Matthew 23

23 ¹Chieina Jishuna mi kachungkha kala awui sākhangatha̱bingli hānga,

²hānga, "Ain kathembing kala Phariseebingna Moseswui pamkhongli pama.

³"Chiwui vang eina athumna nathumli kahāng saikora chi sāda yonlu, kha athumwui otsak chi tākam eina masaalu; kaja athumna hāng, kha masāmana. ⁴Athumna otphun rit kala phungkhanā khalaplaga mibingwui yartuili khāngkāmi, kha athum khalattana chi ngatha̱ khavai pāngmareng akhala makhāngkhuimana. ⁵Athumna mina theivairanu da ot saikora sāna; athumwui phylacterybing chi zat ngasakta athumwui chontheira̱bing chi sāngsang ngasaka, ^a a v5 Phylactery: seihā sā tharan ngalemli kala uishong pāngli khalapkahaia, Kathara lairikwui tui zangkahai savun eina sākahai baksho kateobing. ⁶kala athumna zātkhān kasāli khayākakā pam kala synagogueli mathāmeikap kaji pambing chi ningchanga, ⁷kala leihngapha̱li shālam kala mina athumli 'Ojā' da hokhui chi ningchanga. ⁸Nathumli 'Ojā' da mahokpaimana, kaja nathumwui Ojā chi akha mānga, kala nathum saikora vānaona. ⁹Kala okathuili khipākhala nathumwui avā da mahoalu, kaja kazingramli khalei nathumwui Avā chi akha mānga. ¹⁰Khipānakha nathumli 'chishutme' da maho ngasakalu, kaja nathumwui chishutme chi akha mānga, chi Khrista china. ¹¹Nathumwui ngachaili hakmeikap china nathumwui raona hora. ¹²Khipākha khalatta hakkakhui a china teongasakra; kala khipākha khalatta kateowa a china hakngasakra.

¹³Ain kathembing kala Phariseebing, phākakhaningbing, kakhanang nathumwui ngasāranu! Kaja nathumna ithumwui Avā wungram chi mibingwui mangāli shung ngasaka; nathum khalattana mazangla, kala kazang khavai hotnaibinglila mazang ngasakmana. ^b b v13 Haokaphok kagapkahai lairikbingli verse 14 hi maleimana; kha naolak eina kagapkahai lairikbingna hi kapik: "Kakhanang nathumwui ngasāranu, ain kathembing kala Phariseebing, phākakhaningbing! Nathumna kachangkhat ra̱meikapamva̱bingwui shim chi zāsā, kala mina theivairanu da seihā katuma sāna; chiwui vang eina nathumna reikhameia bichar samphangra."

¹⁵Ain kathembing kala Phariseebing, phākakhaningbing, kakhanang nathumwui ngasāranu! Kaja nathumna mi akhali on ngasākhavai da shamadru kala ngalei kānkāra, chieina ali nathum eina khanishida kazeiramwui naomayara sāngasaka.

¹⁶Mik khangapeo thānmebing, kakhanang nathumwui ngasāranu! Nathumna hāng, 'Khorumshim eina mingzaikahai chi khikhala maningmana, kha khorumshimwui sinā eina mingzaikahai a china khangashit chotchāngkapaina.' ¹⁷Mik khangapeo mangkhama̱bing! Khipā reikhameikhala: sinā ka, maningakha sinā chi kathara sāngasak khorumshim khala? ¹⁸Kala nathumna hāng, 'Hanphut eina mingzaikahai chi khikhala maningmana, kha chiwuitungli khalei lemmet eina mingzaikahai a china chotchāngkapaina.' ¹⁹He, mik khangapeobing! Kaja khipā reikhameiya, lemmet chi ka, lemmetli kathara sāme hanphut chi ka? ²⁰Chiwui vang eina hanphut eina tuingashit kā a china, chi eina kala chitungli khalei ot saikora eina tuingashit kāna. ²¹Kala khorumshim eina tuingashit kā a china, chi eina kala chiwui alungli kā a eina tuingashit kāna. ²²Kala kazingram eina tuingashit kā a china, ithumwui Avāwui wungpamkhong eina kala chitungli pam a eina tuingashit kāna.

²³Ain kathembing eina Phariseebing, phākakhaningbing, nathum kakhanang ringkashi ngasāranu! Kaja nathumna mintā, kayanghanthā kala hanshiwui tithe milaga, ainwui mataimeikap kaji mashun, lukhamashan kala ningkatong chiliva mahengsangmana; khangatateibingla mayansānghaila hi nathum sāphalungki kajina. ²⁴Nathum mik khangapeo thānmebing, khoinao chi phanshokta kashānga chi mayuisangbing!

²⁵Ain kathembing eina Phariseebing, phākakhaningbing, nathum kakhanang ringkashi ngasāranu! Nathumna tengkot eina khongpheiwui ayar pheora, kha alungliva kākharām kala acham aramna pemtinghai. ²⁶Mik khangapeo Phariseepā! Khareli tengkot eina khongpheiwui alung chi pheolu, chieina chiwui ayarla pheo ngasakhaora.

²⁷Ain kathembing eina Phariseebing, phākakhaningbing, nathum kakhanang ringkashi ngasāranu! Nathum teimachar kahaia chikhur kathāna, ayarli khamathā theiya kha alungliva thikahai miwui ara̱-arā kala makathar saikorana pemtinghai. ²⁸Chiwui vang eina nathumla ayarli mibingna khamashunga theiya, kha alungliva phakharek eina makaphā-makhayāna pemtinghai.

²⁹Ain kathembing eina Phariseebing, phākakhaningbing, nathum kakhanang ringkashi ngasāranu! Kaja nathumna marānbingwui chikhur sakāmi kala khangarongbingwui lungshom chi khamathā ngasakta, ³⁰'Ithumna ithumwui avāva̱ ngarāwui atamli kharing kahaila, marānbing shaokathatwui otli athum eina mangakumpaimara' da hāng. ³¹Chiwui vang eina nathum marānbing shaokathatbingwui naomayarabing china da nathum khalattawui makhamayā shākhi sākashokna. ³²Chieina nathumwui avāva̱ ngarāwui chāk chi chipemlu. ³³Nathum phara̱bing, nathum phara̱wui naongarābing, kazeiramli tuitak tāki kajiwui eina kathada yāmshokpairakhala? ³⁴Chiwui vang eina ina nathumwuili marānbing, thangmei mibing kala ain kathembing shivātvāra; kaikhali nathumna shaothatra kala krushli shaoshānra, kaikhali nathumwui synagogueli ngaphitta keinung eina keinungli rekharekra, ³⁵Chieina khamashunga Abelwui ashee eina thuilaga tharkhamathengpam eina hanphutpamwui ngachaili nathumna shaothat kahai Berechiahwui naomayara Zechariahwui ashee tāshungda, okathuili tā kahai khamashunga ashee saikora nathumwuitungli rāngra. ³⁶Kachangkhat eina, ina nathumli kahāngna, ot saikora hi thot hili shokra.

Jishuna Jerusalemwui vang chapa

³⁷Jerusalem, Jerusalem, marānbingli shaokathata, kala nawuitungli chihokharābing chi lung eina horkathata! Nawui naongarābingli ina harva̱na anaobingli angachangzingli kazipkakhui thāda kayākhashira, laga chi nana mamayāmana! ³⁸Yanglu, nathumwui shim ngachakyānghaida nathumli choda haimihaira. ³⁹Ina nathumli hi kahāngna, nathumna 'ithumwui Avāwui mingli kharā a chi sokhami ngasāranu' da mahāngranglakha eina tangda ili matheiluimara."