ማቴዎስ 24

24 ¹ኢየሱስ ከቤተ መቅደሱ ወጥቶ ሲሄድ፣ ደቀ መዛሙርቱ የቤተ መቅደሱን ሕንጻዎች ሊያሳዩት ወደ እርሱ ቀረቡ።

²እርሱም መልሶ፣ “ይህን ሁሉ ታያላችሁን?” አላቸው። “እውነት እላችኋለሁ፤ ድንጋይ በድንጋይ ላይ ሳይፈርስ እዚህ አይቀርም፤ ሁሉም ይፈርሳል።”

³ኢየሱስ በደብረ ዘይት ተራራ ተቀምጦ ሳለ፣ ደቀ መዛሙርቱ ለብቻቸው ወደ እርሱ ቀርበው፣ “ይህ መቼ እንደሚሆን፣ የመምጣትህና የዓለም መጨረሻ ምልክቱም ምን እንደ ሆነ ንገረን” አሉት።

⁴ኢየሱስም መልሶ፣ “ማንም እንዳያስታችሁ ተጠንቀቁ።

⁵“ብዙዎች፣ ‘እኔ ክርስቶስ ነኝ’ እያሉ በስሜ ይመጣሉና፤ ብዙዎችንም ያስታሉ። ⁶ስለ ጦርነትና ስለ ጦርነት ወሬ ትሰማላችሁ፤ ነገር ግን አትደንግጡ። ይህ ሊሆን ግድ ነው፤ ዳሩ ግን መጨረሻው ገና ነው። ⁷ሕዝብ በሕዝብ ላይ፣ መንግሥትም በመንግሥት ላይ ይነሣል፤ በልዩ ልዩ ስፍራም ራብና የምድር መናወጥ ይሆናል። ⁸ይህ ሁሉ ግን የምጥ ጣር መጀመሪያ ነው።

⁹በዚያን ጊዜ ለመከራ አሳልፈው ይሰጧችኋል፤ ይገድሏችሁማል፤ ስለ ስሜም በአሕዛብ ሁሉ ዘንድ የተጠላችሁ ትሆናላችሁ። ¹⁰በዚያን ጊዜ ብዙዎች ይሰናከላሉ፤ እርስ በርሳቸውም አሳልፈው ይሰጣጣሉ፤ እርስ በርሳቸውም ይጠላላሉ፤ ¹¹ብዙ ሐሰተኞች ነቢያትም ይነሣሉ፤ ብዙ ሰዎችንም ያስታሉ። ¹²ዐመፅም ስለሚበዛ፣ የብዙዎች ፍቅር ይቀዘቅዛል፤ ¹³እስከ መጨረሻ የሚጸና ግን እርሱ ይድናል። ¹⁴ይህም የመንግሥቱ ወንጌል ለአሕዛብ ሁሉ ምስክር እንዲሆን በዓለም ሁሉ ይሰበካል፤ ከዚያም በኋላ መጨረሻው ይመጣል።

¹⁵ስለዚህ ነቢዩ ዳንኤል የተናገረው የጥፋት ርኩሰት በተቀደሰው ስፍራ ቆሞ ስታዩ፣ አንባቢው ያስተውል፤ ¹⁶በዚያን ጊዜ በይሁዳ ያሉት ወደ ተራሮች ይሽሹ።

¹⁷“በሰገነት ላይ ያለ ከቤቱ ዕቃ ሊወስድ አይውረድ፤ ¹⁸በዕርሻም ያለ ልብሱን ሊወስድ ወደ ኋላ አይመለስ። ¹⁹በዚያ ወራት ለርጉዞችና ለሚያጠቡ ሴቶች እንዴት የሚያስፈራ ይሆናል! ²⁰ሽሽታችሁ በክረምት ወይም በሰንበት ቀን እንዳይሆን ጸልዩ። ²¹በዚያን ጊዜ ከዓለም መጀመሪያ ጀምሮ እስከ አሁን ድረስ ያልሆነ፣ ከእንግዲህም ወዲህ ከቶ የማይሆን ታላቅ መከራ ይሆናልና። ²²እነዚያ ቀናት ባያጥሩ ኖሮ፣ ማንም ባልዳነ ነበር፤ ነገር ግን ስለ ተመረጡት ሲባል እነዚያ ቀናት ያጥራሉ።

²³በዚያን ጊዜ ማንም፣ ‘እነሆ፣ ክርስቶስ እዚህ አለ’ ወይም ‘እነሆ፣ እዚያ አለ’ ቢላችሁ አትመኑ። ²⁴ሐሰተኞች መሲሖችና ሐሰተኞች ነቢያት ይነሣሉና፤ ቢቻላቸውስ የተመረጡትን እንኳ እስኪያስቱ ድረስ ታላላቅ ምልክቶችንና ድንቆችን ያደርጋሉ። ²⁵እነሆ፣ አስቀድሜ ነግሬአችኋለሁ።

²⁶ስለዚህ፣ ‘እነሆ፣ በምድረ በዳ አለ’ ቢሏችሁ አትውጡ፤ ‘እነሆ፣ በእልፍኝ ውስጥ አለ’ ቢሏችሁ አትመኑ። ²⁷መብረቅ ከምሥራቅ ወጥቶ እስከ ምዕራብ ድረስ እንደሚታይ፣ የሰው ልጅ መምጣት እንዲሁ ይሆናልና። ²⁸በድን ባለበት ስፍራ ሁሉ፣ አሞራዎች በዚያ ይሰበሰባሉ።

²⁹ከዚያ ወራት መከራ በኋላ ወዲያው፣ ፀሓይ ትጨልማለች፤ ጨረቃም ብርሃኗን አትሰጥም፤ ከዋክብትም ከሰማይ ይረግፋሉ፤ የሰማይም ኀይላት ይናወጣሉ። ³⁰በዚያን ጊዜ የሰው ልጅ ምልክት በሰማይ ይታያል፤ የምድርም ወገኖች ሁሉ ዋይ ዋይ ይላሉ፤ የሰው ልጅም በኀይልና በታላቅ ክብር በሰማይ ደመና ሲመጣ ያዩታል። ³¹መላእክቱንም በታላቅ የመለከት ድምፅ ይልካል፤ የተመረጡትንም ከአራቱ ነፋሳት፣ ከሰማይ ዳር እስከ ዳር ይሰበስቧቸዋል።

³²ይህን ከበለስ ተማሩ፤ ቅርንጫፏ ሲለሰልስ ቅጠልም ሲያወጣ፣ በጋ እንደ ቀረበ ታውቃላችሁ። ³³እንዲሁም ይህን ሁሉ ስታዩ፣ በደጅ እንደ ቀረበ ዕወቁ። ³⁴እውነት እላችኋለሁ፤ ይህ ሁሉ እስኪሆን ድረስ፣ ይህ ትውልድ ከቶ አያልፍም። ³⁵ሰማይና ምድር ያልፋሉ፤ ቃሎቼ ግን ከቶ አያልፉም።

አብ ብቻ ያውቃል

³⁶“ያን ቀንና ሰዓት ግን የሰማይ መላእክትም ቢሆኑ ወልድም ቢሆን ማንም አያውቅም፤ አብ ብቻ ያውቃል። ³⁷እንደ ኖኅ ዘመን፣ የሰው ልጅ መምጣት እንዲሁ ይሆናል። ³⁸የጥፋት ውሃ ከመምጣቱ በፊት በነበሩት ቀናት፣ ኖኅ ወደ መርከብ እስከገባበት ቀን ድረስ፣ ሰዎች ይበሉና ይጠጡ፣ ያገቡና ይድሩ ነበርና፤ ³⁹የጥፋት ውሃም መጥቶ ሁሉንም እስኪወስድ ድረስ ምንም አላወቁም ነበር። የሰው ልጅ መምጣትም እንዲሁ ይሆናል። ⁴⁰በዚያን ጊዜ ሁለት ሰዎች በዕርሻ ይሆናሉ፤ አንዱ ይወሰዳል፣ ሌላውም ይቀራል። ⁴¹ሁለት ሴቶች በወፍጮ ይፈጫሉ፤ አንዷ ትወሰዳለች፣ ሌላዋም ትቀራለች። ⁴²እንግዲህ ጌታችሁ በየትኛው ቀን እንደሚመጣ ስለማታውቁ ትጉ። ⁴³ይህን ግን ዕወቁ፤ ባለቤቱ ሌባው በየትኛው የሌሊት ክፍል እንደሚመጣ ቢያውቅ ኖሮ፣ በነቃ ነበር፤ ቤቱም እንዲቈፈር ባልተወ ነበር። ⁴⁴ስለዚህ እናንተ ደግሞ ተዘጋጅታችሁ ኑሩ፤ የሰው ልጅ ባላሰባችሁት ሰዓት ይመጣልና።

⁴⁵እንግዲህ ጌታው በጊዜው ምግባቸውን ይሰጣቸው ዘንድ በቤተ ሰቡ ላይ የሾመው ታማኝና ልባም አገልጋይ ማን ነው? ⁴⁶ጌታው በመጣ ጊዜ እንዲህ ሲያደርግ የሚያገኘው ያ አገልጋይ ብፁዕ ነው። ⁴⁷እውነት እላችኋለሁ፤ በንብረቱ ሁሉ ላይ ይሾመዋል። ⁴⁸ነገር ግን ያ ክፉ አገልጋይ በልቡ፣ ‘ጌታዬ ይዘገያል’ ቢል፣ ⁴⁹የባልንጀሮቹንም አገልጋዮች መምታት ቢጀምር፣ ከሰካራሞችም ጋራ መብላትና መጠጣት ቢጀምር፣ ⁵⁰የዚያ አገልጋይ ጌታ ባላሰበው ቀን፣ ባላወቀውም ሰዓት ይመጣል፤ ⁵¹ይቈራርጠዋልም፤ ዕድል ፈንታውንም ከግብዞች ጋራ ያደርጋል፤ በዚያም ልቅሶና ጥርስ ማፋጨት ይሆናል።”