ማቴዎስ 23

23 ¹ከዚያም ኢየሱስ ለሕዝቡና ለደቀ መዛሙርቱ እንዲህ ሲል ተናገረ፤

²“ጸሐፍትና ፈሪሳውያን በሙሴ ወንበር ላይ ተቀምጠዋል።

³ስለዚህ የሚነግሯችሁን ሁሉ አድርጉ፤ ጠብቁም፤ ነገር ግን እነርሱ እንደሚያደርጉት አታድርጉ፤ ይሰብካሉና አያደርጉምም። ⁴ከባድና ለመሸከም የሚያስቸግር ሸክም አስረው በሰዎች ትከሻ ላይ ይጭናሉ፤ እነርሱ ግን ለማንቀሳቀስ ጣታቸውን እንኳ አያነሡም። ⁵የሚያደርጉትን ሁሉ በሰዎች እንዲታዩ ያደርጋሉ፤ ክታባቸውን ያሰፋሉ፤ ዘርፋቸውንም ያስረዝማሉ፤ ^a a v5 ክታብ፦ የመጽሐፍ ቅዱስ ጥቅሶች የያዙ ትናንሽ የቈዳ ሣጥኖች ሲሆኑ፣ በጸሎት ጊዜ በግንባርና በግራ ክንድ ላይ ይታሰራሉ። ⁶በግብዣ ላይ የክብር ስፍራን፣ በምኵራብም የተሻለ ወንበርን ይወዳሉ፤ ⁷በገበያም ሰላምታ መቀበልን፣ በሰዎችም ‘ረቢ’ ተብሎ መጠራትን ይወዳሉ። ⁸እናንተ ግን ‘ረቢ’ ተብላችሁ አትጠሩ፤ አንድ አስተማሪ ብቻ አላችሁና፤ እናንተም ሁላችሁ ወንድማማች ናችሁ። ⁹በምድር ላይም ማንንም አባት ብላችሁ አትጥሩ፤ በሰማይ ያለው አንድ አባት አላችሁና። ¹⁰ማንም ‘መሪ’ ብሎ አይጥራችሁ፤ አንድ መሪ ብቻ አላችሁና፤ እርሱም ክርስቶስ ነው። ¹¹ከእናንተም ታላቅ የሆነው አገልጋያችሁ ይሆናል። ¹²ራሱን ከፍ የሚያደርግ ሁሉ ዝቅ ይደረጋል፤ ራሱን ዝቅ የሚያደርግ ሁሉ ከፍ ይደረጋል።

¹³እናንተ ግብዞች ጸሐፍትና ፈሪሳውያን፣ ወዮላችሁ! የአባታችንን መንግሥት በሰዎች ፊት ትዘጋላችሁና፤ እናንተም አትገቡም፤ ሊገቡ የሚሹትንም አታስገቡም። ^b b v13 የመጀመሪያዎቹ ቅጂዎች እዚህ ላይ ቍጥር 14 የላቸውም፤ ኋለኞቹ ቅጂዎች ግን እንዲህ ይጨምራሉ፦ “እናንተ ግብዞች ጸሐፍትና ፈሪሳውያን፣ ወዮላችሁ! የመበለቶችን ቤት ትበላላችሁ፤ ለታይታም ጸሎትን ታስረዝማላችሁ፤ ስለዚህ የባሰ ፍርድ ትቀበላላችሁ።”

¹⁵እናንተ ግብዞች ጸሐፍትና ፈሪሳውያን፣ ወዮላችሁ! አንድ ሰው ወደ ሃይማኖታችሁ ለመለወጥ ባሕርንና የብስን ትዞራላችሁና፤ ከተለወጠም በኋላ ከእናንተ ይልቅ ሁለት እጥፍ የገሃነም ልጅ ታደርጉታላችሁ።

¹⁶እናንተ ዕውሮች መሪዎች፣ ወዮላችሁ! ‘በቤተ መቅደስ የሚምል ምንም የለበትም፤ በቤተ መቅደስ ወርቅ የሚምል ግን በመሐላው ይጠየቃል’ ትላላችሁ። ¹⁷እናንተ ዕውሮች ደንቆሮዎች! የትኛው ይበልጣል? ወርቁ ነው ወይስ ወርቁን የቀደሰው ቤተ መቅደስ? ¹⁸ደግሞም ‘በመሠዊያው የሚምል ምንም የለበትም፤ በላዩ ባለው መባ የሚምል ግን በመሐላው ይጠየቃል’ ትላላችሁ። ¹⁹እናንተ ዕውሮች! የትኛው ይበልጣል? መባው ነው ወይስ መባውን የቀደሰው መሠዊያ? ²⁰ስለዚህ በመሠዊያው የሚምል ሁሉ በእርሱና በላዩ ባለው ሁሉ ይምላል። ²¹በቤተ መቅደስም የሚምል ሁሉ በእርሱና በውስጡ በሚኖረው ይምላል። ²²በሰማይም የሚምል ሁሉ በአባታችን ዙፋንና በእርሱ ላይ በተቀመጠው ይምላል።

²³እናንተ ግብዞች ጸሐፍትና ፈሪሳውያን፣ ወዮላችሁ! ከአዝሙድ፣ ከእንስላልና ከከሙን ዐሥራት ታወጣላችሁ፤ ነገር ግን የሕጉን ከባድ ነገሮች፣ ፍትሕን፣ ምሕረትንና ታማኝነትን ትተዋላችሁ። ሌሎቹን ሳትተዉ እነዚህን ማድረግ ይገባችሁ ነበር። ²⁴እናንተ ዕውሮች መሪዎች፣ ትንኝን ታጠሩና ግመልን ትውጣላችሁ!

²⁵እናንተ ግብዞች ጸሐፍትና ፈሪሳውያን፣ ወዮላችሁ! የጽዋውንና የወጭቱን ውጭ ታጠራላችሁ፤ ውስጣቸው ግን ስግብግብነትና ያለ ልክ መብዛት የተሞላ ነው። ²⁶አንተ ዕውር ፈሪሳዊ! አስቀድመህ የጽዋውንና የወጭቱን ውስጥ አጥራ፤ ውጩም ደግሞ ይጠራል።

²⁷እናንተ ግብዞች ጸሐፍትና ፈሪሳውያን፣ ወዮላችሁ! በኖራ እንደ ተለሰኑ መቃብሮች ናችሁ፤ ከውጭ ውብ ሆነው ይታያሉ፤ ከውስጥ ግን የሙታን ዐጥንትና ርኩሰት ሁሉ የተሞሉ ናቸው። ²⁸እንዲሁም እናንተ ከውጭ ለሰዎች ጻድቃን መስላችሁ ትታያላችሁ፤ ከውስጥ ግን ግብዝነትና ዐመፅ የተሞላችሁ ናችሁ።

²⁹እናንተ ግብዞች ጸሐፍትና ፈሪሳውያን፣ ወዮላችሁ! የነቢያትን መቃብር ትሠራላችሁና፤ የጻድቃንንም ሐውልት ታስጌጣላችሁ፤ ³⁰‘በአባቶቻችን ዘመን ኖረን ቢሆን፣ ነቢያትን በመግደል ከእነርሱ ጋር ባልተባበርን ነበር’ ትላላችሁ። ³¹ስለዚህ ነቢያትን የገደሉ ሰዎች ልጆች መሆናችሁን በራሳችሁ ላይ ትመሰክራላችሁ። ³²እንግዲህ የአባቶቻችሁን መስፈሪያ ሙሉ። ³³እናንተ እባቦች፣ የእፉኝት ልጆች፣ ከገሃነም ፍርድ እንዴት ታመልጣላችሁ? ³⁴ስለዚህ እነሆ፣ ነቢያትን፣ ጥበበኞችንና ጸሐፍትን ወደ እናንተ እልካለሁ፤ ከእነርሱ አንዳንዶቹን ትገድላላችሁ፤ ትሰቅላላችሁም፤ አንዳንዶቹንም በምኵራቦቻችሁ ትገርፋላችሁ፤ ከከተማ ወደ ከተማም ታሳድዳላችሁ፤ ³⁵ይኸውም በምድር ላይ የፈሰሰው የጻድቃን ደም ሁሉ፣ ከጻድቁ ከአቤል ደም ጀምሮ በቤተ መቅደስና በመሠዊያው መካከል እስከ ገደላችሁት እስከ በራክዩ ልጅ እስከ ዘካርያስ ደም ድረስ፣ በእናንተ ላይ እንዲመጣ ነው። ³⁶እውነት እላችኋለሁ፣ ይህ ሁሉ በዚህ ትውልድ ላይ ይመጣል።

ኢየሱስ ስለ ኢየሩሳሌም አለቀሰ

³⁷ኢየሩሳሌም፣ ኢየሩሳሌም፣ ነቢያትን የምትገድይ፣ ወደ አንቺ የተላኩትንም የምትወግሪ! ዶሮ ጫጩቶቿን በክንፎቿ ሥር እንደምትሰበስብ፣ ልጆችሽን ለመሰብሰብ ስንት ጊዜ ፈለግሁ፤ አንቺ ግን እምቢ አልሽ። ³⁸እነሆ፣ ቤታችሁ ባዶ ሆኖ ይቀርላችኋል። ³⁹እላችኋለሁም፣ ‘በአባታችን ስም የሚመጣ የተባረከ ነው’ እስክትሉ ድረስ ከእንግዲህ አታዩኝም።”