Leiyeibü shuongei Jisu haitila huon takbü
Yaksa cheei nam juong mubü ponlem jinkukei hoba kho shanga khauangbei; Judasei hao chandinam khujinto la aekei. Gethsemen ka Jisuei haoeibü Bou to khüm leila ngakei, haoeibü jen shuong yepan kibü touje. Lapbü to, haoei ateshekei. Peterei ho müt to adamenku dogo theletkei.
26 1Jisuei khübü ngüh pendou laukhüm phaia, haoei haoeibü eikshuong to laukei,
2“Kanei ngeda, nyibou phaia Püetbülem lousühlabü, hoba Müteibü Shou peiseia thüngla shanga khümbo kuan aplabü.”
3Kheijinei ungshedbou shuong hoba mütli jaishou shuong thükkabou ungshedbou Kaifa khongnyua takshatkei, 4hoba haoenei Jisu hangsho lapan hao haitila huon takyokei. 5Lausikei haoenei laukei, “Lem jiha ohau, ayingsi mütli yoa ngühbü yaang longlabü.”
Saoei Jisu khünla onang naangbü
6Jisu Bethania imbou Simon chema kijinei, 7yaksa cheei nam juong mubü ponlem onang alabaster thungdou che jungan hao jungto loukei, hoba hao shaushanga setan kiteiko, onang kho haoeibü khua jinkukei. 8Eikshuongei kho hapan khauangkei hoba laukei, “Aila hai apsileda? 9Aishanga ho nam juong to aeian shalebü la kula thükakei.”
10Jisuei kho ngean haoen to laukei, “Aila ho yaksa to kipjim kuda? Saoei kü shanga kümsilei maibü che kümkei. 11Aishanga shalebü shuong kan yoa chalou pendou kilabü, lausikei ngo kan yoa chalou pendou akilabü. 12Aishanga saoei ngeibü manga ho onang jinkujinei, ngo khünla lamlela shanga kho kümkei. 13Maimaitham ngühmaia ngei kan to lenda, kaodak pendoua ho Ngühlang Maibü songlenshang kaoen wekoa, sao damenla shanga, ho yaksaei ai kümbü kho yoan laueilabü.”
Judasei nam shanga Shou khümbo kuan apbü
14Kheijinei Anthüknyi yoa che, Judas Iskhariot dogo laubou, ungshedbou shuong jungto haukei, 15hoba laukei, “Kanei ngo la ai kula maangtakda, kheijinei ngei hao kan la khümbo kuan aplabü?” Hobaje haoenei hao la sempak thamsem tanan kukei. 16Kho ka phaia haoei hao yaakshaula jih maibü che lambo kikei.
Püetbülem lamlebü
17Tokai ajinbü Wentek shaangbounyeta, eikshuongei Jisu to phekei, “No Püetbülem shaula shanga künei lanei lamlela nyi maangtakda?”
18Haoei laukei, “Sangnyu to müt che jungto hauashi, hoba hao to laushi, ‘Lenbouei lauda: Kü jihsiphai nyangko lousüha. Ngo kü eikshuong yoa kaibü chema Püetbülem kilabü.’”
19Hobaje eikshuongei Jisuei haoen la lenbü tegü kümbei, hoba haoenei Püetbülem lamlekei.
20Chasem sühkei, haoei Anthüknyi yoa shaushanga setkei.
21Hoba haoen shaujinei, haoei laukei, “Maimaitham ngühmaia ngei kan to lenda, kan yo kabü cheei ngo khümbo kuan aplabü.”
22Haoen aeibou maangto shatko, mütpem wekoei hao to phekei, “Bunyubou, ngo aying lo?”
23Haoei jongaikei, “Aoei kü yoa phau to ik shemlaje khoei ngo khümbo kuan aplabü. 24Müteibü Shou, hao shangabü doan kibü tegü haulabü, lausikei aoei hao khümbo kuan apda, kho müt shanga ügütü! Hao abukbü aki yinglonga, kho müt la maiboutham yingkhoulabü.”
25Hao khümbo kuan apbou Judasei laukei, “Rabba, ngo aying lo?” Haoei hao to laukei, “No lauda.”
26Haoen shaujinei, Jisuei Wentek sungkei, hoba nyensang kuan shaknyinkei, hoba eikshuong la kuko laukei, “Sungan shauashi; ho ngeibü mang.” 27Haoei thung che sungan nyensang kuko haoen la kuko laukei, “Kan pendouei khüka yungashi, 28aishanga ho theyolanyobü ngeibü sii, müt juong shanga shabü lai aptila shanga yeian jinbü ki. 29Ngei kan to lenda, tat ka khangan kü Bou Sanglea kan yoa haanbü ayungsüh shongko, ngei ho semlüh hek nyibou ayunglabü.”
30Hobaje haoenei chia che atkei, kheijinei Oliv Shongh to haukei.
Jisuei Peter atheletlabü shangied lenbü
31Kheijinei Jisuei haoen to laukei, “Khei tao kan pendou ngo shanga lühlabü. Aishanga ho doan kia: ‘Ngei lombou to ngümlabü, hoba san lombü shoushou phinnyinan aplabü.’ 32Lausikei ngo langngaitikei phaia, ngei kan thedangto Galil to haulabü.”
33Peterei hao to laukei, “Haoen pendou no shanga lühlonga, ngo ponpen alühlabü.”
34Jisuei hao to laukei, “Ngühmaia ngei ka to lenda, khei tao aunakei akoutoua, nyi ngo semnei atheletlabü.”
35Peterei laukei, “Ngo no yoa hailabü shonalonga liman, ngei no atheletlabü.” Hoba eikshuong pendouei kho tegütham laukei.
Shouei Bou to lolo khümbo kuan apbü
36Kheijinei Jisu haoen yoa Gethsemen dogo laubü kaoen che to loukei, hoba haoei eikshuong to laukei, “Ngei aeka welaula hautoua hanei setteiashi.”
37Hoba haoei Peter si Zebedi shou nyi lean, aeibou maangto shatko hoba maangmaukei.
38Kheijinei Jisuei haoen to laukei, “Kü soushou maangmaubü haila tegütham shaleda. Hanei lojinei, kü yoa pialemashi.”
39Hao thedang ae saashangko haukei, hoba thenyeka kaoa khüpetan welaukei, “Kü Bou, thükalonga ho thung ngo ka ngailangkushi. Lausikei ngei maangbü aying, ka maangbü tegü leshi.”
40Haoei eikshuong jungto loukei hoba haoen yepan hapbei. Haoei Peter to laukei, “Kheijinei, nyi kü yoa angh che pianleman akienda lo? 41Kan takteibü to alotla shanga üatetan welauashi; soushou kho maangtakbü ki, lausikei phea hau akibü ki.”
42Nyiboukei hao satan haukei hoba welaukei, “Kü Bou, ngei ho ayungko akuktilonga, ka maang kümbo yingshi.”
43Hoba hao nyiboula loukei hoba haoen yepan kibü hapbei, aishanga haoeneibü nyek yuian kiteikei. 44Kheijinei haoen nyiboula apyoan satan haukei hoba semboukei welaukei, samenbü ngüh nyibou lauko.
45Kheijinei Jisuei eikshuong jungto loukei, hoba haoen to laukei, “Kan tou longche yepan haksoda lo? Chühashi, jih lousüha, hoba shabü mütshuongeibü ik ka Müteibü Shou khümbo kuan apa. 46Loenashi, sen hauakho! Chühashi, ngo yaakshaubou chunga kia!”
Jisu Khümbo Kuan Apbei hoba Laptikei
47Hao ngüh joyoko kijinei, Judas, Anthüknyi yo kabü che, ungshedbou shuong hoba mütli jaishou shuongei hautibü in si juthep jungan mütshang juong yoa mangde lousühkei. 48Hao khümbo kuan apbou khoei haoen la amaaphilabü che kukei, “Ngei ao to sembung sheplaje khoei hao ki; hao to ikmanglepashi.” 49Kheijinei tangshaitham haoei Jisu jungto louan laukei, “Salem, Rabba!” hoba hao to sembung shepbei.
50Jisuei hao to laukei, “Jenabou, nyi ai kümla loukei, kho kümashi.” Kheijinei haoen nyangko louan, Jisu to ikmanglepan lapbei.
51Hoba chühashi, Jisu yoa kibü müt cheei haoeibü ik longan in che setenbei, hoba thükkabou ungshedboueibü sambü to ngümbei, hoba haoeibü nou shipkei.
52Kheijinei Jisuei hao to laukei, “Kaibü in kho khünei kishanga nyiboula phoashi; aishanga aoyou in taketbü pendou kho inei haitian aplabü. 53Ngei kü Bou to ngala athükda dogo nyi thinei lo? Haoei tangshaitham kü jungto hangangbü sepai phang anthüknyi to yaangbou hautilabü. 54Lausikei kholongaje, hai yingan kümbo yinglabü dogo lenan kibü Laishiba ailai loushedlabü?”
55Kho jihsiphaia Jisuei mütshang to laukei, “Kokbü khulimbo loubü tegütham kanei in si juthep jungan ngo laptila apyoda si? Ngei chalou angbüa lembü chema setan lenkei, hoba kanei ngo alap. 56Lausikei habü pendou kho thuseibü shuongeibü Laishiba loushedla shanga haüthükkei.” Kheijinei eikshuong pendouei hao apyoan satan haukei.
Jisu Shedbü Kubü Shuong Thedanga
57Kheijinei Jisu laptibü shuongei hao thükkabou ungshedbou Kaifa jungto leian haukei, lanei Ngühkhüm lenbou shuong hoba jaishou shuong takshatbü to. 58Peterei thükkabou ungshedboueibü lambhek sühko saabüa hao phai sembei, hoba jenyua atan aila thonlaje dogo chühla shanga lombü shuong yoa setkei.
59Ungshedbou shuong hoba Thükkabou Kambü pendouei Jisu haitila shanga hao khulimbo amlangbü aukabü lambei, 60lausikei amlangbü aukabü kubou juongei louan phaia yoan, haoenei che ongkei ühüp. Aichemthon to müt nyi louan phaia, 61hoba laukei, “Ho mütei, ‘Ngei Mühghaü lembüchem mautian chalou sema nyiboula dangngaila thükkei,’ dogo laukei.”
62Thükkabou ungshedbou lokei hoba hao to laukei, “Nyi ajongaibü ongkei aying lo? Habü müt shuongei no khulimbo aukabü ai tütda?” 63Lausikei Jisu semele kikei. Thükkabou ungshedbouei laukei, “Langbü Mühghaü nyena ngei ka to ngühkhüm kuda: No Mühghaü Shou Khrista kibü si, kün to lenashi.”
64Jisuei hao to laukei, “Nyi lauda. Lausikei ngei ka to lenda: tat ka phaia nyi Müteibü Shou Thükkaboueibü maenei setan kibü hoba khuthükbü sangmei yoa loubü haplabü.”
65Kheijinei thükkabou ungshedbouei haoeibü neisimei jitnyinkei hoba laukei, “Haoei Mühghaü nyikukei! Senei aila aukabü aei khamla? Chühashi, Mühghaü nyikubü kanei tou dida. 66Kanei ai damda?” Haoenei jongaikei, “Hao haila mua.”
67Kheijinei haoenei hao thenyeka eokei thokkei hoba hao to ikei ipbei; hoba atei hao to leian ngümbei, 68laukei, “Khrista, kün to tetenashi! Kato ngümbou kho ao?”
Peterei Jisu to Atheletkei
69Peter khonga lambhek to setan kikei. Sambüsaoei hao jungto nyangko louan laukei, “Nokei Galilbü Jisu yoa kikei.”
70Lausikei Peterei haoen pendou thedanga atheletko laukei, “Nyi ai joyodaje ngei ashuokda.”
71Hao bakhün to angko kijinei, sambüsao cheei hao to hapan, chunga loan kibü shuong to laukei, “Ho müt ho Nazaretbü Jisu yoa kiteikei.”
72Hoba haoei nyiboukei theletko laukei, “Ngei kho müt angekei.”
73Longche kian phaia chunga loan kibü shuongei Peter jungto louan laukei, “Maimaitham nokei haoen yo kabü che yingkei, aishanga kaibü joyobü danko no tengetida.”
74Kheijinei haoei jembü lolo khükkeiuokkei hoba theletko laukei, “Ngei kho müt angekei.” Khoyam aunakei koukei.
75Hobaje Peterei Jisuei laubü ngüh damenkei, “Aunakei akoutoua nyi ngo semnei atheletlabü,” dogo. Hoba hao ngaikei hoba kaang haapbei.
