Bamfumu Salaka Mfundu samu na Kufwa Yesu
Kento mosi dukulaka mananasi ya ntalu mingi mpe ba ngalaka yandi; Yuda tekaka yandi na palata makumi tatu. Na Ngetesemane, Yesu bondilaka Tata ya yandi na kukatula mbungu ntangu banduku ya yandi vwandaka kaka kulala mpongi. Ntangu ba kangaka yandi, yandi nwanisaka ve. Pyele dyaka ndefi ti yandi me zaba muntu yina ve.
26 1Ntangu Yesu manisaka na kutuba mambu yayi nyonso, yandi tubaka na bilandi ya yandi:
2«Beno zaba ti Pasika ke kwiza na manima ya bilumbu zole, mpe ba ke yekula Mwana ya Muntu samu na kukoma yandi na kulunsi.»
3Na yina, bamfumu ya banganga-Nzambi vukanaka kintwadi na bakuluntu ya bantu na lupangu ya nganga-Nzambi ya ntete Kayife, 4mpe bawu salaka mfundu kintwadi samu na kukanga Yesu na mansweki mpe kufwa yandi. 5Kasi bawu tubaka: «Na ntangu ya nkinsi ve, samu ti makelele lenda vwanda na kati ya bantu.»
Yandi Pakulaka Yesu Mafuta samu na Kuzika Yandi
6Ntangu Yesu vwandaka na mbanza Betani, na yinzo ya Simoni yina vwandaka muntu ya bwazi, 7Ntangu Yesu vwandaka na mesa, kento mosi kwizaka pene-pene na yandi na kitutu ya alabati ya mananasi ya ntalu mingi kibeni, mpe yandi dukulaka yawu na yintu ya yandi. 8Ntangu bilandi talaka yawu, bawu waka nkele, mpe tubaka: «Samu na yinki kubebisa mutindu yayi? 9Samu ti bawu lendaka kuteka yawu na mbongo mingi, mpe kupesa yawu na bansukami.»
10Yesu zabaka yawu, mpe tubilaka bawu: «Samu na yinki beno ke pesa kento yayi mpasi? Yandi me sala munu dyambu ya kitoko. 11Samu ti beno ke vwanda ntangu nyonso na bansukami, kasi beno ke vwanda ve na munu ntangu nyonso. 12Samu ti ntangu yandi sekulaka mananasi yayi na nzutu ya munu, yandi salaka yawu samu na kuyidika munu samu na kuzika. 13Ya tsyelika, mu ke na kuzabisa beno: Bisika nyonso yina ba ke zabisa Nsangu ya Mbote yayi na yinza, ba ke zonzila mpe mambu yina yandi me sala, samu na kubambukila yandi moyo.»
Yuda Yekulaka Mwana samu na Bisengo
14Na yina, muntu mosi na kati ya bilandi kumi na zole, yina bawu vwandaka kubokila Yuda Isekayote, kwendaka na bamfumu ya banganga-Nzambi, 15mpe tubaka: «Beno zola kupesa munu yinki, mpe munu ke yekula yandi na beno?» Bawu tangaka samu na yandi mbongo ya bisengo makumi tatu. 16Katuka ntangu yina, yandi vwandaka sosa ntangu ya mbote ya kuyekula yandi.
Kuyidika samu na Pasika
17Na kilumbu ya ntete ya Mampa ya Kukonda Levule, bilandi yufulaka Yesu: «Nge zola ti beto yidika wapi samu na nge kudya Pasika?»
18Yandi tubaka: «Beno kwenda na mbanza na sika ya muntu mosi, mpe beno zabisa yandi: “Longi ke tuba: Ntangu ya munu me kuma pene-pene. Mu ke dya Pasika na yinzo ya nge kintwadi na bilandi ya munu.”»
19Bilandi salaka mutindu Yesu zabisaka bawu, mpe bawu yidikaka Pasika.
20Ntangu nkokila kumaka, yandi vwandaka na mesa kintwadi na bilandi kumi na zole.
21Ntangu bawu vwandaka kudya, yandi tubaka: «Ya tsyelika, mu ke na kuzabisa beno, mosi na kati ya beno ke yekula munu.»
22Bawu waka kyadi mingi, mpe konso muntu yufulaka yandi: «Mfumu, keti munu ve?»
23Yandi vutulaka: «Muntu yina me bolisa diboko ya yandi kintwadi na munu na kati ya dilonga, yandi ni muntu yina ke yekula munu. 24Mwana ya Muntu ke kwenda, kaka mutindu ba sonikaka yawu samu na yandi. Kasi kyadi na muntu yina ke na kuyekula yandi! Yo lenda vwanda mbote na yandi kana yandi butukaka ve.»
25Yuda, yina vwandaka yekula yandi, tubaka: «Labi, keti munu ve?» Yesu tubaka na yandi: «Nge mosi me tuba yawu.»
26Ntangu bawu vwandaka kudya, Yesu bakaka dimpa, sakumunaka mpe bukunaka yawu, pesaka yawu na bilandi, mpe tubaka: «Beno baka, beno dya; yayi ni nzutu ya munu.» 27Yandi bakaka mbungu mpe tondaka Nzambi, pesaka yawu na bawu, mpe tubaka: «Beno nyonso, beno nwa yawu, 28samu ti yayi ni menga ya munu ya ngwisani, yina ba me mwanga samu na bantu mingi samu na kulemvokila masumu. 29Mu ke na kuzabisa beno: Mu ke nwa dyaka ve mbuma yayi ya vinu, katuka bubu yayi tii na kilumbu yina mu ke nwa yawu ya mpa kintwadi na beno na Kimfumu ya Tata ya munu.»
30Ntangu bawu yimbilaka mukunga, bawu basikaka mpe kwendaka na mongo ya ba-Olive.
Yesu Ke Zabisa na Ntwala ti Pyele Ke Manga Yandi
31Na yina, Yesu zabisaka bawu: «Na mpimpa ya bubu yayi, beno nyonso ke bwa samu na munu. Samu ti ba sonikaka: “Mu ke bula ngungudi, mpe mameme ya kibuka ke mwangana.” 32Kasi na manima ya kufutumuka na munu, mu ke kwenda na ntwala ya beno na Ngalili.»
33Pyele tubaka na yandi: «Ata bawu nyonso ke bwa samu na nge, munu, mu ke bwa ata fyoti ve.»
34Yesu tubaka na yandi: «Ya tsyelika, mu ke na kuzabisa nge, na mpimpa ya bubu yayi, ntete nsusu kuba, nge ke manga munu bambala tatu.»
35Pyele tubaka: «Ata mu fwana kufwa kintwadi na nge, mu ke manga nge ve.» Bilandi nyonso tubaka mutindu mosi.
Mwana Ke Kikaba na Maboko ya Tata
36Na yina, Yesu kwizaka kintwadi na bawu na kisika yina ba ke bokilaka Ngetesemane, mpe zabisaka bilandi: «Beno vwanda awa ntangu mu ke kwenda sambila kuna.»
37Yandi bakaka Pyele na bana zole ya Zebede, mpe yandi bandaka na kuwa kyadi mingi na mpasi ya ntima.
38Na yina, yandi tubilaka bawu: «Ntima ya munu me fuluka na kyadi tii na lufwa. Beno bikala awa, beno kyelola meso kintwadi na munu.»
39Yandi kwendaka na mwa mantwala, kubwaka na kizizi na ntoto mpe sambilaka: «Tata ya munu, kana yawu lenda kusalama, bika mbungu yayi kukatuka pene-pene na munu. Kasi yawu kusalama ve mutindu munu ke zola, kasi mutindu nge ke zola.»
40Yandi kwizaka na bilandi, mpe kutaka bawu ya kulala. Yandi tubaka na Pyele: «Yo yina, nge me lenda ve na kukyelola meso kintwadi na munu ata na ngunga mosi? 41Beno kyelola meso mpe beno sambila, samu ti beno bwa ve na mpukumunu; mpeve ke zola, kasi nzutu kele ngolo ve.»
42Na mbala ya zole, yandi kwendaka dyaka mpe sambilaka: «Tata ya munu, kana yawu lenda katuka ve kana mu nwa yawu ve, bika luzolo ya nge kusalama.»
43Yandi vutukaka dyaka kisika yina, mpe kutaka bawu ya kulala, samu ti mpongi vwandaka na meso ya bawu. 44Na yina, yandi bikaka bawu dyaka, kwendaka mpe sambilaka na mbala ya tatu, na kutuba dyaka mambu mosi.
45Na yina, yandi kwizaka na bilandi mpe tubaka na bawu: «Beno ke lala kaka mpe ke pema? Beno tala, ngunga me kwiza, mpe ba me yekula Mwana ya Muntu na maboko ya bantu ya masumu. 46Beno telama, beto kwenda! Beno tala, muntu yina ke yekula munu me kwiza!»
Ba yekulaka mpe kangaka Yesu
47Kaka na ntangu yina, ntete yandi manisa na kuzonza, Yuda, muntu mosi ya bilandi kumi na zole, kumaka na mpamukunu na nkonga ya nene ya bantu yina vwandaka na bambele mpe bayinti na maboko. Bamfumu ya banganga-Nzambi mpe bakuluntu ya bantu fidisaka bawu. 48Muntu yina vwandaka na kuyekula Yesu pesaka bawu kidimbu: «Yina mu ke fiba, ni muntu yango; beno kanga yandi.» 49Kaka na ntangu yina, yandi kwendaka na Yesu, mpe tubilaka yandi: «Mbote ya nge, Labi!» Mpe yandi fibaka yandi.
50Yesu zabisaka yandi: «Ndiku ya munu, sala dyambu yina nge kwizaka kusala.» Na yina, bawu kwizaka, kangaka Yesu mpe simbaka yandi.
51Mpe beno tala, mosi na kati ya bantu yina vwandaka na Yesu tandulaka diboko ya yandi, basisaka mbele ya yandi, bulaka kisadi ya nganga-Nzambi ya ntete, mpe yandi zengaka dikutu ya yandi.
52Na yina, Yesu tubaka na yandi: «Tula dyaka mbele ya nge na kisika ya yawu. Bantu nyonso yina ke baka mbele ke kufwa na mbele. 53Nge ke banza ti mu lenda bokila Tata ya munu ve, yina lenda fidisa munu kaka na ntangu yina bimvuka ya bambasi kuluta kumi na zole? 54Kasi na mpila yina, nki mutindu mambu yina kele ya kusonama na Dibuku ya Nzambi ke lunga, ti yawu fwana kusalama mutindu yayi?»
55Na ngunga yina, Yesu tubaka na nkonga ya bantu: «Beno me kwiza na bambele mpe bayinti samu na kukanga munu mutindu ti mu vwandaka kimpumbulu? Bilumbu nyonso mu vwandaka vwanda na kati ya Yinzo ya Nzambi samu na kulongisa, mpe beno kangaka munu ve. 56Kasi mambu nyonso yayi salamaka samu na kulungisa mambu yina mimbikudi sonikaka na kati ya Dibuku ya Nzambi.» Na yina, bilandi ya yandi nyonso bikaka yandi mpe tinaka.
Yesu na ntwala ya bazuzi ya yandi
57Na yina, bantu yina kangaka Yesu nataka yandi na nganga-Nzambi ya ntete Kayife, kisika yina milongisi ya Misiku mpe bakuluntu vukanaka. 58Pyele landaka yandi na ntama, tii na lupangu ya nganga-Nzambi ya ntete. Kuna yandi kotaka, mpe vwandaka kintwadi na mikengi samu na kutala mutindu mambu ke manaka.
59Bamfumu ya banganga-Nzambi, ti kimvuka ya mvimba ya bakuluntu ya ba-Zwife, vwandaka sosa bambangi ya luvunu samu na kufunda Yesu, mpe samu na kuzengila yandi lufwa, 60kasi bawu kuzwaka ata dyambu ve, ata bambangi mingi ya luvunu kwizaka. Na nsuka, bantu zole kwizaka, 61mpe tubaka: «Muntu yayi tubaka: “Mu lenda fwa Yinzo ya Nzambi mpe tunga yawu dyaka na bilumbu tatu.”»
62Nganga-Nzambi ya ntete telamaka mpe tubaka na yandi: «Nge kele ve na dyambu ya kuvutula? Nki mambu bantu yayi ke funda nge?» 63Kasi Yesu vwandaka pi. Nganga-Nzambi ya ntete tubaka: «Mu ke lomba nge na kudya ndefi na ntwala ya Nzambi ya moyo: tubila beto keti nge kele Klisto, Mwana ya Nzambi.»
64Yesu zabisaka yandi: «Nge me tuba yawu. Kasi munu, mu ke zabisa nge: Katuka ntangu yayi, nge ke mona Mwana ya Muntu ya kuvwanda na diboko ya kibakala ya Ngolo, mpe ke kwiza na matuti ya zulu.»
65Na yina, nganga-Nzambi ya ntete bakaka bilele na yandi mpe pasulaka yawu, mpe tubaka: «Yandi me safula Nzambi! Samu na nki beto ke lomba dyaka bambangi? Beno me kuwa ntangu yayi mutindu yandi me safula Nzambi. 66Beno ke zenga nki?» Bawu vutulaka: «Yandi fwana lufwa.»
67Na yina, bawu lobolaka mante na kizizi ya yandi, mpe bulaka yandi; mpe mwa bantu ya nkaka bulaka yandi bambata, 68na kutuba: «Bikula na beto, Klisto! Nani me bula nge?»
Pyele mangaka ti yandi me zaba Yesu ve
69Pyele vwandaka na ngaanda na lupangu. Kisadi mosi ya nkento kwizaka pene-pene mpe tubaka: «Nge mpe, nge vwandaka na Yesu muntu ya Ngalili.»
70Kasi yandi mangaka na ntwala ya bawu nyonso, mpe tubaka: «Mu zaba ve yinki nge ke na zola kutuba.»
71Ntangu yandi kwendaka na mwelo, kisadi ya nkaka ya nkento talaka yandi mpe tubaka na bayina vwandaka kuna: «Bakala yayi vwandaka na Yesu ya Nazaleti.»
72Yandi mangaka dyaka na kudya ndefi: «Mu zaba muntu yina ve.»
73Na manima ya mwa ntangu, bayina vwandaka kuna kwizaka na Pyele: «Ya tsyelika, nge mpe kele mosi ya bawu, samu ti mutindu ya kuzonza ya nge ke monisa yawu.»
74Na yina, yandi bandaka na kusiinga yandi mosi mpe na kudya ndefi: «Mu zaba muntu yina ve.» Kaka na ntangu yina, nsusu kubaka.
75Pyele bambukaka moyo na mambu yina Yesu zabisaka yandi: «Ntete nsusu kuba, nge ke manga munu bambala tatu.» Na yina, yandi basikaka na ngaanda mpe dilaka ngolo.