ሐዋርያት ሥራ 25

25 ¹ፊስጦስ ወደ አውራጃው ከደረሰ ከሦስት ቀን በኋላ ከቂሳርያ ወደ ኢየሩሳሌም ወጣ። ²በዚያም የካህናት አለቆችና የአይሁድ መሪዎች በጳውሎስ ላይ ክሳቸውን አቀረቡ፤ ይለምኑትም ነበር፤ ³ጳውሎስን ወደ ኢየሩሳሌም እንዲያስመጣው በእርሱ ላይ ውለታ ጠየቁ፤ በመንገድ ላይ ሊገድሉት አድፍጠው ይጠብቁ ነበርና። ⁴ፊስጦስ ግን ጳውሎስ በቂሳርያ ታስሮ እንደሚገኝ፣ ራሱም በቅርቡ እንደሚሄድ መለሰ። ⁵“ስለዚህ፣” አለ፤ “ከእናንተ የሚችሉት ከእኔ ጋራ ወርደው በዚህ ሰው ላይ ስሕተት ካለ ይክሰሱት።”

⁶ፊስጦስም ከስምንት ወይም ከዐሥር ቀን ያልበለጠ ከእነርሱ ጋራ ከቈየ በኋላ ወደ ቂሳርያ ወረደ፤ በነገታውም በፍርድ ወንበር ላይ ተቀምጦ ጳውሎስ እንዲገባ አዘዘ። ⁷ጳውሎስም በመጣ ጊዜ ከኢየሩሳሌም የወረዱት አይሁድ ከበቡት፤ ሊያስረዱት የማይችሉትን ብዙ ከባድ ክሶች አቀረቡበት። ⁸ጳውሎስም ራሱን ሲከላከል፣ “በአይሁድ ሕግ፣ በቤተ መቅደሱ ወይም በቄሳር ላይ ምንም በደል አላደረግሁም” ብሎ መለሰ።

⁹ፊስጦስ ግን አይሁድን ደስ ለማሰኘት ፈልጎ ጳውሎስን፣ “ወደ ኢየሩሳሌም ወጥተህ በዚያ በእኔ ፊት በዚህ ክስ ልትዳኝ ትፈቅዳለህን?” ሲል ጠየቀው።

¹⁰ጳውሎስም እንዲህ አለ፤ “ልዳኝበት በሚገባኝ በቄሳር ፍርድ ወንበር ፊት ቆሜአለሁ። አንተ ራስህ በሚገባ እንደምታውቀው አይሁድን ምንም አልበደልኋቸውም። ¹¹በድዬ ቢሆንና ለሞት የሚያበቃ ነገር አድርጌ ቢሆን፣ ከመሞት ወደ ኋላ አልልም። ነገር ግን እነዚህ ሰዎች በእኔ ላይ የሚያቀርቡት ክስ መሠረት የሌለው ከሆነ፣ ማንም ለእነርሱ አሳልፎ ሊሰጠኝ አይችልም። ወደ ቄሳር ይግባኝ እላለሁ።”

¹²ፊስጦስም ከአማካሪዎቹ ጋራ ከተማከረ በኋላ፣ “ወደ ቄሳር ይግባኝ ብለሃል፤ ወደ ቄሳር ትሄዳለህ” ሲል መለሰ።

¹³ከጥቂት ቀን በኋላ ንጉሥ አግሪጳና በርኒቄ ወደ ቂሳርያ መጥተው ፊስጦስን ሰላም አሉት። ¹⁴በዚያም ብዙ ቀን ስለቈዩ ፊስጦስ የጳውሎስን ጕዳይ ለንጉሡ አቀረበ፤ “ፊልክስ አንድ ሰው እዚህ እንደ እስረኛ ትቶ ሄዶአል። ¹⁵በኢየሩሳሌም በነበርሁ ጊዜ የካህናት አለቆችና የአይሁድ ሽማግሌዎች ከሰሱት፤ እንዲፈረድበትም ለመኑኝ። ¹⁶እኔም የተከሰሰው ሰው ከሳሾቹን ፊት ለፊት ሳያገኝና ስለ ክሱ ራሱን ለመከላከል ዕድል ሳያገኝ ማንንም አሳልፎ መስጠት የሮም ልማድ አይደለም አልኋቸው። ¹⁷ስለዚህ እዚህ በተሰበሰቡ ጊዜ ምንም ሳላዘገይ በነገታው በፍርድ ወንበር ላይ ተቀምጬ ያ ሰው እንዲገባ አዘዝሁ። ¹⁸ከሳሾቹም በተነሡ ጊዜ እኔ እንደ ጠበቅሁት ዐይነት ወንጀል ምንም አላቀረቡበትም። ¹⁹ነገር ግን ስለ ገዛ ሃይማኖታቸውና ኢየሱስ ስለሚባል ስለ ሞተ ሰው ከእርሱ ጋራ አንዳንድ ክርክር ነበራቸው፤ ጳውሎስ ግን እርሱ በሕይወት እንዳለ ይናገር ነበር። ²⁰ይህንም እንዴት እንደምመረምረው ስላላወቅሁ፣ ወደ ኢየሩሳሌም ሄዶ በዚያ በዚህ ክስ ለመዳኘት ይፈቅድ እንደ ሆነ ጠየቅሁት። ²¹ጳውሎስ ግን ለንጉሠ ነገሥቱ ፍርድ ታስሮ እንዲቈይ ይግባኝ ስላለ፣ ወደ ቄሳር እስክልከው ድረስ ታስሮ እንዲቈይ አዘዝሁ።”

²²አግሪጳም ፊስጦስን፣ “እኔ ራሴ ይህን ሰው መስማት እፈልጋለሁ” አለው። ፊስጦስም፣ “ነገ፣” አለ፤ “ትሰማዋለህ።”

ጳውሎስ በአግሪጳና በበርኒቄ ፊት ቆመ

²³በነገታውም አግሪጳና በርኒቄ በታላቅ ግርማ መጥተው ከሻለቆችና ከከተማው ታላላቅ ሰዎች ጋራ ወደ አዳራሹ ገቡ፤ ፊስጦስም ባዘዘው መሠረት ጳውሎስ እንዲገባ ተደረገ። ²⁴ፊስጦስም እንዲህ አለ፤ “ንጉሥ አግሪጳ ሆይ፣ ከእኛም ጋራ እዚህ ያላችሁ ሁሉ፣ ይህን ሰው ታዩታላችሁ፤ ስለ እርሱ የአይሁድ ማኅበረ ሰብ ሁሉ ከእንግዲህ መኖር የለበትም እያሉ እየጮኹ፣ በኢየሩሳሌምም ሆነ እዚህ ለመኑኝ። ²⁵እኔ ግን ለሞት የሚያበቃ ምንም ነገር ስላላገኘሁበት፣ እርሱም ራሱ ወደ ንጉሠ ነገሥቱ ይግባኝ ስላለ፣ ልልከው ወሰንሁ። ²⁶ስለ እርሱ ለጌታዬ የምጽፈው የተረጋገጠ ነገር የለኝም፤ ስለዚህ ይህ ምርመራ ከተደረገ በኋላ የምጽፈው ነገር እንዲኖረኝ በሁላችሁ ፊት፣ ይልቁንም በአንተ በንጉሥ አግሪጳ ፊት አቀረብሁት። ²⁷እስረኛን ስለ እርሱ የቀረበውን ክስ ሳይገልጹ መላክ ምክንያታዊ ያልሆነ ሆኖ ስለሚታየኝ ነው።”