Jisọs Dọ Aka na Ntị Megide Ndị Nkuzi Ụgha

Ugboro asaa Jisọs kwuru ahụhụ ga-adịrị ndị nkuzi na-ebokwasị ndị ọzọ ibu, na-asacha mpụta iko, ma na-achọ mma ili ndị amụma nna nna ha gburu — n'agbanyeghị na ha nwere naanị otu Nna, nke nọ n'eluigwe. Ọ kwụsịrị n'iru újú maka Jerusalem, obodo jụrụ, ụlọ a hapụrụ ka ọ tọgbọrọ n'efu.

Isi 23.

Mgbe ahụ, Jisọs gwara ìgwè mmadụ ahụ na ndị na-eso ụzọ ya okwu,

sị, “Ndị odeakwụkwọ na ndị Farisii na-anọkwasị nʼoche Mosis.

“Ya mere, meenụ ma debe ihe ọbụla ha gwara unu, mana unu emela ihe ha na-eme—ha na-ekwusa ozi, mana ha adịghị eme ya. Ha na-ekechikọta ibu dị arọ, nke siri ike ibu, na-ebokwasị ya ndị mmadụ nʼubu, mana ha onwe ha agaghị eji ọbụladị otu mkpịsị aka kpalie ha. Ha na-eme ihe niile ka ndị mmadụ wee hụ ha; ha na-eme ka igbe ekpere ha saa mbara, na-emekwa ka ọmịmị uwe ha too ogologo, ^a ha na-ahụkwa ebe a na-asọpụrụ nʼoriri nʼanya, na oche kacha mma nʼụlọ nzukọ, na ekele nʼahịa, na ka ndị mmadụ na-akpọ ha ‘Rabaị.’ Unu ekwela ka a kpọọ unu ‘Rabaị,’ nʼihi na unu nwere naanị otu onye nkuzi, unu niile bụkwa ụmụnna. Unu akpọkwala onye ọbụla nọ nʼụwa nna unu, nʼihi na unu nwere naanị otu Nna, onye bi nʼeluigwe. Unu ekwekwala ka onye ọbụla kpọọ unu ‘onye ndụmọdụ,’ nʼihi na unu nwere naanị otu onye ndụmọdụ, bụ Kraịst. Onye kacha ukwuu nʼetiti unu ga-abụ onye na-ejere unu ozi. Onye ọbụla na-ebuli onwe ya elu ka a ga-eweda ala; onye ọbụla na-eweda onwe ya ala ka a ga-ebuli elu.

Ahụhụ dịịrị unu, unu ndị odeakwụkwọ na ndị Farisii, ndị ihu abụọ! Nʼihi na unu na-emechi alaeze Nna anyị nʼihu ndị mmadụ, unu onwe unu adịghị abanye, unu adịghịkwa ekwe ka ndị na-achọ ịbanye banye. ^b

Ahụhụ dịịrị unu, unu ndị odeakwụkwọ na ndị Farisii, ndị ihu abụọ! Nʼihi na unu na-agafe oke osimiri na elu ala ka unu wee mee ka otu onye tụgharịa bịa, mgbe o mesịrị, unu na-eme ya nwa ala mmụọ okpukpu abụọ karịa unu onwe unu.

Ahụhụ dịịrị unu, unu ndị ndú kpuru ìsì! Unu na-asị, ‘Ịṅụ iyi site nʼụlọnsọ ukwu enweghị isi, mana ịṅụ iyi site nʼọlaedo ụlọnsọ ukwu ahụ na-eme ka iyi ahụ guzosie ike.’ Unu ndị nzuzu kpuru ìsì! Kedụ nke dị ukwuu: ọlaedo ahụ, ka ọ bụ ụlọnsọ ukwu nke na-eme ka ọlaedo ahụ dị nsọ? Unu na-asịkwa, ‘Ịṅụ iyi site nʼebe ịchụ àjà abụghị ihe ọbụla, mana ịṅụ iyi site nʼonyinye dị nʼelu ya na-eme ka iyi ahụ guzosie ike.’ Unu ndị kpuru ìsì! Nʼihi na kedụ nke dị ukwuu, onyinye ahụ ka ọ bụ ebe ịchụ àjà nke na-eme ka onyinye ahụ dị nsọ? Ya mere, onye ọbụla ṅụrụ iyi site nʼebe ịchụ àjà na-aṅụ iyi site na ya na site nʼihe niile dị nʼelu ya. Onye ọbụla ṅụrụ iyi site nʼụlọnsọ ukwu na-aṅụ iyi site na ya na site nʼonye bi nʼime ya. Onye ọbụla ṅụrụ iyi site nʼeluigwe na-aṅụ iyi site nʼocheeze Nna anyị na site nʼonye na-anọkwasị nʼelu ya.

Ahụhụ dịịrị unu, unu ndị odeakwụkwọ na ndị Farisii, ndị ihu abụọ! Unu na-enye otu ụzọ nʼụzọ iri nke mint, dil na kumin, ma unu na-eleghara ihe ndị dị arọ karịa nke iwu anya—ikpe ziri ezi, ọmịiko, na ikwesi ntụkwasị obi. Ihe ndị a ka unu kwesịrị imewo, na-eleghaghị ndị ọzọ anya. Unu ndị ndú kpuru ìsì, na-asachapụ obere anwụnta ma na-elomi kamel!

Ahụhụ dịịrị unu, unu ndị odeakwụkwọ na ndị Farisii, ndị ihu abụọ! Unu na-ehicha iko na efere nʼelu, mana nʼime ha jupụtara nʼanyaukwu na enweghị njide onwe. Gị onye Farisii kpuru ìsì! Buru ụzọ hichaa ime iko na efere, ka ihe dị nʼelu ya wee dịkwa ọcha.

Ahụhụ dịịrị unu, unu ndị odeakwụkwọ na ndị Farisii, ndị ihu abụọ! Unu dị ka ili ndị e ji ọcha tee, nke na-ama mma nʼelu mana nke jupụtara nʼọkpụkpụ ndị nwụrụ anwụ na adịghị ọcha niile nʼime. Nʼotu aka ahụ, unu na-egosi ndị mmadụ na unu bụ ndị ezi omume nʼelu, mana nʼime unu jupụtara nʼihu abụọ na enweghị iwu.

Ahụhụ dịịrị unu, unu ndị odeakwụkwọ na ndị Farisii, ndị ihu abụọ! Nʼihi na unu na-ewu ili ndị amụma na-achọkwa ncheta ndị ezi omume mma, na-asị, ‘A sị na anyị dị ndụ nʼụbọchị nna nna anyị ha, anyị agaraghị eso ha gbuo ndị amụma.’ Ya mere, unu na-agba akaebe megide onwe unu na unu bụ ụmụ ndị gburu ndị amụma. Ya mere, mejupụtanụ ihe ọtụtụ nna nna unu ha. Unu agwọ, unu ụmụ ajụala, olee otu unu ga-esi gbanarị ikpe nke ọkụ ala mmụọ? Ya mere, lee, ana m ezitere unu ndị amụma, ndị maara ihe, na ndị odeakwụkwọ—ụfọdụ nʼime ha ka unu ga-egbu ma kpọgbuo nʼobe, ụfọdụ ka unu ga-apịa ihe nʼụlọ nzukọ unu ma na-achụ ha site nʼotu obodo ruo nʼobodo ọzọ, ka ọbara niile nke ndị ezi omume nke a wụsịrị nʼụwa wee bịakwasị unu—site nʼọbara Ebel onye ezi omume ruo nʼọbara Zekaraya nwa Berekaya, onye unu gburu nʼetiti ebe nsọ na ebe ịchụ àjà. Nʼezie, ana m agwa unu, ihe ndị a niile ga-abịakwasị ọgbọ a.

Jisọs Kwara Ákwá nʼihi Jerusalem

Jerusalem, Jerusalem—onye na-egbu ndị amụma, na-atụ ndị e zitere gị nkume! Ọtụtụ mgbe ka m chọrọ ịchịkọta ụmụ gị, dị ka nnekwu ọkụkọ si achịkọta ụmụ ya nʼokpuru nku ya, mana unu jụrụ. Lee, a hapụụrụla gị ụlọ gị ka ọ tọgbọrọ nʼefu. Ana m agwa unu, unu agaghị ahụkwa m ọzọ ruo mgbe unu ga-asị, ‘Onye a gọziri agọzi ka onye ahụ na-abịa nʼaha Nna anyị bụ.’”