Festus laga samne te Paul ke golti lagaise

Notun ekjon governor pora etu mukoddoma tu paise aru purana lukai kene maribole laga plan tu aru wapas ahise. Jerusalem te pathai dibole nadibi koi kene, Paul pora Caesar logote anurodh korise aru Festus pora etu manise. Akela te Festus pora manise etu jhagara Jisu naam laga ekjon mora manuh nimite ase, junke Paul pora jinda ase koi thake.

Adhyay 25.

Etiya Festus hei desh te ahhi ponchi kene tin din pichete, tai Caesarea pora Jerusalem te uthi jaise. Ta te mukhyo purohit khan aru Yehudi cholawta khan pora Paul bhirodh te taikhan laga golti kotha anise, aru tai ke bar bar anurodh korise, Festus ke ekta upokar mangise — Paul ke Jerusalem te matai dibole. Kilemane taikhan rasta te tai ke morai dibole lukai kene rukhi thakise. Kintu Festus pora jawab dise, Paul ke Caesarea te bondhi kori rakha ase, aru tai nijor bhi joldi ta te jabo. Tai koise, “Etu nimite, tumikhan majote kun pari ase, taikhan moi logote nami jabi, aru jodi hei manuh logote kiba golti ase koile, tai ke golti dibi.”

Festus taikhan logote aath nohoile dosh din pora bisi thaka nai, titia tai Caesarea te nami jaise. Dusera din te tai bisar kora ason te bohi kene Paul ke bhitor te anibole hukum dise. Paul ahhi ponchise jitia, Jerusalem pora aha Yehudi khan pora tai ke gheri loise, aru taikhan porman koribo napara bisi dangor golti khan tai uporte anise. Paul pora nijor safai dikene koise, “Moi Yehudi niyom bhirodh te, mondir bhirodh te, nohoile Caesar bhirodh te eku golti kora nai.”

Kintu Festus pora Yehudi khan ke khushi koribole mon korikena, Paul ke hudise, “Tumi Jerusalem te uthi jai kene, etu golti khan uporte ta te moi laga samne te bisar hobole itcha ase naki?”

Paul pora koise, “Moi Caesar laga bisar ason age te khara ase, aru ta te moi laga bisar hobo lage. Moi Yehudi khan ke eku golti kora nai, jineka tumi nijor bhi bhal pora jani ase. Jodi moi golti korise, aru moribole layak kiba korise koile, moi moribole mana nakoribo. Kintu jodi etu manuh khan pora moi uporte diya golti khan te eku hosa nai koile, kun bhi moi ke taikhan laga hath te di dibo napare. Moi Caesar logote anurodh kori ase.”

Festus pora nijor sabha logote kotha koi kene jawab dise, “Tumi Caesar logote anurodh korise; Caesar logote tumi jabo.”

Olop din pichete, Raja Agrippa aru Bernice Caesarea te ahhise aru Festus ke salam korise. Taikhan ta te bisi din thakise, karone Festus pora raja ke Paul laga kotha koise, “Felix pora ekjon manuh ke yate bondhi hoi kene chari dise. Moi Jerusalem te thakise jitia, mukhyo purohit khan aru Yehudi khan laga bura manuh khan pora tai uporte golti dise, aru tai ke saja dibole moi ke mangise. Moi taikhan ke koise, jun ke golti dise hei manuh pora golti diya manuh khan ke nijor suku-mukh pora lok napa tak, aru hei golti bhirodh te nijor safai dibole ekta homoi napa tak, kunke bhi di dibole Rome laga niyom nohoi. Etu nimite, taikhan yate joma hoise jitia, moi eku deri kora nai — dusera din te moi bisar kora ason te bohi kene hei manuh ke anibole hukum dise. Tai ke golti diya khan khara hoise jitia, moi bhabi thaka biya kaam laga golti khan eku bhi taikhan uthai diya nai. Hoilebi, taikhan laga nijor dhorom laga kotha uporte, aru Jisu naam laga ekjon mora manuh uporte tai logote olop jhagara thakise, junke Paul pora jinda ase koi thakise. Etu kotha kineka bisar koribo moi najanise, karone moi hudise, tai Jerusalem te jai kene etu golti khan uporte ta te bisar hobole itcha ase naki. Kintu Paul pora Maharaja laga bisar nimite tai ke rakhibole anurodh korise, karone moi tai ke Caesar logote pathai nadiya tak bondhi rakhibole hukum dise.”

Agrippa pora Festus ke koise, “Moi nijor bhi hei manuh laga kotha hunibole itcha ase.” Festus pora koise, “Kali apuni tai laga kotha hunibo.”

Agrippa aru Bernice laga samne te Paul khara hoise

Dusera din te Agrippa aru Bernice bisi dhum-dham pora ahhise, aru sipahi laga cholawta khan aru sheher laga dangor manuh khan logote dangor ghor bhitor te ghusi jaise. Festus laga hukum pora, Paul ke bhitor te anise. Festus pora koise, “Raja Agrippa, aru moikhan logote yate thaka sob manuh khan — tumikhan etu manuh ke dikhi ase. Gutta Yehudi jati pora, Jerusalem te aru yate bhi, tai laga kotha loi moi logote anurodh korise, aru tai aru jinda thakibo nalage koi kene hala korise. Kintu moi tai logote moribole layak eku napaise, aru tai nijor bhi Maharaja logote anurodh korise, karone moi tai ke pathai dibole thik korise. Tai laga kotha loi moi laga malik ke likhibole moi logote eku pakka kotha nai, karone moi tai ke tumikhan sob laga age te anise, aru khas kori kene, Raja Agrippa, apuni laga age te, titia etu bisar pichete moi likhibole kiba pabo. Kilemane ekjon bondhi manuh ke, tai uporte thaka golti khan nadikhai kene pathai diya to, moi nimite buddhi nathaka kaam nisena lage.”