Matthew 26

Chapter 26.

26 ¹Kala Jishuna tui saikora hi hāngkupchanghailaga, awui sākhangatha̱bingli hānga,

²"Zimiksho khanithangwui thili Makānkhami rāra kaji nathumna thei, kala miwui Naomayarali krushli shaoshān khavai horsangmira."

³Chiwui thili pāngmon akhokabing eina mibingwui ararbing china pāngmon kharei Caiaphaswui yāngkhupli rākazipa, ⁴kala Jishuli ngathumda tukkhuilaga shaothat khavai ngasoda khangarān sai. ⁵Kha athumna hānga, "Phanit atamli masāpaimara, kaja mibingli ngama̱-ngashao shokpaishina."

Sha̱naona Jishuli Kachizanwui Vang Thao Neomi

⁶Jishuna Bethanyli phārrei kakazā Simonwui shimli leilakha, ⁷sha̱nao akhana aman kasaka nganamkaphā thao alabaster thaokhong akha khuirāda Jishu phazāda leilakha awui akuili heirora. ⁸Chi theilaga sākhangatha̱bingna malungvātta hānga, "Khisāda thao hi aremali shimānngasakkhala? ⁹Kaja hi lupā tarākha eina yorhailaga kachāmbingli mipaira."

¹⁰Jishuna hi theilaga athumli hānkai, "Khisāda nathumna sha̱nao hili sheikhaut sākhala? Ana iwui vang khamathā otsak akha sāhaira. ¹¹Kaja kachāmbing chi atam kachida nathumli ngasoda lei, kha ina atam kachida nathumli ngasoda maleimara. ¹²Kaja ana iwui phasāli thao hi heirormi tharan, iwui chifawui vang ili sānngarānda sāhaira. ¹³Kachangkhat eina ina nathumli kahāngna, okathui katongali paokaphā hi hākashokpam kachida, ana sāmi kahai chila ali phaningkhaung sāda hāngmira."

Judasna Lupāwui Vang Anaomayarali Yorza

¹⁴Chiwui thili tharāda khaniwui ngachaili Judas Iscariot da hokakhuia akhana pāngmon akhokabingli vai, ¹⁵kala hānga, "Ili khi mi khavai nathum ngasakngaikhala, chieina ina ali nathumwui pāngli horsangmira?" Chieina athumna ali lupā thumrā shānmi. ¹⁶Kala chithang eina thuida ana ali yorsang khavai atam kachā phai.

Makānkhamiwui Vang Khangarān Sai

¹⁷Khawok makazang khamuiwui phanitwui kharethangli sākhangatha̱bingna Jishuli ngahāna, "Makānkhamiwui phāzat na zakhavai, ithumna kali khangarān sālu da nana ngasakngaikhala?"

¹⁸Ana hānga, "Keinungli kachikathā mi akhawuili vāda ali hānglu, 'Ojāna kahāngna: Iwui atam nganaihaira. Ina iwui sākhangatha̱bingli ngasoda nawui shimli Makānkhami mayonra.'"

¹⁹Chieina sākhangatha̱bingna Jishuna athumli hāngkahai thada sai, kala athumna Makānkhami ngarānhaira.

²⁰Kazing khaying eina ana sākhangatha̱ tharāda khani chili ngasoda tableli pama.

²¹Kala athumna phazāmahungda leilakha ana hānga, "Kachangkhat eina ina nathumli kahāngna, nathumwui ngachaili akhana ili yansaira."

²²Athum wukkhananglāk eina kachichāna ali ngahāna, "Proho, ina maningmala?"

²³Ana ngahānkai, "Ili ngasoda koklui chili apāng rurkhui kahaia china ili yansaira. ²⁴Miwui Naomayarana awui pongli kapi kahai thada thira; kha ali yankasaia mipa chiwui kalāshāt! Awui vanga marāpharākasāna phāmei."

²⁵Ali yorkazāpa Judasna hānga, "Ojā, ina maningmala?" Jishuna ali hānga, "Nana hānghaira."

²⁶Athumna phazāmahungda leilakha Jishuna khamui khuida ningkashiwui seihā sakuphailaga serkhaida sākhangatha̱bingli mida hānga, "Khuilaga phāzalu; hi iwui asāna." ²⁷Tengkot khuida ningkashi mihailaga ana athumli mida hānga, "Nathum saikorana chiwui eina manglu, ²⁸kaja hi kachungkhawui morei pheokhami khavai heishokmi kahai iwui tuingashitwui asheena. ²⁹Ina nathumli kahāngna, ara eina iwui Avā wungramli nathum ngasoda kadhara mangki kaji zimiksho chi marāranglakha eina tangda, ina hi drakhārongwui athei mamangluimara."

³⁰Laa akha sāchanglaga athumna Olive kaphungli vāhaowa.

Jishuna Peterwui Hatkhami Sāngngarānda Hānga

³¹Chieina Jishuna athumli ngahānkai, "Ngayā arui nathum saikora iwui vang eina yāmserhaora. Kaja hithada kapihaida lei: 'Ina yaokahomali sāthathaora, kala yaoshangwui yaobing chaiyānghaora.' ³²Kha I ringshok kahaiwui thili nathumli ina Galileeli rida vāra."

³³Peterna ali hānga, "Athum saikora nawui vang eina yāmserhailala, I kachilikha mayāmmara."

³⁴Jishuna ali hānga, "Kachangkhat eina ina nali kahāngna, arui ngayā harvāna makhongranglakha eina tangda, nana ili kathum shida hatra."

³⁵Peterna hānga, "Ina nali ngasoda thiphalungngaisālala, nali mahatmara." Chieina sākhangatha̱bing saikorana chikathā hānga.

Anaomayarana Avāli Ayāmsang

³⁶Chiwui thili Jishuna athumli ngasoda Gethsemane kaho apam akhali vai, kala sākhangatha̱bingli hānga, "Ina apam khu chili seihā vāsālakha, nathum hili pamsālu."

³⁷Kala ana Peter kala Zebedeewui naomayara khanili hokhuivailaga, a wukkhananglak kala chotchanglakhaowa.

³⁸Chieina ana athumli hānga, "Iwui wuklung wukkakhanangna thiki jiura; hili pamda ili ngasoda rimpamsālu."

³⁹Ana khavāmeilaga a mai ngaleili mashunzangda seihā sāda hānga, "Iwui Avā, sapaiakha, hi tengkot chi iwui eina kānthuimihaoranu. Chithālala, ina sāngai thada maningmana, kha nana sāngai thada ngasakranu."

⁴⁰Ana sākhangatha̱bingwuili rāda athum pikasā thei. Chieina ana Peterli hānga, "Chieina, nathumna ili ngasoda pung akhamāng mikringmeida mapamrarthulā? ⁴¹Ningngasharda seihā sālu, kasuili matāzang khavaina; manglava sāngaikachangkhata, kha asāna ngazanhaowa."

⁴²Khaniwui thili valuishitlaga seihā vāsālui, "Iwui Avā, ina hi mamangakha hi kānthuimapaimara kajila, nawui sāngai thada ngasakranu."

⁴³Ana latluida rāda athum pikasā thei, kaja athumwui mik ritlakhaira. ⁴⁴Chieina athumli latluida nothāhailaga, kakathumali kharewui tākam eina hānglaga seihā vāsālui.

⁴⁵Chiwui thili ana sākhangatha̱bingli rāhānga, "Aruila pichingda ngasāmda leifala? Yanglu, atam chi rāshungura, kala miwui Naomayarali morei kaphungbingwui pāngli yorkasangura. ⁴⁶Ngakarthuilu, ithum zatusa! Yanglu, ili yorkazapa china hili rāhaira!"

Jishuli Yorkazā kala Tukkhuihai

⁴⁷Ana matui mahungda leilakha hengsāda tharāda khaniwui ngachaili Judas kaho china pāngmon akhokabing kala mibingwui ararbingna kachiho raighai kala thinghun singlaga mi kachungkha ngasoda rāsai. ⁴⁸Yorkazapana ingkit akha athumli mihaira: "Ina amaya̱ki mi china a kho; ali tukkhuida shailu." ⁴⁹Kala hengsāda ana Jishuwuili vai kala, "Ringphālu, Ojā!" da hānglaga amaya̱ya.

⁵⁰Jishuna ali hānga, "Ngasotnao, na khi sākhavai kharā chi sālu." Chieina athumna rāda Jishuli yonsa̱khuida tukkhuihaowa.

⁵¹Kala yanglu, Jishuli ngasokasā mi akhana apāng khangkāda awui raighai singsālaga, pāngmon khareiwui rao akhawui khanā yortāmihaowa.

⁵²Chiwui thili Jishuna ali hānga, "Nawui raighai chi awui apamli hailuishitlu. Raighai singmebing saikora raighai eina thira. ⁵³I iwui Avāli ngakao mapaimara da na phaningla? Ngakaoakha ana ngalāngda kazingrao legion tharāda khani reikhameiya ili chihovāra. ⁵⁴Kha chithākha, hi hithāda shokphalungra da kapihaida lei kaji Kathara lairik chi kathada ungshungrakhala?"

⁵⁵Atam chitharan Jishuna mi kachungkhali hānga, "Nathumna raighai kala thinghun hokhuilaga, khaleli tukkhui thada ili tukkhui khavai kharālā? Thangkachida ina khorumshimli tamchitheida pama, kha nathumna ili matukkhuimana." ⁵⁶Kha hi saikora marānbingna kapi kahai Kathara lairik ungshung khavai shokkahaina." Chieina sākhangatha̱bing saikorana ali horhailaga yāmserhaowa."

Jishu Awui Kaphenabingwui Ngalemli

⁵⁷Chiwui thili Jishuli tukkhui kahaibingna ali pāngmon kharei Caiaphaswuili khuivai, apam chili ain kathembing eina khararnaobing rākazipa. ⁵⁸Peterna khalachāhamsam shurvai, pāngmon khareiwui yāngkhupli azangda, aphān chi kathada shokrakhala da yangkhavai khamayonbing ngasoda apama.

⁵⁹Pāngmon akhokabing kala hangva̱nao katong saikorana Jishuli sāthat khavai, kakapik shākhi phai, ⁶⁰kha minama shākhibing kachungkha thuinganinglala akhala masamphangmana. Naomeikapta khani thuinganinga, ⁶¹kala hānga, "Mipā hina hānga, 'I Varewui khorumshim sāshimānlaga kathum thangli sākāluipaira.'"

⁶²Pāngmon khareina thuinganingda ali hānga, "Na ngahānkā khikha maleimala? Mipā hibingna nawuitungli khi shākhi mikhala?" ⁶³Kha Jishuna kasaikha pama. Pāngmon khareina hānga, "I kharinga Varewui ming eina nali khangashit sāmi: na Khrista, Varewui Naomayara ngasāra kaji ithumli hānglu."

⁶⁴Jishuna ali hānga, "Nana hānghaira. Kha ina nathumli kahāngna: ara eina nathumna miwui Naomayara Pangshapwui yāpangli pamda, kazingram muiyā eina kharāda theira."

⁶⁵Chieina pāngmon khareina awui kachon serkhākta hānga, "Ana chipathaira! Chithākha ithumna aruila shākhibing kaji lei? Nathumna ara awui kachipat tui shāhaira. ⁶⁶Nathumwui tuikup khikhala?" Athumna ngahānkai, "A thikhangayi."

⁶⁷Chieina athumna awui maili machora̱ mashorrora, kala ali shaowa; kala kaikhana ali kapheya, ⁶⁸hānga, "Khrista, ithumli marānlu! Nali khipāna shaokhala?"

Peterna Jishuli matheimana da hatra

⁶⁹Peterna kayāng ayarli pamsai. Rao sha̱nao akhana ali rāhānga, "Nala Galileepā Jishuli ngasosai."

⁷⁰Kha ana athum saikorawui mangāli mamayāmada hānga, "Nana khi kahāngkhala kaji I matheimana."

⁷¹Ana ngaveivāk shokkashung tharan, rao sha̱nao khangatei akhana ali theilaga chili leibing chili hānga, "Mipa hi Nazarethwui Jishuli ngasosai."

⁷²Chieina ana khangashit sāda mamayāluida hānga, "Mipa hi I matheimana."

⁷³Khaleilaga khanganingbing china Peterli rāhānga, "Mashoila na athumwui ngachaili akhana, kaja nawui khamatuina nali samphangngasaka."

⁷⁴Chieina ana khalattali khonshida shākhi sāda hānga, "Mipa hi I matheimana." Chichangli harvā khonghaowa.

⁷⁵Jishuna hāngkahai tui chi Peterna phaningunga: "Harvāna makhongranglakha, nana ili kathumshida hatra." Chieina ana ayarli shoklaga soso chapa.