Matiu 25

25 ¹“Nígbà náà ni ìjọba Baba wa yóò dàbí wúńdíá mẹ́wàá tí wọ́n mú fìtílà wọn tí wọ́n sì jáde lọ pàdé ọkọ ìyàwó. ²Márùn-ún nínú wọn jẹ́ òmùgọ̀, márùn-ún sì gbọ́n. ³Àwọn òmùgọ̀ mú fìtílà wọn ṣùgbọ́n wọn kò mú òróró kankan lọ́wọ́. ⁴Ṣùgbọ́n àwọn ọlọ́gbọ́n mú òróró nínú ìgò pẹ̀lú fìtílà wọn. ⁵Nígbà tí ọkọ ìyàwó pẹ́ dé, gbogbo wọn bẹ̀rẹ̀ sí í tòògbé, wọ́n sì sùn lọ. ⁶Ṣùgbọ́n ní àárín ọ̀gànjọ́ òru, igbe kan ta jáde pé, ‘Ẹ wò ó, ọkọ ìyàwó! Ẹ jáde wá pàdé rẹ̀!’ ⁷Nígbà náà ni gbogbo àwọn ọ̀dọ́mọbìnrin náà jí, wọ́n sì tún fìtílà wọn ṣe. ⁸Àwọn òmùgọ̀ wí fún àwọn ọlọ́gbọ́n pé, ‘Ẹ fún wa nínú òróró yín, nítorí fìtílà wa ń kú.’ ⁹Ṣùgbọ́n àwọn ọlọ́gbọ́n dáhùn pé, ‘Bẹ́ẹ̀ kọ́, kí ó má bàa tó àwa àti ẹ̀yin. Kàkà bẹ́ẹ̀, ẹ lọ sọ́dọ̀ àwọn tí ń tà á, kí ẹ sì rà fún ara yín.’ ¹⁰Nígbà tí wọ́n lọ rà á, ọkọ ìyàwó dé. Àwọn tí ó ti múra sílẹ̀ bá a wọ inú àsè ìgbéyàwó, a sì ti ìlẹ̀kùn. ¹¹Nígbà tó yá, àwọn ọ̀dọ́mọbìnrin yòókù náà wá pẹ̀lú, wọ́n ń wí pé, ‘Olúwa, olúwa, ṣí ìlẹ̀kùn fún wa!’ ¹²Ṣùgbọ́n ó dáhùn pé, ‘Lóòótọ́ ni mo wí fún yín, èmi kò mọ̀ yín.’ ¹³Nítorí náà ẹ máa ṣọ́ra, nítorí ẹ kò mọ ọjọ́ náà tàbí wákàtí náà.

Olóòótọ́ Nínú Gbogbo Ẹ̀bùn tí A Fi Lé Ni Lọ́wọ́

¹⁴“Nítorí yóò dàbí ọkùnrin kan tí ó ń lọ sí ìrìnàjò, tí ó pe àwọn ìránṣẹ́ rẹ̀, tí ó sì fi ọrọ̀ rẹ̀ lé wọn lọ́wọ́. ¹⁵Ó fún ọ̀kan ní àpò fàdákà márùn-ún, òmíràn ní méjì, òmíràn ní ọ̀kan—olúkúlùkù gẹ́gẹ́ bí agbára rẹ̀—lẹ́yìn náà ó bẹ̀rẹ̀ ìrìnàjò rẹ̀. ¹⁶Ẹni tí a fún ní àpò fàdákà márùn-ún lọ lẹ́sẹ̀kẹsẹ̀, ó fi wọ́n ṣòwò, ó sì jèrè márùn-ún mìíràn. ¹⁷Bákan náà, ẹni tí ó ní àpò fàdákà méjì jèrè méjì mìíràn. ¹⁸Ṣùgbọ́n ẹni tí ó gba àpò fàdákà kan lọ, ó gbẹ́ ilẹ̀, ó sì fi owó ọ̀gá rẹ̀ pamọ́.

¹⁹“Lẹ́yìn ìgbà pípẹ́, ọ̀gá àwọn ìránṣẹ́ náà padà dé, ó sì bá wọn ṣe ìṣírò. ²⁰Ọkùnrin tí ó gba àpò fàdákà márùn-ún wá, ó mú márùn-ún mìíràn kún un pé, ‘Ọ̀gá, ẹ fi àpò fàdákà márùn-ún lé mi lọ́wọ́; ẹ wò ó, mo ti jèrè márùn-ún mìíràn.’

²¹“Ọ̀gá rẹ̀ wí fún un pé, ‘O ṣeun, ìránṣẹ́ rere àti olóòótọ́! O ti jẹ́ olóòótọ́ lórí ohun díẹ̀; èmi yóò fi ọ ṣe olórí ohun púpọ̀. Wọ inú ayọ̀ ọ̀gá rẹ!’

²²“Ẹni tí ó ní àpò fàdákà méjì náà wá pẹ̀lú, ó sì wí pé, ‘Ọ̀gá, ẹ fún mi ní àpò fàdákà méjì; ẹ wò ó, mo ti jèrè méjì mìíràn.’

²³“Ọ̀gá rẹ̀ wí fún un pé, ‘O ṣeun, ìránṣẹ́ rere àti olóòótọ́! O ti jẹ́ olóòótọ́ pẹ̀lú ohun díẹ̀; èmi yóò fi ọ ṣe olórí ohun púpọ̀. Wọ inú ayọ̀ ọ̀gá rẹ!’

²⁴“Nígbà náà ni ẹni tí ó ti gba àpò fàdákà kan wá, ó sì wí pé, ‘Ọ̀gá, mo mọ̀ pé ènìyàn líle ni yín, tí ń kórè níbi tí ẹ kò gbìn, tí ń ká jọ níbi tí ẹ kò fúnrúgbìn.’ ²⁵Nítorí ẹ̀rù, mo lọ, mo sì fi fàdákà yín pamọ́ sínú ilẹ̀. Èyí ni ohun tí í ṣe tiyín.

²⁶“Ọ̀gá rẹ̀ dáhùn pé, ‘Ìwọ ìránṣẹ́ búburú àti ọ̀lẹ! O mọ̀ pé mo ń kórè níbi tí èmi kò gbìn, mo sì ń ká jọ níbi tí èmi kò fúnrúgbìn?

²⁷“Ìwọ ìbá fi owó mi sí ọ̀dọ̀ àwọn onísòwò-owó, kí èmi lè rí i gbà padà pẹ̀lú èrè nígbà tí mo bá padà dé. ²⁸Nítorí náà ẹ gba àpò fàdákà rẹ̀, kí ẹ sì fi fún ẹni tí ó ní àpò fàdákà mẹ́wàá. ²⁹Nítorí ẹnikẹ́ni tí ó ní ni a ó fún ní sí i, yóò sì ní lọ́pọ̀lọpọ̀; ṣùgbọ́n ẹni tí kò ní nǹkankan ni a ó gba àní èyí tí ó ní lọ́wọ́. ³⁰Ẹ gbé ìránṣẹ́ aláìníláárí náà jù sínú òkùnkùn biribiri lóde, níbi tí ẹkún àti ìpayínkeke yóò gbé wà.’

Ọmọ Ènìyàn Ṣe Ìdájọ́ Àwọn Orílẹ̀-èdè

³¹“Nígbà tí Ọmọ Ènìyàn bá dé nínú ògo rẹ̀, pẹ̀lú gbogbo àwọn áńgẹ́lì rẹ̀, yóò jókòó lórí ìtẹ́ ògo rẹ̀. ³²A ó kó gbogbo àwọn orílẹ̀-èdè jọ níwájú rẹ̀, yóò sì yà wọ́n sọ́tọ̀ kúrò lọ́dọ̀ ara wọn bí olùṣọ́-àgùntàn ti ń ya àgùntàn sọ́tọ̀ kúrò lọ́dọ̀ ewúrẹ́. ³³Yóò fi àwọn àgùntàn sí ọwọ́ ọ̀tún rẹ̀, yóò sì fi àwọn ewúrẹ́ sí ọwọ́ òsì rẹ̀. ³⁴Nígbà náà ni Ọba yóò wí fún àwọn tí ó wà ní ọwọ́ ọ̀tún rẹ̀ pé, ‘Ẹ wá, ẹ̀yin ẹni ìbùkún Baba mi; ẹ jogún ìjọba tí a ti pèsè sílẹ̀ fún yín láti ìpìlẹ̀ ayé wá.

³⁵“Nítorí ebi pa mí, ẹ sì fún mi ní oúnjẹ; òǹgbẹ gbẹ mí, ẹ sì fún mi ní ohun mimu; àjèjì ni mí, ẹ sì gbà mí sínú ilé, ³⁶Ìhòòhò ni mí, ẹ sì wọ̀ mí ní aṣọ, àìsàn ni mí, ẹ sì tọ́jú mi, mo wà nínú túbú, ẹ sì wá bẹ̀ mí wò.’”

³⁷“Nígbà náà ni àwọn olódodo yóò dá a lóhùn pé, ‘Olúwa, nígbà wo ni àwa rí yín tí ebi ń pa yín tí a sì bọ́ yín, tàbí tí òǹgbẹ ń gbẹ yín tí a sì fún yín ní ohun mimu?

³⁸“Nígbà wo ni àwa rí yín tí ẹ jẹ́ àjèjì tí a sì gbà yín sínú ilé, tàbí tí ẹ wà ní ìhòòhò tí a sì wọ̀ yín ní aṣọ? ³⁹Nígbà wo ni àwa rí yín tí ẹ ṣe àìsàn tàbí tí ẹ wà nínú túbú tí a sì tọ̀ yín wá?’”

⁴⁰“Ọba yóò sì dáhùn pé, ‘Lóòótọ́ ni mo wí fún yín, ohunkóhun tí ẹ ṣe fún ọ̀kan nínú àwọn tí ó kéré jù nínú àwọn arákùnrin àti arábìnrin mi wọ̀nyí, fún èmi ni ẹ ṣe é.’ ⁴¹Nígbà náà ni yóò wí fún àwọn tí ó wà ní ọwọ́ òsì rẹ̀ pé, ‘Ẹ kúrò lọ́dọ̀ mi, ẹ̀yin ẹni ègún, lọ sínú iná àìnípẹ̀kun tí a pèsè sílẹ̀ fún Satani àti àwọn áńgẹ́lì rẹ̀. ⁴²Nítorí ebi pa mí, ẹ kò sì fún mi ní ohun jíjẹ, òǹgbẹ gbẹ mí, ẹ kò sì fún mi ní ohun mimu, ⁴³Àjèjì ni mí, ẹ kò sì gbà mí sínú ilé; ìhòòhò ni mí, ẹ kò sì wọ̀ mí ní aṣọ; àìsàn ni mí, mo sì wà nínú túbú, ẹ kò sì bẹ̀ mí wò.’”

⁴⁴“Nígbà náà ni àwọn náà yóò dáhùn pé, ‘Olúwa, nígbà wo ni àwa rí yín tí ebi ń pa yín, tàbí tí òǹgbẹ ń gbẹ yín, tàbí tí ẹ jẹ́ àjèjì, tàbí tí ẹ wà ní ìhòòhò, tàbí tí ẹ ṣe àìsàn, tàbí tí ẹ wà nínú túbú, tí àwa kò sì ṣe ìránṣẹ́ fún yín?’

⁴⁵“Yóò dáhùn pé, ‘Lóòótọ́ ni mo wí fún yín: ohunkóhun tí ẹ kò ṣe fún ọ̀kan nínú àwọn tí ó kéré jù wọ̀nyí, fún èmi ni ẹ kò ṣe é.’ ⁴⁶Nígbà náà ni wọn yóò lọ sínú ìyà àìnípẹ̀kun, ṣùgbọ́n àwọn olódodo sí ìyè àìnípẹ̀kun.”