அப்போஸ்தலர் 23

23 ¹பவுல் ஆலோசனைச் சங்கத்தை உற்றுப்பார்த்து, “சகோதரரே, இந்நாள்வரை நான் எங்கள் பிதாவுக்கு முன்பாக முற்றிலும் நல்மனச்சாட்சியோடே வாழ்ந்து வந்திருக்கிறேன்” என்றான்.

²பிரதான ஆசாரியனாகிய அனனியா, பவுலின் வாயில் அறையும்படி அவனருகே நின்றவர்களுக்குக் கட்டளையிட்டான்.

³அப்பொழுது பவுல் அவனை நோக்கி, “வெள்ளையடிக்கப்பட்ட சுவரே, எங்கள் பிதா உன்னை அறைவார்! நியாயப்பிரமாணத்தின்படி என்னை நியாயந்தீர்க்க நீ அங்கே உட்கார்ந்திருக்கிறாய்; ஆனாலும் என்னை அறையும்படி கட்டளையிட்டு நியாயப்பிரமாணத்தை மீறுகிறாயே?” என்றான்.

⁴அருகே நின்றவர்கள், “எங்கள் பிதாவின் பிரதான ஆசாரியனை நிந்திக்கத் துணிகிறாயா?” என்றார்கள்.

⁵அதற்குப் பவுல், “சகோதரரே, இவன் பிரதான ஆசாரியன் என்று நான் அறியேன்; ஏனெனில், ‘உன் ஜனத்தின் அதிபதியைக் குறித்துத் தீங்காய்ப் பேசாதே’ என்று வேதத்தில் எழுதியிருக்கிறதே” என்றான்.

⁶அவர்களில் ஒரு பங்கினர் சதுசேயர் என்றும், மற்றொரு பங்கினர் பரிசேயர் என்றும் அறிந்த பவுல், ஆலோசனைச் சங்கத்தில், “சகோதரரே, நான் ஒரு பரிசேயன், பரிசேயருடைய மகன். மரித்தோரின் உயிர்த்தெழுதலைக் குறித்த நம்பிக்கையின்பொருட்டே நான் நியாயம் விசாரிக்கப்படுகிறேன்!” என்று சத்தமிட்டான்.

⁷இதை அவன் சொன்னபோது, பரிசேயருக்கும் சதுசேயருக்கும் இடையே வாக்குவாதம் உண்டாகி, சபை பிரிந்துபோயிற்று. ⁸ஏனெனில், உயிர்த்தெழுதல் இல்லை என்றும், தூதனும் ஆவியும் இல்லை என்றும் சதுசேயர் சொல்லுகிறார்கள்; பரிசேயரோ இவை எல்லாவற்றையும் ஒப்புக்கொள்ளுகிறார்கள். ⁹பேரிரைச்சல் உண்டாயிற்று. பரிசேயர் பக்கத்திலிருந்த சில வேதபாரகர் எழுந்து கடுமையாக வாதாடி, “இந்த மனிதனிடத்தில் நாங்கள் தவறு எதையும் காணோம். ஒரு ஆவியாவது ஒரு தூதனாவது அவனிடம் பேசியிருந்தால் என்ன?” என்றார்கள். ¹⁰வாக்குவாதம் மிகக் கடுமையாகவே, பவுல் அவர்களால் பீறுண்டு போவானோ என்று பயந்து, சேர்வைக்காரர் இறங்கிச்சென்று அவனை அவர்கள் நடுவிலிருந்து பிடித்து, கோட்டைக்குள் கொண்டுவரும்படி படைத்தலைவன் கட்டளையிட்டான்.

¹¹மறுநாள் இரவில் நம்முடைய கர்த்தராகிய இயேசு அவன் அருகே நின்று, “திடன்கொள்! எருசலேமில் என்னைக்குறித்து நீ சாட்சி கொடுத்ததுபோல, ரோமாபுரியிலும் நீ சாட்சி கொடுக்கவேண்டும்” என்றார்.

பவுலின் உயிருக்கு எதிரான சதி

¹²பொழுதுவிடிந்தபோது, யூதர் சதிசெய்து, பவுலைக் கொல்லும்வரை புசிப்பதுமில்லை குடிப்பதுமில்லை என்று ஆணையிட்டுக்கொண்டார்கள். ¹³இந்தச் சதியில் சேர்ந்துகொண்டவர்கள் நாற்பது பேருக்கு மேலிருந்தார்கள். ¹⁴அவர்கள் பிரதான ஆசாரியரிடத்திலும் மூப்பரிடத்திலும் போய், “பவுலைக் கொல்லும்வரை யாதொன்றையும் ருசிபார்ப்பதில்லை என்று கடினமான ஆணையிட்டு நம்மைக் கட்டிக்கொண்டோம். ¹⁵ஆகையால், அவனுடைய காரியத்தை இன்னும் திட்டமாய் விசாரிக்கப்போகிறவர்கள்போல, நீங்களும் ஆலோசனைச் சங்கமும் அவனை உங்களிடத்தில் கொண்டுவரும்படி படைத்தலைவனிடம் கேளுங்கள். அவன் வருமுன்னே அவனைக் கொல்ல நாங்கள் ஆயத்தமாயிருக்கிறோம்” என்றார்கள்.

¹⁶ஆனால் பவுலின் சகோதரியின் மகன் இந்தச் சதியைக் கேள்விப்பட்டு, கோட்டைக்குள் போய் நுழைந்து, பவுலுக்கு அறிவித்தான். ¹⁷அப்பொழுது பவுல் நூற்றுக்கு அதிபதிகளில் ஒருவனை அழைத்து, “இந்த வாலிபனைப் படைத்தலைவனிடத்தில் கொண்டுபோ; இவன் அவருக்கு அறிவிக்கவேண்டியது ஒன்று உண்டு” என்றான்.

¹⁸அவன் அவனைப் படைத்தலைவனிடத்தில் கொண்டுபோய், “காவலில் இருக்கிற பவுல் என்னை அழைத்து, உம்மிடத்தில் அறிவிக்கவேண்டியது ஒன்று உள்ள இந்த வாலிபனை உம்மிடம் கொண்டுவரும்படி கேட்டுக்கொண்டான்” என்றான்.

¹⁹படைத்தலைவன் அவன் கையைப் பிடித்து, தனியே ஒருபுறமாய் அழைத்துச்சென்று, “நீ எனக்கு அறிவிக்கவேண்டியது என்ன?” என்று கேட்டான்.

²⁰அதற்கு அவன், “பவுலைக் குறித்து இன்னும் திட்டமாய் விசாரிக்கப்போகிறதுபோல, நாளை அவனை ஆலோசனைச் சங்கத்திற்கு அழைத்துவரும்படி உம்மைக் கேட்டுக்கொள்ள யூதர் தீர்மானித்திருக்கிறார்கள். ²¹நீர் அவர்களுக்குச் செவிகொடாதேயும்; ஏனெனில் அவர்களில் நாற்பது பேருக்கு மேற்பட்டவர்கள் அவனுக்காகப் பதிவிருந்து காத்திருக்கிறார்கள். அவனைக் கொல்லும்வரை புசிப்பதுமில்லை குடிப்பதுமில்லை என்று ஆணையிட்டுக்கொண்டு, இப்பொழுது உம்முடைய சம்மதத்தை எதிர்பார்த்து ஆயத்தமாயிருக்கிறார்கள்” என்றான்.

²²அப்பொழுது படைத்தலைவன், “நீ இதை எனக்கு அறிவித்ததை ஒருவருக்கும் சொல்லாதே” என்று கட்டளையிட்டு, அந்த வாலிபனை அனுப்பிவிட்டான்.

தம் சாட்சியைப் பிதா காக்கிறார்

²³பின்பு அவன் நூற்றுக்கு அதிபதிகளில் இரண்டு பேரை அழைத்து, “இன்று இரவு ஒன்பதாம் மணிநேரத்திற்குள் செசரியா பட்டணத்திற்குப் போகும்படி இருநூறு போர்ச்சேவகரையும், எழுபது குதிரைவீரரையும், இருநூறு ஈட்டிக்காரரையும் ஆயத்தப்படுத்துங்கள்” என்றான். ²⁴பவுலை ஏற்றி, தேசாதிபதியாகிய பேலிக்ஸிடத்தில் பத்திரமாய்க் கொண்டுசேர்க்கும்படி வாகனங்களை ஆயத்தப்படுத்தச் சொன்னான். ²⁵மேலும் அவன் பின்வருமாறு ஒரு நிருபத்தையும் எழுதினான்:

²⁶“கிலவுதியுஸ் லீசியா என்பவன், கனம்பொருந்திய தேசாதிபதியாகிய பேலிக்ஸுக்கு வாழ்த்துதல்.

²⁷இந்த மனிதனை யூதர் பிடித்து, கொலைசெய்யப்போகையில், இவன் ஒரு ரோமன் என்று அறிந்து, நான் என் சேவகரோடு போய் இவனைத் தப்புவித்தேன். ²⁸அவர்கள் இவன்மேல் சாட்டின குற்றத்தை அறியவிரும்பி, இவனை அவர்களுடைய ஆலோசனைச் சங்கத்திற்குக் கொண்டுபோனேன். ²⁹அப்பொழுது அவர்களுடைய நியாயப்பிரமாணத்துக்குரிய தர்க்கங்களைக் குறித்து இவன்மேல் குற்றஞ்சாட்டப்பட்டதைத்தவிர, மரணத்துக்காவது கட்டுண்டிருப்பதற்காவது தகுந்த குற்றம் ஒன்றையும் இவனிடத்தில் நான் காணவில்லை. ³⁰இந்த மனிதனுக்கு விரோதமாய்ச் செய்யப்பட்ட சதியைக் குறித்து எனக்கு அறிவிக்கப்பட்டவுடனே, இவனை உம்மிடத்தில் அனுப்பினேன்; இவன்மேல் குற்றஞ்சாட்டுகிறவர்களும் உமக்கு முன்பாக இவனுக்கு விரோதமாய்ச் சொல்லும்படி கட்டளையிட்டேன். வாழ்க” என்று எழுதினான்.

³¹அப்படியே போர்ச்சேவகர், தங்களுக்குக் கட்டளையிடப்பட்டபடி பவுலைக் கொண்டு, இராத்திரியிலே அந்திப்பத்திரி பட்டணத்திற்கு அழைத்துக்கொண்டுபோனார்கள். ³²மறுநாள் குதிரைவீரரை அவனோடே போகவிட்டு, மற்றவர்கள் கோட்டைக்குத் திரும்பினார்கள். ³³அந்தக் குதிரைவீரர் செசரியாவுக்குப் போய், நிருபத்தைத் தேசாதிபதியிடத்தில் ஒப்புவித்து, பவுலையும் அவனுக்கு முன்பாக நிறுத்தினார்கள். ³⁴தேசாதிபதி அதை வாசித்து, இவன் எந்த நாட்டைச் சேர்ந்தவன் என்று விசாரித்து, சிலிசியா நாட்டைச் சேர்ந்தவன் என்று அறிந்து, ³⁵“உன்மேல் குற்றஞ்சாட்டுகிறவர்கள் வந்தபின்பு உன் காரியத்தைக் கேட்பேன்” என்று சொல்லி, ஏரோதுவின் அரமனையில் அவனைக் காவல்பண்ணும்படி கட்டளையிட்டான்.