Matthew 24

24 ¹Jishuna khorumshimwui eina kashok tharan, awui sākhangatha̱bingna khorumshimwui shimbing ali chithei khavai rāsai.

²"Ot hi saikora nathumna theida leila?" da ana ngahānkai. "Kachangkhat ina nathumli kahāngna, hili ngalung akhawuitungli ngalung akha ngarorda maleisaluimara; saikora sakhaihaora."

³Jishuna Olive kaphungli pamda leilakha, awui sākhangatha̱bingna ngathumsāda ali rāngahāna, "Ithumli hānglu, ot hi khiatam shokrakhala, kala nawui kharā eina okathui kachang atamwui machut khina leikhala?"

⁴Jishuna ngahānkai, "Ngasharlu, mi khipānakha nathumli mathanngui ngasakhaialu.

⁵"Kaja mi kachungkhana iwui ming singda rālaga, 'I Khrista' da hāngra, kala athumna mi kachungkhali thannguira. ⁶Nathumna rai eina raipao kashā tharan, machipāhaialu; hi shokphalungra, kha khangachang atam marārangsai. ⁷Yur akhana yur akhawuitungli, kala wungram akhana wungram akhawuitungli rai sāra; kala apam apamli chāmrei rāra, kala neina̱ khanukra. ⁸Ot hi saikora nao ra̱kaphokna.

⁹Chieina athumna nathumli kakhanangli khuikara, kala nathumli shaothatra, kala iwui mingwui vang yur saikorana nathumli yangkharingra. ¹⁰Atam chitharan mi kachungkhana kongluira, kala akha eina akha yansaida yangkharing ngarokra, ¹¹kala mikhanama marān kachungkha shokra, kala mi kachungkhali thannguira. ¹²Morei mataisangwui vang, mi kachungkhawui leikashi khamakui sāra, ¹³Kha khipānakha khanao eina tangda khāngkasha kaji china kahui samphangra. ¹⁴Wungramwui paokaphā hi okathui hupvali yur saikorali shākhi mikhavai hāshokra, kala chithākha khangachang atam rāra.

¹⁵Chiwui vang eina marān Danielna hāngkahai shimān khavai ningkakachai ot china kathara apamli nganinga chi nathumna kathei tharan (pākakhuibingna bhap tākhuiranu), ¹⁶chithākha Judeali khaleibingna kaphungli yāmkāranu.

¹⁷"Shimtungli khalei a china shimwui eina khikha khuirā khavai matunglakalu, ¹⁸Kala luili leikasapa china kachon maungkhuiluiaranu. ¹⁹Iyavo, nao vaikasābing kala na̱ shimanda leikasābingwui, atam chili ka̱lāshāt! ²⁰Nathumwui yāmkhavai chi sikachāng atamli kala Sabbaththang mashok khavai seihā sālu. ²¹Kaja chitharan atamli kakhanang khareia shokra, okathui haokaphokwui eina aja rāshungda mashoklakrang kaji kala mashokluilaki kajina. ²²Atam chi ngasak sha̱sang mangakha, khipānakha huikhui mangamara; kha kapangkhui kahaibingwui vang zimiksho chi ngasak sha̱sangra.

²³Chitharan khipānakha nathumli, 'Yanglu, hili Khrista leili,' maningakha 'A chili leili' da hāngakha, mashitsanghaialu. ²⁴Khrista khangamānabing kala minama marānbing shokra, kala kapangkhui kahaibingla shapakha thanngui khavai athumna machut kala matakhak kahai khareibing sāchitheira. ²⁵Yanglu, ina nathumli rida hānghaira.

²⁶Chiwui vang athumna, 'Yanglu, a lamhāngli lei,' da hāngakha mavāalu; 'Yanglu, alung kābingli lei,' da hāngakha mashitsanghaialu. ²⁷Kaja rikhān zingshoshongwui eina khangashei tharan zingtunshong tāshunga horvā thada, miwui Naomayarawui rāki chithada rāra. ²⁸Kathingun khaleipam kachida, chili khalāngbing rākazipra.

²⁹Chitharan atamwui kakhanangwui apeilam, zimik tangmangtinghaora, kachāngna kahor makhamimara, sirābing kazingramwui eina tātungra, kala atungshongwui pangshapbing nganukhaora. ³⁰Chitharan miwui Naomayarawui machut kazingramli shokra, kala miwui Naomayarana kazingramwui muiyātungli pangshap kala tekhamatei khareia eina rāki chi theida, okathuiwui miyur saikorana chapngachāra. ³¹Ana awui kazingraobingli panglāk kahai talla̱khon eina chihovāra, kala athumna masi mati eina, kazingramwui achikun akhawui eina achikun akhali, awui kapangkhui kahaibingli kazipkhuira.

³²Khaorārongwui eina hi kaji tamkhuilu: aphāngli shondhar shokta tharan anah matek phokta kahaili, nathumna kachāngli yāngyir ra da theira. ³³Chithada, nathumna ot saikora hi kathei tharan, a nganailakhaira, khāmongli leira da theilu. ³⁴Kachangkhat ina nathumli kahāng hina, ot saikora hi shokkahai eina tangda thot hi makānthuichingmara. ³⁵Kazing eina okathui shimānhaora, kha iwui tui china katang mashimānmara.

Avāva̱māngna Thei

³⁶"Zimiksho eina pung chi khipānakhala matheimana; kazingramli khalei kazingraobing eina tangdala, Anaomayarala matheimana, kha Avā va̱māngna thei. ³⁷Noahwui atamli kashok thada, miwui Naomayarawui kharāla chithāda shokra. ³⁸Kaja tara̱ maphongrangla atambingli, Noahna marikhongli kātongkhuida zimiksho eina tangda, mibingna phāshak phazāpama, ngalā khuipama, fathuipama; ³⁹kala tara̱ phongda athum saikora kheithuihaowa eina tangda athumna kakhayakla matheimana. Chithāda miwui Naomayarawui kharāla shokra. ⁴⁰Mayarnao khani luili leira; akhali khuithuihaora, akhapāva̱li nothāhaora. ⁴¹Sha̱nao khani millola mā rungsāra; akhali khuithuihaora, akhapāva̱li nothāhaora. ⁴²Chiwui vang eina rimpamlu, khikhalajila nathumwui Proho khiwui zimiksholi rārakhala kaji nathumna matheimana. ⁴³Hi theikazaklu: khale china ngayāwui khiwui katharān rāra̱khala shimva̱na theisāsi kaja, ana rimpamda awui shim chi makaizang ngasakmara. ⁴⁴Chiwui vang eina nathumla ngarānpinghailu, khikhalajila nathumna maphaningkasā pung chili miwui Naomayara rāra.

⁴⁵Chithākha akhavāna awui shimkhurbingli atam horzakta kashakazā khamira khavai kashina horsangmi chisin kala thangkhamei rao chi khipākhala? ⁴⁶Awui akhavā hankhaung kaja ngarakzak eina sākasā rao chi china, ka̱lā mahaira. ⁴⁷Kachangkhat eina ina nathumli kahāngna, ana rao chili awui khalalei lan saikorawui kashina sāngasakra. ⁴⁸Kha kalikhada makhayā rao china khalatta, 'Iwui akhavā sāngnā maungmara,' da phaninglaga, ⁴⁹kala awui rao ngarumbingli kashaola shaopama, kala khamaripbing ngasoda phāshak phazāpama. ⁵⁰Chikathā rao chiwui akhavāna maphaningkasa zimiksho kala makathei pungli rāra. ⁵¹Ana ali tandi mida phākakhaningbingna kapam apamli haira; apam chili mibingna kachapla chapra kala ahāla tarira."