Mathayo 25 FHB Father's Heart Bible™

25 ¹“Hĩndĩ ĩyo Ũthamaki wa Ithe witũ ũkaahaanana na airĩĩtu ikũmi arĩa mooire matawa maao magĩthiĩ gũtũnga mũhikania. ²Atano ao maarĩ akĩĩgu, nao atano maarĩ oogĩ. ³Arĩa akĩĩgu mooire matawa maao, no matioire maguta. ⁴No arĩa oogĩ nĩmaoire maguta thĩinĩ wa cuba hamwe na matawa maao. ⁵Rĩrĩa mũhikania aaikarire, oothe magĩconoka, magĩkoma. ⁶No ũtukũ gatagatĩ gũkĩanĩrĩrwo atĩrĩ, ‘Ta rorai, mũhikania nĩ ũyũ! Umai mũmũtũnge!’ ⁷Hĩndĩ ĩyo airĩĩtu acio oothe magĩũkĩra, magĩthondeka matawa maao. ⁸Nao arĩa akĩĩgu makĩĩra arĩa oogĩ atĩrĩ, ‘Tũheei maguta manyu mamwe, nĩgũkorwo matawa maitũ nĩmarahora.’ ⁹No arĩa oogĩ magĩcookia atĩrĩ, ‘Aca, hihi matingĩiganĩra ithuĩ na inyuĩ. Nĩ kaba mũthiĩ kũrĩ arĩa mendagia, mwĩgũrĩre.’ ¹⁰Na rĩrĩa maathiĩte kũgũra, mũhikania agĩũka. Nao arĩa meehaarĩirie magĩtoonya hamwe nake irugainĩ rĩa ũhiki, naguo mũrango ũkĩhingwo. ¹¹Thuutha ũcio airĩĩtu arĩa angĩ o nao magĩũka, makiuga atĩrĩ, ‘Mwathani, Mwathani, tũhingũrĩre mũrango!’ ¹²No we agĩcookia atĩrĩ, ‘Ngũmwĩra na ma atĩ, ndĩmũũĩ.’ ¹³Kwoguo ikaragai mwĩhũgĩte, tondũ mũtiũĩ mũthenya kana ithaa.

Kwĩhokeka Harĩ Kĩndũ o Gĩothe Kĩĩhokeirwo

¹⁴“Amu gũgaatuĩka ta mũndũ ũrĩa wathiiaga rũgendo, agĩĩta ndungata ciake, akĩciĩhokera indo ciake. ¹⁵Akĩhe ũmwe mĩhuko ĩtano ya betha, ũngĩ ĩĩrĩ, ũngĩ ĩmwe—o mũndũ kũringana na ũhoti wake—agĩcooka agĩthiĩ rũgendo rwake. ¹⁶Ũrĩa waaheirwo mĩhuko ĩtano ya betha agĩthiĩ o rĩmwe, akĩmĩruta wĩra, akĩona ĩngĩ ĩtano. ¹⁷O ũndũ ũmwe, ũrĩa warĩ na mĩhuko ĩĩrĩ ya betha akĩona ĩngĩ ĩĩrĩ. ¹⁸No ũrĩa waamũkĩire mũhuko ũmwe wa betha agĩthiĩ, akĩenja thĩ, akĩhitha mbeeca cia mwathi wake.

¹⁹“Thuutha wa ihinda iraaya, mwathi wa ndungata icio agĩcooka, agĩtarĩrania nao ũhoro wa mbeeca. ²⁰Nake ũrĩa waamũkĩire mĩhuko ĩtano ya betha agĩũka, acookete na ĩngĩ ĩtano, akiuga atĩrĩ, ‘Mwathi wakwa, nĩwaanjĩhokeire mĩhuko ĩtano ya betha; ta rora, nĩndona ĩngĩ ĩtano.’

²¹“Nake mwathi wake akĩmwĩra atĩrĩ, ‘Nĩ wega, wee ndungata njega na ĩĩhokeku! Nĩwĩhokekete harĩ indo nini; nĩngũgũtua mũrori wa indo nyingĩ. Toonya gĩkenoinĩ kĩa mwathi waku!’

²²“Nake ũrĩa warĩ na mĩhuko ĩĩrĩ ya betha o nake agĩũka, akiuga atĩrĩ, ‘Mwathi wakwa, nĩwaaheire mĩhuko ĩĩrĩ ya betha; ta rora, nĩndona ĩngĩ ĩĩrĩ.’

²³“Nake mwathi wake akĩmwĩra atĩrĩ, ‘Nĩ wega, wee ndungata njega na ĩĩhokeku! Nĩwĩhokekete harĩ indo nini; nĩngũgũtua mũrori wa indo nyingĩ. Toonya gĩkenoinĩ kĩa mwathi waku!’

²⁴“Hĩndĩ ĩyo ũrĩa waamũkĩire mũhuko ũmwe wa betha o nake agĩũka, akiuga atĩrĩ, ‘Mwathi wakwa, nĩndakũũĩ atĩ wee ũrĩ mũndũ mũũ, ũgethaga harĩa ũtahaandĩte, na ũgĩcookanĩrĩria harĩa ũtahurunjĩte mbeũ.’ ²⁵Nĩ ũndũ wa guoya, ngĩthiĩ ngĩhitha betha yaku thĩinĩ wa thĩ. Kĩrĩa kĩrĩ gĩaku nĩ gĩkĩ.

²⁶“Nake mwathi wake akĩmũcookeria atĩrĩ, ‘Wee ndungata njũru na ngũũ! Nĩwaamenyete atĩ ngethaga harĩa itahaandĩte, na ngacookanĩrĩria harĩa itahurunjĩte mbeũ?

²⁷“Nĩwagĩrĩirwo nĩ kũiga mbeeca ciakwa harĩ arĩa maigaga mbeeca, nĩguo rĩrĩa ngaacooka njookererwo nĩcio hamwe na uumithio. ²⁸Nĩ ũndũ ũcio oyai mũhuko wake wa betha, mũũhe ũrĩa ũrĩ na mĩhuko ikũmi ya betha. ²⁹Amu mũndũ o wothe ũrĩ na kĩndũ nĩakoongererwo, na nĩakaingĩhĩrwo mũno; no ũrĩa ũtarĩ na kĩndũ nĩagaatuunywo o na kĩrĩa arĩ nakĩo. ³⁰Nayo ndungata ĩyo ĩtarĩ bata mĩĩikie ndumainĩ ya nja, kũrĩa gũkaagĩa na kĩrĩro na kũhagarania magego.’”

Mũrũ wa Mũndũ Atuagĩra Ndũũrĩrĩ Ciira

³¹“Rĩrĩa Mũrũ wa Mũndũ agooka arĩ na riiri wake, marĩ hamwe na araika ake oothe, nĩagaikarĩra gĩtĩ gĩake kĩa ũnene kĩrĩa kĩrĩ riiri. ³²Nacio ndũũrĩrĩ ciothe nĩikoongaanĩrĩrio mbere yake, nake nĩakaamũrania o mũndũ na ũrĩa ũngĩ, o ta ũrĩa mũrĩithi aamũranagia ng'ondu na mbũri. ³³Nĩakaiga ng'ondu mwena wake wa ũrĩo, nacio mbũri mwena wake wa ũmotho. ³⁴Hĩndĩ ĩyo Mũthamaki nĩakeera arĩa marĩ mwena wake wa ũrĩo atĩrĩ, ‘Ũkai, inyuĩ mũrathimĩtwo nĩ Awa; gaĩai ũthamaki ũrĩa mwaathondekeirwo kuuma rĩrĩa thĩ yaombirwo.

³⁵“Amu ndaarĩ mũhũtu, na inyuĩ mũkĩĩhe irio; ndĩ na nyoota, mũkĩĩhe kĩndũ nyue; ndĩ mũgeni, na mũkĩĩnyiita ũgeni, ³⁶ndaarĩ njaga, na inyuĩ mũkĩĩhumba; ndĩ mũrũaru, mũkĩĩmenyerera; ndĩ njeera, mũgĩũka kũndora.’”

³⁷“Hĩndĩ ĩyo arĩa athingu nĩmakamũcookeria atĩrĩ, ‘Mwathani, nĩ rĩ twakuonire ũrĩ mũhũtu tũgĩkũhe irio, kana ũrĩ na nyoota tũgĩkũhe kĩa kũnyua?

³⁸“Nĩ rĩ twakuonire ũrĩ mũgeni tũgĩkũnyiita ũgeni, kana ũrĩ njaga tũgĩkũhumba? ³⁹Ningĩ nĩ rĩ twakuonire ũrĩ mũrũaru kana ũrĩ njeera, tũgĩũka kũrĩ wee?’”

⁴⁰“Nake Mũthamaki nĩakamacookeria atĩrĩ, ‘Ngũmwĩra na ma atĩ, o ũndũ ũrĩa mweekĩire ũmwe wa ariũ na aarĩ akwa aya arĩa anini mũno, nĩ niĩ mwaanjĩkĩire.’ ⁴¹Hĩndĩ ĩyo nĩakeera arĩa marĩ mwena wake wa ũmotho atĩrĩ, ‘Njehererai, inyuĩ mũrumĩtwo, mũtoonye mwakiinĩ wa tene na tene ũrĩa wathondekeirwo mũcukani na araika ake. ⁴²Amu ndaarĩ mũhũtu, na inyuĩ mũtiaheire kĩndũ ndĩe; ndĩ na nyoota, mũtiaheire kĩndũ nyue, ⁴³ndaarĩ mũgeni, na inyuĩ mũtiaanyiitire ũgeni; ndĩ njaga, mũtiaahumbire; ndĩ mũrũaru na ndĩ njeera, mũtiookire kũndora.’”

⁴⁴“Hĩndĩ ĩyo o nao nĩmakamũcookeria atĩrĩ, ‘Mwathani, nĩ rĩ twakuonire ũrĩ mũhũtu, kana ũrĩ na nyoota, kana ũrĩ mũgeni, kana ũrĩ njaga, kana ũrĩ mũrũaru, kana ũrĩ njeera, na tũtiagũtungatĩire?’

⁴⁵“Nake nĩakamacookeria atĩrĩ, ‘Ngũmwĩra na ma atĩ, o ũndũ ũrĩa mũtekĩire ũmwe wa aya anini mũno, nĩ niĩ mũtaanjĩkĩire.’ ⁴⁶Nao nĩmagaathiĩ iherithiainĩ rĩa tene na tene, no arĩa athingu nĩmagaathiĩ muoyoinĩ wa tene na tene.”