Pọl Guzoro nʼIhu Agripa

Mgbe e nyere Pọl ohere ikwu okwu nʼihu otu eze, ọ kọghachiri akụkọ ụzọ Damaskọs: ìhè ahụ, olu ahụ, ozi e nyere ya imeghe anya. Festọs tiri mkpu na mmụta ebughala ya ara. Agripa jụrụ ma Pọl na-atụ anya ime ya onye Kraịst ngwa ngwa otu a, emesịa kweta na a gaara ahapụ ya ka ọ gaa.

Isi 26.

Agripa gwara Pọl sị, “Ị nwere ike ikwuru ihe banyere onwe gị.” Mgbe ahụ, Pọl setịpụrụ aka ya malite ịzọrọ onwe ya ọnụ.

Eze Agripa, ana m agụ onwe m onye ihe gaara nke ọma na m ga-azọrọ onwe m nʼihu gị taa megide ebubo niile ndị Juu boro m, karịsịa ebe ị maara nke ọma omenala na esemokwu niile nke ndị Juu, ya mere ana m arịọ gị ka i jiri ndidi gee m ntị.

Ndị Juu niile maara otu ndụ m si dị site na mgbe m bụ okorobịa, bụ nke m biri site na mbido nʼetiti ndị nke m na nʼime Jerusalem. Ha matawo m ogologo oge, ọ bụrụ na ha ga-ekwe ịgba ama, na dịka otu nke kachasị sie ike nʼokpukpe anyị si dị, ebi m ndụ dịka onye Farisii. Ma ugbu a, a na-ekpe m ikpe nʼihi olileanya m nwere na nkwa ahụ Nna anyị kwere nna nna anyị ha. Ebo anyị iri na abụọ nwere olileanya iru na nkwa a, na-efe ya ofufe nke ọkụ nʼabalị na ehihie. Ọ bụ nʼihi olileanya a, eze, ka ndị Juu ji ebo m ebubo. Gịnị mere unu ji ewere ya dịka ihe a na-apụghị ikwere na Nna anyị na-akpọlite ndị nwụrụ anwụ?

Mụ onwe m chere na m aghaghị ime ọtụtụ ihe megide aha Jisọs onye Nazaret. Nke ahụ bụ ihe m mere na Jerusalem: site nʼikike m nwetara nʼaka ndịisi nchụaja, atụbara m ọtụtụ ndị nsọ nʼụlọ mkpọrọ, were tụọ vootu megide ha mgbe a na-egbu ha. Nʼụlọ nzukọ ọbụla, ana m ata ha ahụhụ ọtụtụ mgbe, na-agbalị ịmanye ha ikwu okwu megide Chineke; ebe iwe were m nke ukwuu megide ha, achụwara m ha ọ bụladị ruo nʼobodo ndị mba ọzọ.

Nʼotu njem dị otú a, agara m Damaskọs, ji ikike na iwu m nwetara nʼaka ndịisi nchụaja. Nʼetiti ehihie, eze, ahụrụ m nʼụzọ ìhè si nʼeluigwe, nke na-amụ amụ karịa anyanwụ, na-enwukwasị gburugburu mụ na ndị mụ na ha na-eme njem.

Anyị niile dara nʼala, anụ m olu nke na-agwa m okwu nʼasụsụ Hibru sị, ‘Sọl, Sọl, gịnị mere i ji akpagbu m? Ọ na-esiri gị ike ịgba ụkwụ megide mkpanaka.’ ^a

Ajụrụ m sị, ‘Onye ka ị bụ, Onyenwe m?’ Onyenwe anyị sịrị, ‘Abụ m Jisọs, onye ị na-akpagbu.’

Ma bilie, guzoro nʼụkwụ gị—nʼihi nke a ka m ji gosi gị onwe m: ime gị ohu na onye akaebe, maka ihe ị hụworo banyere m na maka ihe m ga-egosikwa gị nʼọdịnihu, na-anapụta gị site nʼaka ndị gị na site nʼaka ndị mba ọzọ—bụ ndị m na-eziga gị, imeghe anya ha, ka ha si nʼọchịchịrị tụgharịa bịaruo nʼìhè, sikwa nʼike Ekwensu bịakwute Nna anyị, ka ha nwetakwa mgbaghara mmehie na oke nʼetiti ndị e doro nsọ site nʼokwukwe ha nʼime m.’

Ya mere, Eze Agripa, ajụghị m ịrube isi nʼọhụ ahụ si nʼeluigwe, kama ekwusara m ya na mbụ nye ndị nọ na Damaskọs, mgbe ahụ nʼJerusalem na mpaghara niile nke Judia, nyekwa ndị mba ọzọ, ka ha chegharịa ma tụgharịkwute Nna anyị, na-arụ ọrụ kwekọrọ na nchegharị ha. Ọ bụ nʼihi nke a ka ndị Juu ji jide m nʼime ụlọnsọ ukwu, gbalịa igbu m. Site nʼenyemaka Nna anyị, ana m eguzo ruo taa na-agba ama nye ma onye nta ma onye ukwu, na-ekwughị ihe ọbụla karịrị ihe ndị amụma na Mosis kwuru na ọ ga-eme: na Kraịst aghaghị ịta ahụhụ, na, ebe ọ bụ onye mbụ ga-esi nʼọnwụ bilie, na-ekwusa ìhè nye ma ndị nke anyị ma ndị mba ọzọ.

Ka Pọl nọ na-azọrọ onwe ya ọnụ, Festọs tiri mkpu sị, “Pọl, ị na-ayị ara! Ọmụma ihe gị buru ibu na-eme ka ị raa ara.”

Ma Pọl sịrị, “Anaghị m ayị ara, Festọs onye a na-asọpụrụ nke ukwuu; ana m ekwu okwu eziokwu na okwu nwere ezi uche. Eze maara ihe ndị a—ejiri m nkwuwa okwu na-agwa ya okwu. Ekwenyesiri m ike na ọ dịghị nke ọbụla nʼime ha zoro ya ezo, ebe ọ bụ na e meghị ya nʼakụkụ nzuzo. Eze Agripa, ị na-ekwere ndị amụma? Amaara m na ị na-ekwere.”

Agripa sịrị, “Nʼoge dị mkpụmkpụ otú a ka ị chọrọ ime ka m kwenye ịghọ onye Kraịst?”

Pọl sịrị, “Ma ọ bụ oge mkpụmkpụ ma ọ bụ oge ogologo, ana m ekpegara Nna anyị ekpere ka ọ bụrụ na ọ bụghị naanị gị kama ndị niile na-anụ m taa ghọọ ka m dị—ma e wezụga agbụ ndị a.”

Mgbe ahụ, eze biliri, ya na gọvanọ na Banisi na ndị ha na ha nọọ ọdụ.

Ka ha na-apụ, ha gwarịtara onwe ha sị, “Nwoke a ekwesịghị ọnwụ maọbụ mkpọrọ.”

Agripa gwara Festọs sị, “A gaara ahapụ nwoke a ọ bụrụ na ọ rịọghị ka Siza kpee ya ikpe.”