Iso soxta ustozlardan ogohlantiradi

Iso yetti marta boshqalarga ogʻir yuk ortadigan, kosaning tashqarisini ishqalab tozalaydigan va otalari oʻldirgan paygʻambarlarning qabrlarini bezatadigan ustozlarga «Holingizga voy!» deydi — holbuki ularning Otasi faqat bitta, U osmondadir. Soʻz Quddus uchun qaygʻu bilan yakunlanadi: rad etgan shahar, xarob qoldirilgan uy.

23-bob.

Shunda Iso olomonga va shogirdlariga murojaat qilib,

shunday dedi: “Tavrot tafsirchilari va farziylar Musoning kursisida oʻtiradilar.

Shuning uchun ular sizlarga nimani aytsalar, shuni qilinglar va bajaringlar, lekin qilmishlariga ergashmanglar, chunki ular vaʼz qiladilaru, oʻzlari amal qilmaydilar. Ular ogʻir, koʻtarish qiyin boʻlgan yuklarni bogʻlab, odamlarning yelkasiga yuklaydilar, lekin oʻzlari bu yuklarni qimirlatish uchun barmogʻini ham qimirlatmaydilar. Ular hamma ishini odamlarga koʻz-koʻz qilish uchun qiladilar: ibodat qutichalarini kengaytiradilar, kiyimlarining popuklarini uzaytiradilar, ^a ziyofatlarda toʻrni, ibodatxonalarda esa eng yaxshi joylarni egallashni yaxshi koʻradilar, bozorlarda odamlarning oʻzlariga salom berishini, oʻzlarini «Ustoz» deb atashlarini yoqtiradilar. Sizlar esa oʻzingizni «Ustoz» deb atatmanglar, chunki sizlarning birgina Ustozingiz bor, oʻzingiz esa hammangiz birodarsizlar. Yer yuzida hech kimni oʻzingizga ota deb atamanglar, chunki sizlarning birgina Otangiz bor, U osmondadir. Hech kimga oʻzingizni «Murabbiy» deb atatmanglar, chunki sizlarning birgina Murabbiyingiz bor, U — Masihdir. Oranglardagi eng ulugʻingiz xizmatkoringiz boʻladi. Kim oʻzini yuksaltirsa, u pastga tushiriladi; kim oʻzini kamtar tutsa, u yuksaltiriladi.

Holingizga voy, ey Tavrot tafsirchilari va farziylar, ikkiyuzlamachilar! Chunki sizlar Otamizning Shohligini odamlar yuziga bekitasizlar: oʻzingiz ham kirmaysizlar, kirmoqchi boʻlganlarni ham qoʻymaysizlar. ^b

Holingizga voy, ey Tavrot tafsirchilari va farziylar, ikkiyuzlamachilar! Chunki sizlar bittagina kishini oʻz diningizga kiritish uchun dengiz-u quruqlikni kezib chiqasizlar, uni topgach esa, oʻzingizdan ikki baravar battar doʻzaxi qilib qoʻyasizlar.

Holingizga voy, ey koʻr yoʻlboshchilar! Sizlar: «Kim maʼbad bilan qasam ichsa, bu hech narsa emas, lekin kim maʼbadning oltini bilan qasam ichsa, qasami bogʻlovchi boʻladi», — deysizlar. Ey koʻr ahmoqlar! Qaysi biri ulugʻroq: oltinmi yoki oltinni muqaddas qiladigan maʼbadmi? Yana sizlar: «Kim qurbongoh bilan qasam ichsa, bu hech narsa emas, lekin kim uning ustidagi qurbonlik bilan qasam ichsa, qasami bogʻlovchi boʻladi», — deysizlar. Ey koʻrlar! Qaysi biri ulugʻroq: qurbonlikmi yoki qurbonlikni muqaddas qiladigan qurbongohmi? Shunday ekan, kim qurbongoh bilan qasam ichsa, u ham qurbongoh bilan, ham uning ustidagi hamma narsa bilan qasam ichgan boʻladi. Kim maʼbad bilan qasam ichsa, u ham maʼbad bilan, ham unda Yashovchi Zot bilan qasam ichgan boʻladi. Kim osmon bilan qasam ichsa, u Otamizning taxti bilan va unda Oʻtirgan Zot bilan qasam ichgan boʻladi.

Holingizga voy, ey Tavrot tafsirchilari va farziylar, ikkiyuzlamachilar! Sizlar yalpiz, shivit va zira hosilining oʻndan birini keltirasizlar-u, qonunning muhimroq masalalarini — adolatni, rahm-shafqatni va sadoqatni esa eʼtiborsiz qoldirasizlar. Avvalo mana shularni bajarishingiz, qolganlarini ham eʼtiborsiz qoldirmasligingiz kerak edi. Ey koʻr yoʻlboshchilar! Sizlar chivinni suzib olib tashlaysizlar-u, tuyani esa yutib yuborasizlar!

Holingizga voy, ey Tavrot tafsirchilari va farziylar, ikkiyuzlamachilar! Sizlar kosa va laganning sirtini tozalaysizlar, ichi esa ochkoʻzlik va nafsga toʻla. Ey koʻr farziy! Avval kosa va laganning ichini tozala, shunda sirti ham toza boʻladi.

Holingizga voy, ey Tavrot tafsirchilari va farziylar, ikkiyuzlamachilar! Sizlar oqlangan qabrlarga oʻxshaysizlar: ular sirtdan chiroyli koʻrinadi, ichi esa oʻliklarning suyaklari va har xil nopoklikka toʻla. Xuddi shunday, sizlar ham tashqaridan odamlarga solih koʻrinasizlar, ichingiz esa ikkiyuzlamachilik va qabihlikka toʻla.

Holingizga voy, ey Tavrot tafsirchilari va farziylar, ikkiyuzlamachilar! Chunki sizlar paygʻambarlarning qabrlarini qurasizlar, solihlarning yodgorliklarini bezatasizlar, va: «Agar biz ota-bobolarimiz zamonida yashaganimizda, paygʻambarlarni oʻldirishda ularga sherik boʻlmas edik», — deysizlar. Shunday qilib, sizlar paygʻambarlarni oʻldirganlarning avlodlari ekanligingizga oʻzingiz guvohlik berasizlar. Unday boʻlsa, ota-bobolaringizning oʻlchovini toʻldiringlar! Ey ilonlar, ey zaharli ilonlarning zurriyoti! Doʻzax hukmidan qanday qutulib qolmoqchisizlar? Shuning uchun Men sizlarga paygʻambarlar, dono kishilar va Tavrot tafsirchilarini yuboraman. Ularning baʼzilarini oʻldirasizlar va xochga mixlaysizlar, baʼzilarini ibodatxonalaringizda qamchilaysizlar va shahardan shaharga quvgʻin qilasizlar. Natijada yer yuzida toʻkilgan barcha begunoh qon — solih Hobilning qonidan tortib, maʼbad bilan qurbongoh orasida oʻldirgan Berakyo oʻgʻli Zakariyoning qonigacha — sizlarning boʻyningizga tushadi. Sizlarga chinini aytayki, bularning hammasi shu avlodning boshiga tushadi.

Iso Quddus uchun yigʻlaydi

Ey Quddus, Quddus! Paygʻambarlarni oʻldirgan, oʻzingga yuborilganlarni toshboʻron qilgan shahar! Mokiyon oʻz joʻjalarini qanoti ostiga yigʻqanidek, Men qancha bor farzandlaringni yigʻishni istadim-u, lekin sen istamading. Mana, uying senga vayron holda tashlab qoʻyiladi. Sizlarga aytamanki, «Otamizning nomidan Kelayotgan Zot muborakdir!» demaguningizcha, Meni boshqa koʻrmaysizlar.”