Mateo 22 FHB Father's Heart Bible™

22 ¹Jesu akataura navo zvakare nemifananidzo, achiti:

²“Umambo hwaBaba vedu hwakafanana namambo akagadzirira mwanakomana wake mutambo wemuchato. ³Akatuma varanda vake kundodana vakanga vakokwa kumutambo wemuchato, asi vakaramba kuuya. ⁴Akatumazve vamwe varanda, achiti, ‘Udzai vakakokwa: Tarirai, ndagadzira chokudya changu; nzombe dzangu nemombe dzakakodzwa zvabayiwa, zvose zvagadzirira. Uyai kumutambo wemuchato.’ ⁵Asi havana kuteerera vakaenda, mumwe kumunda wake, mumwe kukutengeserana kwake, ⁶vamwe vakabata varanda vake, vakavabata zvakaipa, vakavauraya. ⁷Mambo akatsamwa kwazvo, akatuma mauto ake, akaparadza mhondi idzo, akapisa guta ravo. ⁸Ipapo akati kuvaranda vake, ‘Muchato wagadzirira, asi vakakokwa vakanga vasina kukodzera. ⁹Naizvozvo endai kumigwagwa mikuru mukokere kumutambo wemuchato vose vamunowana.’ ¹⁰Varanda ivavo vakabuda vakaenda kumigwagwa vakaunganidza vose vavakawana, vakaipa nevakanaka, uye imba yemuchato yakazara navakakokwa.

¹¹“Asi mambo paakapinda kuzoona vakakokwa, akaona munhu akanga asina kupfeka nguo dzemuchato. ¹²Akabvunza, ‘Shamwari, wapinda sei muno usina nguo dzemuchato?’ Akashaya chokutaura. ¹³Ipapo mambo akati kuvaranda, ‘Sungai maoko ake netsoka dzake, mumukande kurima riri kunze, uko kuchava nokuchema nokugeda-geda kwameno.’ ¹⁴Nokuti vazhinji vakadanwa, asi vashoma vakasanangurwa.”

Ipai Baba vedu Zvinhu Zvavo

¹⁵Ipapo vaFarisi vakaenda vakarangana kuti vamubate sei namashoko ake.

¹⁶Vakatuma vadzidzi vavo kwaari, pamwe chete navaHerodhi, vachiti, “Mudzidzisi, tinoziva kuti munotaura chokwadi uye munodzidzisa nzira yaMwari zvechokwadi; hamutyi munhu, nokuti hamutariri zvinzvimbo zvavanhu. ¹⁷Naizvozvo tiudzei, munofungei: Zvinotenderwa kuripa mutero kuna Kesari, kana kwete?”

¹⁸Asi Jesu, achiziva kuipa kwavo, akati, “Munondiedzereiko, imi vanyengeri? ¹⁹Ndiratidzei mari inoshandiswa pamutero.” Vakamuvigira dhenari.

²⁰Akati kwavari, “Mufananidzo uyu ndowaani, nerunyoro urwu ndorwaani?”

²¹Vakati, “NdezvaKesari.” Ipapo akati kwavari, “Naizvozvo ipai Kesari zvaKesari, uye Baba vedu zvaBaba vedu.”

²²Pavakazvinzwa, vakashamiswa; vakamusiya vakaenda.

Baba vedu NdiMwari waVapenyu

²³Nezuva iroro vaSadhusi vakauya kwaari, ivo vanoti hakuna kumuka kuvakafa, vakamubvunza, ²⁴vachiti, “Mudzidzisi, Mozisi akati: kana murume akafa asina mwana, mununʼuna wake anofanira kuroora chirikadzi uye amutsire mukoma wake vana. ²⁵Zvino pakanga pane vana vomumwe baba vanomwe pakati pedu. Wokutanga akaroora, akafa, uye zvaakanga asina mwana, akasiyira mununʼuna wake mukadzi wake. ²⁶Zvimwe chete nowechipiri nowechitatu, kusvikira kuno wechinomwe. ²⁷Pakupedzisira kwazvo, mukadzi uyo akafa. ²⁸Zvino pakumuka kuvakafa, achava mukadzi waani pavanomwe? Nokuti vose vakanga vakamuwana.”

²⁹Jesu akapindura akati, “Marasika—hamuzivi Magwaro kana simba raBaba vedu. ³⁰Nokuti pakumuka kuvakafa vanhu havaroori kana kuroorwa, asi vakaita savatumwa vari kudenga. ³¹Zvino, maererano nokumuka kwavakafa, hamuna kuverenga here zvamakaudzwa naBaba vedu:

³²‘Ndini Mwari waAbhurahama, waIsaka, nowaJakobho’? Havasi Mwari wavakafa, asi wavapenyu.”

³³Vanhu vazhinji pavakazvinzwa, vakashamiswa nedzidziso yake.

Idai Baba venyu Nezvose Zvamunazvo

³⁴Asi vaFarisi pavakanzwa kuti akanga anyaradza vaSadhusi, vakaungana pamwe chete. ³⁵Mumwe wavo, nyanzvi yoMutemo, akamubvunza mubvunzo kuti amuedze: ³⁶“Mudzidzisi, ndoupi murayiro mukuru muMutemo?”

³⁷Akati kwaari, “Ida Baba vako nomwoyo wako wose, nomweya wako wose, nepfungwa dzako dzose. ³⁸Ndiwo murayiro mukuru wokutanga. ³⁹Uye wechipiri wakafanana nawo: Uchada muvakidzani wako sezvaunozvida. ⁴⁰Mutemo wose nevaProfita zvakarembera pamirayiro miviri iyi.”

Kristu Mwanakomana Waani?

⁴¹Zvino vaFarisi vachakaungana pamwe chete, Jesu akavabvunza, ⁴²“Munofungei pamusoro paKristu? Mwanakomana waani?” Vakati kwaari, “WaDhavhidhi.”

⁴³Akavabvunza, “Zvino sei Dhavhidhi, noMweya Mutsvene, achimuti Ishe, achiti,

⁴⁴‘Baba vedu vakati kuna Ishe wangu, “Gara kuruoko rwangu rworudyi, kusvikira ndaisa vavengi vako pasi petsoka dzako”’?

⁴⁵Kana zvino Dhavhidhi achiti Kristu Ishe, Kristu angava sei mwanakomana waDhavhidhi?”

⁴⁶Hakuna akakwanisa kumupindura shoko, uye kubvira pazuva iroro hakuna akatsunga kumubvunzazve chimwe chinhu.