Iteiywei Jeso agobo Kaneetik che po Lembech
Saisyek tisap kole Jeso pwo kaneetik che iipchi piik tigitik che koi, che uunei saang'utap kelasiit, ak kokarariisye oloosyek ole kirue maotik che ki bar kwanisyekwak—kingo tinyei Kwanda agenge kityo, ne mi kipsengwet. Kolet eng' riireetap Jerusalem, nganaseet ne ki eetei, koot ne kibagakta koriarak.
23 1Ki ng'alaalji anyun Jeso tuiyosyek ak kasubikyik,
2koleenji, “Tebee siriik ak Pharisaik ng'echeretap Musa.
3“Ko uu nooto anyun, oyai ak oriip kiy age tugul ne komwaiwok, ago ma osup poisyonikwak; amu amdooti icheek ago ma yaei. 4Ratyi icheek kilaisyek che koi che nyigiisen keip, ak koipchi tigigoigap piik, ago ineechek ko ma nyolu koingaigau agot euutennywa. 5Yaei icheek tuguuk tugul si kogeer piik; ibaraiywei philakteriosyekwak ak koloilen sawoikwak, a a v5 Philakteriosyek: sanduusyek che mengech che po muito che tinyei ng'aleegap Bukuit ne Tilil, che kiratei tainda ak eutap kadong'ung' eng' saait ne saaei chii. 6ak kochamei ole po toroornatet eng' sagaosyek ak ng'echerok che torooreen eng' sinagogisyek, 7ak kagatosyek eng' ole kiyae mung'aaret, ak si koguure piik kole, ‘Rabbi.’ 8Amat koguur piik okwek, ‘Rabbi,’ amu otinye kaneetindet agenge kityo, ak oo tupcho okweek tugul. 9Ak amat oguur chii age tugul eng' ng'wony kole kwandang'wong', amu otinye Kwanda agenge, ne mi kipsengwet. 10Amat ochamji chii age tugul koguur okwek kole, ‘kandoindet,’ amu otinye kandoindet agenge, Kristo. 11Ne oo eng' okweek ko koek otwogindeng'wong'. 12Age tugul ne ing'eeti ineegei ko koming'indoi; ak age tugul ne ming'ingei ko koing'eetitoi.
13Pwo eng' okweek, siriik ak Pharisaik, chombilik! Amu okergei laitornatetap Kwandanyo eng' taitap piik; amu ma ochut okweek, ak ma ochamji che mache kochut kochut. b b v13 Isteisyek che po tai ko ma tinyei isteet 14 yuni; isteisyek che po let ko tesei: "Pwo eng' okweek, siriik ak Pharisaik, chombilik! Taachei okweek koriigap leeliisyek, ak si kogeer piik oisaae saaosyek che koi; nooto anyun osichi irwoget ne oo."
15Pwo eng' okweek, siriik ak Pharisaik, chombilik! Amu olandae araraita ak ng'wony si oyai chii agenge koweeksei; ye kagoyai anyun, oipchi koek lakweetap Gehenna ne konyil aeng' kosiirok.
16Pwo eng' okweek, kandoik che ma keeri! Omwae, ‘Ngot koyasyo chii Hekaluut ko ma kiy, ago ngot koyasyo thahabu ne po Hekaluut, ko kagogimiit kayosyennyi.’ 17Okweek che perber che ma keeri! Ne nee ne oo: thahabu, anan Hekaluut ne yaei thahabu koek ne tiliil? 18Ak omwae, ‘Ngot koyasyo chii kaptisisyet ko ma kiy, ago ngot koyasyo kagoochinet ne mi parak, ko kagogimiit kayosyennyi.’ 19Okweek che ma keeri! Amu ne nee ne oo, kagoochinet anan kaptisisyet ne yaei kagoochinet koek ne tiliil? 20Ko uu nooto, age tugul ne yosyo kaptisisyet ko yosyo ineendet ak tuguuk tugul che mi parak. 21Ak age tugul ne yosyo Hekaluut ko yosyo ineendet ak ne menye oriit. 22Ak age tugul ne yosyo kipsengwet, ko yosyo ng'echereet ne po laitornatetap Kwandanyo ak ne tebee parak.
23Pwo eng' okweek, siriik ak Pharisaik, chombilik! Ogoitoi kebebertap taman ne po heduosmon ak dil ak kumin, ago ometoi ng'aleek che weigei che po ng'atuutik—kirwooget, rireenet, ak iman. Chuuto kita nyolu oyai, amomete chuun alak. 24Okweek kandoik che ma keeri, oistoi kibisyoni ago olugui tambeesyet!
25Pwo eng' okweek, siriik ak Pharisaik, chombilik! Ouni saang' kigombet ak sanit, ago oriit ko nyiitaat rebisyet ak kasetap myat. 26Pharisaindet ne ma keeri! Iun korook oriit eng' kigombet ak sanit, si koun saang' agine.
27Pwo eng' okweek, siriik ak Pharisaik, chombilik! Oo okweek kerge ak kereeriisyek che kileel, che kogeeri saang' kole karaaran, ago nyiitaat oriit koik che po piik che kibek ak murwoonindo tugul. 28Ko uu nooto, okweek agine ogeeri saang' kole po imanda eng' taitap piik, ago nyiitaat oriit arageneet ak kasetap ng'atuutyet.
29Pwo eng' okweek, siriik ak Pharisaik, chombilik! Amu oteeche kereeriisyegap maotik ak okararanisyei tolochigap piik che po imanda, 30omwae, ‘Nda ki kimenye eng' peetuusyegap kwanisyekwok, ko ma kinamgei ak icheek eng' pareetap maotik.’ 31Ko uu nooto, oegu paorinik agobo okweegei kole oo lagogap che ki bar maotik. 32Onyi anyun kieng'etap kwanisyekwok. 33Okweek erenook, lagogap erenook, ochililye ano kirwoogetap Gehenna? 34Ko uu nooto, ayooktook maotik, ak piik che utaatiin, ak siriik—alak obare, ak obar eng' keetit, ak alak obirei eng' sinagogisyekwak, ak ousok kong'eetee nganaseet age koba age, 35si konyoonok korotiik tugul che po imanda che ki tumda eng' ng'wony—kobooch korotiigap Abel ne po imanda agoi korotiigap Zekariah weeriitap Berekiah, ne ki obar eng' kwenutap Hekaluut ak kaptisisyet. 36Amwaiwok iman ale, konyonei tuguuchu tugul ibinda ni.
Riirchin Jeso Jerusalem
37Jerusalem, Jerusalem—ne barei maotik, ak kolach che kiyooktoowok! Konyil ata amache ayum lagoguk, ko uu ye yumei ingoror aarekyik eng' oriit kebebaikyik, ago oeesyoi. 38Ogeero, kiweechaak koong'wong' koek kabwanet. 39Amwaiwok ale, ma ogeera agaigai agoi omwa, ‘Iberuurot ne nyoonei eng' kainetap Kwandanyo.’”