Ìṣe àwọn Aposteli 25

25 ¹Nígbà tí ó di ọjọ́ mẹ́ta tí Fẹsto dé ẹkùn náà, ó gòkè lọ sí Jerusalẹmu láti Kesarea. ²Níbẹ̀ ni àwọn olórí àlùfáà àti àwọn aṣáájú àwọn Júù gbé ẹ̀sùn wọn kalẹ̀ sí Paulu, wọ́n sì ń rọ̀ ọ́, ³wọ́n ń béèrè oore kan lọ́dọ̀ rẹ̀ lòdì sí Paulu—pé kí ó pe Paulu wá sí Jerusalẹmu. Wọ́n ti dẹ ìkọ̀lù sílẹ̀ láti pa á ní ọ̀nà. ⁴Fẹsto dáhùn pé a ń fi Paulu pamọ́ sí Kesarea, àti pé òun tìkára rẹ̀ yóò lọ láìpẹ́. ⁵Ó wí pé, “Nítorí náà, ẹ jẹ́ kí àwọn tí ó lè ṣe é nínú yín bá mi sọ̀kalẹ̀ lọ, kí wọ́n sì fi ẹ̀sùn kan ọkùnrin náà, bí ohunkóhun tí kò dára bá wà lára rẹ̀.”

⁶Fẹsto kò sí lọ́dọ̀ wọn ju ọjọ́ mẹ́jọ tàbí mẹ́wàá lọ, lẹ́yìn náà ó sọ̀kalẹ̀ lọ sí Kesarea. Ní ọjọ́ kejì ó jókòó sórí àga ìdájọ́, ó sì pàṣẹ pé kí a mú Paulu wá. ⁷Nígbà tí Paulu dé, àwọn Júù tí ó ti Jerusalẹmu wá yí i ká, wọ́n ń mú ẹ̀sùn ribiribi púpọ̀ wá tí wọn kò lè fi ẹ̀rí hàn. ⁸Paulu dáhùn láti gba ara rẹ̀ pé, “Èmi kò ṣẹ̀ sí òfin àwọn Júù, tàbí sí tẹmpili, tàbí sí Kesari.”

⁹Ṣùgbọ́n Fẹsto, tí ó fẹ́ mú inú àwọn Júù dùn, béèrè lọ́wọ́ Paulu pé, “Ṣé ìwọ yóò gòkè lọ sí Jerusalẹmu, kí a sì ṣe ìdájọ́ rẹ níbẹ̀ níwájú mi lórí àwọn ẹ̀sùn wọ̀nyí?”

¹⁰Paulu wí pé, “Mo dúró níwájú ìtẹ́ ìdájọ́ Kesari, níbi tí ó yẹ kí a ti ṣe ìdájọ́ mi. Èmi kò ṣẹ̀ sí àwọn Júù, gẹ́gẹ́ bí ẹ̀yin fúnra yín ti mọ̀ dájúdájú. ¹¹Bí mo bá ṣẹ̀, bí mo bá ṣe ohun tí ó tọ́ sí ikú, èmi kì yóò kọ̀ láti kú. Ṣùgbọ́n bí àwọn ẹ̀sùn tí àwọn ọkùnrin wọ̀nyí fi kàn mí bá jẹ́ aláìní ìpìlẹ̀, kò sí ẹni tí ó lè fi mí lé wọn lọ́wọ́. Mo fa ẹjọ́ mi rọ̀ sí Kesari.”

¹²Lẹ́yìn tí ó bá àwọn ìgbìmọ̀ rẹ̀ gbèrò, Fẹsto dáhùn pé, “Ìwọ ti fa ẹjọ́ rẹ rọ̀ sí Kesari; sọ́dọ̀ Kesari ni ìwọ yóò lọ.”

¹³Lẹ́yìn ọjọ́ díẹ̀, Agrippa ọba àti Bernike wá sí Kesarea láti kí Fẹsto. ¹⁴Bí wọ́n ti lo ọjọ́ púpọ̀ níbẹ̀, Fẹsto gbé ọ̀ràn Paulu kalẹ̀ fún ọba pé, “Fẹlikisi fi ọkùnrin kan sílẹ̀ níhìn-ín gẹ́gẹ́ bí ẹlẹ́wọ̀n. ¹⁵Nígbà tí mo wà ní Jerusalẹmu, àwọn olórí àlùfáà àti àwọn àgbààgbà àwọn Júù fi ẹ̀sùn kàn án, wọ́n ń béèrè lọ́wọ́ mi pé kí a dá a lẹ́bi. ¹⁶Mo sọ fún wọn pé kì í ṣe àṣà àwọn ará Romu láti fi ẹnikẹ́ni lélẹ̀ kí ẹni tí a fi ẹ̀sùn kàn tó dojú kọ àwọn olùfisùn rẹ̀ lójúkojú, kí ó sì rí àyè láti gba ara rẹ̀ lọ́wọ́ nínú ẹ̀sùn náà. ¹⁷Nítorí náà, nígbà tí wọ́n péjọ síhìn-ín, èmi kò falẹ̀ rárá—ní ọjọ́ kejì mo jókòó sórí àga ìdájọ́, mo sì pàṣẹ pé kí a mú ọkùnrin náà wá. ¹⁸Nígbà tí àwọn olùfisùn rẹ̀ dìde, wọn kò mú èyíkéyìí nínú àwọn ẹ̀sùn ìwà ọ̀daràn tí mo ti ń retí wá. ¹⁹Kàkà bẹ́ẹ̀, wọ́n ní àwọn àríyànjiyàn kan pẹ̀lú rẹ̀ nípa ẹ̀sìn tiwọn fúnra wọn, àti nípa ọkùnrin kan tí ó ti kú tí orúkọ rẹ̀ ń jẹ́ Jesu, ẹni tí Paulu ń tẹnumọ́ ọn pé ó wà láàyè. ²⁰Bí mi kò ti mọ ọ̀nà tí èmi yóò gbà ṣèwádìí nǹkan yìí, mo béèrè bóyá ó fẹ́ lọ sí Jerusalẹmu, kí a sì ṣe ìdájọ́ rẹ̀ níbẹ̀ lórí àwọn ẹ̀sùn wọ̀nyí. ²¹Ṣùgbọ́n níwọ̀n bí Paulu ti fa ẹjọ́ rẹ̀ rọ̀ pé kí a fi òun pamọ́ dúró de ìdájọ́ olú-ọba, mo pàṣẹ pé kí a fi í pamọ́ títí èmi yóò fi lè rán an sí Kesari.”

²²Agrippa sọ fún Fẹsto pé, “Èmi fúnra mi fẹ́ gbọ́ ọ̀rọ̀ ọkùnrin náà.” “Ní ọ̀la,” Fẹsto wí pé, “ẹ yóò gbọ́ ọ̀rọ̀ rẹ̀.”

Paulu Dúró níwájú Agrippa àti Bernike

²³Ní ọjọ́ kejì, Agrippa àti Bernike dé pẹ̀lú ìṣeféfé ńlá, wọ́n sì wọ gbọ̀ngàn náà pẹ̀lú àwọn olórí ọmọ ogun àti àwọn ọkùnrin gbàjúmọ̀ ìlú náà. Nípa àṣẹ Fẹsto, a mú Paulu wá. ²⁴Fẹsto wí pé, “Agrippa ọba, àti gbogbo ẹ̀yin tí ó wà níhìn-ín pẹ̀lú wa—ẹ̀yin rí ọkùnrin yìí. Gbogbo àwọn Júù ti bẹ̀bẹ̀ lọ́dọ̀ mi nípa rẹ̀, ní Jerusalẹmu àti níhìn-ín, wọ́n ń kígbe pé kò gbọdọ̀ wà láàyè mọ́. ²⁵Ṣùgbọ́n bí èmi kò ti rí ohunkóhun tí ó tọ́ sí ikú, àti níwọ̀n bí òun fúnra rẹ̀ ti fa ẹjọ́ rẹ̀ rọ̀ sí olú-ọba, mo pinnu láti rán an lọ. ²⁶Èmi kò ní ohunkóhun pàtó láti kọ sí olúwa mi nípa rẹ̀, nítorí náà mo mú un wá síwájú gbogbo yín, pàápàá jùlọ síwájú yín, Agrippa ọba, kí èmi lè ní ohun kan láti kọ lẹ́yìn ìwádìí yìí. ²⁷Nítorí ó dàbí ohun tí kò bọ́gbọ́n mu lójú mi láti rán ẹlẹ́wọ̀n lọ láìfihàn àwọn ẹ̀sùn tí a fi kàn án.”