Matiu 22

22 ¹Jesu tún bá wọn sọ̀rọ̀ ní òwe, ó wí pé:

²“Ìjọba Baba wa dàbí ọba kan tí ó ṣe àsè ìgbéyàwó fún ọmọ rẹ̀. ³Ó rán àwọn ìránṣẹ́ rẹ̀ láti pe àwọn àlejò tí a ti pè sí àsè ìgbéyàwó náà, ṣùgbọ́n wọ́n kọ̀ láti wá. ⁴Ó tún rán àwọn ìránṣẹ́ mìíràn, ó ní, ‘Ẹ sọ fún àwọn tí a pè pé: Ẹ wò ó, mo ti ṣe oúnjẹ mi tán; a ti pa àwọn akọ màlúù mi àti ẹran àbọ́pa mi, ohun gbogbo sì ti ṣe tán. Ẹ wá sí àsè ìgbéyàwó náà.’ ⁵Ṣùgbọ́n wọn kò kà á sí, wọ́n sì lọ, ẹnìkan sí oko rẹ̀, òmíràn sí òwò rẹ̀, ⁶àwọn tí ó kù sì mú àwọn ìránṣẹ́ rẹ̀, wọ́n fìyà jẹ wọ́n, wọ́n sì pa wọ́n. ⁷Ìbínú sì mú ọba náà, ó rán àwọn ọmọ ogun rẹ̀, ó pa àwọn apànìyàn náà run, ó sì sun ìlú wọn. ⁸Nígbà náà ni ó sọ fún àwọn ìránṣẹ́ rẹ̀ pé, ‘Àsè ìgbéyàwó náà ti ṣe tán, ṣùgbọ́n àwọn tí a pè kò yẹ fún un. ⁹Nítorí náà ẹ lọ sí àwọn ọ̀nà gbangba, kí ẹ sì pe iye àwọn tí ẹ bá rí sí àsè ìgbéyàwó náà.’ ¹⁰Àwọn ìránṣẹ́ náà sì jáde lọ sí àwọn ọ̀nà, wọ́n sì kó gbogbo àwọn tí wọ́n bá rí jọ, ẹni búburú àti ẹni rere, gbọ̀ngàn ìgbéyàwó náà sì kún fún àwọn àlejò.

¹¹“Ṣùgbọ́n nígbà tí ọba náà wọlé láti wo àwọn àlejò, ó rí ọkùnrin kan tí kò wọ aṣọ ìgbéyàwó. ¹²Ó béèrè pé, ‘Ọ̀rẹ́, báwo ni o ṣe wọlé síhìn-ín láìní aṣọ ìgbéyàwó?’ Ẹnu sì kọ̀ ọ́. ¹³Nígbà náà ni ọba náà sọ fún àwọn ìránṣẹ́ pé, ‘Ẹ de ọwọ́ àti ẹsẹ̀ rẹ̀, kí ẹ sì sọ ọ́ sínú òkùnkùn tí ó wà lóde, níbi tí ẹkún àti ìpayínkeke yóò gbé wà.’ ¹⁴Nítorí ọ̀pọ̀ ni a pè, ṣùgbọ́n díẹ̀ ni a yàn.”

Ẹ Fún Baba wa ní Ohun tí Í Ṣe Tirẹ̀

¹⁵Nígbà náà ni àwọn Farisi lọ, wọ́n sì gbìmọ̀ bí wọn yóò ṣe fi ọ̀rọ̀ ẹnu rẹ̀ mú un.

¹⁶Wọ́n rán àwọn ọmọ-ẹ̀yìn wọn sí i, pẹ̀lú àwọn ọmọ ẹgbẹ́ Herodu, wọ́n wí pé, “Olùkọ́, àwa mọ̀ pé olóòótọ́ ni ìwọ, ìwọ sì ń fi ọ̀nà Ọlọ́run kọ́ni nínú òtítọ́; ìwọ kò ṣègbè ẹnìkan, nítorí ìwọ kì í wo ipò ènìyàn. ¹⁷Nítorí náà sọ ohun tí o rò fún wa: Ṣé ó tọ́ láti san owó orí fún Kesari, tàbí kò tọ́?”

¹⁸Ṣùgbọ́n Jesu, tí ó mọ àrékérekè wọn, wí pé, “Èéṣe tí ẹ fi ń dán mi wò, ẹ̀yin alágàbàgebè? ¹⁹Ẹ fi owó tí a fi ń san owó orí hàn mí.” Wọ́n sì mú dínárì kan wá fún un.

²⁰Ó sì bi wọ́n pé, “Àwòrán ta ni èyí, àti àkọlé ta ni?”

²¹Wọ́n wí pé, “Ti Kesari ni.” Nígbà náà ni ó wí fún wọn pé, “Nítorí náà ẹ fún Kesari ní ohun tí í ṣe ti Kesari, àti Baba wa ní ohun tí í ṣe ti Baba wa.”

²²Nígbà tí wọ́n gbọ́ èyí, ẹnu yà wọ́n; wọ́n sì fi í sílẹ̀, wọ́n lọ.

Baba wa Ni Ọlọ́run Àwọn Alààyè

²³Ní ọjọ́ náà gan-an, àwọn Sadusi tí wọ́n ń wí pé àjíǹde kò sí, tọ̀ ọ́ wá, wọ́n sì bi í léèrè, ²⁴wọ́n wí pé, “Olùkọ́, Mose sọ pé: bí ọkùnrin kan bá kú láìní ọmọ, arákùnrin rẹ̀ gbọdọ̀ fẹ́ opó náà, kí ó sì bí irú-ọmọ fún arákùnrin rẹ̀. ²⁵Àwọn arákùnrin méje sì wà láàrín wa. Èkíní fẹ́ aya, ó kú, nígbà tí kò sì ní ọmọ, ó fi aya rẹ̀ sílẹ̀ fún arákùnrin rẹ̀. ²⁶Bẹ́ẹ̀ sì ni èkejì àti ẹ̀kẹta, títí dé ẹ̀keje. ²⁷Ní ìkẹyìn gbogbo wọn, obìnrin náà kú. ²⁸Nítorí náà, nígbà àjíǹde, aya ta ni yóò jẹ́ nínú àwọn méje náà? Nítorí gbogbo wọn ni ó ti fẹ́ ẹ.”

²⁹Jesu dáhùn pé, “Ẹ̀yin ti ṣìnà—ẹ kò mọ Ìwé Mímọ́, bẹ́ẹ̀ ni ẹ kò mọ agbára Baba wa. ³⁰Nítorí nígbà àjíǹde ènìyàn kì í fẹ́ aya, bẹ́ẹ̀ ni a kì í fẹ́ wọn fúnni, ṣùgbọ́n wọ́n dàbí àwọn áńgẹ́lì ní ọ̀run. ³¹Ní ti àjíǹde àwọn òkú, ṣé ẹ kò ka ohun tí Baba wa sọ fún yín:

³²‘Èmi ni Ọlọ́run Abrahamu, àti Ọlọ́run Isaaki, àti Ọlọ́run Jakọbu’? Òun kì í ṣe Ọlọ́run àwọn òkú, bí kò ṣe ti àwọn alààyè.”

³³Nígbà tí ọ̀pọ̀ ènìyàn gbọ́ èyí, ẹnu yà wọ́n sí ẹ̀kọ́ rẹ̀.

Fẹ́ Baba Rẹ pẹ̀lú Ohun Gbogbo tí O Ní

³⁴Ṣùgbọ́n nígbà tí àwọn Farisi gbọ́ pé ó ti pa àwọn Sadusi lẹ́nu mọ́, wọ́n péjọ pọ̀. ³⁵Ọ̀kan nínú wọn, tí í ṣe amòye nínú Òfin, sì bi í léèrè kan láti dán an wò: ³⁶“Olùkọ́, èwo ni àṣẹ tí ó tóbi jùlọ nínú Òfin?”

³⁷Ó sì wí fún un pé, “Fẹ́ Baba rẹ pẹ̀lú gbogbo ọkàn rẹ, pẹ̀lú gbogbo ẹ̀mí rẹ, àti pẹ̀lú gbogbo èrò inú rẹ. ³⁸Èyí ni àṣẹ tí ó tóbi, tí ó sì jẹ́ àkọ́kọ́. ³⁹Èkejì sì dàbí rẹ̀: Ìwọ yóò fẹ́ ọmọnìkejì rẹ bí ara rẹ. ⁴⁰Lórí àwọn àṣẹ méjì wọ̀nyí ni gbogbo Òfin àti àwọn Wòlíì dúró lé.”

Ọmọ Ta Ni Kristi?

⁴¹Nígbà tí àwọn Farisi sì péjọ pọ̀, Jesu bi wọ́n léèrè pé, ⁴²“Kí ni ẹ rò nípa Kristi? Ọmọ ta ni í ṣe?” Wọ́n wí fún un pé, “Ọmọ Dafidi ni.”

⁴³Ó bi wọ́n pé, “Báwo ni Dafidi ṣe ń pè é ní Olúwa nípa Ẹ̀mí Mímọ́, ní wí pé,

⁴⁴‘Baba wa wí fún Olúwa mi pé, “Jókòó ní ọwọ́ ọ̀tún mi, títí èmi yóò fi fi àwọn ọ̀tá rẹ sí abẹ́ ẹsẹ̀ rẹ”’?

⁴⁵Nítorí náà bí Dafidi bá pe Kristi ní Olúwa, báwo ni Kristi ṣe lè jẹ́ ọmọ Dafidi?”

⁴⁶Kò sí ẹni tí ó lè dá a lóhùn ní ọ̀rọ̀ kan, láti ọjọ́ náà lọ, kò sí ẹni tí ó gbójúgbóyà láti bi í léèrè ohunkóhun mọ́.