ማቴዎስ 22

22 ¹ኢየሱስም እንደ ገና በምሳሌ እንዲህ ብሎ ተናገራቸው፤

²“የአባታችን መንግሥት ለልጁ የሰርግ ግብዣ ያዘጋጀ ንጉሥን ይመስላል። ³የተጠሩትን እንግዶች ወደ ሰርጉ ግብዣ ይጠሩ ዘንድ ባሮቹን ላከ፤ እነርሱ ግን ሊመጡ አልወደዱም። ⁴እንደ ገና ሌሎች ባሮችን እንዲህ ብሎ ላከ፤ ‘የተጠሩትን እንዲህ ንገሯቸው፤ እነሆ፣ ራቴን አዘጋጅቻለሁ፤ በሬዎቼና የሰቡት ከብቶቼ ታርደዋል፤ ሁሉም ተዘጋጅቷል። ወደ ሰርጉ ግብዣ ኑ።’ ⁵እነርሱ ግን ቸል ብለው አንዱ ወደ እርሻው፣ ሌላው ወደ ንግዱ ሄዱ፤ ⁶የቀሩትም ባሮቹን ይዘው አንገላቷቸው፤ ገደሏቸውም። ⁷ንጉሡም ተቈጥቶ ጭፍሮቹን ላከ፤ እነዚያን ነፍሰ ገዳዮች አጠፋ፤ ከተማቸውንም አቃጠለ። ⁸ከዚያም ባሮቹን እንዲህ አላቸው፤ ‘ሰርጉ ተዘጋጅቷል፤ የተጠሩት ግን የተገቡ አልነበሩም። ⁹ስለዚህ ወደ ዋና መንገዶች ሂዱ፤ ያገኛችሁትንም ሁሉ ወደ ሰርጉ ግብዣ ጥሩ።’ ¹⁰እነዚያ ባሮች ወደ መንገዶች ወጥተው ያገኙትን ሁሉ፣ ክፉውንም ደጉንም ሰበሰቡ፤ የሰርጉም አዳራሽ በእንግዶች ተሞላ።

¹¹“ንጉሡ ግን እንግዶቹን ለማየት በገባ ጊዜ፣ የሰርግ ልብስ ያልለበሰ አንድ ሰው አየ። ¹²እንዲህም አለው፤ ‘ወዳጄ፣ የሰርግ ልብስ ሳትለብስ እንዴት ወደዚህ ገባህ?’ እርሱም ዝም አለ። ¹³ከዚያም ንጉሡ ባሮቹን እንዲህ አላቸው፤ ‘እጁንና እግሩን አስራችሁ ወደ ውጭ ጨለማ ጣሉት፤ በዚያም ልቅሶና ጥርስ ማፋጨት ይሆናል።’ ¹⁴የተጠሩ ብዙዎች፣ የተመረጡ ግን ጥቂቶች ናቸውና።”

ለአባታችን የእርሱ የሆነውን ስጡ

¹⁵ከዚያም ፈሪሳውያን ሄደው በገዛ ቃሉ እንዴት እንደሚያጠምዱት ተማከሩ።

¹⁶ደቀ መዛሙርታቸውንም ከሄሮድስ ወገኖች ጋራ ወደ እርሱ እንዲህ ብለው ላኩ፤ “መምህር ሆይ፣ እውነተኛ እንደ ሆንህ፣ የእግዚአብሔርንም መንገድ በእውነት እንደምታስተምር እናውቃለን፤ ሰዎችን በማዕረጋቸው ስለማትፈርድ ለማንም አታዳላም። ¹⁷እንግዲህ ምን እንደምታስብ ንገረን፤ ለቄሳር ግብር መክፈል ተፈቅዷል ወይስ አልተፈቀደም?”

¹⁸ኢየሱስ ግን ክፋታቸውን ዐውቆ እንዲህ አለ፤ “እናንተ ግብዞች፣ ለምን ትፈትኑኛላችሁ? ¹⁹ግብር የሚከፈልበትን ሳንቲም አሳዩኝ።” እነርሱም አንድ ዲናር አመጡለት።

²⁰እርሱም፣ “ይህ የማን ምስል፣ የማንስ ጽሑፍ ነው?” አላቸው።

²¹እነርሱም፣ “የቄሳር ነው” አሉ። ከዚያም እርሱ፣ “እንግዲህ የቄሳርን ለቄሳር፣ የአባታችንንም ለአባታችን ስጡ” አላቸው።

²²ይህን በሰሙ ጊዜ ተደነቁ፤ ትተውትም ሄዱ።

አባታችን የሕያዋን አምላክ ነው

²³በዚያው ቀን ትንሣኤ የለም የሚሉ ሰዱቃውያን ወደ እርሱ መጥተው እንዲህ ብለው ጠየቁት፤ ²⁴“መምህር ሆይ፣ ሙሴ እንዲህ ብሏል፤ አንድ ሰው ልጅ ሳይወልድ ቢሞት፣ ወንድሙ ሚስቱን አግብቶ ለወንድሙ ዘር ይተካ። ²⁵እንግዲህ በእኛ ዘንድ ሰባት ወንድማማቾች ነበሩ። የመጀመሪያው አግብቶ ሞተ፤ ልጅም ስላልነበረው ሚስቱን ለወንድሙ ተወለት። ²⁶እንዲሁም ሁለተኛውና ሦስተኛው እስከ ሰባተኛው ድረስ ሆነ። ²⁷ከሁሉም በኋላ ሴቲቱ ሞተች። ²⁸እንግዲህ በትንሣኤ ከሰባቱ የማን ሚስት ትሆናለች? ሁሉም አግብተዋታልና።”

²⁹ኢየሱስም መልሶ እንዲህ አለ፤ “ተሳስታችኋል፤ መጻሕፍትንም ሆነ የአባታችንን ኀይል አታውቁምና። ³⁰በትንሣኤ ጊዜ አያገቡም፤ አይጋቡምም፤ ነገር ግን በሰማይ እንዳሉ መላእክት ይሆናሉና። ³¹ስለ ሙታን ትንሣኤ ግን አባታችን የነገራችሁን አላነበባችሁምን፤

³²‘እኔ የአብርሃም አምላክ፣ የይስሐቅ አምላክ፣ የያዕቆብ አምላክ ነኝ’ የሚለውን? እርሱ የሕያዋን አምላክ እንጂ የሙታን አምላክ አይደለም።”

³³ሕዝቡም ይህን በሰሙ ጊዜ በትምህርቱ ተገረሙ።

አባትህን ባለህ ሁሉ ውደድ

³⁴ፈሪሳውያን ግን ሰዱቃውያንን ዝም እንዳሰኛቸው በሰሙ ጊዜ፣ በአንድነት ተሰበሰቡ። ³⁵ከእነርሱም አንዱ የሕግ ዐዋቂ ሊፈትነው እንዲህ ብሎ ጠየቀው፤ ³⁶“መምህር ሆይ፣ ከሕጉ ታላቁ ትእዛዝ የትኛው ነው?”

³⁷እርሱም እንዲህ አለው፤ “አባትህን በፍጹም ልብህ፣ በፍጹም ነፍስህ፣ በፍጹም ኀሳብህ ውደድ። ³⁸ታላቁና ፊተኛው ትእዛዝ ይህ ነው። ³⁹የሚመስለውም ሁለተኛው ይህ ነው፤ ባልንጀራህን እንደ ራስህ ውደድ። ⁴⁰ሕግም ሁሉ ነቢያትም በእነዚህ በሁለቱ ትእዛዛት ላይ ተመሥርተዋል።”

ክርስቶስ የማን ልጅ ነው?

⁴¹ፈሪሳውያን ተሰብስበው ሳሉ፣ ኢየሱስ እንዲህ ብሎ ጠየቃቸው፤ ⁴²“ስለ ክርስቶስ ምን ታስባላችሁ? የማን ልጅ ነው?” እነርሱም፣ “የዳዊት ነው” አሉት።

⁴³እርሱም፣ “ታዲያ ዳዊት በመንፈስ ቅዱስ ኾኖ እንዴት ጌታ ብሎ ይጠራዋል? እንዲህ ይላልና፤

⁴⁴‘አባታችን ጌታዬን እንዲህ አለው፤ “በቀኜ ተቀመጥ፤ ጠላቶችህን ከእግርህ በታች እስካደርጋቸው ድረስ”’?

⁴⁵ዳዊትም ክርስቶስን ጌታ ብሎ ከጠራው፣ ክርስቶስ እንዴት የዳዊት ልጅ ይሆናል?”

⁴⁶ማንም አንዲት ቃል ሊመልስለት አልቻለም፤ ከዚያም ቀን ጀምሮ ማንም ከቶ ሌላ ሊጠይቀው አልደፈረም።