ግብሪ ሃዋርያት 23 FHB Father's Heart Bible™

23 ¹ጳውሎስ ነቲ መጋባእያ ኣትኲሩ ጠሚቱ ከምዙይ በለ፦ “ኣቱም ኣሕዋት፥ ክሳዕ ሎሚ ብኹሉ ፅቡቕ ሕሊና ኣብ ቅድሚ ኣቦና ነቢረ እየ።”

²ሊቀ ካህናት ሃናንያ ከዓ ነቶም ኣብ ጥቓኡ ደው ኢሎም ዝነበሩ ንጳውሎስ ኣብ ኣፉ ኽሃርምዎ ኣዘዞም።

³ጳውሎስ ድማ “ኣታ ዝተለበጠ መንደቕ! ኣቦና ክሃርመካ እዩ። ንስኻ ብሕጊ ኽትፈርደኒ ተቐሚጥካ እናለኻ፥ ሕጊ ጥሒስካ ኽሃርሙኒ ትእዝዝ ዲኻ?” በሎ።

⁴እቶም ኣብ ጥቓኡ ደው ኢሎም ዝነበሩ ድማ “ንሊቀ ካህናት ኣቦና ክትፀርፍ ትደፍር ዲኻ?” በልዎ።

⁵ጳውሎስ ከዓ “ኣቱም ኣሕዋት፥ ሊቀ ካህናት ምዃኑ ኣይፈለጥኩን ነይረ፤ ‘ንሹም ህዝብኻ ኽፉእ ኣይትዛረብ’ ኢሉ ተፅሒፉ ኣሎ እዩ እሞ” በለ።

⁶ጳውሎስ ከዓ ገሊኦም ሰዱቃውያን ገሊኦም ድማ ፈሪሳውያን ምዃኖም ፈሊጡ፥ ኣብቲ መጋባእያ ዓው ኢሉ “ኣቱም ኣሕዋት፥ ኣነ ፈሪሳዊ፥ ወዲ ፈሪሳውያን እየ። ብዛዕባ ተስፋን ትንሳኤ ሙታንን እየ ዝፍረድ ዘለኹ!” ኢሉ ጨደረ።

⁷እዙይ ምስ በለ፥ ኣብ መንጎ ፈሪሳውያንን ሰዱቃውያንን ክርክር ተልዓለ፤ እቲ ጉባኤ ኸዓ ተመቓቐለ። ⁸ሰዱቃውያን ትንሳኤ የለን፥ መልኣኽ ኮነ መንፈስ የለን ይብሉ እዮም እሞ፤ ፈሪሳውያን ግና ነዙይ ኵሉ ይኣምኑ እዮም። ⁹ዓብዪ ወኻዕታ ድማ ተልዓለ። ገሊኦም መምህራን ሕጊ ኻብ ወገን ፈሪሳውያን ተሲኦም ኣበርቲዖም “ኣብዝ ሰብኣይ እዙይ ገለ ኽፉእ እኳ ኣይንረክብን። መንፈስ ወይ መልኣኽ እንተ ተዛሪብዎኸ?” ኢሎም ተኻትዑ። ¹⁰እቲ ክርክር እናበርትዐ ምስ ከደ፥ እቲ ሓለቓ ጳውሎስ ብኣኣቶም ከይቕዳደድ ፈሪሑ፥ ነቶም ወታደራት ወሪዶም ካብ ማእኸሎም መንዚዖም ናብ ሰፈር ወታደራት ከእትውዎ ኣዘዞም።

¹¹ንፅባሒቱ ለይቲ ድማ ጐይታና ኢየሱስ ኣብ ጥቓኡ ደው ኢሉ “ኣጆኻ! ከምቲ ኣብ ኢየሩሳሌም ብዛዕባይ ዝመስከርካ፥ ከምኡ ኣብ ሮሜ ኸዓ ክትምስክር ይግብኣካ እዩ” በሎ።

ኣብ ልዕሊ ጳውሎስ ዝተኣልመ ውዲት

¹²ምስ ወግሐ ድማ ኣይሁድ ተመሳጢሮም፥ ንጳውሎስ ክሳዕ ዝቐትልዎ እንተይበልዑን እንተይሰተዩን ኢሎም መሓሉ። ¹³ነዝ ውዲት እዙይ ዝኣተዉ ኻብ ኣርብዓ ዝበዝሑ ሰባት ነበሩ። ¹⁴ናብ ሊቃነ ካህናትን ሽማግለታትን ከይዶም “ንጳውሎስ ክሳዕ እንቐትሎ ገለ እኳ ኸይንጥዕም ብብርቱዕ መሓላ ተማሒልና ኣለና። ¹⁵ሕዚ ኸዓ ንስኻትኩምን እቲ መጋባእያን ነገሩ ኣፅቢቕኩም ክትምርምርዎ ከም እትደልዩ ኣምሲልኩም፥ ናባኻትኩም ከውርዶ ነቲ ሓለቓ ለምንዎ። ንሕና ኸዓ ከይቐረበ ከሎ ኽንቐትሎ ተዳሊና ኣለና።”

¹⁶እቲ ወዲ ሓፍቲ ጳውሎስ ግና፥ ብዛዕባ እቲ ድብያ ምስ ሰምዐ፥ ከይዱ ናብ ሰፈር ወታደራት ኣትዩ ንጳውሎስ ነገሮ። ¹⁷ጳውሎስ ከዓ ሓደ ሓለቓ ሚእቲ ፀዊዑ “ነዝ መንእሰይ እዙይ ናብ ሓለቓ ወስዶ፤ ዝነግሮ ነገር ኣለዎ እዩ” በሎ።

¹⁸ንሱ ድማ ናብ ሓለቓ ወሲዱ “እቲ እሱር ጳውሎስ ፀዊዑኒ ነዝ መንእሰይ እዙይ ናባኻ ኸምፅኦ ለሚኑኒ፤ ዝነግረካ ነገር ኣለዎ” በሎ።

¹⁹እቲ ሓለቓ ኸዓ ኢዱ ሒዙ፥ ንበይኑ ገለል ኣቢሉ “እንታይ ዝትነግረኒ ኣለካ?” ኢሉ ጠየቖ።

²⁰ንሱ ድማ “ኣይሁድ ብዛዕባ ጳውሎስ ኣፅቢቖም ክጥይቑ ኸም ዝደልዩ ኣምሲሎም፥ ፅባሕ ናብቲ መጋባእያ ኸተውርዶ ኽልምኑኻ ተሰማሚዖም ኣለዉ። ²¹ንስኻ ግና ኣይትእመኖም፤ ኻብ ኣርብዓ ዝበዝሑ ሰባቶም ክድብይዎ ይፅበዩ ኣለዉ እዮም እሞ። ክሳዕ ዝቐትልዎ ኣይንበልዕን ኣይንሰትን ኢሎም ተማሒሎም ኣለዉ፤ ሕዚ ድማ ተዳልዮም መልሲ ካባኻ ይፅበዩ ኣለዉ።”

²²እቲ ሓለቓ ኸዓ ነቲ መንእሰይ “ነዙይ ከም ዝነገርካኒ ንሓደ እኳ ኣይትንገር” ኢሉ ኣዚዙ ሰደዶ።

ኣቦና ንምስክሩ ይሕልዎ

²³ሽዑ ኽልተ ሓለቑ ሚእቲ ፀዊዑ “ናብ ቂሳርያ ክኸዱ ክልተ ሚእቲ ወታደራትን ሰብዓ ፈረሰኛታትን ክልተ ሚእቲ ኵናተኛታትን፥ ሎሚ ለይቲ ኣብ ሰዓት ትሽዓተ ኣዳልዉ” በሎም። ²⁴ንጳውሎስ ዝወጥምዎ እንስሳ ኸዳልዉ፥ ናብ ሹም ፊሊክስ ብደሓን ከብፅሕዎ ኸዓ ነገሮም። ²⁵ከምዙይ ዝብል መልእኽቲ ድማ ፀሓፈ፦

²⁶“ቀላውዴዎስ ሉስያስ፥ ናብ ክቡር ሹም ፊሊክስ፤ ሰላም።

²⁷ነዝ ሰብኣይ እዙይ ኣይሁድ ሒዞም ክቐትልዎ ተቐራሪቦም እንተለዉ፥ ሮማዊ ዜጋ ምዃኑ ፈሊጠ ምስ ሰራዊተይ መፂአ ኣድሓንክዎ። ²⁸እቲ ዝኸስዎ ዝነበሩ ነገር ክፈልጥ ስለ ዝደለኹ ኸዓ፥ ናብቲ መጋባእያኦም ኣውረድክዎ። ²⁹ብዛዕባ ጥያቐታት ሕጎም ከም ዝተኸሰሰ ረኸብክዎ፤ ሞት ወይ ማእሰርቲ ዘግብሮ ኽሲ ግና ኣይረኸብኩሉን። ³⁰ኣብ ልዕሊ እዝ ሰብኣይ ውዲት ከም ዝተመሳጠረ ምስ ተነገረኒ፥ ብኡ ንብኡ ናባኻ ሰደድክዎ፤ ከሰስቱ ኸዓ ኣብ ቅድሜኻ ዘለዎም ነገር ክዛረቡ ኣዘዝክዎም።”

³¹እቶም ወታደራት ከዓ ከምቲ ዝተኣዘዝዎ፥ ንጳውሎስ ወሲዶም ብለይቲ ናብ ኣንቲጳጥሪስ ኣብፅሕዎ። ³²ንፅባሒቱ ኸዓ ነቶም ፈረሰኛታት ምስኡ ኽኸዱ ሓዲጎም፥ ንሳቶም ናብ ሰፈር ወታደራት ተመለሱ። ³³እቶም ፈረሰኛታት ናብ ቂሳርያ በፂሖም፥ ነቲ መልእኽቲ ነቲ ሹም ኣረከብዎ፤ ንጳውሎስ ድማ ኣብ ቅድሚኡ ኣቐረብዎ። ³⁴እቲ ሹም ከዓ ነቲ መልእኽቲ ኣንቢቡ፥ ካብ ኣየናይ ሃገር ምዃኑ ጠየቖ፤ ካብ ኪልቅያ ምዃኑ ድማ ምስ ፈለጠ፥ ³⁵“ከሰስትኻ ምስ መፁ ኽሰምዓካ እየ” በሎ። ኣብ ቤተ መንግስቲ ሄሮድስ ተሓልዩ ኽፅናሕ ድማ ኣዘዘ።