ጳውሎስ ኣብ ቅድሚ ፌስጦስ ተኸሰሰ

ሓድሽ ሹም ነቲ ጉዳይ ወረሶ፥ እቲ ናይ ቀደም ውዲት ደጀን ድማ ተመለሰ። ናብ ኢየሩሳሌም ካብ ዝልኣኽ ይሓይሽ ኢሉ፥ ጳውሎስ ናብ ቄሳር ይግባእ በለ፥ ፌስጦስ ድማ ፈቐደሉ። ፌስጦስ ብምስጢር፥ እቲ ክርክር ብዛዕባ ኢየሱስ ዝበሃል ዝሞተ ሰብኣይ፥ ጳውሎስ ግና ህያው ከም ዝኾነ ዘረጋግፀሉ ምዃኑ፥ ኣመነ።

ምዕራፍ 25።

ፌስጦስ ድማ ናብታ ሃገር ምስ መፀ ድሕሪ ሰለስተ መዓልቲ፥ ካብ ቂሳርያ ናብ ኢየሩሳሌም ደየበ። ኣብኡ ሊቃነ ካህናትን መራሕቲ ኣይሁድን ንጳውሎስ ከሲሶም ኣቕረብዎ፥ ለሚኖም ከዓ፥ ንጳውሎስ ናብ ኢየሩሳሌም ክፅውዖ፥ ኣብ ልዕሊኡ ፀጋ ለመንዎ፤ ኣብ መንገዲ ኽቐትልዎ ድማ ደጀን ኣንበሩሉ ነበሩ። ፌስጦስ ከዓ ጳውሎስ ኣብ ቂሳርያ ተታሒዙ ኸም ዘሎ፥ ባዕሉውን ድሕሪ ቑሩብ ጊዜ ከም ዝኸይድ መለሰ። ንሱ ድማ፥ “እምበኣር፥ ካባኻትኩም ዝኽእሉ ምሳይ ይውረዱ እሞ፥ ኣብቲ ሰብኣይ ገለ ኽፉእ እንተ ኣልዩ፥ ይኸስዎ” በለ።

ፌስጦስ ከዓ ኣብ መንጎኦም ካብ ሸሞንተ ወይ ዓሰርተ መዓልቲ ዘይበዝሐ ተቐሚጡ፥ ሽዑ ናብ ቂሳርያ ወረደ፤ ንፅባሒቱ ኸዓ ኣብ መንበር ፍርዲ ተቐሚጡ ንጳውሎስ ከምፅእዎ ኣዘዘ። ጳውሎስ ምስ መፀ ድማ፥ እቶም ካብ ኢየሩሳሌም ዝመፁ ኣይሁድ ከበብዎ፤ ከረጋግፅዎ ዘይኽእሉ ብዙሕ ከቢድ ክስታት ኣቕረቡሉ። ጳውሎስ ከዓ ነፍሱ እናተኸላኸለ፥ “ኣነ ኣብ ሕጊ ኣይሁድ ኮነ ኣብ ቤተ መቕደስ ኮነ ኣብ ቄሳር ገለ ኣይበደልኩን” ኢሉ መለሰ።

ፌስጦስ ግና ንኣይሁድ ባህ ከብሎም ስለ ዝደለየ፥ ንጳውሎስ፥ “ናብ ኢየሩሳሌም ደይብካ ኣብኡ ብዛዕባ እዝ ክሲ እዙይ ኣብ ቅድመይ ክትፍረድዶ ትደሊ ኢኻ?” ኢሉ ጠየቖ።

ጳውሎስ ከዓ፥ “ኣነ ኣብ ቅድሚ መንበር ፍርዲ ቄሳር ደው ኢለ ኣለኹ፤ ኣብኡ ድማ ክፍረድ ይግብአኒ። ንስኻ ባዕልኻ ኣፀቢቕካ ኸም እትፈልጥ፥ ንኣይሁድ ገለ ኣይበደልኩን። ኣነ በዲለ እንተ ዄነ፥ ሞት ዝግብኦ ነገር ገይረ እንተ ዄነ፥ ካብ ሞት ኣይምሕንቅቕን እየ፤ እዞም ሰባት ዝኸስኹኒ ዘለዉ ክሲ ግና ከንቱ እንተ ኾይኑ፥ ንሳቶም ኣሕሊፉ ዝህበኒ ሓደ እኳ የለን። ናብ ቄሳር ይግባእ እብል ኣለኹ” በለ።

ፌስጦስ ከዓ ምስ ባይቶኡ ተማኺሩ፥ “ናብ ቄሳር ይግባእ ኢልካ ኣለኻ፤ ናብ ቄሳር ድማ ክትከይድ ኢኻ” ኢሉ መለሰ።

ድሕሪ ቑሩብ መዓልቲ ኸዓ ንጉስ ኣግሪጳን በርኒቄን ናብ ቂሳርያ መፂኦም ንፌስጦስ ሰላም በልዎ። ኣብኡ ብዙሕ መዓልቲ ምስ ፀንሑ ድማ፥ ፌስጦስ ነገር ጳውሎስ ነቲ ንጉስ ከምዙይ ኢሉ ኣቕረበሉ፦ “ፊሊክስ ሓደ ሰብኣይ ኣብዙይ ተኣሲሩ ሓዲጉዎ ኣሎ። ኣብ ኢየሩሳሌም እንተለኹ፥ ሊቃነ ካህናትን ዓበይቲ ኣይሁድን ከሲሶም፥ ክፍረደሎም ለመኑኒ። ኣነ ኸዓ፥ እቲ ተኸሳሲ ነቶም ከሰስቱ ገፅ ንገፅ ከይረኣየን ነቲ ክሲ ንምምካት ዕድል ከይረኸበን፥ ዝኾነ ሰብ ኣሕሊፍካ ምሃብ ልማድ ሮማውያን ኣይኮነን፥ ኢለ መለስኩሎም። ስለዙይ ኣብዙይ ምስ ተኣከቡ፥ ገለ እኳ ኣይደንጐኹን፤ ንፅባሒቱ ኣብ መንበር ፍርዲ ተቐሚጠ ነቲ ሰብኣይ ከምፅእዎ ኣዘዝኩ። እቶም ከሰስቱ ደው ምስ በሉ ድማ፥ ካብቲ ኣነ ዝተፀበኽዎ ገበናዊ ክሲ ሓደ እኳ ኣየምፅኡን። ኣብ ክንድኡ ብዛዕባ ሃይማኖቶምን ኢየሱስ ዝበሃል ዝሞተ ሰብኣይ፥ ጳውሎስ ከዓ ህያው እዩ ኢሉ ዝምጕተሉን፥ ገለ ፍልልይ ነበሮም። ነዙይ ከመይ ገይረ ኸም ዝምርምሮ ስለ ዝተፀገምኩ፥ ናብ ኢየሩሳሌም ከይዱ ብዛዕባ እዝ ክሲ እዙይ ኣብኡ ኽፍረድ ፍቓደኛዶ እዩ ኢለ ጠየቕዎ። ጳውሎስ ግና ንፍርዲ እቲ ንጉሰ ነገስት ተታሒዙ ክፅበ ይግባእ ኢሉ ስለ ዝለመነ፥ ናብ ቄሳር ክሳዕ ዝሰዶ ኽሕሎ ኣዘዝኩ” በለ።

ኣግሪጳ ድማ ንፌስጦስ፥ “ኣነ ባዕለይ ነቲ ሰብኣይ ክሰምዖ ምደለኹ” በሎ። ፌስጦስ ከዓ፥ “ፅባሕ ክትሰምዖ ኢኻ” በሎ።

ጳውሎስ ኣብ ቅድሚ ኣግሪጳን በርኒቄን ደው በለ

ንፅባሒቱ ኸዓ ኣግሪጳን በርኒቄን ብዓብዪ ግርማ መፁ፤ ምስ ሓለቑ ሰራዊትን ፍሉጣት ሰብ እታ ኸተማን ናብቲ ኣዳራሽ ኣተዉ። ፌስጦስ ምስ ኣዘዘ ድማ ንጳውሎስ ኣእተውዎ። ፌስጦስ ከዓ፥ “ኦ ንጉስ ኣግሪጳ፥ ምሳና ኣብዙይ ዘለኹም ኵላትኩምውን፥ ነዝ ሰብ እዙይ ትርእይዎ ኣለኹም። ኵሉ ማሕበር ኣይሁድ ኣብ ኢየሩሳሌምን ኣብዙይን፥ ‘ድሕሪ ደጊም ክነብር ኣይግብኦን’ እናበሉ እናፀወዑ ብዛዕባኡ ለመኑኒ። ኣነ ግና ሞት ዝግብኦ ነገር ከም ዘይገበረ ስለ ዝረኸብኩ፥ ንሱ ባዕሉ ድማ ናብ ንጉሰ ነገስት ይግባእ ስለ ዝበለ፥ ክሰዶ ወሰንኩ። ብዛዕባኡ ንጐይታይ ዝፅሕፎ ርጉፅ ነገር የብለይን፤ ስለዙይ ድሕሪ እዝ ምርመራ እዙይ ዝፅሕፎ ገለ ምእንቲ ኽረክብ፥ ናብ ቅድሜኹም፥ ኣውራ ኸዓ ናብ ቅድሜኻ ኦ ንጉስ ኣግሪጳ፥ ኣቕረብክዎ። እቲ ኣብ ልዕሊ እሱር ዘሎ ክሲ ኸይጠቐስካ ምስዳድ ዘይበቅዕ ኮይኑ ይርኣየኒ ኣሎ እሞ” በለ።