ፈርቶ ወታደሮቹ ወርደው ከመካከላቸው ነጥቀው ወደ ሰፈሩ እንዲያመጡት አዘዘ።

¹¹በሚቀጥለውም ሌሊት ጌታችን ኢየሱስ በአጠገቡ ቆሞ፣ “አይዞህ! በኢየሩሳሌም ስለ እኔ እንደ መሰከርህ፣ እንዲሁ በሮምም ትመሰክር ዘንድ ይገባሃል” አለው።

በጳውሎስ ሕይወት ላይ የተጠነሰሰ ሴራ

¹²ሲነጋም አይሁድ ተማክረው ጳውሎስን እስኪገድሉ ድረስ እንዳይበሉና እንዳይጠጡ ተማሉ። ¹³በዚህም ሴራ የተባበሩት ከአርባ የሚበልጡ ነበሩ። ¹⁴ወደ ካህናት አለቆችና ወደ ሽማግሌዎች ሄደው፣ “ጳውሎስን እስክንገድል ድረስ ምንም ነገር እንዳንቀምስ በጽኑ መሐላ ራሳችንን አስረናል። ¹⁵እንግዲህ አሁን እናንተና ሸንጎው ጕዳዩን ጠለቅ ብላችሁ ልትመረምሩ እንደምትፈልጉ አስመስላችሁ፣ የሻለቃው አለቃ ወደ እናንተ እንዲያወርደው ለምኑት፤ እኛም ሳይደርስ ልንገድለው ተዘጋጅተናል” አሉ።

¹⁶የጳውሎስ እኅት ልጅ ግን ይህን ማድፈጥ ሰምቶ ሄዶ ወደ ሰፈሩ ገባና ለጳውሎስ ነገረው። ¹⁷ጳውሎስም ከመቶ አለቆች አንዱን ጠርቶ፣ “ይህን ጐበዝ ወደ ሻለቃው አለቃ ውሰደው፤ የሚነግረው ነገር አለውና” አለ።

¹⁸እርሱም ወደ ሻለቃው አለቃ ወስዶት፣ “እስረኛው ጳውሎስ ጠርቶኝ ይህን ጐበዝ ወደ አንተ እንዳመጣ ለመነኝ፤ የሚነግርህ ነገር አለውና” አለ።

¹⁹የሻለቃው አለቃም እጁን ይዞ ለብቻው ወደ አንድ ዳር አግልሎ፣ “የምትነግረኝ ነገር ምንድን ነው?” ብሎ ጠየቀው።

²⁰እርሱም፣ “አይሁድ ስለ ጳውሎስ ጠለቅ ብለው ለመጠየቅ እንዳሰቡ አስመስለው፣ ነገ ወደ ሸንጎው እንድታወርደው ሊለምኑህ ተስማምተዋል። ²¹አንተ ግን አትስማቸው፤ ከአርባ የሚበልጡ ሰዎቻቸው ሊያደፍጡት ይጠብቁታልና። እስኪገድሉት ድረስ እንዳይበሉና እንዳይጠጡ በመሐላ ራሳቸውን አስረዋል፤ አሁንም ተዘጋጅተው የአንተን ፈቃድ ይጠብቃሉ” አለ።

²²የሻለቃው አለቃም ጐበዙን፣ “ይህን ለእኔ እንደ ነገርከኝ ለማንም አትንገር” ብሎ አዝዞ አሰናበተው።

አብ ምስክሩን ይጠብቃል

²³ከዚያም ከመቶ አለቆች ሁለቱን ጠርቶ፣ “ወደ ቂሳርያ የሚሄዱ ሁለት መቶ ወታደሮች፣ ሰባ ፈረሰኞችና ሁለት መቶ ጦረኞች ዛሬ ሌሊት በሦስት ሰዓት አዘጋጁ” አለ። ²⁴ጳውሎስንም ወደ አገረ ገዥው ወደ ፊሊክስ በደኅና ያደርሱት ዘንድ የሚጫኑበት መጫኛ እንዲያዘጋጁ ነገራቸው። ²⁵እንዲህም የሚል ደብዳቤ ጻፈ፤

²⁶“ከቀላውዴዎስ ሉስዮስ፤ ለክቡር አገረ ገዥ ፊሊክስ፤ ሰላም።

²⁷አይሁድ ይህን ሰው ይዘው ሊገድሉት ባሉ ጊዜ፣ የሮም ዜጋ መሆኑን ዐውቄ ከወታደሮቼ ጋር ደርሼ አዳንሁት። ²⁸በእርሱም ላይ ያቀረቡበትን ክስ ማወቅ ፈልጌ ወደ ሸንጎአቸው አወረድሁት። ²⁹ስለ ሕጋቸው ጥያቄ ተከሶ አገኘሁት እንጂ ሞት ወይም እስራት የሚያስገባ ክስ አልነበረበትም። ³⁰በዚህም ሰው ላይ ሴራ እንዳለ በተነገረኝ ጊዜ፣ ወዲያውኑ ወደ አንተ ላክሁት፤ ከሳሾቹም በአንተ ፊት የሚከሱበትን እንዲያቀርቡ አዘዝሁ።”

³¹ወታደሮቹም እንደ ታዘዙት ጳውሎስን ይዘው በሌሊት ወደ አንጢጳጥሪስ አደረሱት። ³²በማግሥቱም ፈረሰኞቹ ከእርሱ ጋር እንዲሄዱ ትተው እነርሱ ወደ ሰፈሩ ተመለሱ። ³³ፈረሰኞቹም ቂሳርያ ደርሰው ደብዳቤውን ለአገረ ገዥው ሰጡ፤ ጳውሎስንም በፊቱ አቀረቡ። ³⁴አገረ ገዥውም አንብቦ ከየትኛው አውራጃ እንደ ሆነ ጠየቀ፤ ከኪልቅያም እንደ ሆነ ዐወቀ፤ ³⁵“ከሳሾችህ በመጡ ጊዜ እሰማሃለሁ” አለው። በሄሮድስም ግቢ ውስጥ ተጠብቆ እንዲቈይ አዘዘ።