An Tuhumi Bulus a Gaban Felis

Wani mai iya magana da aka ɗauko haya ya kira Bulus annoba kuma shugaban ƙungiya. Bulus ya amsa cewa babu wanda zai iya tabbatar da ko ɗaya, kuma ainihin dalilin shari'arsa tashin matattu ne. Filikus ya yi jinkiri, ya tsorata sa'ad da maganar ta koma kan hukunci, ya kuma riƙe shi shekara biyu yana fatan cin hanci.

Babi na 24.

Bayan kwana biyar, sai babban firist Hananiya ya sauko tare da waɗansu dattawa da kuma wani lauya mai suna Tartullus, suka kawo ƙara a kan Bulus a gaban gwamna. Da aka kirawo Bulus, sai Tartullus ya fara kawo ƙararsa, ya ce, “Ta wurinka muke jin daɗin zaman lafiya mai girma, kuma gyare-gyare sun zo wa wannan al'umma ta wurin hangen nesanka, mun yarda da wannan ta kowace hanya kuma a ko'ina, ya mai girma Felis, da matuƙar godiya. Amma domin kada in ƙara tsare ka, ina roƙonka ka saurare mu da alheri, a cikin 'yan kalmomi kaɗan. Mun sami wannan mutum kamar annoba, yana tā da tarzoma a cikin dukan Yahudawa a ko'ina a duniya, kuma shugaban ƙungiyar Nazarawa. Har ma ya yi ƙoƙari ya ƙazantar da haikali, saboda haka muka kama shi. ^a Ta wurin binciken sa da kanka, za ka iya sanin dukan abin da muke tuhumarsa da shi.”

Yahudawa su ma suka haɗa baki a cikin tuhumar, suna nacewa cewa waɗannan abubuwa haka suke.

Sai gwamna ya nuna masa ya yi magana. Bulus ya amsa ya ce, “Da yake na sani kai ka shar'anta wannan al'umma shekaru masu yawa, da farin ciki nake kāre kaina. Za ka iya tabbatar ba fiye da kwana goma sha biyu ba ke nan tun da na haura zuwa Urushalima domin in yi sujada. Ba su same ni ina gardama da kowa ba, ba kuma ina tā da wani taro ba—ko a cikin haikali, ko a majami'u, ko a ko'ina a cikin birnin. Ba kuma za su iya tabbatar maka tuhume-tuhumen da suke kawo mini yanzu ba. Amma ina shaida maka, cewa bisa ga Hanyar—wadda suke kira ƙungiya—ina bauta wa Allah na kakanninmu, ina gaskata dukan abin da ya yi daidai da Shari'a, da abin da ake a rubuce a cikin Annabawa. Ina da bege ga Ubanmu—wanda waɗannan mutane su ma suke da shi—cewa masu adalci da marasa adalci duka za su tashi daga matattu. Saboda haka kullum ina ƙoƙari in kiyaye lamirina da tsabta a gaban Ubanmu da kuma a gaban mutane. Bayan shekaru da yawa, na zo domin in kawo baye-baye na taimako saboda matalautan al'ummata, da kuma hadayu. A cikin wannan, suka same ni tsarkakke a cikin haikali—babu taro, babu hayaniya. Waɗansu Yahudawa daga Asiya ne ya kamata su kasance a nan a gabanka domin su kawo ƙara, in suna da wani abu a kaina. Ko kuwa bari waɗannan mutane da kansu su faɗi wane laifi suka samu sa'ad da na tsaya a gaban majalisa, sai dai abu guda nan da na ɗaga murya ina faɗa a tsaye a tsakaninsu, ‘Bisa ga tashin matattu ne ake shar'anta ni a gabanku yau.’”

Sai Felis, wanda ya san Hanyar sosai, ya dakatar da sauraron ƙarar, ya ce, “Sa'ad da Lisiyas shugaban sojoji ya iso, zan yanke shawara a kan ƙararku.” Ya umarci jarumin soja ya tsare Bulus, amma ya ba shi 'yanci kaɗan, kada kuma ya hana wani daga cikin abokansa yi masa hidima.

Bayan 'yan kwanaki, sai Felis ya zo tare da matarsa Darusila, wadda Bayahudiya ce, ya aika a kirawo Bulus, ya kuma saurare shi a kan bangaskiya cikin Almasihu Yesu. Yayinda Bulus yake magana a kan adalci, da kamun kai, da kuma hukuncin da yake zuwa, sai tsoro ya kama Felis, ya ce, “Wannan ya isa a yanzu; ka tafi. Sa'ad da na sami lokaci, zan kirawo ka.” Ya kuma yi fata Bulus zai ba shi kuɗi, saboda haka ya riƙa aika a kirawo shi sau da yawa, yana kuma magana da shi.

Bayan shekara biyu, sai Borkiyus Festus ya gāji Felis. Da yake yana so ya gamshi Yahudawa, sai Felis ya bar Bulus a kurkuku.