Matiu 26

Orí 26.

26 ¹Nígbà tí Jesu ti parí gbogbo ọ̀rọ̀ wọ̀nyí, ó wí fún àwọn ọmọ-ẹ̀hìn rẹ̀ pé,

²“Ẹ mọ̀ pé lẹ́yìn ọjọ́ méjì ni àjọ Ìrékọjá yóò dé, a ó sì fi Ọmọ Ènìyàn hàn láti kàn án mọ́ àgbélébùú.”

³Nígbà náà ni àwọn olórí àlùfáà àti àwọn àgbàgbà àwọn ènìyàn péjọ sí àgbàlá àlùfáà àgbà, Kaiafa, ⁴wọ́n sì jọ gbìmọ̀ pọ̀ láti mú Jesu ní ìkọ̀kọ̀ kí wọ́n sì pa á. ⁵Ṣùgbọ́n wọ́n wí pé, “Kì í ṣe lásìkò àjọ̀dún, kí rúdurùdu má bàa ṣẹlẹ̀ láàrin àwọn ènìyàn.”

Ó Fi Òróró Yan Jesu fún Ìsìnkú

⁶Nígbà tí Jesu wà ní Betani, ní ilé Simoni adẹ́tẹ̀, ⁷obìnrin kan tọ̀ ọ́ wá pẹ̀lú ìgò alabasita tí ó kún fún òróró ìkunra olówó iyebíye, ó sì dà á sí orí rẹ̀ bí ó ti jókòó ti oúnjẹ. ⁸Nígbà tí àwọn ọmọ-ẹ̀hìn rí èyí, inú bí wọn, wọ́n sì wí pé, “Èé ṣe tí a fi ṣòfò nǹkan báyìí? ⁹Nítorí a ì bá ta èyí ní owó púpọ̀, kí a sì fi fún àwọn tálákà.”

¹⁰Jesu mọ èyí, ó sì wí fún wọn pé, “Èé ṣe tí ẹ fi ń yọ obìnrin yìí lẹ́nu? Ó ṣe ohun rere sí mi. ¹¹Nítorí ẹ ó máa ní àwọn tálákà pẹ̀lú yín nígbà gbogbo, ṣùgbọ́n ẹ kì yóò ní mi nígbà gbogbo. ¹²Nítorí nígbà tí ó da òróró ìkunra yìí sí ara mi, ó ṣe é láti múra mi sílẹ̀ de ìsìnkú. ¹³Lóòótọ́ ni mo wí fún yín pé, ibikíbi tí a bá ti wàásù ìhìnrere yìí jákèjádò ayé, ohun tí ó ṣe ni a ó sọ pẹ̀lú, ní ìrántí rẹ̀.”

Judasi Fi Ọmọ náà Hàn fún Fàdákà

¹⁴Nígbà náà ni ọ̀kan nínú àwọn Méjìlá, ẹni tí a ń pè ní Judasi Iskariotu, tọ àwọn olórí àlùfáà lọ, ¹⁵ó sì wí pé, “Kí ni ẹ fẹ́ fún mi, èmi ó sì fi í lé yín lọ́wọ́?” Wọ́n sì ka ọgbọ̀n ẹyọ fàdákà fún un. ¹⁶Láti ìgbà náà lọ ni ó ti ń wá àǹfààní láti fi í hàn.

Ìgbáradì fún Àjọ Ìrékọjá

¹⁷Ní ọjọ́ àkọ́kọ́ àjọ àìwúkàrà, àwọn ọmọ-ẹ̀hìn béèrè lọ́wọ́ Jesu pé, “Níbo ni ẹ fẹ́ kí a lọ pèsè àjọ Ìrékọjá sílẹ̀ fún yín láti jẹ?”

¹⁸Ó wí pé, “Ẹ lọ sí ìlú ńlá sọ́dọ̀ ọkùnrin kan, kí ẹ sì sọ fún un pé, ‘Olùkọ́ wí pé: Àkókò mi súnmọ́ tòsí. Èmi ó ṣe àjọ Ìrékọjá ní ilé rẹ pẹ̀lú àwọn ọmọ-ẹ̀hìn mi.’”

¹⁹Àwọn ọmọ-ẹ̀hìn sì ṣe bí Jesu ti darí wọn, wọ́n sì pèsè àjọ Ìrékọjá sílẹ̀.

²⁰Nígbà tí alẹ́ lẹ́, ó jókòó ti oúnjẹ pẹ̀lú àwọn Méjìlá.

²¹Bí wọ́n ti ń jẹun, ó wí pé, “Lóòótọ́ ni mo wí fún yín, ọ̀kan nínú yín yóò fi mí hàn.”

²²Inú wọn bàjẹ́ gidigidi, olúkúlùkù wọn sì béèrè lọ́wọ́ rẹ̀ pé, “Dájúdájú, kì í ṣe èmi, Olúwa?”

²³Ó dáhùn pé, “Ẹni tí ó bá mi tẹ ọwọ́ rẹ̀ bọ inú àwo ni yóò fi mí hàn. ²⁴Ọmọ Ènìyàn ń lọ, gẹ́gẹ́ bí a ti kọ̀wé nípa rẹ̀. Ṣùgbọ́n ègbé ni fún ọkùnrin náà tí ó fi í hàn—ì bá sàn fún un ká ni a kò bí i rí.”

²⁵Judasi, ẹni tí yóò fi í hàn, wí pé, “Dájúdájú, kì í ṣe èmi, Rabbi?” Ó wí fún un pé, “Ìwọ ti wí i.”

²⁶Bí wọ́n ti ń jẹun, Jesu mú àkàrà, ó súre, ó sì bù ú, ó fi fún àwọn ọmọ-ẹ̀hìn, ó sì wí pé, “Ẹ gbà, ẹ jẹ; èyí ni ara mi.” ²⁷Ó mú ago kan, ó dúpẹ́, ó sì fi fún wọn, ó ní, “Gbogbo yín, ẹ mu nínú rẹ̀, ²⁸nítorí èyí ni ẹ̀jẹ̀ mi ti májẹ̀mú, tí a ta sílẹ̀ fún ọ̀pọ̀lọpọ̀ fún ìdáríjì ẹ̀ṣẹ̀. ²⁹Mo wí fún yín pé: Èmi kì yóò tún mu nínú èso àjàrà yìí mọ́, láti ìsinsìnyí títí di ọjọ́ náà tí èmi ó bá yín mu ún ní tuntun ní ìjọba Baba mi.”

³⁰Nígbà tí wọ́n sì ti kọ orin ìyìn tán, wọ́n jáde lọ sí Òkè Ólífì.

Jesu Sọtẹ́lẹ̀ Bí Peteru yóò ṣe Sẹ́ Òun

³¹Nígbà náà ni Jesu wí fún wọn pé, “Ní òru òní, gbogbo yín ni yóò kọsẹ̀ nítorí mi. Nítorí a ti kọ̀wé pé: ‘Èmi ó kọlu olùṣọ́-àgùntàn, àwọn àgùntàn inú agbo ni a ó sì fọ́n ká.’ ³²Ṣùgbọ́n lẹ́yìn tí a bá jí mi dìde, èmi ó ṣáájú yín lọ sí Galili.”

³³Peteru wí fún un pé, “Bí gbogbo wọn bá tilẹ̀ kọsẹ̀ nítorí yín, èmi kì yóò kọsẹ̀ láéláé.”

³⁴Jesu wí fún un pé, “Lóòótọ́ ni mo wí fún ọ pé: kí àkùkọ tó kọ ní òru òní, ìwọ ó sẹ́ mi lẹ́ẹ̀mẹ́ta.”

³⁵Peteru wí pé, “Bí ó tilẹ̀ di dandan kí èmi kú pẹ̀lú yín, èmi kì yóò sẹ́ yín.” Gbogbo àwọn ọmọ-ẹ̀hìn sì wí bákan náà.

Ọmọ náà Fi Ara Rẹ̀ Lélẹ̀ fún Baba

³⁶Nígbà náà ni Jesu bá wọn dé ibì kan tí a ń pè ní Getsemane, ó sì wí fún àwọn ọmọ-ẹ̀hìn pé, “Ẹ jókòó níhìn-ín nígbà tí èmi ó lọ gbàdúrà lọ́hùn-ún.”

³⁷Ó sì mú Peteru àti àwọn ọmọ Sebede méjèèjì pẹ̀lú rẹ̀, inú rẹ̀ sì bẹ̀rẹ̀ sí í bàjẹ́ gidigidi, ọkàn rẹ̀ sì dàrú.

³⁸Nígbà náà ni ó wí fún wọn pé, “Ọkàn mi gbọgbẹ́ pẹ̀lú ìbànújẹ́, àní títí dé ikú. Ẹ dúró níhìn-ín, kí ẹ sì máa bá mi ṣọ́ra.”

³⁹Ó lọ síwájú díẹ̀, ó dojúbolẹ̀, ó sì gbàdúrà pé, “Baba mi, bí ó bá ṣe é ṣe, ẹ jẹ́ kí ago yìí kọjá lọ́dọ̀ mi. Ṣùgbọ́n kì í ṣe bí èmi ti fẹ́, bí kò ṣe bí ẹ ti fẹ́.”

⁴⁰Ó tọ àwọn ọmọ-ẹ̀hìn wá, ó sì bá wọn, wọ́n ń sùn. Ó wí fún Peteru pé, “Ǹjẹ́ bẹ́ẹ̀ ni, ẹ kò ha lè bá mi ṣọ́nà fún wákàtí kan? ⁴¹Ẹ máa ṣọ́ra, kí ẹ sì máa gbàdúrà, kí ẹ má bàa bọ́ sínú ìdẹwò; ẹ̀mí ń fẹ́, ṣùgbọ́n ara kò lera.”

⁴²Nígbà kejì, ó tún lọ, ó sì gbàdúrà pé, “Baba mi, bí èyí kò bá lè kọjá lọ àfi bí mo bá mu ún, ìfẹ́ yín ni kí ó ṣẹ.”

⁴³Ó tún padà wá, ó sì bá wọn, wọ́n ń sùn, nítorí ojú wọn kún fún oorun. ⁴⁴Ó sì tún fi wọn sílẹ̀, ó lọ, ó sì gbàdúrà nígbà kẹta, ó tún sọ àwọn ọ̀rọ̀ kan náà.

⁴⁵Nígbà náà ni ó tọ àwọn ọmọ-ẹ̀hìn wá, ó sì wí fún wọn pé, “Ṣé ẹ ṣì ń sùn, tí ẹ sì ń sinmi? Ẹ wò ó, wákàtí náà dé, a ó sì fi Ọmọ Ènìyàn lé àwọn ẹlẹ́ṣẹ̀ lọ́wọ́. ⁴⁶Ẹ dìde, ẹ jẹ́ kí a lọ! Ẹ wò ó, ẹni tí ó fi mí hàn ti dé!”

A Fi Jesu Hàn, A sì Mú Un

⁴⁷Bí ó ti ń sọ̀rọ̀ lọ́wọ́, Judasi, ọ̀kan nínú àwọn Méjìlá, dé lójijì pẹ̀lú ọ̀pọ̀ ìjọ ènìyàn tí wọ́n gbé idà àti kùmọ̀, tí àwọn olórí àlùfáà àti àwọn àgbàgbà àwọn ènìyàn rán. ⁴⁸Ẹni tí yóò fi í hàn sì ti fún wọn ní àmì pé, “Ẹni tí mo bá fi ẹnu kò ni ẹni náà—ẹ mú un.” ⁴⁹Lójúkan náà, ó tọ Jesu lọ, ó sì wí pé, “Àlàáfíà, Rabbi!” Ó sì fi ẹnu kò ó.

⁵⁰Jesu wí fún un pé, “Ọ̀rẹ́, ṣe ohun tí o wá ṣe.” Nígbà náà ni wọ́n súnmọ́ ọn, wọ́n sì mú Jesu, wọ́n dìímú.

⁵¹Sì wò ó, ọ̀kan nínú àwọn tí ó wà pẹ̀lú Jesu na ọwọ́ rẹ̀, ó fa idà rẹ̀ yọ, ó sì ṣá ọmọ ọ̀dọ̀ àlùfáà àgbà, ó gé etí rẹ̀ dànù.

⁵²Nígbà náà ni Jesu wí fún un pé, “Fi idà rẹ padà sí àpò rẹ̀. Gbogbo àwọn tí ó bá fa idà ni yóò ti ipá idà ṣègbé. ⁵³Ṣé o rò pé èmi kò lè ké pe Baba mi, ẹni tí yóò rán sí mi lójúkan náà ní ohun tí ó ju ọ̀wọ́ ọmọ-ogun áńgẹ́lì méjìlá lọ? ⁵⁴Ṣùgbọ́n báwo ni Ìwé Mímọ́ ṣe lè ṣẹ nígbà náà, pé ó gbọ́dọ̀ ṣẹlẹ̀ báyìí?”

⁵⁵Ní wákàtí náà, Jesu wí fún ìjọ ènìyàn pé, “Ṣé pẹ̀lú idà àti kùmọ̀ ni ẹ ṣe jáde wá láti mú mi, bí ẹni pé ọlọ́ṣà ni mí? Mo jókòó ń kọ́ni nínú tẹ́mpìlì lójoojúmọ́, ẹ kò sì mú mi. ⁵⁶Ṣùgbọ́n gbogbo èyí ṣẹlẹ̀ kí Ìwé Mímọ́ àwọn wòlíì lè ṣẹ.” Nígbà náà ni gbogbo àwọn ọmọ-ẹ̀hìn fi í sílẹ̀, wọ́n sì sá.

Jesu Níwájú Àwọn Olùfisùn Rẹ̀

⁵⁷Nígbà náà ni àwọn tí ó mú Jesu fà á lọ sọ́dọ̀ Kaiafa àlùfáà àgbà, níbi tí àwọn akọ̀wé àti àwọn àgbàgbà ti péjọ. ⁵⁸Peteru sì tẹ̀lé e lókèèrè, títí dé àgbàlá àlùfáà àgbà, ó wọ inú rẹ̀, ó sì bá àwọn olùṣọ́ jókòó láti wo bí nǹkan yóò ṣe parí sí.

⁵⁹Àwọn olórí àlùfáà àti gbogbo ìgbìmọ̀ wá ẹ̀rí èké lòdì sí Jesu, láti pa á, ⁶⁰ṣùgbọ́n wọn kò rí ọ̀kan, bí ó tilẹ̀ jẹ́ pé ọ̀pọ̀ ẹlẹ́rìí èké yọjú. Níkẹyìn, méjì yọjú, ⁶¹wọ́n sì wí pé, “Ọkùnrin yìí wí pé, ‘Èmi lè wó tẹ́mpìlì Ọlọ́run palẹ̀, kí n sì tún un kọ́ ní ọjọ́ mẹ́ta.’”

⁶²Àlùfáà àgbà dìde dúró, ó sì wí fún un pé, “Ṣé o kò ní ìdáhùn kankan? Kí ni àwọn ọkùnrin wọ̀nyí ń jẹ́rìí lòdì sí ọ?” ⁶³Ṣùgbọ́n Jesu dákẹ́ jẹ́ẹ́. Àlùfáà àgbà wí pé, “Mo fi Ọlọ́run alààyè búra fún ọ pé, sọ fún wa bóyá ìwọ ni Kristi, Ọmọ Ọlọ́run.”

⁶⁴Jesu wí fún un pé, “Ìwọ ti wí i. Ṣùgbọ́n mo wí fún yín pé: láti ìsinsìnyí lọ, ẹ ó rí Ọmọ Ènìyàn tí yóò jókòó ní ọwọ́ ọ̀tún Agbára, tí yóò máa bọ̀ lórí àwọsánmà ọ̀run.”

⁶⁵Nígbà náà ni àlùfáà àgbà fa aṣọ rẹ̀ ya, ó wí pé, “Ó ti sọ ọ̀rọ̀ òdì sí Ọlọ́run! Èé ṣe tí a ṣì fi ń fẹ́ ẹlẹ́rìí? Ẹ ti gbọ́ ọ̀rọ̀ òdì náà báyìí. ⁶⁶Kí ni ìdájọ́ yín?” Wọ́n dáhùn pé, “Ó tọ́ sí ikú.”

⁶⁷Nígbà náà ni wọ́n tutọ́ sí ojú rẹ̀, wọ́n sì lu ú; àwọn mìíràn sì gbá a lójú, ⁶⁸wọ́n ń wí pé, “Sọ àsọtẹ́lẹ̀ fún wa, Kristi! Ta ni ó lù ọ́?”

Peteru Sẹ́ pé Òun Kò Mọ Jesu

⁶⁹Peteru jókòó lóde nínú àgbàlá. Ọmọ ọ̀dọ̀bìnrin kan sì tọ̀ ọ́ wá, ó wí pé, “Ìwọ pẹ̀lú wà pẹ̀lú Jesu ará Galili.”

⁷⁰Ṣùgbọ́n ó sẹ́ níwájú gbogbo wọn, ó wí pé, “Èmi kò mọ ohun tí ìwọ ń sọ.”

⁷¹Bí ó ti jáde lọ sí ẹnu-ọ̀nà, ọmọ ọ̀dọ̀bìnrin mìíràn rí i, ó sì wí fún àwọn tí ó wà níbẹ̀ pé, “Ọkùnrin yìí wà pẹ̀lú Jesu ti Nasareti.”

⁷²Ó sì tún sẹ́ pẹ̀lú ìbúra pé, “Èmi kò mọ ọkùnrin náà.”

⁷³Lẹ́yìn ìgbà díẹ̀, àwọn tí ó dúró síbẹ̀ tọ Peteru wá, wọ́n wí pé, “Dájúdájú, ìwọ pẹ̀lú jẹ́ ọ̀kan nínú wọn, nítorí ọ̀rọ̀ ẹnu rẹ fi ọ́ hàn.”

⁷⁴Nígbà náà ni ó bẹ̀rẹ̀ sí í fi ara rẹ̀ bú, ó sì búra pé, “Èmi kò mọ ọkùnrin náà.” Lójúkan náà, àkùkọ sì kọ.

⁷⁵Peteru sì rántí ọ̀rọ̀ Jesu pé, “Kí àkùkọ tó kọ, ìwọ ó sẹ́ mi lẹ́ẹ̀mẹ́ta.” Ó sì jáde lọ, ó sọkún kíkorò.