ወዲ ኣቦ ናብ ጲላጦስ ተሓሊፉ ተዋህበ

ይሁዳ ተሓኒቑ ሞተ፥ ጲላጦስ ኢዱ ተሓፀበ፥ ወታደራት ንኢየሱስ ከም ናይ ላግፂ ንጉስ ኣልበስዎ። ፀልማት ኣብ ምድሪ ኸወለ፥ ንሱ ኸዓ ኣምላኽ ከም ዝሓደጎ ጨደረ፥ ድሕሪኡ ሞተ። እቲ መጋረጃ ተቐደደ። ኣብ ዝተለቕሐ መቓብር ተቐቢሩ፥ ተሓቲሙን ተሓሊዩን።

ምዕራፍ 27።

ምድሪ ምስ ወግሐ፥ ኵሎም ሊቃውንቲ ካህናትን ዓበይቲ ህዝብን ተኣኪቦም ንኢየሱስ ክቐትልዎ ተማኸሩ። ኣሲሮም ወሲዶም ድማ ናብ ጲላጦስ እቲ ሹም ኣሕሊፎም ሃብዎ።

ሽዑ እቲ ዘትሕዞ ይሁዳ፥ ኢየሱስ ከም ዝተፈርዶ ምስ ረአየ፥ ተፀዐተ እሞ ነተን ሰላሳ ብሩር ናብ ሊቃውንቲ ካህናትን ዓበይትን መለሰ፥ “ንፁህ ደም ኣሕሊፈ ብምሃበይ ሓጢአ” ኢሉ ድማ በለ። ንሳቶም ከዓ “ምሳና እንታይ ኣለና? ባዕልኻ ትርእዮ” በልዎ።

ነተን ብሩር ናብ ቤተ መቕደስ ደርቢዩ ወፀ፤ ከይዱ ድማ ተሓኒቑ ሞተ።

እቶም ሊቃውንቲ ካህናት ድማ ነቲ ብሩር ወሲዶም፥ “ዋጋ ደም እዩ እሞ ኣብ መዝገብ ከነእትዎ ኣይግባእን” በሉ። ተማኺሮም ድማ፥ መቓብር ጓኖት ክኸውን፥ በቲ ገንዘብ ግራት እቲ ሰራሒ መሬት ዓደጉ። ስለዙይ እታ ግራት እቲኣ ክሳዕ ሎሚ ግራት ደም ተባሂላ ትፅዋዕ ኣላ። ሽዑ እቲ ነቢይ ኤርሚያስ ዝበሎ ተፈፀመ፦ “ነተን ሰላሳ ብሩር፥ ዋጋ እቲ ገሊኦም ደቂ እስራኤል ዝመነዎ፥ ወሰዱ፥ ንግራት እቲ ሰራሒ መሬት ድማ ከምቲ ኣቦና ዝኣዘዘኒ ሃብዎም።”

ኢየሱስ ኣብ ቅድሚ ጲላጦስ ስቕ ኢሉ ደው በለ

ኢየሱስ ኣብ ቅድሚ እቲ ሹም ደው በለ፤ እቲ ሹም ድማ “ንስኻ ንጉስ ኣይሁድ ዲኻ?” ኢሉ ጠየቖ። ኢየሱስ ከዓ “ባዕልኻ ትብል ኣለኻ” በሎ።

ብሊቃውንቲ ካህናትን ዓበይትን ክኽሰስ እንተሎ ግና፥ ገለ እኳ ኣይመለሰሉን። ሽዑ ጲላጦስ “ክንደይ ክሲ ከም ዘቕርቡልካ ኣይትሰምዕንዶ ኣለኻ?” በሎ።

ንሓንቲ ቓል እኳ ገለ ኣይመለሰሉን፤ ስለዙይ እቲ ሹም የመና ተገረመ።

ኣብ ነፍሲ ወከፍ በዓል፥ እቲ ሹም ነቲ ህዝቢ ዝደልዮ ሓደ እሱር ይፈትሓሎም ነበረ። በታ ጊዜ እቲኣ ድማ፥ በርባን ዝተብሃለ ፍሉጥ እሱር ሒዞም ነበሩ። ምስ ተኣከቡ ድማ ጲላጦስ “ንበርባን ወይ ነቲ ክርስቶስ ዝተብሃለ ኢየሱስ፥ ነየናይ ክፈትሓልኩም ትደልዩ?” በሎም። ብቕንኣት ኣሕሊፎም ከም ዝሃብዎ ይፈልጥ ነበረ እሞ።

ኣብ መንበር ፍርዲ ተቐሚጡ እንተሎ ድማ፥ ሰበይቱ ከምዙይ ኢላ ለኣኸትሉ፦ ሎሚ ብሰበቡ ብሕልሚ ብዙሕ ተሳቐኹ እየ እሞ፥ ነቲ ፃድቕ ሰብኣይ እቲ ገለ ኣይትግበሮ።

እቶም ሊቃውንቲ ካህናትን ዓበይትን ግና፥ ንበርባን ክሓቱን ንኢየሱስ ድማ ከጥፍኡን፥ ነቶም ህዝቢ ኣረድእዎም። እቲ ሹም ድማ “ካብዞም ክልተ ነየናይ ክፈትሓልኩም?” በሎም። ንሳቶም ከዓ “ንበርባን” በሉ።

ጲላጦስ ድማ “ነቲ ክርስቶስ ዝተብሃለ ኢየሱስ እሞ እንታይ ክገብሮ?” በሎም። ኵሎም ከዓ “ይስቀል!” በሉ።

ንሱ ድማ “ስለ ምንታይ? እንታይ ክፉእ ገይሩ?” በለ። ንሳቶም ግና “ስቐሎ!” እናበሉ የመና ዓው ኢሎም ኣእወዩ።

ጲላጦስ ገለ ክገብር ከም ዘይኽእል፥ ኣብ ክንድኡ ድማ ሁከት ከም ዝጅምር ምስ ረአየ፥ ማይ ወሲዱ ኣብ ቅድሚ እቲ ህዝቢ ኣእዳዉ ተሓፀበ እሞ “ካብ ደም እዝ ሰብ እዙይ ንፁህ እየ፤ ባዕልኻትኩም ትርእይዎ” በለ።

ኵሉ እቲ ህዝቢ ድማ “ደሙ ኣብ ልዕሌናን ኣብ ልዕሊ ደቅናን ይኹን!” ኢሉ መለሰ። ^a

ሽዑ ንበርባን ፈትሓሎም፤ ንኢየሱስ ድማ ኣገሪፉ፥ ክስቀል ኣሕሊፉ ሃቦ።

ወተሃደራት ነቲ ንጉስ የላግፁሉ

ሽዑ ወተሃደራት እቲ ሹም ንኢየሱስ ናብ ኣደራሽ እቲ ሹም ወሲዶም፥ ኵሉ እቲ ጭፍራ ናብኡ ኣከቡ። ኣልባሱ ቀንጢጦም ድማ፥ ቀይሕ ባርኖስ ከደንዎ። ዘውዲ እሾዅ ጠሚሞም ኣብ ርእሱ ደፍኡሉ፤ ኣብ የማነይቲ ኢዱ ድማ ሻምብቆ ኣትሒዞም፥ ኣብ ቅድሚኡ ተምበርኪኾም “ሰላም ንኣኻ፥ ኦ ንጉስ ኣይሁድ!” እናበሉ ኣላገፁሉ። ኣብ ልዕሊኡ ድማ እንትፍ በሉሉ፤ ነታ ሻምብቆ ወሲዶም ከዓ ኣብ ርእሱ ደጋጊሞም ወቕዕዎ። ኣላጊፆምሉ ምስ ወድኡ ድማ፥ ነቲ ባርኖስ ቀንጢጦም ክዳውንቱ ኣልበስዎ፤ ክሰቕልዎ ከዓ ወሰድዎ።

ወዲ እግዚኣብሄር ይስቀል

ክወፁ እንተለዉ ድማ፥ ስምኦን ዝተብሃለ ሓደ ቀሬናዊ ረኸቡ፤ መስቀል ኢየሱስ ክሽከም ከዓ ኣገደድዎ። ናብታ ጎልጎታ እትብሃል፥ ማለት ቦታ ናላ፥ ቦታ ምስ በፅሑ፥ ምስ መሪር ሓሞት ዝተሓወሶ ወይኒ ክሰቲ ሃብዎ፤ ጠዓሞ እሞ ክሰቲ ኣበየ። ምስ ሰቐልዎ ድማ፥ ዕፃ ኣውዲቖም ክዳውንቱ ንሓድሕዶም ተማቐሉ። ተቐሚጦም ድማ ኣብኡ ይሕልውዎ ነበሩ። ኣብ ልዕሊ ርእሱ ድማ፥ ነቲ ዝኽሰሰሉ ክሲ “እዙይ ኢየሱስ ንጉስ ኣይሁድ እዩ” ኢሎም ፀሓፉ።

ሽዑ ክልተ ከተርቲ፥ ሓደ ብየማኑ ሓደ ድማ ብፀጋሙ፥ ምስኡ ተሰቕሉ።

እቶም ዝሓልፉ ዝነበሩ ድማ፥ ርእሶም እናነቕነቑ ይፃረፍዎ ነበሩ፥ “ኣታ ንቤተ መቕደስ እተፍርስ፥ ብሰለስተ መዓልቲ ድማ እትሃንፆ፥ ንርእስኻ ኣድሕን! ወዲ እግዚኣብሄር እንተ ኾይንካ፥ ካብ መስቀል ውረድ!” ኢሎም።

ከምኡ ድማ እቶም ሊቃውንቲ ካህናት ምስ ፀሓፍትን ዓበይትን ኮይኖም እናባጨዉ ከምዙይ በሉ፦ “ንኻልኦት ኣድሐነ፤ ንርእሱ ግና ከድሕን ኣይኽእልን። ንጉስ እስራኤል እዩ፤ ሕዚ ካብቲ መስቀል ይውረድ እሞ ብእኡ ክንኣምን ኢና። ብእግዚኣብሄር ይኣምን ኣሎ፤ እግዚኣብሄር ፈትይዎ እንተ ኾይኑ ሕዚ የድሕኖ፤ ‘ኣነ ወዲ እግዚኣብሄር እየ’ ኢሉ ነይሩ እዩ እሞ።” እቶም ምስኡ ዝተሰቕሉ ጐሓሉ ድማ ከምኡ ገይሮም ፀረፍዎ።

እቲ ዝተሓደገ ወልድ መንፈሱ ኣሕለፈ

ካብ ፍርቂ መዓልቲ ኣትሒዙ ድማ ክሳዕ ሰዓት ትሽዓተ፥ ኣብ ልዕሊ ኵላ እታ ምድሪ ፀልማት ኮነ።

ሰዓት ትሽዓተ ኣቢሉ ኸዓ ኢየሱስ ዓው ኢሉ “ኤሊ፥ ኤሊ፥ ለማ ሰበቕታኒ?” ኢሉ ፀውዐ፤ ትርጕሙ ኸዓ “ኣምላኸይ፥ ኣምላኸይ፥ ስለ ምንታይ ሓደግካኒ?” ማለት እዩ።

ካብቶም ኣብኡ ደው ኢሎም ዝነበሩ ገሊኣቶም እዙይ ምስ ሰምዑ፥ “እዝ ሰብ እዙይ ንኤልያስ ይፅውዕ ኣሎ” በሉ። ካብኣቶም ሓደ ሽዑ ንሽዑ ጎይዩ፥ ሰፍነግ ብኮምጣጣ ኣጠልቂሉ፥ ኣብ ሻምብቆ ገይሩ ኣስተዮ። እቶም ካልኦት ግና “ሕደግዎ፤ ኤልያስ መፂኡ ከድሕኖ እንተ ዀይኑ ንርአ” በሉ።

ኢየሱስ ድማ ከም ብሓድሽ ዓው ኢሉ ፀዊዑ መንፈሱ ኣሕለፈ። እንሆ ድማ እቲ መጋረጃ ቤተ መቕደስ ካብ ላዕሊ ክሳዕ ታሕቲ ናብ ክልተ ተቐደደ። ምድሪ ተናወፀት፤ እቲ ኣኻውሕ ድማ ተሰንጠቐ። መቓብራት ተኸፈተ፤ ብዙሓት ስጋታት እቶም ዝደቀሱ ቅዱሳን ድማ ተንስኡ። ድሕሪ ትንሳኤ ኢየሱስ ድማ ካብ መቓብራት ወፂኦም፥ ናብ እታ ቅድስቲ ኸተማ ኣትዮም ንብዙሓት ተራእዩ።

እቲ ሓለቓ ሚእትን እቶም ምስኡ ንኢየሱስ ዝሕልዉ ዝነበሩን እቲ ምንቅጥቃጥ ምድርን እቲ ዝኾነን ምስ ረአዩ፥ የመና ፈሪሖም “ብሓቂ እዝ ሰብ እዙይ ወዲ እግዚኣብሄር ነይሩ!” በሉ።

ብዙሓት ኣንስቲ ኸዓ ካብ ርሑቕ ይርእያ ነበራ፤ ንሳተን ንኢየሱስ ከገልግልኦ ኻብ ገሊላ ተኸቲለንኦ መፂአን ነበራ። ካባታተን ድማ ማርያም መግደላዊትን፥ ማርያም ኣደ ያእቆብን ዮሴፍን፥ ኣደ ደቂ ዘብዴዎስን ነበራ።

ኢየሱስ ኣብ መቓብር ተቐበረ

ምሸት ምስ ኮነ ኸዓ ዮሴፍ ዝተብሃለ ሃፍታም ሰብ፥ ካብ ኣርማትያስ መፀ፤ ንሱ ድማ ባዕሉ ደቀ መዝሙር ኢየሱስ ነበረ። ናብ ጲላጦስ ከይዱ ድማ ስጋ ኢየሱስ ለመነ። ሽዑ ጲላጦስ ክወሃቦ ኣዘዘ። ዮሴፍ ድማ ነቲ ስጋ ወሲዱ ብንፁህ በፍታ ገነዞ። ኣብቲ ኣብ ከውሒ ዝወቐሮ ሓድሽ መቓብሩ ኣንበሮ፤ ኣብ ኣፍ መቓብር ድማ ዓብዪ እምኒ ኣንከባሊሉ ኸደ። ማርያም መግደላዊትን እታ ኻልአይታ ማርያምን ድማ ኣብኡ ነበራ፤ ኣብ መንፅር እቲ መቓብር ተቐሚጠን።

እቲ መቓብር ተሓቲሙ ተሓለወ

ንጽባሒቱ ድማ፥ ድሕሪ እታ መዓልቲ ምድላው፥ እቶም ሊቃውንቲ ካህናትን ፈሪሳውያንን ኣብ ቅድሚ ጲላጦስ ተኣከቡ፤ ከምዙይ ድማ በሉ፦ “ጐይታና፥ እቲ መታለሊ ገና ብህይወቱ እንተሎ፥ ‘ድሕሪ ሰለስተ መዓልቲ ክትስእ እየ’ ኢሉ ኸም ዝበለ ንዝክር ኣለና። ስለዙይ እቲ መቓብር ክሳዕ ሳልሳይ መዓልቲ ክሕሉ ኣዝዝ፤ እንተ ዘይኮነ ደቀ መዛሙርቱ መፂኦም ክሰርቅዎ፥ ‘ካብ ምዉታን ተሲኡ’ ኢሎም ድማ ነቲ ህዝቢ ኽነግሩ ይኽእሉ እዮም። እቲ ናይ ዳሕራይ ምትላል ድማ ካብቲ ናይ ቀዳማይ ዝገደደ እዩ።”

ጲላጦስ ድማ “ሓለውቲ ኣለኹም፤ ኪዱ እሞ ከም ዝከኣለኩም ኣፅንዕዎ” በሎም። ንሳቶም ድማ ከይዶም ነቲ እምኒ ሓቲሞም ሓለውቲ ኣቐሚጦም ነቲ መቓብር ኣፅንዕዎ።