மத்தேயு 25

25 ¹"அப்பொழுது, எங்கள் பிதாவின் ராஜ்யம், தங்கள் தீவட்டிகளை எடுத்துக்கொண்டு மணவாளனுக்கு எதிர்கொண்டுபோகப் புறப்பட்ட பத்துக் கன்னிகைகளுக்கு ஒப்பாயிருக்கும். ²அவர்களில் ஐந்துபேர் புத்தியில்லாதவர்கள், ஐந்துபேர் புத்தியுள்ளவர்கள். ³புத்தியில்லாதவர்கள் தங்கள் தீவட்டிகளை எடுத்துக்கொண்டு, தங்களுடனே எண்ணெயை எடுத்துக்கொள்ளவில்லை. ⁴புத்தியுள்ளவர்களோ தங்கள் தீவட்டிகளுடனே கூடச் சிமிழ்களில் எண்ணெயையும் எடுத்துக்கொண்டார்கள். ⁵மணவாளன் வரத் தாமதித்தபோது, அவர்கள் எல்லாரும் தூக்கமயக்கமடைந்து நித்திரைபண்ணினார்கள். ⁶நடுஜாமத்திலோ, ‘இதோ, மணவாளன் வருகிறார், அவருக்கு எதிர்கொண்டுபோகப் புறப்படுங்கள்’ என்கிற சத்தம் உண்டாயிற்று. ⁷அப்பொழுது அந்தக் கன்னிகைகள் எல்லாரும் எழுந்திருந்து, தங்கள் தீவட்டிகளை ஆயத்தம்பண்ணினார்கள். ⁸புத்தியில்லாதவர்கள் புத்தியுள்ளவர்களை நோக்கி, ‘உங்கள் எண்ணெயில் எங்களுக்குக் கொஞ்சம் கொடுங்கள், எங்கள் தீவட்டிகள் அணைந்துபோகிறதே’ என்றார்கள். ⁹அதற்குப் புத்தியுள்ளவர்கள், ‘அப்படியல்ல, எங்களுக்கும் உங்களுக்கும் போதாமலிருக்கும்; நீங்கள் விற்கிறவர்களிடத்திற்குப் போய், உங்களுக்காக வாங்கிக்கொள்ளுங்கள்’ என்றார்கள். ¹⁰அவர்கள் வாங்கப் போனபோது மணவாளன் வந்துவிட்டார்; ஆயத்தமாயிருந்தவர்கள் அவரோடேகூடக் கலியாண விருந்துக்குள் பிரவேசித்தார்கள்; கதவும் அடைக்கப்பட்டது. ¹¹பின்பு, மற்றக் கன்னிகைகளும் வந்து, ‘ஆண்டவரே, ஆண்டவரே, எங்களுக்குக் கதவைத் திறவும்’ என்றார்கள். ¹²அதற்கு அவர், ‘மெய்யாகவே உங்களுக்குச் சொல்லுகிறேன், நான் உங்களை அறியேன்’ என்றார். ¹³ஆகையால், நாளையாவது நாழிகையையாவது நீங்கள் அறியாதிருக்கிறபடியால், விழித்திருங்கள்.

ஒப்படைக்கப்பட்ட ஒவ்வொரு வரத்திலும் உண்மையாயிருத்தல்

¹⁴"அன்றியும், பரதேசத்துக்குப் புறப்படுகிற ஒரு மனிதன், தன் ஊழியக்காரரை அழைத்து, தன் ஆஸ்திகளை அவர்கள் வசமாய் ஒப்புவித்ததுபோல் இருக்கிறது. ¹⁵அவன் அவனவனுடைய திறமைக்குத்தக்கதாக ஒருவனுக்கு ஐந்து பொற்பைகளையும், ஒருவனுக்கு இரண்டையும், ஒருவனுக்கு ஒன்றையும் கொடுத்து, உடனே பிரயாணமானான். ¹⁶ஐந்து பொற்பைகளைப் பெற்றவன் போய், அவைகளைக்கொண்டு வியாபாரம்பண்ணி, வேறு ஐந்து பொற்பைகளைச் சம்பாதித்தான். ¹⁷அப்படியே இரண்டு பொற்பைகளைப் பெற்றவனும் வேறு இரண்டைச் சம்பாதித்தான். ¹⁸ஒரு பொற்பையைப் பெற்றவனோ போய், நிலத்தைத் தோண்டி, தன் எஜமானுடைய பணத்தைப் புதைத்துவைத்தான்.

¹⁹"வெகுகாலத்திற்குப்பின்பு அந்த ஊழியக்காரரின் எஜமான் திரும்பிவந்து, அவர்களிடத்தில் கணக்குப்பார்த்தான். ²⁰ஐந்து பொற்பைகளைப் பெற்றவன் வேறு ஐந்து பொற்பைகளைக் கொண்டுவந்து, ‘எஜமானே, ஐந்து பொற்பைகளை என்னிடத்தில் ஒப்புவித்தீரே; இதோ, வேறு ஐந்து பொற்பைகளைச் சம்பாதித்தேன்’ என்றான்.

²¹"அதற்கு அவனுடைய எஜமான், ‘நல்லது, உத்தமமும் உண்மையுமுள்ள ஊழியக்காரனே, கொஞ்சத்திலே உண்மையாயிருந்தாய், அநேகத்தின்மேல் உன்னை அதிகாரியாக வைப்பேன்; உன் எஜமானுடைய சந்தோஷத்திற்குள் பிரவேசி’ என்றான்.

²²"இரண்டு பொற்பைகளைப் பெற்றவனும் வந்து, ‘எஜமானே, இரண்டு பொற்பைகளை என்னிடத்தில் ஒப்புவித்தீரே; இதோ, வேறு இரண்டு பொற்பைகளைச் சம்பாதித்தேன்’ என்றான்.

²³"அதற்கு அவனுடைய எஜமான், ‘நல்லது, உத்தமமும் உண்மையுமுள்ள ஊழியக்காரனே, கொஞ்சத்திலே உண்மையாயிருந்தாய், அநேகத்தின்மேல் உன்னை அதிகாரியாக வைப்பேன்; உன் எஜமானுடைய சந்தோஷத்திற்குள் பிரவேசி’ என்றான்.

²⁴"பின்பு, ஒரு பொற்பையைப் பெற்றவனும் வந்து, ‘எஜமானே, நீர் விதைக்காத இடத்தில் அறுக்கிறவரும், தெளிக்காத இடத்தில் சேர்க்கிறவருமான கடினமுள்ள மனிதன் என்று உம்மை அறிந்திருந்தேன். ²⁵ஆகையால் நான் பயந்து, போய், உம்முடைய பணத்தை நிலத்தில் புதைத்துவைத்தேன்; இதோ, உம்முடையதை வாங்கிக்கொள்ளும்’ என்றான்.

²⁶"அதற்கு அவனுடைய எஜமான், ‘பொல்லாதவனும் சோம்பேறியுமான ஊழியக்காரனே, நான் விதைக்காத இடத்தில் அறுக்கிறவனென்றும், தெளிக்காத இடத்தில் சேர்க்கிறவனென்றும் அறிந்திருந்தாயே;

²⁷"அப்படியானால் நீ என் பணத்தைக் காசுக்காரரிடத்தில் போட்டுவைக்கவேண்டியதாயிருந்ததே; அப்பொழுது நான் வந்து என்னுடையதை வட்டியோடே வாங்கிக்கொள்வேனே. ²⁸ஆகையால் அந்தப் பொற்பையை அவனிடத்தில் எடுத்து, பத்துப் பொற்பைகளையுடையவனுக்குக் கொடுங்கள். ²⁹உள்ளவனெவனோ அவனுக்குக் கொடுக்கப்படும், பரிபூரணமும் அடைவான்; இல்லாதவனிடத்திலிருந்து உள்ளதும் எடுத்துக்கொள்ளப்படும். ³⁰பிரயோஜனமற்ற அந்த ஊழியக்காரனைப் புறம்பான இருளிலே தள்ளிப்போடுங்கள்; அங்கே அழுகையும் பற்கடிப்பும் உண்டாயிருக்கும்’ என்றான்.

மனுஷகுமாரன் ஜாதிகளை நியாயந்தீர்க்கிறார்

³¹"அன்றியும், மனுஷகுமாரன் தமது மகிமையோடே தம்முடைய சகல தூதரோடுங்கூட வரும்போது, தமது மகிமையுள்ள சிங்காசனத்தின்மேல் வீற்றிருப்பார். ³²அப்பொழுது சகல ஜாதிகளும் அவருக்கு முன்பாகச் சேர்க்கப்படுவார்கள்; மேய்ப்பன் செம்மறியாடுகளையும் வெள்ளாடுகளையும் ஒன்றைவிட்டு ஒன்றைப் பிரிக்கிறதுபோல அவர்களை ஒருவரையொருவர் பிரிப்பார். ³³செம்மறியாடுகளைத் தமது வலதுபக்கத்திலும், வெள்ளாடுகளைத் தமது இடதுபக்கத்திலும் நிறுத்துவார். ³⁴அப்பொழுது ராஜா தமது வலதுபக்கத்தில் நிற்பவர்களைப் பார்த்து, ‘என் பிதாவினால் ஆசீர்வதிக்கப்பட்டவர்களே, வாருங்கள்; உலகம் உண்டானதுமுதல் உங்களுக்காக ஆயத்தம்பண்ணப்பட்டிருக்கிற ராஜ்யத்தைச் சுதந்தரித்துக்கொள்ளுங்கள்.

³⁵"ஏனெனில் நான் பசியாயிருந்தேன், நீங்கள் எனக்கு போஜனங்கொடுத்தீர்கள்; தாகமாயிருந்தேன், என் தாகத்தைத் தீர்த்தீர்கள்; அந்நியனாயிருந்தேன், என்னைச் சேர்த்துக்கொண்டீர்கள்; ³⁶வஸ்திரமில்லாதிருந்தேன், எனக்கு வஸ்திரங்கொடுத்தீர்கள்; வியாதியாயிருந்தேன், என்னை விசாரிக்க வந்தீர்கள்; காவலிலிருந்தேன், என்னைப் பார்க்க வந்தீர்கள்’ என்பார்."

³⁷"அப்பொழுது நீதிமான்கள் அவருக்குப் பிரதியுத்தரமாக, ‘ஆண்டவரே, உம்மைப் பசியுள்ளவராகக் கண்டு எப்பொழுது போஜனங்கொடுத்தோம்? தாகமுள்ளவராகக் கண்டு எப்பொழுது உம்முடைய தாகத்தைத் தீர்த்தோம்?

³⁸"அந்நியராகக் கண்டு எப்பொழுது உம்மைச் சேர்த்துக்கொண்டோம்? வஸ்திரமில்லாதவராகக் கண்டு எப்பொழுது உமக்கு வஸ்திரங்கொடுத்தோம்? ³⁹வியாதியுள்ளவராகவும் காவலிலிருக்கிறவராகவும் உம்மை எப்பொழுது கண்டு உம்மிடத்தில் வந்தோம்?’ என்பார்கள்."

⁴⁰"அப்பொழுது ராஜா அவர்களுக்குப் பிரதியுத்தரமாக, ‘மெய்யாகவே உங்களுக்குச் சொல்லுகிறேன், மிகவும் சிறியவராகிய என் சகோதரரான இவர்களில் ஒருவனுக்கு நீங்கள் எதைச் செய்தீர்களோ, அதை எனக்கே செய்தீர்கள்’ என்பார். ⁴¹பின்பு, தமது இடதுபக்கத்தில் நிற்பவர்களைப் பார்த்து அவர், ‘சபிக்கப்பட்டவர்களே, என்னைவிட்டு, பிசாசுக்காகவும் அவன் தூதர்களுக்காகவும் ஆயத்தம்பண்ணப்பட்டிருக்கிற நித்திய அக்கினியிலே போங்கள். ⁴²ஏனெனில் நான் பசியாயிருந்தேன், நீங்கள் எனக்கு போஜனங்கொடுக்கவில்லை; தாகமாயிருந்தேன், நீங்கள் என் தாகத்தைத் தீர்க்கவில்லை; ⁴³அந்நியனாயிருந்தேன், நீங்கள் என்னைச் சேர்த்துக்கொள்ளவில்லை; வஸ்திரமில்லாதிருந்தேன், நீங்கள் எனக்கு வஸ்திரங்கொடுக்கவில்லை; வியாதியாயும் காவலிலும் இருந்தேன், நீங்கள் என்னை விசாரிக்க வரவில்லை’ என்பார்."

⁴⁴"அப்பொழுது அவர்களும் அவருக்குப் பிரதியுத்தரமாக, ‘ஆண்டவரே, உம்மைப் பசியுள்ளவராகவும், தாகமுள்ளவராகவும், அந்நியராகவும், வஸ்திரமில்லாதவராகவும், வியாதியுள்ளவராகவும், காவலிலிருக்கிறவராகவும் எப்பொழுது கண்டு உமக்கு ஊழியஞ்செய்யாதிருந்தோம்?’ என்பார்கள்.

⁴⁵"அப்பொழுது அவர் அவர்களுக்குப் பிரதியுத்தரமாக, ‘மெய்யாகவே உங்களுக்குச் சொல்லுகிறேன், மிகவும் சிறியவராகிய இவர்களில் ஒருவனுக்கு நீங்கள் எதைச் செய்யாதிருந்தீர்களோ, அதை எனக்கே செய்யாதிருந்தீர்கள்’ என்பார். ⁴⁶அப்பொழுது இவர்கள் நித்திய தண்டனையையும், நீதிமான்களோ நித்தியஜீவனையும் அடையப்போவார்கள்" என்றார்.