Haikali Ba Zai Tsaya Ba

Da aka faɗa musu za a rushe haikali, almajirai suka tambaya yaushe. Yesu ya bayyana yaƙe-yaƙe, cin amana, almasihan ƙarya, ƙaunar da ta yi sanyi, da gudun da ya yi gaggawa har ba mai tsayawa ya ɗauki mayafi. Ranar kanta kuwa ba wanda ya sani — ba mala'iku ba, ba Ɗan ba, sai Uba kaɗai.

Babi na 24.

Sa'ad da Yesu yake barin haikali, sai almajiransa suka zo domin su nuna masa gine-ginen haikalin.

Ya amsa ya ce, “Ko kun ga dukan waɗannan? Lalle hakika, ina gaya muku, ba wani dutse a nan da za a bar shi a kan wani; za a rushe dukansu.”

Da Yesu yana zaune a kan Dutsen Zaitun, sai almajiransa suka zo wajensa a ɓoye suka ce, “Ka gaya mana, yaushe ne waɗannan abubuwa za su faru, kuma wace alama ce za ta nuna zuwanka da ƙarshen zamani?”

Yesu ya amsa ya ce, “Ku yi hankali kada wani yă ruɗe ku.

“Gama mutane da yawa za su zo da sunana, suna cewa, ‘Ni ne Almasihu,’ kuma za su ruɗi mutane da yawa. Za ku ji labarin yaƙe-yaƙe da jita-jitar yaƙe-yaƙe—kada ku firgita. Dole waɗannan su faru, amma ƙarshen bai yi ba tukuna. Al'umma za ta tasar wa al'umma, mulki kuma zai tasar wa mulki, za a kuma yi yunwa da girgizar ƙasa a wurare dabam-dabam. Dukan waɗannan farkon naƙudar haihuwa ne.

Sa'an nan za su ba da ku ga wahala, su kuma kashe ku, dukan al'ummai kuma za su ƙi ku saboda sunana. A lokacin nan mutane da yawa za su kauce daga bangaskiya, su kuma ci amanar juna, su ƙi juna, annabawan ƙarya da yawa kuma za su bayyana, su ruɗi mutane da yawa. Saboda yawaitar mugunta, ƙaunar mafi yawan mutane za ta yi sanyi, amma wanda ya jure har ƙarshe zai sami ceto. Za a yi shelar wannan bishara ta Mulki a duk duniya, ta zama shaida ga dukan al'ummai, sa'an nan ƙarshen zai zo.

Saboda haka sa'ad da kuka ga abin ƙyama mai kawo kango, wanda annabi Daniyel ya yi magana a kai, yana tsaye a wuri mai tsarki—bari mai karatu yă gane, sai waɗanda suke a Yahudiya su gudu zuwa duwatsu.

“Wanda yake kan soron ɗaki kada yă sauka domin yă ɗauko wani abu daga gida, wanda kuma yake gona kada yă koma domin yă ɗauko rigarsa. Kaiton mata masu ciki da masu renon jarirai a kwanakin nan! Ku yi addu'a kada gudunku yă zama a lokacin sanyi ko a ranar Asabar. Gama a lokacin nan za a yi wahala mai girma, wadda ba a taɓa yin kwatankwacinta ba tun farkon duniya har yanzu, ba kuwa za a ƙara yin irinta ba. Da ba a taƙaita kwanakin nan ba, da babu wani da zai tsira; amma saboda zaɓaɓɓu, za a taƙaita kwanakin nan.

Sa'an nan idan wani ya ce muku, ‘Duba, ga Almasihu nan,’ ko ‘Ga shi can,’ kada ku gaskata. Almasihan ƙarya da annabawan ƙarya za su tashi, za su kuma nuna manyan alamu da al'ajabai domin su ruɗi, in ya yiwu, har da zaɓaɓɓu. Ga shi, na riga na gaya muku tun da wuri.

Saboda haka in suka ce muku, ‘Duba, yana cikin jeji,’ kada ku fita; ko ‘Duba, yana cikin ɗakunan ciki,’ kada ku gaskata. Gama kamar yadda walƙiya take haskakawa daga gabas har zuwa yamma, haka zuwan Ɗan Mutum zai kasance. Duk inda mushe yake, a can ungulai za su taru.

Nan da nan bayan wahalar kwanakin nan, rana za ta yi duhu, wata kuma ba zai ba da haske ba, taurari za su fāɗo daga sama, ƙarfin sammai kuma zai girgiza. Sa'an nan alamar Ɗan Mutum za ta bayyana a sama, dukan mutanen duniya kuma za su yi makoki, sa'ad da suka ga Ɗan Mutum yana zuwa a kan gizagizan sama da iko da ɗaukaka mai girma. Zai aiki mala'ikunsa da ƙarar ƙaho mai ƙarfi, za su kuma tattara zaɓaɓɓunsa daga kusurwoyi huɗu na duniya, daga wannan iyakar sama zuwa wancan.

Ku koyi wannan daga itacen ɓaure, da zarar reshensa ya tofo ya kuma yi ganye, kun san rani ya yi kusa. Haka ma, sa'ad da kuka ga dukan waɗannan abubuwa, ku sani ya yi kusa, yana bakin ƙofa. Lalle hakika, ina gaya muku, wannan tsara ba za ta shuɗe ba sai dukan waɗannan abubuwa sun faru. Sama da ƙasa za su shuɗe, amma maganata ba za ta taɓa shuɗewa ba.

Sai Uba Kaɗai Ya Sani

“Babu wanda ya san wannan rana ko sa'a—ko mala'iku na sama, ko Ɗa—sai Uba kaɗai. Kamar yadda ya kasance a kwanakin Nuhu, haka zuwan Ɗan Mutum zai kasance. Gama a kwanakin kafin ruwan tsufana, mutane suna ci suna sha, suna aure suna aurarwa, har ranar da Nuhu ya shiga jirgi; ba su kuwa san kome ba sai da ruwan tsufana ya zo ya share su duka. Haka zuwan Ɗan Mutum zai kasance. Maza biyu za su kasance a gona; za a ɗauki ɗaya a bar ɗaya. Mata biyu za su kasance suna niƙa da dutsen niƙa; za a ɗauki ɗaya a bar ɗaya. Saboda haka ku zauna a faɗake, domin ba ku san ranar da Ubangijinku zai zo ba. Ku gane wannan: da maigida ya san a wane lokaci na dare ɓarawo zai zo, da ya zauna a faɗake, da bai kuwa bar a ratsa gidansa ba. Saboda haka ku ma sai ku kasance a shirye, domin Ɗan Mutum zai zo a sa'ar da ba ku zato ba.

To, wane ne bawan nan mai aminci da hikima, wanda maigidansa ya sa yă lura da gidansa, domin yă riƙa ba su abinci a kan lokaci? Mai albarka ne bawan nan wanda maigidansa zai dawo ya iske shi yana yin haka. Lalle hakika, ina gaya muku, zai sa shi yă lura da dukan dukiyarsa. Amma in mugun bawan nan ya ce a ransa, ‘Maigidana ya yi jinkirin dawowa,’ sa'an nan ya fara dūkan 'yan'uwansa bayi, yana kuma ci yana sha tare da mashaya, maigidan bawan nan zai zo a ranar da bai zata ba, a sa'ar da bai sani ba. Zai yanyanka shi gunduwa-gunduwa, yă kuma sa shi tare da munafukai, inda ake kuka da cizon haƙora.”