Putra Rama Diselehkeun ka Pilatus

Yudas gantung diri, Pilatus ngumbah leungeun, prajurit-prajurit maké-makéan Yesus jadi raja-rajaan. Poék nutupan tanah, sarta Mantenna ngagorowok yén Allah geus ninggalkeun Mantenna, tuluy pupus. Langsé soéh. Mantenna dikurebkeun dina kuburan nu diinjeum, disegel jeung dijaga.

Pasal 27.

Barang isuk-isuk, sakabeh imam kapala jeung para kokolot bangsa kumpul tuluy ngarencanakeun rek maehan Yesus. Geus kitu Anjeunna dirante, dibawa, tuluy diselehkeun ka Pilatus, gupernur harita.

Harita Yudas, nu geus ngahianat ka Anjeunna, barang nenjo Yesus dihukum, aya kaduhung, tuluy mulangkeun deui duit perak nu tilu puluh keping teh ka imam-imam kapala jeung para kokolot, pokna, “Kaula geus milampah dosa, ngahianat getih nu teu boga dosa.” Tapi tembalna, “Lain urusan kami. Tanggung bae ku maneh sorangan.”

Tuluy duit perak teh ku manehna dialungkeun ka jero Bait Allah, geus kitu manehna indit tuluy ngagantung maneh.

Imam-imam kapala tuluy mulungan duit perak teh bari ngomong, “Teu meunang ieu duit diasupkeun kana peti harta, sabab ieu teh pamayaran getih.” Sanggeus babadamian, duit teh tuluy dipake meuli tanah tukang ngagaringan, pikeun ngurebkeun urang asing. Ku sabab eta, nepi ka kiwari tanah teh disebutna Tanah Getih. Harita laksana pisan anu diucapkeun ku Nabi Yermia: “Maranehanana nyokot duit perak nu tilu puluh keping teh, hargana anu geus ditangtukeun keur Anjeunna, anu dihargaan ku sawatara urang Israil, tuluy duit teh dibikeun pikeun meuli tanah tukang ngagaringan, cocog jeung pituduh Rama urang ka Kami.”

Yesus Jempe di Payuneun Pilatus

Yesus ngadeg di payuneun gupernur; gupernur mariksa, “Anjeun teh Raja urang Yahudi?” Waler Yesus, “Kitu saur anjeun.”

Tapi waktu dituduh ku imam-imam kapala jeung para kokolot, Anjeunna teu ngawaler sakecap-kecap acan. Ti dinya Pilatus nyarios ka Anjeunna, “Naha Anjeun teu ngadangu sakitu lobana tuduhan ka Anjeun?”

Tapi Anjeunna teu ngawaler saeutik-eutik acan, nepi ka gupernur teh kacida heraneunana.

Dina unggal pesta, gupernur biasa ngabebaskeun saurang anu dihukum, nurutkeun pamenta jalma rea. Harita aya hiji anu dihukum nu kamashur jahatna, ngaranna Barabas. Sanggeus jalma rea kumpul, Pilatus nanya, “Rek menta nu dibebaskeun teh nu mana, Barabas, atawa Yesus anu disebut Kristus?” Sabab Pilatus terang yen Yesus teh diselehkeun ka manehna teh ku karana sirik.

Waktu Pilatus keur diuk dina korsi pangadilan, pamajikanana nitah bebejaan ka manehna: Ulah pipilueun kana urusan eta Jalma nu bener, sabab poe ieu kaula loba sangsara dina impian ku karana Anjeunna.

Tapi imam-imam kapala jeung para kokolot ngojok-ngojok jalma rea sangkan menta Barabas jeung sangkan Yesus dipaehan. Gupernur nanya, “Ti nu duaan teh, nu mana nu kudu dibebaskeun ku kaula pikeun maraneh?” Tembalna, “Barabas.”

Ceuk Pilatus ka maranehna, “Ari Yesus anu disebut Kristus, rek dikumahakeun atuh?” Tembal sarerea, “Salib bae!”

Ceuk Pilatus, “Naha? Naon kajahatana-Na?” Tapi maranehna beuki tarik ngagorowok, “Salib bae!”

Barang nenjo yen manehna teu bisa nanaon, malah bakal timbul karusuhan, Pilatus nyokot cai, tuluy ngumbah leungeun hareupeun jalma rea, bari ngomong, “Kaula teu boga dosa tina getih ieu Jalma; tanggung bae ku maraneh sorangan.”

Jalma rea kabeh tuluy ngajawab, “Getih-Na sina nibankeun ka kami jeung ka anak-incu kami!” ^a

Geus kitu Barabas dibebaskeun pikeun maranehna, ari Yesus dirangket, tuluy diselehkeun pikeun disalib.

Para Serdadu Moyok Raja

Geus kitu serdadu-serdadu gupernur mawa Yesus ka jero markas gupernur, tuluy sapasukan serdadu dikumpulkeun ngurilingan Anjeunna. Anjeunna dilaan panganggo-Na, tuluy disalinan ku jubah warna beureum. Maranehna nyieun makuta tina cucuk, dipakekeun kana mastaka Anjeunna, leungeun katuhu-Na dicekelan tangkal awi, tuluy ngariak hareupeun Anjeunna bari ngaledek, “Wilujeng, Raja urang Yahudi!” Terus Anjeunna diciduhan, tangkal awina dicokot, tuluy dipake neunggeulan mastaka Anjeunna sababaraha kali. Sanggeus ngaledek, jubahna dilaan deui, tuluy Anjeunna dianggoan deui panganggo-Na sorangan, geus kitu dibawa rek disalib.

Putra Allah Disalib

Keur di jalan, maranehna manggih hiji urang Kirena, ngaranna Simon, tuluy dipaksa kudu manggul salib Yesus. Barang nepi ka hiji tempat anu disebut Golgota (anu hartina Tempat Tangkorak), Anjeunna disuguhan cianggur dicampur peresan ku getang, tuluy diraosan, tapi teu kersaeun nginum. Sanggeus Anjeunna disalib, panganggo-Na dibagi-bagi ku maranehna ku jalan diundian. Geus kitu maranehna dariuk, tuluy ngajaga Anjeunna di dinya. Luhureun mastaka Anjeunna dipasang tulisan tuduhan ka Anjeunna: “Ieu Yesus, Raja urang Yahudi.”

Harita aya dua rampog anu disalib bareng jeung Anjeunna, saurang di tengen jeung saurang di kenca-Na.

Jalma-jalma anu laliwat ngahina-hina ka Anjeunna, bari unggang-anggutan, carekna, “Heh Anjeun anu rek ngaruksak Bait Allah tuluy ngadegkeun deui dina tilu poe—tulungan maneh! Lamun enya Anjeun Putra Allah, turun ti salib!”

Nya kitu deui imam-imam kapala, jeung ahli-ahli Kitab katut para kokolot, ngaledek bari ngaromong, “Jelema sejen ditulungan; ari anjeunna sorangan teu bisa nulungan maneh. Manehna teh Raja Israil—sina turun ayeuna ti salib, tangtu urang percaya ka manehna. Manehna sumender ka Allah—sina ditulungan ayeuna ku Allah lamun Allah kersaeun ka manehna, sabab cenah manehna teh, ‘Kami Putra Allah.’” Rampog-rampog anu disalib bareng jeung Anjeunna oge milu ngahina-hina ka Anjeunna cara kitu.

Putra nu Ditinggalkeun Masrahkeun Nyawa-Na

Ti wanci tengah poe nepi ka pukul tilu beurang, sakuliah nagri ujug-ujug poek mongkleng.

Kira-kira pukul tilu beurang, Yesus ngagentra tarik, “Eli, Eli, lema sabakhtani?”—anu hartina, “Nun Allah abdi, nun Allah abdi, ku naon abdi diantep ku Gusti?”

Sawatara jalma anu narangtung di dinya, barang ngadarenge kitu, tuluy ngaromong, “Eta Jalma teh ngagero Nabi Elias.” Saurang ti maranehna gancang lumpat, nyokot pependetan dicelebkeun kana anggur haseum, dipasangkeun kana tangkal awi, tuluy disodorkeun supaya diinum ku Anjeunna. Tapi nu sejenna ngaromong, “Antep bae. Urang tenjo heula naha Nabi Elias bakal datang nulungan manehna.”

Yesus ngagentra deui sora-Na tarik, tuluy masrahkeun nyawa-Na. Harita keneh reregan Bait Allah soek dua ti luhur ka handap. Bumi ngoyag, batu-batu bareulah. Makam-makam muka, tuluy loba layon para wali Allah anu geus maraot teh dihirupkeun deui. Sanggeus Yesus gugah ti nu maraot, maranehna kalaluar ti makam, arasup ka kota suci, tuluy nembongan ka loba jalma.

Perwira jeung anu bareng jaga Yesus, barang narenjo lini jeung kajadian-kajadian sejenna, kacida sarieuneunana, tuluy ngaromong, “Saestuna ieu Jalma teh Putra Allah!”

Loba awewe anu narenjokeun ti kajauhan; maranehna geus naluturkeun Yesus ti Galilea pikeun ngalalayanan Anjeunna. Di antarana: Maria Magdalena, Maria indungna Yakobus jeung Yusup, jeung indungna anak-anak Sebedeus.

Yesus Dikurebkeun di Makam

Sanggeus sore, datang hiji jalma beunghar ti Arimatea, ngaranna Yusup, anu oge murid Yesus. Manehna nepangan Pilatus, menta layon Yesus. Pilatus tuluy marentah supaya layon teh dibikeun ka manehna. Layon teh ku Yusup dicandak, tuluy dibungkus ku lawon lenen anu beresih. Geus kitu disimpen dina makamna anu anyar, anu dipahat dina gunung batu, tuluy lawang makam teh digulingan ku batu nu gede, geus kitu manehna indit. Maria Magdalena jeung Maria saurang deui aya di dinya, dariuk mayun ka makam.

Makam Disegel jeung Dijaga

Poe isukna—sanggeus Poe Tatahar—imam-imam kapala jeung urang Parisi kumpul di payuneun Pilatus, tuluy unjukan, “Juragan, abdi sadaya emut yen eta tukang ngarah teh, waktu masih keneh hirup, ngomong kieu, ‘Sanggeus tilu poe Kami bakal hudang deui.’ Ku margi kitu, mugi marentahkeun supados makamna dijaga ketat dugi ka poe nu katilu, bisi murid-muridna datang maling layonna, tuluy ngabejaan ka jalma rea, ‘Anjeunna geus digugahkeun ti nu maraot.’ Panipuan nu pamungkas tangtos langkung awon ti batan nu kahiji.”

Waler Pilatus ka maranehna, “Maraneh boga pangjaga. Pek jaga sing ketat sabisa-bisa.” Tuluy maranehna arindit, makam teh dijaga sangkan aman, batuna disegel tuluy dipasangan pangjaga.