Mathayo 23 FHB Father's Heart Bible™

23 ¹Naake Jesũ akĩarĩria kĩrĩndĩ na arutwo aake,

²akĩmeera atĩrĩ, “Aandĩki a watho na Afarisai maikaragĩra gĩtĩ kĩa Musa.

³“Kwoguo ĩkagai na mũmenyagĩrĩre ũrĩa wothe mamwĩraga, no mũtikeeke ũrĩa meekaga; amu nĩmahunjagia no matiĩkaga. ⁴Nĩmohaga mĩrigo mĩritũ ĩrĩa ĩkuuĩkaga na hinya, makamĩigĩrĩra andũ ciande, no-o ene matingĩenda o na kũmĩhũtia na kĩara nĩguo mamĩeherie. ⁵Ciĩko ciao ciothe maciĩkaga nĩguo moonwo nĩ andũ; nĩmaraihagia tũbuku twao twa mahooya na makaraihia ndigi cia nguo ciao, ^a a v5 Tũbuku twa njũũa tũnini tũrĩa twĩkĩrĩtwo maandĩko ma Maandĩko Matheru, tuohagĩrĩrwo thĩĩĩ-inĩ na guoko kwa ũmotho hĩndĩ ya kũhooya. ⁶na nĩmeendete gũikara handũ ha gĩtĩĩo marugainĩ, na itĩ iria njega mũno thunagogiinĩ, ⁷na kũgeithio ndũnyũinĩ, na gwĩtwo ‘Rabi’ nĩ andũ. ⁸No inyuĩ mũtikanetwo ‘Rabi,’ nĩgũkorwo mũrĩ na mũrutani o ũmwe, na inyuothe mũrĩ ariũ a ithe ũmwe. ⁹Na mũtikeete mũndũ o na ũmwe gũkũ thĩ ithe wanyu, nĩgũkorwo mũrĩ na Ithe ũmwe, ũrĩa ũrĩ igũrũ. ¹⁰Mũtikareke mũndũ o na ũmwe amwĩte ‘mũtongoria,’ nĩgũkorwo mũrĩ na mũtongoria ũmwe, nĩ we Kristũ. ¹¹Ũrĩa mũnene mũno thĩinĩ wanyu nĩagatuĩka ndungata yanyu. ¹²Ũrĩa wothe wĩtũũgagĩria nĩagaconorithio; nake ũrĩa wothe wĩnyiihagia nĩagatũũgĩrio.

¹³Kaĩ mũrĩ na haaro-ĩ, inyuĩ aandĩki a watho na Afarisai, hinga ici! Nĩgũkorwo mũhingagĩra andũ Ũthamaki wa Ithe witũ; inyuĩ ene mũtitoonyaga, na arĩa marenda gũtoonya mũkamagiria. ^b b v13 Maandĩko ma moko marĩa ma tene mũno matirĩ na mũhari wa 14 haaha; makopi marĩa maarũmĩrĩire nĩmoongereire atĩrĩ: “Kaĩ mũrĩ na haaro-ĩ, inyuĩ aandĩki a watho na Afarisai, hinga ici! Nĩmũrĩĩaga nyũmba cia atumia a ndigwa, na nĩguo moonekane mũkahooya mahooya maraaihu; nĩ ũndũ ũcio nĩmũkamũkĩra ũtuĩro mũnene makĩria.”

¹⁵Kaĩ mũrĩ na haaro-ĩ, inyuĩ aandĩki a watho na Afarisai, hinga ici! Nĩgũkorwo mũringaga iria na thĩ nyũmũ nĩguo mũgarũre mũndũ o ũmwe atuĩke wa ndini yanyu, na aarĩkia gũtuĩka ũguo mũkamũtua mwana wa Jehana maita meerĩ gũkĩra inyuĩ.

¹⁶Kaĩ mũrĩ na haaro-ĩ, inyuĩ atongoria atumumu! Muugaga atĩrĩ, ‘Mũndũ angĩĩhĩta na hekaru, ti ũndũ; no ũrĩa wĩhĩtaga na thahabu ya hekaru, nĩoohetwo nĩ mwĩhĩtwa wake.’ ¹⁷Inyuĩ irimũ na atumumu! Nĩ kĩrĩkũ kĩnene: nĩ thahabu, kana nĩ hekaru ĩrĩa ĩtheragia thahabu? ¹⁸Na muugaga atĩrĩ, ‘Mũndũ angĩĩhĩta na kĩgongona, ti ũndũ; no ũrĩa wĩhĩtaga na kĩheo kĩrĩa kĩrĩ igũrũ rĩakĩo, nĩoohetwo nĩ mwĩhĩtwa wake.’ ¹⁹Inyuĩ atumumu! Nĩ kĩrĩkũ kĩnene, nĩ kĩheo, kana nĩ kĩgongona kĩrĩa gĩtheragia kĩheo? ²⁰Kwoguo ũrĩa wothe wĩhĩtaga na kĩgongona, ehĩtaga nakĩo, o na indo ciothe iria irĩ igũrũ rĩakĩo. ²¹Na ũrĩa wothe wĩhĩtaga na hekaru, ehĩtaga nayo, o na ũrĩa ũtũũraga thĩinĩ wayo. ²²Na ũrĩa wothe wĩhĩtaga na igũrũ, ehĩtaga na gĩtĩ kĩa ũnene kĩa Ithe witũ, o na ũrĩa ũikaragĩra kĩo.

²³Kaĩ mũrĩ na haaro-ĩ, inyuĩ aandĩki a watho na Afarisai, hinga ici! Nĩmũrutaga gĩcunjĩ gĩa ikũmi kĩa minti, na dili, na kumini, no mũgatiganĩria maũndũ marĩa manene ma watho—nĩmo kĩhooto, na tha, na wĩhokeku. Maya nĩmo mwagĩrĩirwo nĩ gwĩka, mũtegũtiganĩria marĩa mangĩ. ²⁴Inyuĩ atongoria atumumu, mũcungaga karũũnyũ, no mũkameria ngamĩĩra!

²⁵Kaĩ mũrĩ na haaro-ĩ, inyuĩ aandĩki a watho na Afarisai, hinga ici! Nĩmũthambagia gĩkombe na mbakũri na nja, no thĩinĩ ciyũrĩte ũkoroku na ũĩĩni. ²⁶Wee Mũfarisai mũtumumu! Amba ũthambie thĩinĩ wa gĩkombe na mbakũri, nĩguo o na nja gũtuĩke gũtheru.

²⁷Kaĩ mũrĩ na haaro-ĩ, inyuĩ aandĩki a watho na Afarisai, hinga ici! Mũhaana ta mbĩrĩra iria ihakĩtwo rangi mwerũ, iria cionekaga irĩ njega na nja, no thĩinĩ ciyũrĩte mahĩndĩ ma andũ akuũ na thaahu wa mĩthemba yothe. ²⁸Ũguo noguo o na inyuĩ mũonekaga na nja mũrĩ athingu kũrĩ andũ, no thĩinĩ mũiyũrĩtwo nĩ ũhinga na waganu.

²⁹Kaĩ mũrĩ na haaro-ĩ, inyuĩ aandĩki a watho na Afarisai, hinga ici! Nĩgũkorwo mũakaga mbĩrĩra cia anabii, na mũkagemia mbĩrĩra cia andũ arĩa athingu, ³⁰mũkoiga atĩrĩ, ‘Korwo nĩtwatũũrĩte matukũinĩ ma maithe maitũ, tũtingĩĩteithanĩirie nao kũũraga anabii.’ ³¹Kwoguo nĩmwĩrutagĩra ũira inyuĩ ene atĩ mũrĩ ariũ a arĩa mooragire anabii. ³²Kwoguo iyũriai gĩthimi kĩa maithe manyu. ³³Inyuĩ nyoka, inyuĩ ciana cia nduĩra, mũngĩhonoka atĩa gũtuĩrwo ciira wa gũikio Jehana? ³⁴Nĩ ũndũ ũcio nĩngũmũtũmĩra anabii, na andũ oogĩ, na aandĩki a watho—amwe aao nĩmũkamooraga na mũkamamba mĩtĩ igũrũ, na amwe mũkamahũũra iboko thunagogiinĩ cianyu, na mũkamanyariira kuuma itũũra nginya itũũra, ³⁵nĩguo thakame yothe ya andũ arĩa athingu ĩrĩa yaitirwo gũkũ thĩ ĩmũkinyĩre—kuuma thakame ya Habili ũrĩa mũthingu nginya thakame ya Zekaria mũrũ wa Barakia, ũrĩa mworagĩire gatagatĩ ka handũ harĩa hatheru na kĩgongona. ³⁶Ngũmwĩra na ma atĩ, maũndũ maya mothe nĩmagakinyĩra rũciaro rũrũ.

Jesũ Akĩrĩrĩra Jerusalemu

³⁷Jerusalemu, Jerusalemu—wee ũũragaga anabii, na ũkahũũra na mahiga arĩa matũmĩirwo kũrĩ wee! Kaĩ nĩnjendete kaingĩ gũcookereria ciana ciaku hamwe, o ta ũrĩa ngũkũ ĩcookanagĩrĩria tũcuucu twayo rungu rwa mathagu mayo, no wee ũkĩrega-ĩ! ³⁸Atĩrĩrĩ, nyũmba yaku nĩĩtigĩirwo ĩrĩ ihooru. ³⁹Nĩngũmwĩra atĩ, mũtikanjona rĩngĩ, nginya rĩrĩa mũkoiga atĩrĩ, ‘Kũraathimwo nĩ ũrĩa ũgũũka na rĩĩtwa rĩa Ithe witũ.’”