ማቴዎስ 23 FHB Father's Heart Bible™

23 ¹ሽዑ ኢየሱስ ነቶም ህዝብን ንደቀ መዛሙርቱን ከምዙይ ኢሉ ተዛረቦም፦

²“መምህራን ሕግን ፈሪሳውያንን ኣብ መንበር ሙሴ ይቕመጡ።

³እምበኣር እቲ ዝብሉኹም ኵሉ ግበሩ ሓልዉውን፤ ከምቲ ግብሮም ግና ኣይትግበሩ፤ ንሳቶም ይሰብኩ፥ ኣይገብሩን ግና። ⁴ከቢድ ንምፅዋር ዘፀግም ፃዕነት ኣሲሮም ኣብ ማእገር ሰባት የሰክሙ፤ ባዕልቶም ግና ንኸንቀሳቕስዎም ኣፃብዕቶም እኳ ኣየልዕሉን። ⁵ኵሉ ግብሮም ብሰብ ምእንቲ ኽረአዩ እዮም ዝገብርዎ፤ ናይ ፀሎት ሳፁኖም የስፍሑ፥ ዘፈሮም ድማ የናውሑ፥ ^a a v5 ናይ ፀሎት ሳፁን፦ ኣብ እዋን ፀሎት ኣብ ግንባርን ኣብ ፀጋም ቅልፅምን ዝእሰሩ፥ ፅሑፋት መፅሓፍ ቅዱስ ዝሓዙ ናእሽቱ ናይ ቘርበት ሳፁናት። ⁶ኣብ ግብዣ ዝለዓለ መቐመጢ፥ ኣብ ቤተ ፀሎት ኣይሁድ ድማ ዝበለፀ መንበር ይፈትዎ፥ ⁷ኣብ ዕዳጋ ድማ ሰላምታ፥ ብሰብ ‘ረቢ’ ተባሂሎም ክጽውዑ ይፈትዎ። ⁸ንስኻትኩም ግና ‘ረቢ’ ኣይትበሃሉ፤ መምህርኩም ሓደ እዩሞ፥ ንስኻትኩም ድማ ኵልኻትኩም ኣሕዋት ኢኹም። ⁹ኣብ ምድሪ ድማ ንሓደ እኳ ‘ኣቦ’ ኢልኩም ኣይትፀውዑ፤ እቲ ኣብ ሰማይ ዘሎ ሓደ ኣቦ ኣለኩም እዩሞ። ¹⁰‘መራሒ’ ኢልኩም እውን ኣይትፀውዑ፤ ሓደ መራሒ ክርስቶስ ኣለኩም እዩሞ። ¹¹ካብ መንጎኹም እቲ ዝዓቢ ኣገልጋልኹም ክኸውን እዩ። ¹²ርእሱ ዘልዕል ኵሉ ክዋረድ እዩ፤ ርእሱ ዘትሕት ከዓ ልዕል ክብል እዩ።

¹³ኣቱም መምህራን ሕግን ፈሪሳውያንን ግብዛት፥ ንመንግስቲ ኣቦና ኣብ ቅድሚ ሰባት ትዓፅዉ ኢኹም እሞ ወይለኹም! ባዕልኻትኩም ኣይትኣትዉን፥ ነቶም ክኣትዉ ዝደልዩ ዘለዉ እውን ክትኣትዉ ኣይትሓድግዎምን። ^b b v13 እቶም ጥንታውያን ቅዳሓት ኣብዙይ ፍቕዲ 14 የብሎምን፤ ድሕሪኡ ዝመፁ ቅዳሓት ግና ከምዙይ ይውስኹ፦ “ኣቱም መምህራን ሕግን ፈሪሳውያንን ግብዛት፥ ኣባይቲ መበለታት ትበልዑ፥ ንምርኣይ ድማ ነዊሕ ፀሎት ትፅልዩ ኢኹም እሞ ወይለኹም፤ ስለዙይ ዝገደደ ፍርዲ ክትቕበሉ ኢኹም።”

¹⁵ኣቱም መምህራን ሕግን ፈሪሳውያንን ግብዛት፥ ንሓደ ሰብ ናብ ሃይማኖትኩም ንምምላስ ባሕርን ምድርን ትሳገሩ ኢኹም እሞ ወይለኹም! ምስ ረኸብኩምዎ ድማ፥ ካባኻትኩም ዕፅፊ ወዲ ገሃነም ትገብርዎ።

¹⁶ኣቱም ዕዉራት መራሕቲ፥ ‘ብቤተ መቕደስ ዝምሕል ገለ የብሉን፤ ብወርቂ ቤተ መቕደስ ዝምሕል ግና በቲ ማሕላ ይግደድ’ ትብሉ ኢኹም እሞ ወይለኹም! ¹⁷ኣቱም ዕዉራት ዓያሹ፥ እቲ ዝዓቢ ኣየናይ እዩ? እቲ ወርቂ ድዩ ወይስ እቲ ነቲ ወርቂ ዝቕድስ ቤተ መቕደስ? ¹⁸‘ብመሰውኢ ዝምሕል ገለ የብሉን፤ ብዝተቐመጠሉ ህያብ ዝምሕል ግና ይግደድ’ ትብሉ ኢኹም። ¹⁹ኣቱም ዕዉራት፥ እቲ ዝዓቢ ኣየናይ እዩ? እቲ ህያብዶ ወይ እቲ ነቲ ህያብ ዝቕድስ መሰውኢ? ²⁰እምበኣር እቲ ብመሰውኢ ዝምሕል፥ በኡን በቲ ኣብ ልዕሊኡ ዘሎ ኵሉን ይምሓል። ²¹እቲ ብቤተ መቕደስ ዝምሕል ድማ፥ በኡን በቲ ኣብኡ ዝነብርን ይምሓል። ²²እቲ ብሰማይ ዝምሕል ከዓ፥ ብዙፋን ኣቦናን በቲ ኣብ ልዕሊኡ ዝቕመጥን ይምሓል።

²³ኣቱም መምህራን ሕግን ፈሪሳውያንን ግብዛት፥ ካብ ሽላንን ሰሊጥን ከሙንን ዕሽር እተውፅኡ፥ ነቲ ዝኸበደ ነገር ሕጊ ግና፥ ማለት ንፍትሕን ምሕረትን እምነትን ዕሽሽ እትብልዎ ኢኹም እሞ ወይለኹም! ነዚ ክትገብሩ ይግባእ ነይሩ፥ ነቱይውን ከይሓደግኩም። ²⁴ኣቱም ዕዉራት መራሕቲ፥ ንጣቃ ተጻርዩ፥ ንገመል ግና ትውሕጡ!

²⁵ኣቱም መምህራን ሕግን ፈሪሳውያንን ግብዛት፥ ንዋንጫን ሸሓነን ብደገ ተፅርዩ፥ ውሽጦም ግና ብስስዐን ብዘይምግታእን ዝመልአ እዩ እሞ ወይለኹም! ²⁶ኣታ ዕዉር ፈሪሳዊ፥ ነቲ ደገ እውን ፅሩይ ምእንቲ ኽኸውን፥ ቅድም ነቲ ውሽጢ ዋንጫን ሸሓነን ኣፅሪ።

²⁷ኣቱም መምህራን ሕግን ፈሪሳውያንን ግብዛት፥ ብኖራ ዝተለቕሑ መቓብር ትመስሉ ኢኹም እሞ ወይለኹም፤ ብደገ ፅቡቕ ይመስል፥ ብውሽጡ ግና ኣዕፅምቲ ምዉታትን ኵሉ ርኽሰትን ዝመልአ እዩ። ²⁸ከምኡ ድማ ንስኻትኩም ብደገ ንሰብ ፃድቃን ትመስሉ፥ ብውሽጥኹም ግና ብግብዝናን ብዓመፅን ምሉኣት ኢኹም።

²⁹ኣቱም መምህራን ሕግን ፈሪሳውያንን ግብዛት፥ መቓብር ነቢያት ትሃንፁ፥ ሓወልቲ ፃድቃን ድማ ተመዓራርዩ ኢኹም እሞ ወይለኹም! ³⁰‘ብዘመን ኣቦታትና እንተ ንነብር ኔርና፥ ኣብ ምቕታል ነቢያት ምሳታቶም ኣይምተሓባበርናን ኔርና’ ትብሉ ኢኹም። ³¹እምበኣር ንስኻትኩም ውሉድ እቶም ነቢያት ዝቐተልዎም ምዃንኩም፥ ኣብ ልዕሊ ርእስኹም ትምስክሩ ኣለኹም። ³²እምበኣር ንስኻትኩም ነቲ ዓቐን ኣቦታትኩም ምልእዎ። ³³ኣቱም ኣትማን፥ ኣቱም ውሉድ ኣትማን፥ ካብ ፍርዲ ገሃነም ከመይ ኢልኩም ክተምልጡ ኢኹም? ³⁴እምበኣር እንሆ ነቢያትን ጠቢባንን መምህራን ሕግን ናባኻትኩም እሰድድ ኣለኹ፤ ካባታቶም ክትቐትሉን ክትሰቕሉን ኢኹም፥ ካባታቶም ድማ ኣብ ኣብያተ ፀሎትኩም ክትገርፉን ካብ ከተማ ናብ ከተማ ክትሰጉን ኢኹም፥ ³⁵ኵሉ እቲ ኣብ ምድሪ ዝፈሰሰ ፅድቂ ዘለዎ ደም ኣብ ልዕሌኹም ምእንቲ ኽመፅእ፥ ካብ ደም ፃድቕ ኣቤል ጀሚሩ ክሳዕ ደም ዘካርያስ ወዲ በራክዮ፥ እቲ ኣብ መንጎ መቕደስን መሰውኢን ዝቐተልኩምዎ። ³⁶ብሓቂ እብለኩም ኣለኹ፥ እዝ ኵሉ ነገር እዙይ ኣብ ልዕሊ እዝ ትውልዲ እዙይ ክመፅእ እዩ።

ኢየሱስ ብዛዕባ ኢየሩሳሌም ይበኪ

³⁷ኦ ኢየሩሳሌም፥ ኢየሩሳሌም፥ ንነቢያት እትቐትሊ፥ ነቶም ናባኺ ዝተልኣኹ ድማ ብእምኒ እትቕጥቅጢ! ከምቲ ደርሆ ጨቓዊታ ኣብ ትሕቲ ኣኽናፋ እትእክብ፥ ንደቅኺ ክእክብ ክንደይ ጊዜ ደለኹ፥ ንስኺ ግና ኣበኺ። ³⁸እንሆ ቤትኪ ባዲማ ኮይና ትተርፈኪ ኣላ። ³⁹‘በስም ኣቦና ዝመፅእ ቡሩኽ እዩ’ ክሳዕ እትብሉ፥ ድሕሪ ሕዚ ኸም ዘይትርእዩኒ እብለኩም ኣለኹ።”