ማቴዎስ 26 FHB Father's Heart Bible™

ምዕራፍ 26።

26 ¹ኢየሱስ እዝ ኵሉ ቃላት እዙይ ምስ ወድአ፥ ንደቀ መዛሙርቱ ከምዙይ በሎም፦

²“ፋሲካ ድሕሪ ኽልተ መዓልቲ ኸም ዝመፅእ ትፈልጡ ኢኹም፤ ወዲ ሰብ ድማ ክስቀል ኣሕሊፉ ይውሃብ እዩ።”

³ሽዑ ሊቃነ ካህናትን ሽማግለታት ህዝብን፥ ኣብ ኣፅድ እቲ ሊቀ ካህናት ቀያፋ ተኣከቡ፤ ⁴ንኢየሱስ ብምስጢር ሒዞም ክቐትልዎ ድማ ብሓባር ተማኸሩ። ⁵ንሳቶም ግና “ኣብ ህዝቢ ወኻዕታ ኸይለዓል፥ በቲ በዓል ኣይኹን” በሉ።

ንኢየሱስ ንቐብሪ ቀብአቶ

⁶ኣብ ቢታንያ ኣብ ገዛ እቲ ለምፃም ስምኦን ኢየሱስ እንተሎ፥ ⁷ሓንቲ ሰበይቲ፥ ኣዝዩ ክቡር ሽቱ ዝሓዘ ብልቃጥ ኣልባስጥሮስ ሒዛ ናብኡ መፀት፤ ኣብ ማእዲ ተቐሚጡ እንተሎ ኸዓ ኣብ ርእሱ ኣፍሰሰቶ። ⁸እቶም ደቀ መዛሙርቱ ኸዓ እዙይ ምስ ረአዩ፥ ኰሪዮም “እዝ ጥፍኣት እዙይ ንምንታይ እዩ? ⁹እዙይ ብብዙሕ ገንዘብ ተሸይጡ ንድኻታትዶ ግዳ ኣይምተውሃበን ነይሩ” በሉ።

¹⁰ኢየሱስ ድማ እዙይ ፈሊጡ ከምዙይ በሎም፦ “ስለ ምንታይ ነዛ ሰበይቲ ተፅግምዋ ኣለኹም? ንሳ ፅቡቕ ነገር እያ ዝገበረትለይ። ¹¹ድኻታት ኵሉ ጊዜ ምሳኻትኩም ኣለዉ እዮም፤ ንኣይ ግና ኵሉ ጊዜ ኣይክትረኽቡንን ኢኹም። ¹²እዛ ሰበይቲ እዚኣ እዝ ሽቱ እዙይ ኣብ ሰብነተይ ብምፍሳሳ፥ ንቐብረይ ከተዳልወኒ ኢላ እያ ዝገበረት። ¹³ብሓቂ እብለኩም ኣለኹ፥ እዝ ወንጌል እዙይ ኣብ ኵላ ዓለም ኣብ ዝስበኸሉ ስፍራ ዅሉ፥ እዝ ንሳ ዝገበረቶ እውን ንመዘከርታኣ ክንገር እዩ።”

ይሁዳ ንወልድ ብብሩር ኣሕሊፉ ሃቦ

¹⁴ሽዑ ኻብቶም ዓሰርተ ኽልተ ሓደ፥ ኣስቆሮታዊ ይሁዳ ዝተብሃለ፥ ናብ ሊቃነ ካህናት ከደ፤ ¹⁵“ኣነ ኣሕሊፈ ኽህበኩም፥ ንስኻትኩም እንታይ ክትህቡኒ ትደልዩ?” ድማ በሎም። ንሳቶም ከዓ ሰላሳ ብሩር ቈፂሮም ሃብዎ። ¹⁶ካብታ ጊዜ እቲኣ ድማ ኣሕሊፉ ኽህቦ ምችዊ ጊዜ ይደሊ ነበረ።

ንፋሲካ ምድላው

¹⁷በታ ቐዳመይቲ መዓልቲ በዓል ቅጫ ድማ፥ እቶም ደቀ መዛሙርቱ ናብ ኢየሱስ መፂኦም “ፋሲካ ኽትበልዕ ኣበይ ከነዳልወልካ ትደሊ?” ኢሎም ጠየቕዎ።

¹⁸ንሱ ኸዓ “ናብ ከተማ ናብ ሓደ ሰብኣይ ኪዱ እሞ ‘እቲ መምህር፦ ጊዜይ ቀሪቡ እዩ፤ ፋሲካ ምስ ደቀ መዛሙርተይ ኣብ ቤትካ ኸብዕል እየ፥ ይብል ኣሎ’ በልዎ” በሎም።

¹⁹እቶም ደቀ መዛሙርቱ ድማ ከምቲ ኢየሱስ ዝኣዘዞም ገበሩ፤ ንፋሲካ ኸዓ ኣዳለዉ።

²⁰ምሸት ምስ ኮነ ድማ፥ ምስቶም ዓሰርተ ኽልተ ኣብ ማእዲ ተቐመጠ።

²¹ክበልዑ እንተለዉ ድማ “ካባኻትኩም ሓደ ኣሕሊፉ ኽህበኒ እዩ፥ ብሓቂ እብለኩም ኣለኹ” በሎም።

²²የመና ሓዚኖም ድማ፥ ነፍሲ ወከፎም “ኦ ጐይታ፥ ኣነዶ ኾን እየ?” ኢሎም ጠየቕዎ።

²³ንሱ ኸዓ ኢሉ መለሰ፦ “እቲ ምሳይ ኣብ ሸሓነ ኢዱ ዝጠመዐ፥ ንሱ ኣሕሊፉ ክህበኒ እዩ። ²⁴ወዲ ሰብ ከምቲ ብዛዕባኡ ዝተፅሓፈ ይኸይድ እዩ፤ ነቲ ዘትሕዞ ሰብኣይ ግና ወይለኡ! እቲ ሰብኣይ እቱይ እንተ ዘይተወልደ ምሐሾ ነይሩ።”

²⁵እቲ ዘትሕዞ ይሁዳ ድማ “መምህር፥ ኣነዶ ኾን እየ?” በሎ። ንሱ ኸዓ “ባዕልኻ ኢልካ” በሎ።

²⁶ክበልዑ እንተለዉ ድማ፥ ኢየሱስ ሕብስቲ ኣልዒሉ ባሪኹ ቘሪሱ ንደቀ መዛሙርቱ ሃቦም፤ “ውሰዱ፤ ብልዑ፤ እዙይ ስጋይ እዩ” ድማ በሎም። ²⁷ፅዋዕ ኣልዒሉ ድማ ኣመስጊኑ ሃቦም፤ ከምዙይ ድማ በሎም፦ “ኵልኻትኩም ካብኣ ስተዩ፤ ²⁸እዙይ ምእንቲ ብዙሓት ንሕድገት ሓጢኣት ዝፈስስ፥ ደመይ ናይ ኪዳን እዩ እሞ። ²⁹እብለኩም ኣለኹ፤ ካብ ሕዚ ጀሚረ፥ ክሳዕ እታ ምሳኻትኩም ሓድሽ ጌረ ኣብ መንግስቲ ኣቦይ ዝሰትዮ መዓልቲ፥ ካብዛ ፍረ ወይኒ እዚኣ ድጊም ኣይክሰትን እየ።”

³⁰መዝሙር ምስጋና ምስ ዘመሩ ድማ፥ ናብ ደብረ ዘይት ወፁ።

ኢየሱስ ብዛዕባ ክሕደት ጴጥሮስ ኣቐዲሙ ተዛረበ

³¹ሽዑ ኢየሱስ ከምዙይ በሎም፦ “ብዛዕባይ ኵልኻትኩም በዛ ለይቲ እዚኣ ኽትዕንቀፉ ኢኹም፤ ‘ነቲ ጓሳ ኽወቕዖ እየ፥ ኣባጊዕ መጓሰ ኸዓ ክበታተና እየን’ ዝብል ተፅሒፉ ኣሎ እሞ። ³²ድሕሪ ምትንሳአይ ግና፥ ቀቅድሜኹም ናብ ገሊላ ክኸይድ እየ።”

³³ጴጥሮስ ድማ “ብዛዕባኻ ኵሎም እንተ ተዓንቀፉ፥ ኣነ ኸቶ ኣይክዕንቀፍን እየ” በሎ።

³⁴ኢየሱስ ከዓ “በዛ ለይቲ እዚኣ ደርሆ እንተይነቀወ፥ ሰለስተ ሻዕ ከም እትኽሕደኒ ብሓቂ እብለካ ኣለኹ” በሎ።

³⁵ጴጥሮስ ድማ “ምሳኻ ኽመውት እኳ እንተ ኣድለየኒ፥ ኣይክሕደካን እየ” በሎ። ኵሎም እቶም ደቀ መዛሙርቲ ድማ ከምኡ በሉ።

ወልድ ንኣቦ ተማእዘዘ

³⁶ሽዑ ኢየሱስ ምሳታቶም ጌቴሴማኒ ናብ እትበሃል ቦታ መፀ፤ ንደቀ መዛሙርቱ ኸዓ “ናብቱይ ከይደ ክፅሊ እንተለኹ፥ ኣብዙይ ተቐመጡ” በሎም።

³⁷ንጴጥሮስን ንኽልቲኦም ደቂ ዘብዴዎስን ምስኡ ወሲዱ ድማ፥ የመና ሓዘነ፤ ተጨነቐውን።

³⁸ሽዑ ኸምዙይ በሎም፦ “ነፍሰይ ክሳዕ ሞት ሓዚና ኣላ፤ ኣብዙይ ፅንሑ፤ ምሳይ ከዓ ትግሁ።”

³⁹ቁሩብ ንቕድሚት ፈንተት ኢሉ ድማ፥ ብገፁ ተደፊኡ ፀለየ፤ “ኣቦይ፥ ዝከኣል እንተ ኾይኑ፥ እዛ ፅዋዕ እዚኣ ኻባይ ትሕለፍ፤ ግና ከምቲ ኣነ ዝደልዮ ዘይኮነስ፥ ከምቲ ንስኻ እትደልዮ ይኹን” በለ።

⁴⁰ናብ እቶም ደቀ መዛሙርቱ መፂኡ ድማ ደቂሶም ረኸቦም፤ ንጴጥሮስ ከዓ “እምበኣር፥ ሓንቲ ሰዓት እኳ ምሳይ ክትነቅሑ ኣይከኣልኩምን ዲኹም? ⁴¹ተጊህኹም ፀልዩ፥ ናብ ፈተና ከይትኣትዉ፤ መንፈስ ፍቓደኛ እዩ፥ ስጋ ግና ድኹም እዩ።”

⁴²ንኻልኣይ ጊዜ ከይዱ ድማ ከምዙይ ኢሉ ፀለየ፦ “ኦ ኣቦይ፥ እዙይ ኣነ እንተ ዘይሰተኽዎ ኽሓልፍ ዘይኽእል እንተ ኾይኑ፥ ፍቓድካ ይኹን።”

⁴³ተመሊሱ ኸዓ ደቂሶም ረኸቦም፤ ኣዒንቶም ከቢዱ ነይሩ እዩ እሞ። ⁴⁴ደጊሙ ሓዲጉዎም ድማ ከይዱ፥ ነቲ ቐደም ዝበሎ ቓላት እናደገመ ንሳልሳይ ጊዜ ፀለየ።

⁴⁵ሽዑ ናብቶም ደቀ መዛሙርቱ መፂኡ ኸምዙይ በሎም፦ “ገና ትድቅሱ ተዕርፉ ኣለኹም? እንሆ፥ እታ ሰዓት በፂሓ እያ፤ ወዲ ሰብ ድማ ኣብ ኢድ ሓጥኣን ኣሕሊፉ ተዋሂቡ ኣሎ። ⁴⁶ተልዓሉ፥ ንኺድ! እንሆ፥ እቲ ዘትሕዘኒ ኣብዙይ ኣሎ!”

ኢየሱስ ተጠሊሙ ተታሕዘ

⁴⁷ንሱ ገና ኽዛረብ እንተሎ፥ እንሆ፥ ካብቶም ዓሰርተ ኽልተ ሓደ ዝኾነ ይሁዳ፥ ካብ ሊቃነ ካህናትን ካብ ሽማግለታት ህዝብን ዝተልኣኹ፥ ኣስይፍትን ኣብትርትን ዝሓዙ ብዙሕ ህዝቢ ሒዙ ሽዑ ንሽዑ መፀ። ⁴⁸እቲ ዘትሕዞ ኸዓ ኣቐዲሙ ምልክት ሂብዎም ነበረ፦ “ኣነ ዝስዕሞ ሰብ፥ ንሱ እዩ እሞ ሓዝዎ።” ⁴⁹ብኡብኡ ድማ ናብ ኢየሱስ ቀሪቡ “ሰላም ንኣኻ ይኹን፥ ረቢ!” በሎ፤ ሰዓሞ ድማ።

⁵⁰ኢየሱስ ድማ “ኣታ ዓርከይ፥ ነቲ ዝመፃእካሉ ግበሮ” በሎ። ሽዑ ቀሪቦም ንኢየሱስ ሒዞም ኣፅንዕዎ።

⁵¹እንሆ ድማ፥ ካብቶም ምስ ኢየሱስ ዝነበሩ ሓደ፥ ኢዱ ዘርጊሑ ሰይፉ መዘዘ፤ ንሓሽከር ሊቀ ካህናት ወቒዑ ድማ እዝኑ ቈረፆ።

⁵²ሽዑ ኢየሱስ “ሰይፍኻ ናብ ቦታኡ ምለሶ፤ ሰይፊ ዝሓዙ ዅሎም ብሰይፊ ኽሞቱ እዮም እሞ።” በሎ። ⁵³“ንኣቦይ ክልምኖ ዘይኽእል ዝመስለካ ዲዩ? ንሱ ድማ ሕዚ ኻብ ዓሰርተ ኽልተ ጭፍራ ዝበዝሑ መላእኽቲ ምሰደለይ ነይሩ። ⁵⁴ግና እዙይ ከምዙይ ክኸውን ከም ዝግባእ፥ እቲ ኣብ መፃሕፍቲ ዝተፅሓፈ ደኣ ኸመይ ኢሉ ኽፍፀም እዩ?”

⁵⁵በታ ሰዓት እቲኣ ኢየሱስ ነቶም ህዝቢ ኸምዙይ በሎም፦ “ከም ከታሪዶ ኣስይፍትን ኣብትርትን ሒዝኩም ክትሕዙኒ መፂእኹም? ዕለት ዕለት ኣብ ቤተ መቕደስ እናመሃርኩ እቕመጥ ነይረ፥ ኣይሓዝኩምንን። ⁵⁶ግና እዝ ኵሉ ዝኾነ፥ ናይ ነቢያት ፅሑፋት ምእንቲ ኽፍፀም እዩ።” ሽዑ ዅሎም ደቀ መዛሙርቱ ንእኡ ሓዲጎም ሃደሙ።

ኢየሱስ ኣብ ቅድሚ ከሰስቱ

⁵⁷ሽዑ እቶም ንኢየሱስ ዝሓዙ ሰባት፥ ናብቲ መምህራን ሕግን ሽማግለታትን ተኣኪቦምሉ ዝነበሩ፥ ናብ ሊቀ ካህናት ቀያፋ ወሰድዎ። ⁵⁸ጴጥሮስ ድማ ክሳዕ ቅፅሪ ሊቀ ካህናት ብርሑቕ ተኸተሎ፤ ኣትዩ ኸዓ፥ መወዳእታኡ ኽሳዕ ዝርኢ፥ ምስቶም ሓሻኽር ተቐመጠ።

⁵⁹ሊቃነ ካህናትን ኵሉ መጋባእያን ድማ፥ ንኢየሱስ ክቐትልዎ ምእንቲ፥ ናይ ሓሰት ምስክርነት ይደልዩ ነበሩ፤ ⁶⁰ግና ብዙሓት ናይ ሓሰት መሰኻኽር ቀሪቦም እኳ እንተነበሩ፥ ኣይረኸቡን። ኣብ መወዳእታ ድማ ክልተ ቀረቡ፥ ⁶¹ከምዙይ ድማ በሉ፦ “እዝ ሰብኣይ እዙይ ‘ንቤተ መቕደስ እግዚኣብሄር ከፍርሶ፥ ብሰለስተ መዓልቲ ኸዓ ክሃንፆ ይኽእል እየ’ ኢሉ ነይሩ።”

⁶²እቲ ሊቀ ካህናት ድማ ደው ኢሉ “እትምልሶ ዘይብልካ ዲኻ? እዚኣቶም ኣባኻ ዝምስክርዎ ዘለዉ እንታይ እዩ?” ኢሉ በሎ። ⁶³ኢየሱስ ግና ስቕ በለ። እቲ ሊቀ ካህናት ድማ “ንስኻ ክርስቶስ፥ ወዲ እግዚኣብሄር ምዃንካ ኽትነግረና፥ ብህያው እግዚኣብሄር ኤምሕለካ ኣለኹ።” በለ።

⁶⁴ኢየሱስ ድማ “ንስኻ ኢልካዮ። ግና እብለኩም ኣለኹ፥ ካብ ሕዚ ጀሚርኩም ንወዲ ሰብ ኣብ የማን ሓይሊ ተቐሚጡ፥ ኣብ ደመና ሰማይ እናመፀ ኽትርእይዎ ኢኹም።” በሎ።

⁶⁵ሽዑ እቲ ሊቀ ካህናት ክዳውንቱ ቀዲዱ “ፃሪፉ እዩ! ደጊም ናይ ምንታይ መሰኻኽር የድልየና? እንሆ፥ ሕዚ ነቲ ፀርፊ ሰሚዕኹምዎ ኣለኹም። ⁶⁶እንታይ ትፈርዱ?” በለ። ንሳቶም ድማ “ሞት ይግብኦ” ኢሎም መለሱ።

⁶⁷ሽዑ ኣብ ገፁ እንትፍ በሉሉ፥ ወቕዕዎ ድማ፤ ገሊኣቶም ከዓ ፀፍዕዎ፥ ⁶⁸“ኣታ ክርስቶስ፥ መን ከም ዝወቕዐካ ተነበየልና!” እናበሉ።

ጴጥሮስ ንኢየሱስ ከሓዶ

⁶⁹ጴጥሮስ ድማ ኣብ ወፃኢ፥ ኣብቲ ቅፅሪ ተቐሚጡ ነበረ። ሓንቲ ገረድ ድማ ናብኡ ቀሪባ “ንስኻውን ምስ ኢየሱስ እቲ ገሊላዊ ነይርካ” በለቶ።

⁷⁰ንሱ ግና ኣብ ቅድሚ ዅሎም “ነዝ እትብልዮ ዘለኺ ኣይፈልጦን እየ” ኢሉ ኸሓደ።

⁷¹ናብ ኣፍ ደገ ኽወፅእ እንተሎ ድማ፥ ካልእ ገረድ ረአየቶ፤ ነቶም ኣብኡ ዝነበሩ ኸዓ “እዙይ ምስ ኢየሱስ እቲ ናዝራዊ ነይሩ” በለቶም።

⁷²ደጊሙ ድማ “ነቲ ሰብኣይ ኣይፈልጦን እየ” ኢሉ ብመሓላ ኸሓደ።

⁷³ድሕሪ ቑሩብ ጊዜ ድማ፥ እቶም ኣብኡ ደው ኢሎም ዝነበሩ ናብ ጴጥሮስ መፂኦም “ኣዘራርባኻ የፍልጠካ ኣሎ እሞ፥ ብርግፅ ንስኻውን ካብኣቶም ኢኻ” በልዎ።

⁷⁴ሽዑ “ነቲ ሰብኣይ ኣይፈልጦን እየ” እናበለ ንባዕሉ ኽረግምን ክምሕልን ጀመረ። ሽዑ ንሽዑ ድማ ደርሆ ነቀወ።

⁷⁵ጴጥሮስ ከዓ ነቲ ኢየሱስ ዝበሎ ቓል ዘከረ፦ “ደርሆ እንተይነቀወ፥ ሰለስተ ሻዕ ክትክሕደኒ ኢኻ።” ናብ ደገ ወፂኡ ድማ ኣምሪሩ በኸየ።