Otsak 25

25 ¹Festusna ngaleili vākashung eina kathumthangwui thili, ana Caesareawui eina Jerusalemli azanga. ²Chili pāngmon akhokabing eina Jihudiwui akhavābingna Paulwuitungli athumwui kaphen hāngchithei, kala ali kasatsanga, ³Paulli Jerusalemli hokhui khavai awuitungli ngahānkhangai poi. Athumna shongfali ali sāthat khavai ngathirai sāda leisai. ⁴Paulli Caesareali haihaira, kala ana khalatta atam kasha̱kha shokra da Festusna ngahānkai. ⁵Chieina ana hānga, "Chithākha awuitungli khangui khikha leiakha, nathumwui ngachaili kapingpingabing chi ili ngasoda tunglaga mipā chili phenmilu."

⁶Festusna athumli ngasoda zimiksho chishat pet lah tharāthangwui eina masangthuda pamzanglaga, Caesareali tunhaowa. Akhama kathā ana kārotli pamda Paulli khuirā khavai kasoi. ⁷Paul rākashung tharan, Jerusalemwui eina kharā Jihudibingna ali kuinama, kala athumna mashunga da theikhui khavai mamirar khangakhai-khangarai kaphen kachungkha phena. ⁸Paulna khalattawui vang kaphayat eina ngahānkai, "Ina Jihudiwui ain, khorumshim, lah Caesarwuitungli khangui khikha masāhaimana."

⁹Kha Festusna Jihudibingwui masot khuingaihaoda Paulli ngahāna, "Na Jerusalemli azanglaga kaphen hiwui vang chili iwui mangāli bichar sāra jila?"

¹⁰Paulna hānga, "Ina Caesarwui kārotli nganinga, chili ili bichar sāphalungra. Ina Jihudibingwuitungli khangui khikha masāhaimana kaji na khalatta mathālak eina thei. ¹¹Ina khangui sāhairasaakha, thikhangayi khalāng ot sāhairakha, thihai chi ina marāngaimara. Kha mibing hina iwuitungli phen chi mamashungmana jiakha, mikumo khipānakha ili athumwui pāngli mamipaimara. Ina Caesarli poi."

¹²Awui khangamkhareibing eina ngasanlaga, Festusna ngahānkai, "Na Caesarli pohaira; Caesarli na vāra."

¹³Zimiksho khaleilaga, awunga Agrippa eina Bernicena Caesareali rāzanglaga Festusli shālam sai. ¹⁴Athum chili zimiksho kachungkha pamsanglakha, Festusna awungali Paulwui tuingaphun hāngchithei, "Felixna mi akhali hili phātopli haihaowa. ¹⁵Ina Jerusalemli leilakha, Jihudiwui pāngmon akhokabing eina ararnaobingna ali phena, awuitungli khalāng mikhavai ili poi. ¹⁶Kaphen zangkasā china ali kaphenabing eina samphang mai zangda manai kala kaphenwui vang khalatta kaphayat sākhavai atam kachā mangasā kaje, mikumo khipālikha ngasangngasak hi Romenaowui khangachā maningmana da ina athumli hānga. ¹⁷Chieina athum hili kazipkhui tharan, ina khikha mahuinganongmana; akhama kathā ina kārotli pamda mipā chili khuirā khavai kasoi. ¹⁸Awui kaphenbingna nganinga tharan, athumna ina phaning kahai yomnaowui kaphen akhala mamikai. ¹⁹Chithālala, athumwui dharma pongli kala Jishu kaho mi kathi akhawui pongli awuitungli tuishot kaikha leihaowa; mipa chi ringda lei da Paulna hāngchinga. ²⁰Hi kathada ngathingkhuirakhala da matheimada, ana Jerusalemli vālaga kaphen hiwui vang chili bichar sākhavai mayāngaila da ina ngahāna. ²¹Kha Paulna wungreiwui khamayāwui vang zangkasā leikhavai poi kajiwui vang eina, ina ali Caesarli chihovāranglakha eina tangda mayonpamlu da kasoi."

²²Agrippana Festusli hānga, "Ina I khalattana mipa hiwui tui nganāyangngai." "Akhama," Festusna hānga, "nana ali nganānaora."

Paulna Agrippa eina Bernicewui Mangāli Nganinga

²³Akhama kathā Agrippa eina Bernicena hakmahālak eina rāshunglaga, raithānabing eina keinungwui kathānabingli ngasoda shimrei chi azanga. Festuswui kasoda Paulli thānvāmi. ²⁴Festusna hānga, "Awunga Agrippa, kala hili ithumli ngasopamkasā saikora, nathumna mipa hi theili. Jihudi yarui ashangva̱ katongana Jerusalemli kala hili khanini eina awui pongli ili poi, a longkatā maringphalungmara da panglāk eina vao. ²⁵Kha thikapai khayon akhala masamphangthuda, kala a khalattana wungreili poi kajiwui vang eina, ina ali chihovā khavai khamayā mi. ²⁶Awui pongli iwui akhavāli kakapi khavai tāzak kahai khikha maleimana, chiwui vang eina, hi ngahānkup kahaiwui thili ina kapi khavai khikha samphang khavai, ali nathum saikorawui mangāli, mataimeikapta awunga Agrippa nawui mangāli thānphunga. ²⁷Kaja awuitungli kaphen chi machishātla phātop akha chihovā hi, iwui mangāli khamashung maningmana da ina phaninga."