ማቴዎስ 25

25 ¹“ያን ጊዜ የአባታችን መንግሥት መብራቶቻቸውን ይዘው ሙሽራውን ሊቀበሉ የወጡ ዐሥር ደናግልን ትመስላለች። ²ከእነርሱም አምስቱ ሰነፎች፣ አምስቱም ልባሞች ነበሩ። ³ሰነፎቹ መብራቶቻቸውን ያዙ እንጂ ከእነርሱ ጋር ዘይት አልያዙም። ⁴ልባሞቹ ግን ከመብራቶቻቸው ጋር በማሰሮ ዘይት ያዙ። ⁵ሙሽራውም በዘገየ ጊዜ ሁሉም እንቅልፍ እያሸለባቸው አንቀላፉ። ⁶እኩለ ሌሊት ግን ‘እነሆ፣ ሙሽራው! ልትቀበሉት ውጡ!’ የሚል ጩኸት ተሰማ። ⁷ያን ጊዜ ቈነጃጅቱ ሁሉ ከእንቅልፋቸው ነቅተው መብራቶቻቸውን አዘጋጁ። ⁸ሰነፎቹም ልባሞቹን ‘መብራቶቻችን እየጠፉ ስለሆነ ከዘይታችሁ ስጡን’ አሏቸው። ⁹ልባሞቹ ግን መልሰው ‘አይሆንም፤ ለእኛና ለእናንተ ላይበቃ ይችላል፤ ይልቁንም ወደ ሻጮች ሄዳችሁ ለራሳችሁ ግዙ’ አሉ። ¹⁰እነርሱም ሊገዙ በሄዱበት ጊዜ ሙሽራው መጣ፤ ተዘጋጅተው የነበሩትም ከእርሱ ጋር ወደ ሰርጉ ግብዣ ገቡ፤ በሩም ተዘጋ። ¹¹ኋላም ሌሎቹ ቈነጃጅት መጥተው ‘ጌታ ሆይ፣ ጌታ ሆይ፣ በሩን ክፈትልን!’ አሉ። ¹²እርሱ ግን መልሶ ‘እውነት እላችኋለሁ፣ አላውቃችሁም’ አለ። ¹³ስለዚህ ቀኑንም ሰዓቱንም ስለማታውቁ ትጉ።

በተሰጠው ዐደራ ሁሉ ታማኝ መሆን

¹⁴“ደግሞም ወደ ባዕድ አገር ሊሄድ ሲል ባሪያዎቹን ጠርቶ ንብረቱን ዐደራ የሰጠ ሰውን ይመስላል። ¹⁵ለአንዱ አምስት ከረጢት ብር፣ ለሌላው ሁለት፣ ለሌላውም አንድ፣ ለእያንዳንዱ እንደ ችሎታው ሰጠና ጕዞውን ጀመረ። ¹⁶አምስት ከረጢት ብር የተሰጠው ወዲያውኑ ሄዶ ነግዶ ሌላ አምስት አተረፈ። ¹⁷እንዲሁም ሁለት ከረጢት ብር የነበረው ሌላ ሁለት አተረፈ። ¹⁸አንድ ከረጢት ብር የተቀበለው ግን ሄዶ ምድርን ቈፍሮ የጌታውን ገንዘብ ደበቀ።

¹⁹“ከብዙ ጊዜ በኋላም የእነዚያ ባሪያዎች ጌታ ተመልሶ ከእነርሱ ጋር ሒሳብ ተሳሰበ። ²⁰አምስት ከረጢት ብር የተቀበለው ሰው ሌላ አምስት ከረጢት ይዞ መጥቶ ‘ጌታዬ፣ አምስት ከረጢት ብር ዐደራ ሰጥተኸኝ ነበር፤ እነሆ፣ ሌላ አምስት አተረፍሁ’ አለ።

²¹“ጌታውም ‘ጎሽ፣ አንተ መልካምና ታማኝ ባሪያ! በጥቂቱ ታምነሃል፤ በብዙ እሾምሃለሁ፤ ወደ ጌታህ ደስታ ግባ!’ አለው።

²²“ሁለት ከረጢት ብር የነበረውም መጥቶ ‘ጌታዬ፣ ሁለት ከረጢት ብር ሰጥተኸኝ ነበር፤ እነሆ፣ ሌላ ሁለት አተረፍሁ’ አለ።

²³“ጌታውም ‘ጎሽ፣ አንተ መልካምና ታማኝ ባሪያ! በጥቂቱ ታምነሃል፤ በብዙ እሾምሃለሁ፤ ወደ ጌታህ ደስታ ግባ!’ አለው።

²⁴“ከዚያም አንድ ከረጢት ብር የተቀበለው መጥቶ ‘ጌታዬ፣ ካልዘራህበት የምታጭድ፣ ካልበተንህበት የምትሰበስብ ጨካኝ ሰው እንደሆንህ ዐውቅ ነበር’ አለ። ²⁵ስለዚህ ፈርቼ ሄድሁና ብርህን በምድር ውስጥ ደበቅሁ፤ እነሆ፣ ያንተ የሆነው ይህ ነው።

²⁶“ጌታውም መልሶ እንዲህ አለው፤ ‘አንተ ክፉና ሰነፍ ባሪያ! ካልዘራሁበት እንደማጭድ፣ ካልበተንሁበትም እንደምሰበስብ ታውቅ ነበርን?

²⁷“ገንዘቤን ለገንዘብ ለዋጮች ባስቀመጥኸው ኖሮ፣ እኔም ስመለስ ከትርፉ ጋር በወሰድሁት ነበር። ²⁸ስለዚህ ያለውን ከረጢት ብር ከእርሱ ወስዳችሁ ዐሥር ከረጢት ብር ላለው ስጡት። ²⁹ላለው ሁሉ ይጨመርለታል፤ ይበዛለታልም፤ ከሌለው ግን ያው ያለው እንኳ ይወሰድበታል። ³⁰ይህን የማይጠቅመውን ባሪያ ልቅሶና ጥርስ ማፋጨት ወዳለበት ወደ ውጭ ጨለማ አውጥታችሁ ጣሉት’።

የሰው ልጅ በአሕዛብ ይፈርዳል

³¹“የሰው ልጅ ከመላእክቱ ሁሉ ጋር በክብሩ በሚመጣበት ጊዜ፣ በክብሩ ዙፋን ላይ ይቀመጣል። ³²አሕዛብም ሁሉ በፊቱ ይሰበሰባሉ፤ እረኛም በጎችን ከፍየሎች እንደሚለይ፣ እርስ በርሳቸው ይለያቸዋል። ³³በጎቹን በቀኙ፣ ፍየሎቹን በግራው ያቆማል። ³⁴“ያን ጊዜ ንጉሡ በቀኙ ያሉትን እንዲህ ይላቸዋል፤ ‘እናንተ በአባቴ የተባረካችሁ፣ ኑ፤ ዓለም ከተፈጠረ ጀምሮ የተዘጋጀላችሁን መንግሥት ውረሱ።

³⁵“ተርቤ ነበርና አበላችሁኝ፤ ተጠምቼ ነበር አጠጣችሁኝ፤ እንግዳ ሆኜ ተቀበላችሁኝ፤ ³⁶ታርዤ ነበር አለበሳችሁኝ፤ ታምሜ ጠየቃችሁኝ፤ ታስሬ ወደ እኔ መጣችሁ’።”

³⁷“ያን ጊዜ ጻድቃን መልሰው እንዲህ ይሉታል፤ ‘ጌታ ሆይ፣ ተርበህ አይተን መቼ አበላንህ? ወይስ ተጠምተህ አይተን መቼ አጠጣንህ?

³⁸“እንግዳ ሆነህ አይተን መቼ ተቀበልንህ? ወይስ ታርዘህ አይተን መቼ አለበስንህ? ³⁹ታመህ ወይም ታስረህ አይተን መቼ ወደ አንተ መጣን?’።”

⁴⁰“ንጉሡም መልሶ እንዲህ ይላቸዋል፤ ‘እውነት እላችኋለሁ፣ ከእነዚህ ከታናናሾቹ ወንድሞቼ ለአንዱ ያደረጋችሁት፣ ለእኔ አደረጋችሁት’። ⁴¹ከዚያም በግራው ያሉትን እንዲህ ይላቸዋል፤ ‘እናንተ የተረገማችሁ፣ ለሰይጣንና ለመላእክቱ ወደ ተዘጋጀው የዘላለም እሳት ከእኔ ዘንድ ራቁ። ⁴²ተርቤ ነበርና የምበላውን አልሰጣችሁኝም፤ ተጠምቼ ነበር የምጠጣውን አላጠጣችሁኝም፤ ⁴³እንግዳ ሆኜ አልተቀበላችሁኝም፤ ታርዤ አላለበሳችሁኝም፤ ታምሜና ታስሬ አልጠየቃችሁኝም’።”

⁴⁴“ያን ጊዜ እነርሱም መልሰው እንዲህ ይላሉ፤ ‘ጌታ ሆይ፣ ተርበህ ወይም ተጠምተህ ወይም እንግዳ ሆነህ ወይም ታርዘህ ወይም ታመህ ወይም ታስረህ መቼ አይተን አላገለገልንህም?’

⁴⁵“እርሱም መልሶ እንዲህ ይላቸዋል፤ ‘እውነት እላችኋለሁ፤ ከእነዚህ ከታናናሾቹ ለአንዱ ያላደረጋችሁት፣ ለእኔ አላደረጋችሁትም’። ⁴⁶እነዚህም ወደ ዘላለም ቅጣት፣ ጻድቃን ግን ወደ ዘላለም ሕይወት ይሄዳሉ።”