Paulo eng' Taitap Kapkirwooget
Kibar Paulo eng' kutit eng' kirwooget, ak kobetaks kapkirwooget ye komwa ng'eetyeetap che kibek, kowaachei Pharisaik ak Sadukaik icheegei. Eng' kemounooto komwachi Jeso kole koneeti eng' Rome. Kayan murenik artam kole kobar ineendet; kogas weeriitap tupchennyi niito, ak koip murenigap lugeet ineendet eng' kemout.
23 1Ki chiilji kong' Paulo kapkirwooget, kole, “Tupchosyek, ki asap saboondanyu eng' taitap Kwandanyo eng' muguleldo ne myee komugul agoi raini.”
2Ki ng'at tisiindet ne oo Anania piik che tonondos eng' ole neegitee ineendet, kobar Paulo eng' kutit.
3Ki leenji Paulo ineendet, kole, “Kobar inyee Kwandanyo, inyee lukeet ne kagilael! Itebee olooto si ikirwokto anee eng' ng'atuutik, ago ipel ng'atuutik ye ing'at kobara?”
4Ki le piik che tonondos olooto, kole, “Iboiisye iteweeri tisiindet ne oo ne po Kwandanyo?”
5Ki le Paulo, kole, “Tupchosyek, ki ma anai ale tisiindet ne oo ineendet; amu mwaei siruutyet kole, ‘Amat imwachi yaityet pounindetap piiguk.’”
6Ki nai Paulo kole alak ko Sadukaik, alak ko Pharisaik, ak kowaachei eng' kapkirwooget, kole, “Tupchosyek, Pharisaindet anee, weeriitap Pharisaik. Kikirwokto anee agobo mogornateet ak ng'eetyeetap che kibek!”
7Ye ki mwa nooto, ko ki ng'eet tiyet eng' kwenutap Pharisaik ak Sadukaik, ak ki betaksei tuiyet. 8Amu mwaei Sadukaik kole ma mi ng'eetyeet, ama mi angeet anan kabuuset, ago iboortoi Pharisaik tugul chooto. 9Ki ng'eet polateet ne oo. Ki tonon siriik alak che po Pharisaik, ak kiboljin miising', kole, “Ma kinyoorchi kiy age tugul ne ya chiichi. Ngo king'alaalji kabuuset anan angeet?” 10Ye ki ng'waan tiyet, ko ki iywei kiptaiyatap lugeet kole kobetaksei Paulo icheek, ak ki ng'at asigarik koba ng'wony, konam ineendet eng' kwenunnywa, ak koip koba koot ne po asigarik.
11Eng' kemutyet ne isubu, ki tonon Kiptaiyannyo Jeso eng' ye neegitee ineendet, ak kole, “Igimitkei! Ko uu ye ki ibaoryan agobo anee eng' Jerusalem, ko uu nooto kanyool ibaoryan ko eng' Rome.”
Perberindo ne Agobo Saboondap Paulo
12Ye kagoeech, kochaamso Yahudik ak koayan kole ma oomei anan koee agoi kebar Paulo. 13Ki mi che siirei artam che ki chut perberindonooto. 14Ki pa icheek tisiik che eecheen ak poisyek, kole, “Ki kiitunegei eng' kayasyoet ne oo kole ma kichamchami kiy age tugul agoi kebar Paulo. 15Nooto anyun, okweek ak kapkirwooget, osoom kiptaiyatap lugeet koityi okweek ineendet, ko uu ye omache ogeer ng'aleekyik komyee. Ki kagechobchegei si kebar ineendet kotom koit.”
16Ago kingo kas weeriitap chepkametap Paulo agobo suryet, kwo ak kochut koot ne po asigarik, ak komwachi Paulo. 17Ki guur Paulo kiptaiyatap pogol age, kole, “Ib weeriini ne ming'in kiptaiyatap lugeet; amu tinyei kiy ne mwachin.”
18Ki ib anyun ineendet kiptaiyatap lugeet, kole, “Ki guurwa Paulo chiito ne mi korgoreet, ak kosoomwa aib weeriini ne ming'in inyee; amu tinyei kiy ne mwachin.”
19Ki nam kiptaiyatap lugeet eunnyi, ak komut taban eng' ung'oot, ak koteep, kole, “Nee ne itinye ne imwachina?”
20Ki le ineendet, kole, “Ki kagochamyechigei Yahudik kosoomin koituu Paulo kapkirwooget mutai, koyaegei kole omache oteep agobo ineendet komyee. 21Amat iepchi iit icheek; amu mi piikwak che siirei artam che riibei ineendet eng' suryet. Ki kiitunegei eng' kayasyoet kole ma oomei anan koee agoi kobar ineendet, ak nguno ko kagechobchegei, koriibei chamnateng'ung'.”
22Ki iyookto kiptaiyatap lugeet weeriit ne ming'in, ak kong'at ineendet, kole, “Amat imwachi chii age tugul ale kiiboorwa ng'olyoondoni.”
Siisei Kwanda Paoryannyi
23Ki guur anyun kiptaiyosyegap pogol aeng', kole, “Ochopchi asigarik pogol aeng' koba Kaisarea, ak piik che laanyei farasiisyek kongoogooywok, ak piik che tinyei ng'otwek pogol aeng', eng' saaisyek tisap eng' kemutyet.” 24Ki leenji icheek kochopchi Paulo farasiisyek che ilaanye, si koip ineendet komyee kwo pounindet Felix. 25Ak ki sir parweet ne le ko uu ni:
26“Claudio Lisia, kisirchini pounindet ne oo Felix: Chamge.
27Ki nam Yahudik chiichi ak kichomche kobar ineendet, ago ye ki anyo kobooto asigarikyuk, asar ineendet, amu ki anai ale ko chiitap Rome. 28Amu ki amache anai charu ne ibini ineendet, ki aib ineendet koba kapkirwoogennywa. 29Ki anyoor ineendet koteenegetai agobo teebutik che po ng'atuutikwak, ago ma tinyei charu ne nyoljin meet anan korgoreet. 30Ye ki kimwawa agobo perberindo ne po chiichooto, ki ayookto ineendet inyee eng' yooto, ak ang'at kora che teenegei ineendet komwa ng'aleekwak agobo ineendet eng' taing'ung'.”
31Ki yai anyun asigarik ko uu ye king'atchi icheek, konam Paulo ak koip ineendet eng' kemutyet kwo Antipatris. 32Ye kingo kagoeech, kobagakta piik che laanyei farasiisyek koba kobooto ineendet, ak koweektagei icheek koba koot ne po asigarik. 33Ye kingo koit piik che laanyei farasiisyek Kaisarea, koipchi pounindet parweet, ak kondoi Paulo eng' tainnyi. 34Ye kingo soman, koteep pounindet kole ko punu emet ane, ak konai kole ko punu Kilikia, 35Ki le, kole, “Aa kas ng'olyoondeng'ung' ye koit che teenegei inyee.” Ak ki ng'at koriibei ineendet eng' kootap Herode.