Mga Buhat 24

24 ¹Paglabay sa lima ka adlaw, ang labawng pari nga si Ananias milugsong uban sa pipila ka mga anciano ug usa ka abogado nga si Tertulo, ug ilang gisumbong si Pablo atubangan sa gobernador. ²Sa dihang gipatawag si Pablo, gisugdan ni Tertulo ang iyang sumbong, “Pinaagi kanimo nakatagamtam kami ug dakong kalinaw, ug ang mga kausaban mianhi niini nga nasod pinaagi sa imong pagkamabinantayon, ³giila namo kini sa tanang paagi ug bisan asa, labing halangdon nga Felix, uban sa bug-os nga pagpasalamat. ⁴Apan aron dili ka na malangan pa, mangamuyo ako nga pamation mo kami uban sa kalulot, sa pipila ka mga pulong. ⁵Nakaplagan namo nga kining tawhana usa ka peste, nga nagsugyot ug mga kagubot taliwala sa tanang mga Judio sa tibuok kalibotan, ug usa ka pangulo sa sekta sa mga Nazareno. ⁶Misulay pa gani siya sa pagpasipala sa templo, busa among gidakop siya. ^a a v6 Ang labing karaang mga manuskrito walay bersikulo 7 dinhi; ang ulahing mga kopya nagdugang: “Apan ang komandante nga si Lisias miabot ug uban sa dakong kusog gikuha siya gikan sa among mga kamot,” ⁸Pinaagi sa imong kaugalingong pagsusi kaniya, imong mahibaloan ang tanan nga among gisumbong batok kaniya.”

⁹Ang mga Judio usab miapil sa pagsumbong, nga nagpamugos nga tinuod kining mga butanga.

¹⁰Gisinyasan siya sa gobernador nga mosulti. Mitubag si Pablo, “Tungod kay nahibalo ako nga daghan nang katuigan ikaw naghukom niini nga nasod, malipayon akong manalipod sa akong kaugalingon. ¹¹Imong mapamatud-an nga dili molapas sa napulog duha ka adlaw sukad ako mitungas sa pagsimba sa Jerusalem. ¹²Wala nila ako makita nga nakiglalis kang bisan kinsa, o nagsugyot ug panon sa katawhan—dili sa templo, sa mga sinagoga, o bisan asa sa siyudad. ¹³Ni makapamatuod sila kanimo sa mga sumbong nga karon ilang gidala batok kanako. ¹⁴Apan isugid ko kanimo, nga sa pagsunod sa Dalan—nga ilang gitawag ug sekta—nagasimba ako sa Dios sa atong mga katigulangan, nga nagatuo sa tanang nahiuyon sa Balaod ug nahisulat diha sa mga Propeta. ¹⁵Ako adunay paglaom sa among Amahan—nga gihuptan usab niining mga tawhana—nga ang mga matarong ug ang mga dili-matarong managsama nga mabanhaw. ¹⁶Busa naningkamot ako kanunay nga mahuptan nga hinlo ang akong konsensya atubangan sa atong Amahan ug atubangan sa mga tawo. ¹⁷Human sa pipila ka katuigan, mianhi ako aron sa pagdala ug mga gasa sa kalooy alang sa mga kabos sa akong nasod, ug mga halad. ¹⁸Samtang nagbuhat niini, nakita nila ako nga nahinlo diha sa templo—walay panon sa katawhan, walay kagubot. ¹⁹Ang pipila ka mga Judio gikan sa Asia kinahanglan unta nga ania dinhi sa imong atubangan aron mosumbong, kon aduna silay bisan unsa batok kanako. ²⁰O pasultiha kining mga tawhana mismo kon unsang sayop ang ilang nakita sa dihang mitindog ako atubangan sa konseho, ²¹gawas lamang niining usa ka butang nga akong gisinggit samtang nagtindog taliwala kanila, ‘Tungod sa pagkabanhaw sa mga patay ako gihusay sa inyong atubangan karong adlawa.’”

²²Si Felix, nga nahibalo ug husto bahin sa Dalan, nagpahunong sa husay, “Kon moabot na si Lisias nga komandante, akong hukman ang inyong kaso.” ²³Gimandoan niya ang senturyon nga bantayan si Pablo apan hatagan siyag diyutayng kagawasan, nga dili pugngan ang bisan kinsa sa iyang mga higala sa pag-alagad kaniya.

²⁴Paglabay sa pipila ka adlaw, miabot si Felix uban sa iyang asawa nga si Drusila, nga usa ka Judio, gipatawag niya si Pablo, ug naminaw kaniya mahitungod sa pagtuo kang Cristo Jesus. ²⁵Samtang gihisgotan ni Pablo ang pagkamatarong, ang pagpugong sa kaugalingon, ug ang umaabot nga paghukom, nahadlok si Felix ug miingon, “Igo na kana sa pagkakaron; lakaw na. Kon makakaplag ako ug panahon, akong ipatawag ka.” ²⁶Naglaom usab siya nga hatagan siya ni Pablo ug kuwarta, busa kanunay niya kining gipatawag ug nakigsulti kaniya.

²⁷Human sa duha ka tuig, si Porcio Festo mipuli kang Felix. Tungod kay buot niyang pahimut-an ang mga Judio, gibilin ni Felix si Pablo sa bilanggoan.